මළගෙදර (වැල්වටාරම්)

” මේ කාළකණ්නියා කවදා මැරෙයිද දන්නෙ නෑ ” කියලා..

තෝලාගෙ මාමණ්ඩියා උදේට තේ බිව්වෙ නෑ , බිව්වෙ කසිප්පු.. බත් කන්නෙත් නෑ බැරිවෙලාවත් බත් කෑවත් කාලා ඉවරෙට වතුර වෙනුවට බීවෙ කසිප්පු. රෑටත් ඉතින් කසිප්පුම තමයි.. අන්තිම කාලෙ මිනිහා දොස්තරගෙන් ඉල්ලීමක් කොරලා තිබ්බා සේලයින් වෙනුවට ඒ බෝතලේට කසිප්පු දාන්ඩය කියලා.. මිනිහා මාස දාහතරක් විඳෙව්වා.. මිනිහට වඩා තෝලයි තෝලගෙ ගෑණියි විඳෙව්වා.. උදේ හවස ඉස්පිරිතාලෙ බඩ ගෑවා මාස හයක්ම එක දිගට.. ඉතිරි කාලෙ ගෙදර ඉඳගෙන මාමණ්ඩිගෙ තිත්ත පට්ට කුණුහරුප අහ අහ ඒ උන්දැගෙ මල මුත්තරා අහක් කොරලා පිරිසිදු කරනවට වඩා වැඩක් උන්ට තිබ්බෙම නෑ…!

මළගෙදර පැත්තට මම ගියේ තෝලාට සුභ පතලා සතුට සමරන්න කියලා..ඒත් තෝලා දොර උළුවස්ස ගාව හිටගෙන හිටියෙ මූණ එල්ලගෙන.. මම තෝලාට කොන්ගැටුලේසන්ස් කියලා කියන්ඩ හිතන් උගෙ උරහෙට අත තිව්වා විතරයි මූ වැළහින්න වායෙ අඬන්න පටන් ගත්තා කියාපංකො. මම පුල් අන්දෝස්..

” හනේ පූචා බලපන් මයෙ මාමා අපිව දාලා ගියා.. රන් ටිකට හිටි අපේ රත්තරන් බුදු මාමේ..ඇයි අපිව දාලා කළින්ම දිවිය ලෝකෙට ගියෙ…! “

තෝලාගෙ එකම විලාපයයි..මිනිපෙට්ටිය ගාවට දුවලා ගියාපු තෝලා කරවල කූරියෙක් වාගෙ හැකිළුණු මාමණ්ඩිගේ මිනියෙ කකුල් දෙක බදාගෙන අඬනවා..!

මට නම් අදහගන්නත් බෑ..!

• ඈ බං රැම්බට් තෝලාගෙ මාමා අවසන් කාලෙ හොඳට ඉඳලා තියෙන ගාණයි..! තෝලා අච්චරටම දුක් වෙන්නෙ..?

මොන පිස්සුද පූචො.. ඒකා අර හිටපු විදියටමයි උන්නෙ.. අන්තිම මොහොතෙ ඒකාට පිරිත් කියන්න ආපු හාංදුරුන්ගෙනුත් කසිප්පු ඉල්ලලා තිබුණා.. පිරිත් පැන් පොවද්දි කසිප්පු නෙමේය කියලා ඒකට අතින් ගහලා, තිත්ත කුණුහරුප කියාලා එතන හෙනම ජවුසමක් කොරලා තමාලු මළේ..

• එහෙනම් මාමණ්ඩියා මූට ලොකු දේපලක්වත් දීලද..?

ඒකාට මොන දේපලක්ද බං…! අන්තිම කාලෙ යට ඇඳුමත් වික්කාය කියන්නෙ කසිප්පු බොන්ට…

තෝලා එසේනම් මෙසේ හඬන්නෙ ඇයිද යන්න මට නම් තාමත් ප්‍රස්නයක්..! මළගෙදරට අලුතෙන් එන හැම මනුස්සයා ඉස්සරහම තෝලා අර හෑල්ල කියලා අඬලා අදාල නාඩගම කොරනවා..! ඒ අස්සේ තෝලාගෙ නැන්දම්මා සිරිනා තම අදරැති සුවාමි පුරුසයාගෙ වියෝව දරාගන්ට බැරිව එන එන මනුස්සයා ඉස්සරහ කලන්තෙ දාලා වැටෙනවා. බර කිලෝ එකසිය දහයක් ඉතර වෙච්චි සිරිනා එහෙම වැටෙන වැටෙන වාරයක් පාසා උන්දැව උස්සන්න හිටි පේර කෝට්ටක් වායෙ කෙඬැරි මැල්ටොත් මේන් එක පාරටම අඬන්න ගතිපි.. මැල්ටො කියන්නෙ මැරිච්චි තෝලාගෙ මාමණ්ඩිට කිසිම මිත්‍රත්වයක් ඥාතීත්වයක් නොතිබුණු එකෙක්.. එහෙව් එකේ ඌ මෙච්චර හූ තියාන අඬන්නෙ මක්කටදැයි මම තවත් හොල්මන්..

සේරෝම මැල්ටොන් වටකරගත්තෙ ඒ බෑගිරියාව එතරම්ම තාත්වික සහ වේදනාකාරි නිසා.. මළගෙදර පිරිසගෙ අවධානය සිරිනාගෙන් මැල්ටොට ගිය එක ගැන සිරිනාට දස කේන්තියක් ආවා.. ඒ කේන්තියට සිරිනා අසරණ මැල්ටොට මිනිපෙට්ටිය ළඟ තිවුණ බුලත් හෙප්පුවෙන් දමලා ගහපි.. බුලත් හෙප්පුව මැරිච්ච මාමාණ්ඩියාගෙ මූණෙ පතබෑවිච්චි.. බුලත් කොළ හතර අත.. මේ සීන්ස් එකට බයවුණ මෙල්ටො උගෙ එක අතක් අනික් අතෙන් බදාගෙන අඬාගෙනම දුවපි. ඌට හෙප්පුව වැදුනෙත් නැතිව උෟ අත බදාගෙන දිව්වෙ ඇයිදැයි මම නම් දන්නෙ නෑ…

සිරිනාට තම සුවාමි පුරුසයාගෙ වියෝව දරාගත නොහැකිව ඇය මානසිකව ඇද වැටී ඇතැයි සිතු බවලතියන් පිරිසක් උන්දැව කුදලාගෙන ගෙනියපි වෙදනා ගාවට… ඊටපස්සෙ මක් වුනාද මම දන්නෙ නෑ..!

මාමණ්ඩිගෙ සුන්දර මුහුණට හෙප්පුව වැදී මූණ තැලුනායි දුක් වෙන තෝලා කලින් ඇඬියාව දෙගුණ කරපි..! ” අනේ අර මලක් වගෙ මූණට ඒ මොකක්ද කොරාපු අපරාධෙ..! අනේ මාමේ..! “

මක් කිව්වා.. මලක් වගෙ.. යකෝ එච්චර කැත මල් නම් මම ඩිස්කවරියේවත් දැකලා නෑ ඕන්.. අනේ සංසාරේ..! මට නම් මේක මහ විකාරයක්.. එදා හවහ ගෙදර යන ගමන් මම මෙල්ටොව බලන්ඩ ගියෙ ඌට ඇත්තටම මොකක්ද වුණේ දැනගන්න.. ඒ යද්දිත් ඌ අතේ පත්තු බැඳගෙන.. අතපත්තු වගෙ උන්නෙ.!

• අනේ බං පූචා , අර උලමි ගොන් වැස්සියක් වායෙ කලාන්ත වෙවි මයෙ ඇඟටම බරවෙලා අන්තිමට මගෙ අත උරහෙන් කටස් ගාලා පැන්නා කියාංකො.. ඒ වේදනාවට මම ලතෝනි තිව්වෙ..

සංසාරම්.. දැන් ඉතින් රෑටත් මළකඳෙ තනිරකින්නට ගම්මු එක්ක යන්ට ඕනෑ නේද කියලා හිතද්දිත් අප්පිරියාවක් ආවත් යන්ඩත් එපැයි..

රෑ කාලෙ නම් සෙනඟ ටිකක් වැඩිපුර උන්නා.. සමහර වයසක බවලතියො ඉනෙ මූණෙ කටේ අත් තියාන හරියට විස්සෝප වෙනවා තෝලාගෙ මාමණ්ඩි ගැන. ඒ වෙද්දි මදි පාඩුවට තෝලාගෙ බිරින්දෑත් ඇවිදින් හිටියා. උන්දෑ පහුගිය දොහේ උන්දැයෙ නගාගෙ දරු ප්‍රසූතිය වෙනුවෙන් ගම් ගොහින් හිටියෙ..

” මයෙ බුදු රත්තරන් මැණික් මුතු තාත්තෙ…! අනේ එක දවසකටවත් උඹ කියලවත් නොකියපු රත්තරන් තාත්තෙ..! ගහක් ගලක් වයෙ හිටි ඔයා මෙහෙම යද්දි කෝමද අප්පෙ අපි දරාගන්නෙ.. මේ අහස පොළවත් කම්පා වෙලා යනවනෙ දෙයියනෙ මේ අපරාධයට හයියො..! තාත්තෙ මම තෝලාට බැන්නා තාත්තෙ.. මට සමාවෙන්න ඔයාගෙ බෑනාට බැන්නට.. එයා රුපියල් ලක්ෂයක පෙට්ටියක ඔයාව දාලා ඔයාට ඇයි එතරම් අවනම්බුවක් කරේ කියලයි මම බැන්නෙ තාත්තෙ..! මට සමාවෙන්න රත්තරන් තාත්තෙ..! “

අම්මපා මම වැරදි මළගෙදරකට ඇවිත්ද කියලා හරියකටම දැනගන්ඩ මිනිය ගාවට විසි පාරක්වත් ගියා.. මට ඒ තරම් හැකැයි මේ මළගෙදර ගැන.. යකෝ තෝලාගෙ ගෑණි මම දන්න විදිහට මිනිහට එක පාරක් හිරමනයකිනුත් කෙලලා තිවුණා.. අනික මල්සාලා මහත්තුරු එක්කම තෝලෙ එක්ක පිළිකන්නට ගියපු මේ යෝධි කාටත් නෑහෙන්න තෝලෙට අර ඇත්තො ඉස්සරහම බැන්නලු රුපියල් තිස්දාහේ පැකේජ් එක ගත්තනම් තෝම ගෙවපන් කියලා. මල්සාලා මහත්තුරු ඒත් කියලා තිවුණා තිස්දාහට අඩු පැකේජ් නම් නෑ, ඒ නිසා තෝලෙට බයින්ඩ එපා කියලත්.. ඕක මට කීවෙ රැන්චා.. පොර මුත්තරා කරන්ඩ පිලිකන්නට ගිය වෙලේ තමා ඔය දෙබස ඇහිලා තිවුණෙ.. ඉතින් ඇත්තටම මම තෝලාගෙ මාමණ්ඩිගෙ මළගෙදරමද ඉන්නෙ කියලා මට තාමත් හරිම ගැටළුවක්.

ඕන් ඉතින් රෑ දහයට විතර කුස්සිය පැත්තෙන් පොඩි ආරෝවක් ඇහුණ හන්දා මම ඩිංගක් ඒ පැත්තට ඔළුව දැම්මා. හම්මටසිරි තෝලායෙ ගෑණි ආරූඪ වෙලා වායෙ වෙලේ ගෙදර සාන්තට බයිනවා මහාමේරු පරුවතෙ පැලෙන සද්දෙන්.. යකෝ මළානික වෙලා බාගෙට මැරිලා විස්සෝපෙන් හිටි මේ ගෑණිට මේ මක් වුණාදැයි හිතාගන්න බැරිව ෆුල් හොල්මන් වෙලා මම සාන්තවත් කුදලන් එතැනින් පැත්තකට ආවා..

• මක්කද බං වුනෙ..?

මම දෙවනි පාරටත් මාරි බිස්කට් දෙකක් ගත්තා කියලා බං ඔය.. ඉදකිං.. අම්මපා මම මගෙ දිව හපන් මැරෙනවා.. චැහ්.!

ඔය අව්අස්සෙ සිරිනා කාමරයකට වෙලා ගණන් හදනවා.. ඒ දවස් දෙකට මළගෙදරට හම්බුණ බිස්කට් සීනි ප්‍රමාණය හෙම හරියටම ගණන් තියලා ඒ කාමරය ඉබ්බො දෙන්නෙක් දාලා ලොක් කරලා යතුර ඉනෙ ගහගෙන බූරු ඇඳක් යට තිවුණ කාලෙ බෝතලයකින් උගුරක් බීලා මේ යෝධි ආපහු යනවා මිනිපෙට්ටිය ගාවට.. එතකොටම එහා ගමේ සිරිමල් ආවා.. සිරිනා සුපුරුදු පරිදි එක්දහස් අසූ අටවෙනි පාරටත් කලන්තෙ දැම්මා. දැන් සිරිනා කලාන්ත වුණාම අල්ලන්න එකෙක්වත් යන්නෙ නෑ. ඒ තරමටම දැන් ඒක හැමෝටම සාමාන්‍ය දර්සනයක් වෙලා. ඉතින් සිරිනාම කලන්තෙ දාලා සිරිනාම නැගිටිනවා..

මිනිය වළලන දවසෙ සිරිනාට කලන්තෙ වෙලාම ඉන්ඩ වුණා එක දිගට. මොකද එදා තමයි ගමෙන් හතරෙන් එකක්ම මළ ගෙදර ආවෙ… ස්වාමීන් වහන්සේලා වැඩම කරන්ඩ කලියෙන් පෙට්ටිය වහද්දි තෝලයි , ගෑණියි , සිරිනායි එක යුද්ධයයි පෙට්ටිය වහන්ඩ එපා කියාලා හිටං.

” අනේ තාත්තගෙ හුස්ම හිරවෙයි.. වහන්ඩ එපා..” කියලා අඬනවා , වැටෙනවා , පපුවට ගහගන්නවා , හූ තියනවා , බල්ටි ගහනවා , කැරකිලා වැටෙනවා , උඩ පැනලා බිම වැටෙනවා මලම කරුමයක්… අන්තිමට මල් සාලාවෙ එවුන් පැත්තකට වුණා තොපි ඕනි එකක්ය කියලා.. එතකොටම තුන්දෙනා ඕන් ටිකක් නිස්සද්දව පැත්තකට වුණා.

ස්වාමින් වහන්සේලා වැඩම කරා.. එහා ගමට එහා ගමට එහා ගමටත් එහා ගමේ එහා ගමේම එහා ගමේ ළඟම ගමේ හාමුදුරුවෝ තමයි වැඩම කරවන්ට උනෙ. මොකද අහල ගම් හතම දන්නවා මැරුණු උන්දැයෙ කැරැට්ටුව.. බෑනෙ කොරන්ට..

” ඉතින් මේ මියගිය උපාසක මහත්තයා ඉතාම හොඳ කල්කිරියාවෙන් තම දූ දරුවො බිරින්දෑ එක්ක හරිම සාමාකාමි දිවිපෙවතක් ගත කොරලාාා.. “

ඒ ටික කියද්දි නම් ගමේ ඈයොන්ට කැස්සකුත් ආවා.. සිරිනා හරියට දේව්දාස් එකේ අයිස්වර්යා රායි සාරුක් ඛාන් නැති සොවින් ඉන්න මූඩ් එක වගෙ මාර අමුතු තාලෙට මූණ හදාගෙන එක අතක් ඔළුවෙ ගහගෙන සාරි පොට කටේ දාගෙන වම් පැත්තෙ හක්කෙ දතකින් සාරි පොට විකාගෙන හුස්ම උඩට ඇද ඇද ඉන්නවා , තෝලේ නිකම් පොළියට දීපු සල්ලි ගන්න බැරිව හැමදාම ගමටම දෙස් දෙවොල් තියලා හෙම්බත් වෙලා අත් දෙකම ඔළුවෙ ගහගෙන බිම වාඩිවෙලා ඉන්න කෑරල පොළි මුදලාලියාගෙ ඇක්සොන් එකෙන්මයි ඉන්නෙ..

තෝලෙගෙ නෝනා හිටියෙ කසාද පෝරුවෙ ඉද්දි මිනිහා පැනලා ගිය ගාණට..

” …. ඉතින් අපේ මේ මියගිය උපාසක මහත්තයාට නිර්වාණ සුවයම අත්වේවා…” කියලා හාංදුරුවෝ පරාර්තනා කොරද්දිම සිරිනාගෙ පරණ ලව් එකක්ව හිටි දංගෙදර පාටිසුයියා මළගෙදරට සැපත් වෙච්චි.. පරණ පෙම දුටු සිරිනාට අහස පොළව , උඩ බිම සේරම මාරු වුණා. ගෑණි එකපාටරම ” එපාා අනේ එපා” කියලා බිම පෙරලිලා සුපුරුදු රංගනය පටන් ගතිපි.

මළගෙදර උනුයි හාංදුරුවෝයි හොඳටම අන්දුස් වුණා. ” යකො නිර්වාණය අත්වේවා කීවම එපා කියලා අඬන්න මේකිට අමු කැවිලැදැයි ” ජොසපිනා ආච්චි මගෙන් අහපි…!

කෝමහරි ස්වාමීන් වහන්සේලා මළ ගෙදරින් පන්සල බලා වැඩම කොරාට පස්සෙ පෙට්ටිය උස්සන්ට මල්සාලා මහත්තුරු ලැහැත්ති වුණා ඉතරයි මේන් සිරිනාට ආවේස වෙලා වායෙ පපුවට ගහගෙන හැට්ටෙ ඇදලා ඉරාගෙන කොණ්ඩෙ කඩාගෙන අමුතුම නාටකයකට පිවිසුණා. තෝලා පෙට්ටියට කරගහගෙන අමාරුවෙන් ඉක්කාවක් මතු කරගෙන ඉකි ගසමින් ගල් ගැසී විකල්ව ගිය මාරාන්තික දුක්ඛිත වේදනාකාරි ඉරියව්වෙන්ම කනත්තට වෙනකම් ගියා.. පෙට්ටියෙ බරට තමා ඇත්තටම මුගෙ මූණ නම් බෙරිවෙලා තිවුණෙ. තෝලාගෙ ගෑණි බුදු තාත්තෙ ගීතය ගයමින් ගියෙ හතර දෙනෙක්ගෙ වාරුවෙන්..

සිරිනාව මෙල්ල කරගන්ට නම් සෑහෙන ගේමක් දෙන්ට වුනා.. කිරිත්තා මාමාගෙ කනෙ පාරකට තමා සිරිනාගෙ විගඩම් නැවතුනෙ.. දැන් සිරිනා උතුර දිසාව බලාගෙන අැහිපිය නොගසා දහ දෙනෙක්ගෙ වාරුවෙන් මාර සෝකෙන් කනත්තට යනවා..

වල ගාව තමා ඊළඟ විගඩම . මම හිතුවෙම සිරිනා මළකඳෙ කට හපයි කියලා. ඒ තරම්ම මළකඳට ළංවෙලා පිස්සු කෙළිනවා.. පරණ පෙමට පේන්න ඉතින් දාන්න ඕනි ජවුසං සේරම දානවා. තෝලා වලට පයින්ඩම යනවා.. කෙළ හොටු සෙම පෙරාගන අඬනවා.. මිනිහා වලට පනියි කියන බයට රැන්චායි , ජසයයි , පැන්ටායි , ඩපයයි මාර ගේමක් දීලා තෝලාව අල්ලගෙන හිටියෙ..තෝලා උන්ගෙ අත් ගසලා , අත් විකලා , කෑගහලා වලට පයින්ඩමයි ලැහැත්තිය.. ඔය අස්සෙ එකපාරටම ඩපයට පඩයක් ගිහින් තෝලයව අතැරුනා.. රැන්චායි , ජසයයි පඩේ ගඳට නහය වහගන්න අත් අතෑරියා.. ! මේ අනපේක්ෂිත අතැරීමෙන් කෙලා හුටා කියලා තෝලයව වලට වැටුණා කියකො… ! ඇයි ඉතින් පොර හිටියෙ වලට පයින්ඩ බලාගෙන අංසක 160 ක් විතර වලට ආනතව නෙවැ.. වලට වැටුණු තෝලෙ ජසයටයි , රැන්චටයි , පැන්ටටයි , ඩපයටයි පලු යන්නම තිත්ත කුණුහරුප වලින් බයින්ඩ ගතිපි.

” බොගෙ අම්මලාට හැම…… කාලකණ්නි හැත්ත මාව ගොඩට ගනින් යකො බුදාම්මෝ ” ගාගෙන මූ හතරට කැඩිච්චි පණුවා වාගෙ දඟලනවා , කෑගහනවා , මිනිහට බයට දාඩිය දාලා හෝ ගාලා මදාවට දැන් ඇත්තටම අැඬෙනවාත් එක්ක… ගමේ ඈයොයි මල් සාලා මහත්තුරුයි මූව ගොඩට අදිනවා.. මූ දඟලන දැඟලිල්ලට උන්ගෙ අතින් මේකාව ආයෙ වලටම අතෑරුණා.. පෙට්ටියට උඩට වැටුණු තෝලෙ පෙට්ටි පියන කඩාගෙන ඒකෙ හිරවෙච්චි.. ඒක දැකපු රින්සි ආච්චි මගෙන් අහනවා

” යකෝ රුපියල් ලස්සෙට තියෙන පෙට්ටි මෙතරම් බාල ලෑලි වලින්ද හදන්නෙ ” කියලා .. ” අම්මපා මේ මල්සාලා කාරයින්ට හෙන ගහන්ට ඕනි” ය කියලා දෙසුත් තියනවා .. ඒ අස්සෙ තෝලෙ ගම් හතක් දෙවනත් වෙන්න කෑගහනවා.. ටික වෙලාවකින් මිනිහගෙ හඬත් නැවතුනා. ගම්මු යමරෙට කලබල වෙලා.. ! ” බුදාම්මෝ අර කාලකණ්නියා පෙට්ටියෙන් නැගිටලා එනවෝ කියාගෙන සිරිනායි තෝලෙගෙ ගෑණියි රෙදි කරේ තියන් දුවනවා දැකලා තිවුනෙ ජොසපින් ආච්චි..”

තෝලයව වලෙන් උඩට ගද්දි ඌට කලන්තෙ වෙලා මළ මුත්තරාත් පිටවෙලා තිවුනෙ… තෝලෙව උඩට ගත්ත ගමන් මල්සාලා මහත්තුරු දඩ බඩ ගාලා වලට පස් දාලා වල වැහුවා..! තෝලයව හෝදලා තෙල් මතුරලා නූල් බඳින්ඩ කියලා පන්සලට ඒකාව එක්කරගෙන ගියපු සෙටාර් එක ඒ වැඩ අහවර කොරලා මල බත කන්ඩය කියලා අරූවත් වාත්තු කොරාන ගෙදට්ට ආවා ඉතරයි සිරිනා තෝලයට කන පැලෙන්ඩ ගහපි..

අපි සේරෝම ආපහු අන්දුස්.. !

“තෝ මයෙ මිනිහව පස් වලට යට කරලා ආවෙ කෝමද යකො.. ? මයෙ රන්කඳව මට ආපහු ගෙනත් දියෝ ” කියලා සිරිනා ආපහුත් රංගනය පටන් ගත්තා..

මිනිවලෙ වැටිලා රෙවිලා හිටි තෝලෙට ඒ වැදුනු කම්මුල් පාරට දෙලොව රත්වෙලා තරු විසි වෙලා ආයෙ රෙවුනා..

මේ ඉවරයක් නැති කරුම නාඩගම බලා ඉන්ඩම බැරි තැන මම එතැනින් ආවා බොලව්..

මීට

පච පූචා.

උපුටා ගැනීම: පූර්ණිමා චාරුණී බණ්ඩාර