ලෝකේ හැම මිනිහෙක්ම උපත ලබන්නේ විශාල පාපයක් එක්ක. ඉතිං අපේ මේ පවු ගෙවා දැමීමට උපකාර කරන්න දෙවියන් වහන්සේට වුවමනා වුණා. අන්න ඒ නිසා තමයි උන්වහන්සේ ස්වකීය පුත්‍රයා, ඒ කියන්නේ ජේසුස් ක්‍රිස්තුස් වහන්සේව පුද්ගල වේශයකින් මේ ලෝකෙට එවන්නේ.
බයිබලයේ අන්තර්ගත වන ක්‍රිස්තියානි අර්ථ දැක්වීම්වලට අනුව ජේසුස් වහන්සේගේ ඉගැන්වීම්වල තේමාව වුණේ පශ්චාත්තාපය, කොන්දේසි විරහිත ආදරය, පවුවලට සමාව දීම, කරුණාව සහ දෙවියන්ගේ රාජධානියට පැමිණීමයි.
ඉතින් දෙවියන් වහන්සේගේ පුත්‍රයා, ජේසුස් වහන්සේ කල්වාරි කන්ද මුදුණෙදි කුරුසියක් මත අවසන් ගමන් ගියේ අපේ පවුවලට සමාව දීමේ අරමුණ ඇතිව. ඒකේ තේරුම දෙවියන් වහන්සේගේ පුත්‍රයා, අපේ පවුවලට වන්දි ගෙවන්න එයාගේ ජීවිතේ පූජා කළා.
මම කිතු දහම අවබෝධ කරගෙන ඉන්නේ ඒ විදිහට. එදා ජේසුස් වහන්සේව කුරුසියේ තියලා ඇණ ගැහුවේ වගේම උන් වහන්සේ කල්වාරි කන්ද මතදි, අපේ පවුවලට වන්දි ගෙවන්න ජීවිතයෙන් සමුගත්තෙත් සිකුරාදා දිනයක. හරියටම කිව්වොත් මහ සිකුරාදා. ජේසුස් වහන්සේ උන්වහන්සේගේ මරණයෙන් හරියටම දින 3 කට පස්සේ, ඒ කියන්නේ ඉරිදා දිනයේදී මළවුන්ගෙන් නැගිට්ටා. හරියටම කිව්වොත් උට්ඨාන වුණා. පාස්කු ඉරිදා දිනය ක්‍රිස්තු භක්තිකයන්ට වැදගත් වෙන්නේ ඒ නිසා.
මීට අවුරුදු දෙකකට කලින් යෙදිලා තිබුණු මහා සිකුරාදා දිනයක ලංකාවේ කිතුණුවෝ දේවස්ථානවලට ගියේ දෙවියන් වහන්සේගේ පුත්‍රයා, ජේසුස් වහන්සේ සමස්ථ ලෝ වැසියාගෙම පවු වෙනුවෙන් කල්වාරි කන්දේ කුරුසයක් මතදී ජීවිතය පූජා කරපු මහා සිකුරාදා දිනය සමරන්න.
ඊට දවස් තුනකට පස්සේ, පාස්කු ඉරිදා දිනයේ ආයිමත් සැරයක් ඒ අය පල්ලි ගියේ ජේසුස් වහන්සේගේ උටාඨානය සමරන්න. ඒත් එදා පල්ලි ගියපු අයගෙන් 400 කට කිට්ටු අහිංකයෝ පිරිසකට ආපහු ගෙදර යන්න අවස්ථාව ලැබුණේ නැහැ. තම ශාස්තෘවරයා මළවුන්ගෙන් නැගිටපු දවසේ, පල්ලියක් ඇතුළෙදිම ශරීරය කෑලි කෑලිවලට කැඩිලා අවසන් ගමන් යන්න ඒ අයට සිද්ධ වුණා.
ජේසුස් වහන්සේ උන්වහන්සේගේ මරණයෙන් හරියටම දින තුනකට පස්සේ මළවුන්ගෙන් නැගිට්ටත් පාස්කු ඉරිදා දවසේ දේවස්ථානයේ අල්තාරය මත තමන් නොකරපු සහ නොදන්නා වරදකට ජීවිතය පූජා කරපු අර අහිංසකයෝ 400 දෙනා කිසිම දවසක මළවුන්ගෙන් නැගිට්ටේ නැහැ.
එදා අල්තාරය උඩ මියගිය අයගේ අම්මලා, තාත්තාලා, දරුවෝ නෑදෑයෝ යාලු මිත්‍රයෝ අදටත් බලන් ඉන්නවා තම ආදරණීයයන් මරණයෙන් නැගිටලා තමන් ළඟට එයි කියලා. අවුරුදු දෙකක් ගෙවිලා ගියත් තම ආදරණීයයන්ගේ මතකය ඔවුන් අමතක කරලා නැහැ. ඒ දුක්බර මතකය ඒ අයගේ හිතේ හැමදාම තියේවි.
මේ අහිංසකයන්ගේ මතකය විකුණන තවත් කට්ටියක් ඉන්නවා. ඒ තමයි දේශපාලකයෝ සහ ඒ අයගේ අනුගාමිකයෝ. අභිරහස් දේශපාලන න්‍යාය පත්‍රයක කෲර ප්‍රතිඵලයකට අනුව අවසන් ගමන් ගිය මේ අහිංසකයෝ 400 දෙනා පහුගිය ජනාධිපතිවරණයේදී වගේම, මහ මැතිවරණයේදිත් හරි හරි විකිනුණා. මේ අහිංසකයෝ 400 දෙනා නිසා එක් පිරිසකට බලය නැතිවුණා වගේම, තවත් පිරිසකට අති විශාල බලයක් ලැබුණා.
ඒත් අවුරුදු 2 ක් ගත වෙලා ගියත් මේ අහිංසකයන්ගේ මරණවලට තවමත් සාධාරණයක් ඉෂ්ඨ වෙලා නැහැ. බලය නැති වුණු අයට වගේම, බලය ගත්තු අයටත් මේ මරණ 400 ගැන දැන් මතක නැහැ. ඒත් ඒ අයගේ ආදරණීයයෝ තවමත් තම මියගිය දුව,පුතා, අම්මා තාත්තා මළවුන්ගෙන් නැගිටලා ගෙදර ඒවි කියලා බලන් ඉන්නවා.
සහරාන් ප්‍රමුඛ ස්වයං ඝාතකයෝ මේ අහිංසකයන්ව මැරුවේ එක පාරයි. ඒත් මේ අමන දේශාපාලකයෝ ඒ අහිංසකයන්ව නැවත නැවත මරලා දානවා. ඒ අයගේ මළ මිනී පෙන්න පෙන්න වාසි ගන්නවා. එහෙම බැලුවාම උන් සහරාන්ලට වඩා ම්ලේච්ඡයි.
පාස්කු බෝම්බ ප්‍රහාරයෙන් අවුරුදු දෙකකට පස්සේ කියන්න තියෙන්නේ මෙච්චරයි. දැන්වත් ඒ මිනිස්සුන්ට තමන්ගේ අවසන් නින්දේ සමාදානයේ සැතපෙන්න ඉඩ දෙන්න. දෙවියන් වහන්සේ උන් වහන්සේගේ රාජධානිය තුළ අනිවාර්යයෙන්ම ඒ අයට ඉඩක් තියයි.
මේ මරණ 400 ට වගකිව යුතු නියම ම්ලේච්ඡයෝ කවදාවත් එළිවෙන්නේ නැහැ… ඡන්ද කාලෙට මළ මිනී ගොඩ අරන්, ජීවිත් වෙලා ඉන්න අයගේ හිත්වලට තවත් දුක් දෙන්න එපා…
මතෙව් 27:50-53
“යේසුස් නැවතත් මහත් හඬින් කෑ ගැසූ විට, ඔහු තම ආත්මය අතහැරියේය. ඒ අවස්ථාවේදී දේව මාළිගාවේ තිරය ඉහළ සිට පහළට ඉරී ගියේය. පෘථිවිය දෙදරුම් කෑවේය. සොහොන් ගෙවල් බිඳී ගොස් මිය ගිය බොහෝ ශුද්ධ වූ මිනිස් සිරුරු ජීවත් වේ. ඔවුන් සොහොන් ගෙයින් පිටතට පැමිණ, යේසුස්ගේ නැවත නැගීටීමෙන් පසුව ඔවුහු ශද්ධ නුවරට ගොස් බොහෝ ජනයාට දර්ශනය වූහ…”
– අනිල් කරුණාරත්න –