ජනාධිපති ගෝඨාභය රාජපක්ෂ මහතාගේ, ජනාධිපතිවරණ ප්‍රතිපත්ති ප්‍රකාශය වන ‘සෞභාග්‍යයේ දැක්ම’ හුදු ප්‍රතිපත්ති ප්‍රකාශය පමණක්ම නොවී යථාර්ථයක් බවට මේ වන විට පත් වෙමින් තිබේ.
ඒ අනුව එහි සඳහන් දේශිය නිපුණතාවන්ට ප්‍රමුඛත්වය දීම වෙනුවෙන් වූ ප්‍රතිපත්තිය හුදු ප්‍රතිපත්තියකටම පමණක් සීමා නොකර 2020 ජුලි මස 1 වැනි දින ගන්නා ලද කැබිනට් තීරණයට අනුව මෝටර් රථ ප්‍රවාහන දෙපාර්තමේන්තුවේ ශ්‍රී ලංකා රියැදුරු බලපත් මුද්‍රණය කිරීමේ ක්‍රියාවලිය 2021 ජනවාරි මස 1 වැනි දින සිට ශ්‍රී ලංකා යුද හමුදාව වෙත පවරා දුන්නේ එතෙක් එම ක්‍රියාවලියේ පැවැති යම් යම් දෝෂයන්ට පිළියම් වශයෙනි.
මෙරට රියැදුරු බලපත්‍ර නිකුත් කිරීමේ ක්‍රියාවලියේ පැවැති ආකාර්යක්ෂමතාවන් සහ විෂමාචාරයන් පිළිබඳ පසුගිය සමය පුරා ජනතාවගෙන් චෝදනා එල්ල වූ අතර ජනාධිපති ගෝඨාභය රාජපක්ෂ මහතා එම දෙපාර්තමේන්තුවේ නිරීක්ෂණ චාරිකාවකටද එක් වූයේය. ශ්‍රී ලංකා ජාතික රියැදුරු බලපත්‍ර නිකුත් කිරීමේ ක්‍රියාවලියේ පවතින අකාර්යක්ෂමතාවන් හා විශමාචාරයන් මගහරවා ශ්‍රී ලාංකීය මහජනතාවට කාර්යක්ෂම හා ඵලදායි ජනහිතවාදී වන අකාරයෙන් ශ්‍රී ලංකා රියැදුරු බලපත්‍ර ලබාදීම මෙම ව්‍යාපෘතියේ ප්‍රධාන අරමුණ විය.
මෙම ජාතික රියැදුරු බලපත්‍ර නිකුත් කිරීමේ ක්‍රියාවලිය ව්‍යාපෘතියක් ලෙස යුද්ධ හමුදා වෙතින් භාර ගැනීමට අදාළ ශ්‍රී ලංකා යුද්ධ හමුදාව හා මෝටර් රථ ප්‍රවාහන දෙපාර්තමේන්තුව අතර වන අවබෝධතා ගිවිසුම ආරක්ෂක මාණ්ඩලික ප්‍රධානී සහ යුද්ධ හමුදාපති ජෙනරාල් ශවේන්ද්‍ර සිල්වා සහ මෝටර් රථ ප්‍රවාහන දෙපාර්තමේන්තුව ප්‍රධානී මෝටර් රථ ප්‍රවාහන කොමසාරිස් ෙජනරාල්වරයා අත්සන් කරන ලදී.
උක්ත අරමුණ සාක්ෂාත් කර ගනිමින් මෙම ව්‍යාපෘතිය ඉදිරියට පවත්වාගෙන යෑම සඳහා යද හමුදාපති ජෙනරාල් ශවේන්ද්‍ර සිල්වා මහතාගේ උපදෙස් මත, ශ්‍රී ලංකා යුද හමුදාව යුද්ධ හමුදා තොරතුරු තාක්ෂණ විසඳුම් මධ්‍යස්ථානය (Army Information Technology Solutions Center (AITSC)) වේරහැර පිහිටි මෝටර් රථ ප්‍රවාහන දෙපාර්තමේන්තුවේ රියැදුරු බලපත් නිකුත් කිරීමේ කාර්යාල පරිශ්‍රයේ සිය මෙහෙයුම් ආරම්භ කරන ලදී.
මෝටර් රථ ප්‍රවාහන දෙපාර්තමේන්තුවේ නිලධාරීන් අනුමත කරනු ලබන රියැදුරු බලපත් අයැදුම්පත් අනුව රියැදුරු බලපත්‍ර මුද්‍රණය කිරීම සහ ඒ සඳහා වන සංයුක්ත පරිගණක පද්ධතියේ තොරතුරු තාක්ෂණ යටිතල පහසුකම් පවත්වාගෙන යෑම සහ නඩත්තුව මෙම යුද්ධ හමුදා තොරතුරු විසඳුම් මධ්‍යස්ථානය මඟින් සිදු කරනු ලැබේ.
ජාලගත මෙම සංයුක්ත පරිගණක පද්ධතිය වෙත දිස්ත්‍රික්ක 24ක රියදුරු බලපත් කාර්යාල වෙතින් ලැබෙන අතර තොරතුරු ඇතුළත් කරනු ලබන අතර ඉන් දිස්ත්‍රික්ක 9ක පද්ධතියට අන්තර්ජාලය (Online) ඔස්සේ සම්බන්ධ වේ. මීට පෙර අනකුත් මධ්‍යස්ථානවලින් ලැබෙන අයැදුම්පත්‍රවලට අදාළ රියැදුරු බලපත්‍ර මුද්‍රණය කිරීම සඳහා මසක පමණ කාලයක් ගත වී ඇති අතර ඒ සඳහා මේ වන විට යුද හමුදාවට ගත වන්නේ සති දෙකක පමණ කාලයකි.
දශක එකහමාරකට අධික කාලයක් පෞද්ගලික අංශයේ ආයතනයක් හා තවත් විදේශීය ආයතනයක් සමඟ එක්ව පිහිටුවා තිබු සමාගමක් මඟින් සිදු කරන ලද මෙම සේවාව ශ්‍රී ලංකා යුද හමුදාව සිදුකිරීම මඟින් ඒ සඳහා විදේශයකට ඇදියන විශාල මුදල් ප්‍රමාණයක් ඉතිරි කැර ගැනීමට හැකියාව ලැබෙන අතර ශ්‍රී ලාංකීය ආර්ථිකය වෙත යහපතක් ඇති කිරීමට ද ශ්‍රී ලාංකීක පුරවැසියන්ගේ අනන්‍යතාව සුරැකීමටද හැකි වනු ඇත.
එසේම මෙම ව්‍යාපෘතිය ශ්‍රී ලංකා යුද හමුදාව වෙතින් සිදු කිරීමේ දී මෙතෙක් එම ක්‍රියාවලිය පවත්වා ගෙන ගිය පෞද්ගලික සමාගමේ සේවය කරනු ලැබු සේවක සේවිකාවන් සියල්ලන්ගේ රැකියා සුරක්ෂිතතාවය වෙනුවෙන් ඔවුන්ව යුද හමුදා ස්වේච්ඡා බලසේනාව වෙත බඳවා ගැනීමට ක්‍රියා කරන ලද අතර, එහි දී ඒ සඳහා තම කැමැත්ත පළ කළ සේවක සේවිකාවන් 45 දෙනෙකු යුද හමුදා සෙබළ සෙබළියන් ලෙස ස්වේච්ඡා උපසේවයට අනුයුක්ත කර ගන්නා ලදී. එමඟින් ඔවුන්ගේ සේවා වියුක්තිය සඳහා පිළියම් ද ලැබිණි.
මෙම ආයතනය මේ වන විට රියැදුරු බලපත්‍ර ලබාදීමට අදාළ වාර්තා මිලියන 90ක් නඩත්තු කරනු ලබන අතර එහි දත්ත ගබඩා වේරහැර හා නාරාහේන්පිට ස්ථාපිත කැර ඇත. එසේම මීට පෙර පුද්ගලික අයාතනය රියැදුරු බලපත්‍ර මුද්‍රණය කිරීම වෙනුවෙන් රජය එම ආයතනයට එක් රියැදුරු බලපත්‍රයකට රුපියල් දහසක මුදලක් ගෙවන ලදී.
යුද්ධ හමුදාව මේ කටයුතු භාර ගැනී නිසා එම මුදල රජයට අහිමි නොවේ. එය වාර්ෂිකව ගත් විට අතිවිශාල මුදල් ප්‍රමාණයකි. රියැදුරු බලපත්‍ර මුද්‍රණය කිරීම යුද්ධ හමුදාව භාරගත්තේ 2021 ජනවාරි 1 වැනිදා සිටය. පසුගිය අප්‍රේල් 15 වැනි දා දක්වා යුද හමුදාව රියැදුරු බලපත්‍ර දෙලක්ෂ එක්දහස් අටසිය හැත්තෑවක් මුද්‍රණය කැර ඇත.
ඒ අනුව ගත වූ කාලයේ පමණක් රුපියල් විසි කෝටි දහ අට ලක්ෂ හැත්තෑ දහසකට ආසන්න මුදලක් රජයට ඉතිරි කැර දී ඇත. එය සුළුපටු මුදලක් නොවේ. අදාළ පෞද්ගලික සමාගම රියැදුරු බලපත්‍ර මුද්‍රණය කරන සමයේ මසකට රියැදුරු බලපත්‍ර හතලිස් දහසක පමණ ප්‍රමාණයක් මුද්‍රණය කැර තිබුණු අතර එම ප්‍රමාණය මේ වන විට මසකට හැටදහස දක්වා ඉහළ නැංවීමට යුද හමුදාවට හැකි වී ඇත. එසේ ම මේ වන විට රියැදුරු බලපත්‍ර ලබාදීමේ එක්දින සේවය ද ක්‍රියාත්මකය.
ඔවුන්ට සියැරියදුරු බලපත්‍රය මුද්‍රණය කිරීමෙන් පසු කෙටි පණිවිඩයක් මඟින් ඒ බැව් දැනුම්දීම ද සිදුවේ. එසේම වර්තාමනායේ භාවිතයට ගැනෙන චීපයක් සහිත රියැදුරු බලපත්‍රය වෙනුවට ඉදිරියේ දී කේතයක් සහිත රියැදුරු බලපත්‍රයක් හඳුන්වාදීමට නියමිතය. එමඟින් රියැදුරු බලපත්‍ර ආශිතව සිදු කරන ලබන අක්‍රමිකතා රැසක් වළක්වා ගැනීම අරමුණ වී ඇත. එසේම මේ වන විට රියැදුරු බලපත්‍ර මුද්‍රණය කිරීමට භාවිත කරන මෘදුකාංගය දකුණු අප්‍රිකානු සමාගමක් මඟින් නිෂ්පාදනය කළ එකක් වන අතර ඒ සඳහා වාර්ෂිකව අති විශාල මුදලක් වැය කිරීමට ද සිදුවේ. එම මුදල ද මෙරටේ ඉතිරි කර ගැනීම වෙනුවෙන් ඉදිරියේ දී ශ්‍රී ලංකා යුද හමුදාව මේ සඳහා උචිත මෘදුකාංගයක් සංවර්ධනය කිරීමට නියමිතය.
එය ක්‍රියාත්මක වුවහොත් තවත් අතිවිශාල මුදලක් රජයට ඉතිරි කර ගත හැකි වනු ඇත. ජනාධිපති ගෝඨාභය රාජපක්ෂ මහතාගේ දැක්මට අනුව එතුමන්ගේ ප්‍රතිපත්ති ක්‍රියාත්මක කරමින් ශ්‍රී ලංකා යුද හමුදාව ජාතිය ගොඩනැඟීමේ කටයුත්තේ දී සුවිශේෂි දායකත්වයක් ලබා දෙමින් සිටි. යුද හමුදාව ඇතුළු ත්‍රිවිධ හමුදාව බොහෝ අභියෝගයන් ජයග්‍රහණය කිරීම වෙනුවෙන් යෙදවීමේදී ඊට අකුල් හෙළමින් ඒවා නිර්දය ලෙස විවේචනය කැර ඇති පිරිස් වෙත පිළිතුරු ලැබෙන කාලය දැන් එළඹී ඇත.
ඒ පිළිතුරු ලැබෙන්නේ හුදෙක්ම එල්ල කළ චෝදනාවලට පමණක් නොව සංවර්ධනය වෙමින් පවතින රටක් යැයි දශක ගණනාවක් හඳුන්වන ශ්‍රී ලංකාව සංවර්ධනයේ හිණිපෙත්තටම රැගෙන යමිනි.
උපුටා ගැනීම: Lanka Telegraph
– දිලංක ගුණතිලක