“මේසන් බාස් කරන දේවල් මහලොකු දෙයක්ද?
අහවල් පදමට සිමෙන්ති අනල ගඩොල් බඳින එකක ඕන කෙනෙකුට කරන්න පුලුවන්..”
මෙහෙම හිතන කෙනෙකුට මට සරලවම කියන්න තියෙන්නෙ ඔබම උත්සාහ කරල බලන්න ගඩොල් කැට 10ක්වත් ඔබට තනියම හරියට බැඳගන්න පුලුවන්ද කියල?
ගොඩක් අයට බෑ..
හැම රස්සාවක්ම එහෙමයි..
පිටින් බලන කෙනාට ලේසියි වගේ පේනව..
කරන කෙනා තමයි දන්නෙ කොච්චර අමාරු කාර්‍යයක්ද කියල..
ගුරු වෘත්තිය
පොලිස් වෘත්තිය
බස් රියදුරු
වඩු බාස්
ව්‍යවසායකයො
මේසන් බාස්
මේ හැමෝම උපයන්නෙ සාධාරණව නම්
මේ හැමෝම උතුම්..
එකෙකුට වඩා එකෙකුවත් උසස්වත් පහත්වත් කියල නෑ..
මම දන්න විදියට රැකියාවක වැටුප හෝ වේතනය තීරණය වෙන්නෙ ප්‍රධාන නිර්ණායක තුනකට අනුලෝමව.
1.රැකියා වෙළඳපොළේ පවතින ඉල්ලුම
2.අධ්‍යාපනික සහ වෘත්තිය සුදුසුකම්
3.අවදානම
ගුරුවරුන්ගේ වැටුප අනිවාර්යයෙන්ම වැඩිවීමක් වෙන්න ඕන
වැටුප් විෂමතාත් අයින් කරන්න ඕන..කියන මතයෙ මම ඉන්නවා..
ඒ වගේම ආදරණීය මගේ ගුරුවරුත් හිතන විදිය වෙනස් වෙන්න ඕන කියන මතයෙ මම ඉන්නවා,
මොකද මේ කතාව කියවල මතුදවසක
ඔබේ
——————————————————————–
ශිෂ්‍යයෙක් කිව්වොත්
“ටීචර් මම කැටයම් ශිල්පියෙක් වෙනවා”
කියල
අපෝ මෙච්චර ඉගෙනගෙන්නෙ වඩුවෙක් වෙලා ගස්කප කප ඉන්නද කියල ඒ දරුවගෙ සිතුවිල්ල පහත් කරන්න එපා!
හොඳයිනෙ පුතේ..පුතාට හොඳට කලාව පුලුවන්නෙ..ඕන දෙයක් ඒ දේ ගැන හොඳට ඉගෙනගෙන කරන්න පුතේ..මම ඔයාට සුබපතනවා කියල ඒ දරුවව දිරිමත් කරන්න.
ශිෂ්‍යයෙක් කිව්වොත්
“ටීචර් මම අනාගතේ මගේම කියල දෙයක් පටංගන්නවා”
කියල
අපෝ තමන්ගෙ කියල දේවල් පටං අරං කාටද හරිගියේ..හොඳට ඉගෙනගෙන රජයෙ රැකියාවකට පැනගන්න..පෙන්ෂන් එක හරි තියෙනවනෙ ළමයො..කියල ඒ දරුවව අධෛර්යමත් කරන්න එපා.
ශෝක්නෙ පුතේ..ඒ කියන්නෙ ඔයත් අනිවාර්යයෙන්ම දවසක ලෝකෙම දන්න ලොකු ව්‍යාපාරිකයෙක් වෙයි..ටීචත් අනිවාර්යයෙන්ම පුතා සාර්ථක වෙන්න කියල ප්‍රාර්ථනා කරනවා කියල ඒ දරුවට ශක්තියක් දෙන්න.
“පිරිමි ළමයෙක් කොලුකමට කොණ්ඩෙ පොඩ්ඩක් උස්සන් ආවොත්”
ඒ දරුවගෙ කොන්ඩෙ කුට්ටි කුට්ටි කපල අනිත් දරුවො ඉස්සරහ පාච්චල් කරන්න එපා..ඒ දරුවා මානසිකව හිංසනය කරන්න එපා.
“ගවුම කොට ගෑනුලමයි හිටියොත්”
ඒ දරුවන්ගෙ ගවුම් වල පත්තර කෑලි අලවල අපහසුතාවයට පත්කරන්න එපා!
විශේෂයෙන්ම කිසිම දරුවෙක්ව මානසිකව හෝ ශාරීරිකව පීඩනයට ලක්කරන්න එපා..ඒවා ඉදිරියට බලපානවා
ගහල බැනලා පට්ටගහල හදන්න බැරි දරුවෙක්ව එක ආදරණීය ආමන්ත්‍රණයකින් ක්ෂණිකව වෙනස් කරන්න පුලුවන්..
————————————————————-
මෑතකදී සිදුවුණ ලස්සන නිදසුන් දෙකකින් කතාව අවසන් කරන්නම්..
“ළමයිට පෝං දෙන්න එපා..ළමයි නරක් වෙනව කියපු ගුරුවරුන්ටම
“කොහොමහරි කරල ළමයට පෝං එකක් අරං දෙන්න..ඉස්සරහට උගන්නන්නෙ පෝං එකෙං”
කියල කියන්නට සිදුවුණා..
“ඉගෙන ගත්තෙ නැත්තං උබලටත් වෙන්නෙ බදාම අනන්න”
“ඉගෙනගෙන වැදගත් රස්සාවක් කරපං”
කියපු ගුරුවරුන්ටම අද මේසන් බාස් මහත්මයෙකුගෙ වැටුප ගැන නාහෙන් අඬන්න සිදුවුණා..
—————————————
සමාජය තනන්නෙ ආදරණීය ගුරුවරු
ඔබ වපුරන දේ අනිවාර්යයෙන්ම ඔබටම පාරාවලල්ලක් වෙනවා!
ප.ලි.
*ලියපු කරුණු ඔක්කොම මට ලැබුනු අද්දැකීම්
*මම මගේ අදහස මට දැනුණ විදියට වචන හසුරවමින් ලිව්වා
*ඔබේ පිළිතුරුත් අදහසුත් ඔබට දැනෙන විදියට කමෙන්ට් කරන්න පුලුවන්
ඊ.ප.ලි.
*මට පීඩනයක් දුන් ගුරුවරුන්ගෙන් මා ගනන් නොගැනීම “neglection” උගත්තෙමි
*මට අම්ම කෙනෙක් වුන තාත්තා කෙනෙක් වුන අක්කා කෙනෙක් වුන අයියා කෙනෙක් වුන ගුරුවරුන්ගෙන් මා ජීවිතය උගත්තෙමි.
උපුටා ගැනීම: Heshan Dissanayake