මයිකල් ජැක්සන් සමග නර්තනයේ යෙදුන ශ්‍රී ලාංකික යුවතිය! (වැල්වටාරම්)

1991 වර්ෂයේදී මයිකල් ජැක්සන් විසින් ගායනා කරපු Black or White ගීතයේ ඔහුත් සමග නර්තනයේ යෙදෙමින් ගීතයේ රූපරාමුවට දායක වෙන මෙම යුවතිය නමින් යමුනා සන්ගාරසිවම් (Yamuna Sangarasivam). යමුනා මේ කාලයේ රැඳී සිටියේ ඇමරිකා එක්සත් ජනපදයේ තමන්ගේ උපාධිය සම්පූර්ණ කරමිනුයි. ඒ සංස්කෘතිය සහ මානව විද්‍යාව සම්බන්ධයෙනුයි. මේ කාලයේ සිටම ඇය මයිකල් ජැක්සන් ගේ තදබල රසිකයෙක් ලෙසට කටයුතු කල බවත් සඳහන් වනවා.

කොහොම වුනත් Black or White ගීතය රූපගත කරන්නට පෙර මයිකල් ජැක්සන් විසින් මෙම ගීතය සඳහා නර්තනයෙන් දායක වීමට කැමති සාම්ප්‍රදායික හෝ නූතන ආකාරයේ ඕනෑම නර්තන ශිල්පියෙක්ට අවස්ථාව ඇති බව පවසා ඒ සඳහා සම්මුඛ පරීක්ෂණයක් සූදානම් කරනවා. අවසානයේ 3000ක් පමණ දෙනා අතුරින් ඇය මේ සඳහා තේරී පත්වනවා. ඒ ඇයගේ සාම්ප්‍රදායික නර්තනය වන Odissi නර්තනයත් සමගයි.

ගීතයේ 3:27 සිට 3:47 කාලය දක්වා තත්පර 20 ක පමණ කාලයක් යමුනා ජැක්සන් සමග නර්තනයේ යෙදෙනවා. මෙම ගීතයේදී විවිධාකාර නර්තන සමග ජැක්සන් වසර ගණනාවක් පුරා පවතින වර්ණභේදවාදයට කතා කරනවා. ඒ වගේම විවිධ සංස්කෘතික සහ විවිධ ජන කොට්ටාසයනුත් මේ වීඩියෝවට අදාල වනවා. ඉහත කී තත්පර 20 ක කාලය සඳහා පැය 12 ක පමණ කාලයක් ජැක්සන් සමග ලොස් ඇන්ජලීස් හී අධිවේගී මාර්ගයක රූගත කිරීම් වලට එක් වීමට යමුනාට අවස්ථාව උදා වනවා.

මේ වන විට ඇය සම්බන්ධයෙන් හරියාකර තොරතුරක් සොයා ගැනීමට නොහැකි වූවත් මානව විද්‍යාව, නර්තනය, සංගීතය, සංස්කෘතික තත්ත්වයන් මෙන්ම ත්‍රස්තවාදය සම්බන්ධයෙනුත් ඇය මහාචාර්ය පදවි මෙන්ම විවිධ උපාධීන් රාශියක් සම්පූර්ණ කොට තිබෙනවා.

පහතින් වීඩියෝවට සම්බන්ධ එක් ඡායාරූපයකුත් ඇය මයිකල් ජැක්සන් සමග පුහුණුවීමේ නිරත වන එක් වීඩියෝ පටයකුත් ඒ වගේම ගීතයේ අදාළ තත්පර 20 ට අදාල වීඩියෝ පටයත් එක් කර තිබෙනවා.

මෙවැනි රූප රචනාවකට සම්බන්ධ වීමට (වර්ණභේදවාදයට මෙන්ම විවිධ සංස්කෘතික අංග නිරූපණය ව) ලැබීම සැබවින්ම ඇය ලැබූ භාග්‍යක්. ඒ වගේම ශ්‍රී ලංකාවේ නම සහ සංස්කෘතිය යුගයක ලොව ජනප්‍රියතම ගායකයාත් සමග ලොවට ගෙන යාමට හැකිවීමත් ශ්‍රී ලාංකිකයන් ලෙසට ආඩම්බර වියහැකි කරුණක්. බොහෝ දෙනෙක් සත්‍ය වශයෙන්ම මෙය නොදන්නා නිසා මේ සම්බන්ධයෙන් පළ කිරීමට සිතුවා.

$haggy 

උපුටා ගැනීම: Shaminda Jayarathne