මේ මගේ මෙරට අත්දැකීමක් නොවේ. නමුත් ඊයේ වෙනත් රටකදී ලැබූ අවාසනාවන්ත තත්වයකි.
මේ දිනවල කොවිඩ් රෝගීන් සීග්‍ර ලෙස වැඩි වෙමින් පවතී. රෝහල් ඔවුන්ගෙන් පිරී ඉතිරී යමින් ඇත. ඒ අතරේ වින්ටර් ෆ්ලු වලින් සෞඛ්‍ය සේවකයින් දැඩි ලෙස පිඩා විඳිති. සෑම වාට්ටුවක්ම කොවිඩ් වාට්ටුවක් වී ඇත. විශේෂ ශ්වසන ප්‍රතිකාර ඒකක වල ඇඳන් මදි වී ඇත. එසේම රෝහලේ ඔක්සිජන් නලවල පීඩනය අඩුවී ඔක්සිජන් සැපයුම අඩාල වී ඇත. විශේෂඥ වෛද්‍යවරුත් රාත්‍රියට සේවය කරති. මෙය අතිශය භයංකර තත්වයකි.
ඊයේ ශ්වසන අධිප්‍රතිකාර ඒකකයේ සිටි රෝගීන් තිහෙන් බහුතරය අවාසනාවන්ත ලෙස මරණය කරා ලංවෙමින් තිබුණි. එතැනින් ICU එකට යැවෙන්නේ රෝගියාගේ ජීවිතය බේරා ගැනීමේ වටිනාකම සලකා බලාවේ. මේ අතර සිටි එක් විශේෂ රෝගියෙක් ගැන මගේ අවධානය යොමුවුණි.
ඔහු මැදි වයසේ තනිකඩයෙකි. ඔහුට වකුගඩු අක්‍රිය වීම සහ වසා ගැටිති පිළිකාවක් ඇත. ඔහු ඊට රසායනික ප්‍රතිකාර අර්ධ ලෙස ලබා තිබුණි. මෙම රෝගියාට කොවිඩ් වැළඳී තිබුණු අතර ඉතාම වේගයෙන් අසාධ්‍ය වෙමින් සිටියේය.
ඔහුගේ CT Scan එක ඉතාම නරක විය. පෙනහළු වල සෑහෙන ප්‍රමාණයක් ආසාධනය සහ ප්‍රදාහ තත්වයෙන් අක්‍රිය වී ඇත. ඔහුගේ ඔක්සිජන් අවශ්‍යතාව වේගයෙන් ඉහළ යමින් තිබුණි. රාත්‍රී 3.30 ට හෙදියන් මට බීප් කළහ. මම යනවිය හෙදියන් දෙදෙනෙක් ඔහුගේ දෙපස සිට ඒ පැත්ත මේ පැත්ත හරවමින් ඔක්සිජන් මට්ටම 92% තබා ගැනීමට උත්සාහ කරයි.
රෝගියා මහත් අපහසුවෙන් දඟලයි. ඔහුට කරන්නට දෙයක් නැත. අපටද කරන්නට ලොකු දෙයක් නැත. ඉන්පසු මම එදා රාත්‍රී වැඩකරන විශේෂඥ්ඥ වෛද්‍යවරයාට කථාකොට ඔහු සම්භන්දව වෙනත් විශේෂ ප්‍රතිකාර නොකොට ඔහුට පහසුව ඇති කරන ප්‍රතිකාර පමණක් ලබා දීමට තීරණය කරන ලදී.
මම මේ රෝගියා දෙස බලා බොහෝ දේ කල්පනා කළෙමි. මගේ අනෙක් සගයා මගෙන් ඇසුවේ How you deal this situation in Sri Lanka? ලෙසයි. මම අපි රෝගීන් වෙනුවෙන් අවසන් මොහොත දක්වා සියළුම ප්‍රතිකාර ලබා දෙන බවත්, ලංකාවේ රෝගීන් වැඩි වුණත් දරුණු රෝගය ඇතිවීම වාසනාවට අඩුබවත් පැවසීමි.
මෙම රෝගියා ක්‍රමයෙන් වතුරෙන් ගොඩ දැමූ මාළුවෙක් මෙන් ගැහෙන ආකාරය බලා සිටියෙමි. ඔහු අසරණව අප දෙස බලයි. තව පැය කිහිපයකින් ඔහු මිය යන බව අප දනිමු. මෙය හරියට දියේ ගිලී මිය යාමේ ප්‍රතිවිරුද්ධ ස්වභාවයයි. ඉතාම වේදනාකාරී මරණයකි. ඔහුගේ අසල සිටීමට ඔහුට නෑදෑයෙක්ද නැත.
මෙම තත්වය කොතරම් භයානකද යන්න කල්පනා කර බලන්න. සිගරට් පානය පවා මීට බලපාන බව ඔබ මතක තබා ගන්නේ නම් වටී. මිය යාමට ආසන්න විට ඔහුට නිද්‍රාවට පත්වෙන ඖෂධ ලබා දෙනු ඇත. මරණය සිදුවූ පසු විශේෂ බෑග් වලින් මෝචරියට යනු ඇත.
උපුටා ගැනීම: Vipula Bataduwaarachchi