එදා සිකුරාදා දවසක්. වැඩ ඉවර කරලා සුපුරුදු විදිහට මම වාහනේ පැදව්වේ ලකී සෙවන් රෙස්ටුරන්ට් එකට. ටිකක් කලින් ආව නිසා ඉදිරිපිසම නවත්වන්න ඉඩ තිබුනා. ඇතුල් වෙන දොරටුව ඉදිරියේ ගාල් කරන්න යද්දී ඉදිරිපස හිටපු කෙට්ටු මනුස්සයෙක් අතින් ඇස් වහ ගත්තේ ඉදිරිපස ලාම්පු ආලෝකය ඔහුගෙ මුහුනට කෙලින්ම වැදුනු නිසා වෙන්න ඇති .
පින් අඩි කාරයෙක් .
මම හිතුවෙ සාමාන්‍යයෙන් නිතරම පින් අඩි බලාපොරොත්තුවෙන් මිනිස්සු ඔතන ඉන්න නිසා.
වාහනේ ගාල් කරලා මම ඇතුලට ආවා. රතු පාට බල්බ , කලු පාට කවර දාපු මේස වලින් සුපුරුදු ලෙසට ආකර්ශනීය පෙනුමක් ලැබිලා තිබුනා . කොහොමත් මම කැමතිම තැනක මේක .හරියට දෙවැනි ගෙදර වගේ.
මම මට පුරුදු කැමතිම දකුනු පැත්තේ තියෙන ප්‍රදාන දොරට මූන ලා තිබුනු මේසයෙ අසුන් ගත්තා .
ගුඩ් එවිනින් සර්. අදත් පුරුදු එකමද
මම හොදටම දන්නා වේටර් සුමනසිරි ඇවිත් ඇහුවා .
ඔව්.ඕල්ඩ් බාගයය්. පෝක් ඉස්ටු එකය්. සෝඩා අය්ස් එක්ක.
ඕඩරෙ එනකම් මම දුම් වැටියක් දල්වා ගත්තේ පසුබිමෙන් වාදනය උනු මම ආසම මිල්ටන් මල්ලවාරච්චිගෙ එදා රෑ සින්දුවට සවන් දීගෙන .
සර්. විනාඩි පහෙන් බය්ට් එක ගෙන්නම්.
සුමනේ මගෙ ඕඩර් එක මේසය උඩින් තියන ගමන් කිව්වා .
මම වීදුරුවට අය්ස් කැට දෙකක් දාලා අරක්කු ටිකක් හා සෝඩා ටිකක් කලවම් කලා. මිල්ටන්ගෙන් කපුගෙට මාරු වෙලා උන්මාද සිතුවම් ගීතය වාදනය වෙමින් තිබුනා .මම විදුරුවෙන් අරන් උගුරක් පානය කලා.
ශීත අය්ස් සමග මුසූවු මදුවිත මගෙ ගත සිත උනුසුම් කරමින් උගුරෙන් පහලට බැස්සා .මම නැවත නැවත වඩි තුන හතරක් අවසන් කලා. අහම්බෙන් වගේ මම පාර බලද්දී මම දැක්කා අර කලින් දුටු පුද්ගලයා මා දෙස බලන් ඉන්නවා .
තාම කව්රු වත් මිනිහට අඩියක් දීලා නෑ වගේ.මට හිතුණා .
සුමනසිරි .
මම සුමනේට කතා කලා.
ඇය් සර්.මොනවාද ගේන්න ඕන .
අර දොර ගාව හිටගෙන ඉන්න මනුස්සයට එන්න කියන්න .තව වීදුරුවක් ප්ලෙට් එකක් ගේන්න .
මම දිහා විමතියෙන් වගේ බලපු සුමනෙ දොර ලගට ගියා.
මහත්තයා .
මගෙ මේසය ලගට ආපු ඒ මනුස්සයා කටහඬ අවදි කලා.
වාඩි වෙනවා.
කමක් නෑ සර්.මෙහෙම හොදය් .
වාඩි වෙනවා අය්සේ.
බයාදු විදිහට මන් දිහා බලපු මිනිහා ඉස්සරහා තිබුනු පුටුවේ වාඩි උනා .
මිනිහා අතේ තිබුණේ එක පොඩි බෑග් එකක් විතරයි .
ආ ගන්නවා .
මම වීදුරුව ඔහුට දික් කලා.
නමුත් මේ අනපේක්ෂිත කැදවීමෙන් ඔහු පැකිලෙන බවක් මන් දැක්කා .
ගන්නවා අය්සේ ඇය් තමුසෙ බොන්නේ නැද්ද .
හොදය් මහත්තයා .
ඔහු විදුරුවට මදුවිත ටිකක් එකතුකලා.
සුමනේ තව භාගයය් .සෝඩ එකය් ගේන්න .
එහෙනම් මන් ගන්නවා සර් කියමින් ඔහු වීදුරුවම එකවරින් මුවට හලා ගත්තා .
නම මොකක්ද .මොකද මෙතන කරන්නේ .
මම ඇහුවා .
මම අනිල් .. සමාවෙන්න සර් මම අද හිරෙන් නිදහස් වෙලා එන ගමන්..
මොකක්.. හිරෙන් නිදහස් වෙලා .
ඔව් සර් අවුරුදු විස්සකින් පස්සේ අදය් නිදහස් උනේ .
මොකද තමුසෙ හිරේ ගියේ
මම ආයෙත් වීදුරුව පුරවා ගත්තා .
මගෙ අතින් මිනියක් මැරුනා සර්.
මට එකපාරටම ආහ් කියැවුනා. අහපු දේ විශ්වාස කරන්නත් බැරි උනා.
මැරුනා….ඒ කොහොමද
මම හිතලා ඒක කරේ නෑ සර්..
තව එකක් දාගන්න .
මම කිව්වා .
ඉතින්
ඉස්සර මන් කරේ වින්කල් රස්සාව සර්.මට මගේම කියලා වින්කලයක් තිබුනා .දැන් වගේ නෙවෙය්නෙ සර්.ඒකාලෙ ඕන තරම් වැඩ තිබුනා . හැමොම වගේ ගියේ පුට් සය්කලනෙ. ඉතින් මට සල්ලිත් තිබුනා .නමුත් කාලයක් යද්දී බිස්නස් අඩු උනා. ඔහොම ගිහින් මට ඒක වහන්න උනා.ඊට පස්සේ රස්සා කීපයක් කලත් මට හරි ගියේ නෑ . මන් සල්ලි තියෙන කාලෙ ගෑනිට හොදටම සැලකුවා සර් ඒත් සල්ලි නැති කාලෙත් ගෑනි එහෙමම බලාපොරොත්තු උනා. සල්ලි ඉල්ලලා දිගටම කරදර කරන්න ගත්තා .ඒ අතරේ තමය් ඔය සිද්දිය උනේ .
මම දුම්වැටියක් දල්වා ගත්තා .
එදාත් උදේ පාන්දර ඉදන් ගෑනි කරච්චලේ මගුල් ගෙදරක යන්න සල්ලි ඉල්ලලා . උදේ පාන්දර ඉදන් ගෑනියෙක් හුචුහුචු ගාද්දී පුදුම කේන්තියක් එන්නේ සර්. මම කුලි වැඩක් වත් බලන්න සමගි මාවතේ ගෙවල් වලට ගියා . ගෙවල් තුනහතරකින් ඇහුවා වැඩක් ලැබුනේ නෑ සර්.. ඔහොම යද්දී තට්ටු දෙකක ලොකු ගෙදරකට ගිහින් කතා කරා. නෝනා කෙනෙක් හිටියේ .වැඩක් ඇහුවාම වැඩක් නෑ කිව්වා සර්. ඒත් මන් දැක්කා ඒ නෝනාගේ කරෙ ලොකු මාලයක් තියෙනවා .මට ගෑනිගෙ කරච්චලේ මතක් උනා . කොහොම හරි සල්ලි නැතුව අද ගෙදර යන්න බැරි බව තේරුනා .ඉතින් ඒ නෝනාගෙන් මම වතුර වීදුරුවක් ඉල්ලුව. ඒක ගේන්න නෝනා යන කොට මම කරමාලේ උදුරුවා. ඒත් ඒ නෝනා කෑගහගෙන මාත් එක්කම පොර බැදුවා සර් . පොර බදන කොට නෝනා වැටිලා ඔලුව එතන සිමෙන්ති ගැට්ටක වැදුනා . මට මුකුත් හිතාගන්න බැරි උනා. නෝනා කෑගහපු සද්දෙට මිනිස්සු ඇවිත් මට හොදටම ගහල පොලිසියට බාර දුන්නා . පොලිසියෙන් මට කිව්වා නෝන මැරිලා කියලා සර්..
ඒක අහද්දී මට කරන්ට් එකක් වැදුනා වගේ උනා.. ඒ කියන්නේ මේ ඉන්නේ ජානකි මරපු එකා. උබ බොන්න දෙන්නේ උබේ ගෑනි මරපු මිනීමරුවාට.උබ කොහොමද එහෙම කරන්නේ .මගෙ හිත මගෙන් ඇහුවා .මට පුදුම කේන්තියක් ආවේගයක් ආවා.මට මේ මිනිහා අදුරගන්න බැරි උනේ දැන් පෙනුම සෑහෙන වෙනස් වෙලා නිසා වෙන්නඇති.
තමුසෙ ඒ මැරුවේ මගේ ගෑනි අය්සේ
මන් ඒ කේන්තියෙන්ම අනිල්,ට ඒ මීනීමරුවට කිව්වා .
අනේ බුදු සර් .සමාවෙන්න .මන් හිතලා එහෙම දෙයක් කරේ නෑ සර්.
අනිල් මට කිව්වේ අත් දෙකම එකතු කරලා අඩන ස්වරයෙන් .
අඩන්න එපා මිනිහෝ මෙතන තව මිනිස්සු ඉන්නවා.
මන් කිව්වේ අනිත් මේස දිහා බලන අතරේ ..
ඒ උනාට සර් .
තමුසෙ හිතලා මැරුවෙ නෑනෙ .අනික එක අතකින් තමුසෙ ඉස්සර උනු එක හොදය් .නැත්නම් ඔය ගෑනි මරල හිරේ යන්නේ මම
මම කිව්වා .
ඒ කිව්වේ සර්.
විමතියෙන් අනිල් ඇහුවා
ඒ ගෑනි මගේ මුලු ජීවිතේම අපායක් කරලා තිබුණේ අය්සෙ . මන් බදින්න හිටියේ වෙන කෙල්ලෙක් .ඒත් ඒ ගෑනිය් ඒකිගෙ අම්මය් මගෙ අම්ම රැවටුවේ අපෙ පරම්පරා සල්ලි හින්දා .
අපේ අම්මත් රැවටිලා මට බලෙන් වගේ බන්දලා දුන්නා .පලවෙනි දවසේ ඉදන්ම ඒකි මට ජීවිතේ එපා කරා අය්සේ..
මන් වීදුරුවෙ ඉතුරු වෙලා තිබුනු මදුවිත සේරම එකපාරටම උගුරට හලා ගත්තා .
මන් අපායක ජීවත් උනේ ඒකි බැදලා.
තමුසෙ හිතලා නොවුනත් කරපු වැඩේ හින්දා මන් සැනසිල්ලේ ජීවත් වෙනවා.
අනේ සර්. ඒ උනාට
ඒව වැඩක් නෑ අය්සෙ.ඒක වෙලා ඉවරය්.තමුසෙ දඩුවම් වින්දානෙ.දැන් තමුසෙ මොකක්ද කරන්න යන්නේ .ගෑනි දන්නවද තමුසෙ නිදහස් උන බව
නෑ සර්. ඒකි වෙන මිනිහෙක් එක්ක ගියා මන් හිරේට ගිය අලුතම. මන් ගමට යනවා සර්. අම්ම විතරයි මන් බලන්න හරි ආවෙ. ඉතුරු ටිකේ මන් අම්මව බලන් ඉන්නවා සර්.
සුමනේ
මන් වේටර්වරයාට කතා කලා.
සර්..මුකුත් ඕනද.
ඔව්.අපිට චිකන් ප්‍රය්ඩ් රය්ස් ලාර්ජ් එකය්. ඩෙවල්ඩ් ෆිශ් එකය් චොප්සුය් එකකුය් ගේන්න .
හරි සර්.
මන් ඉතුරු වෙලා තිබුනු මීවිත වීදුරු දෙකට වත් කලා.
මේ ජීවිත කියන්නේ මහ පුදුම දෙයක් අය්සේ . කව්ද හිතුවෙ ගෑනි මරපු මිනිහා මෙහෙම හම්බ වෙලා බොන්න වෙය් කියලා . අනික ඒක ජානකීගෙත් කරුමෙ. එයාගෙ ගෙනාපු ආයුශ ඉවර වෙලා එයා ගියා . තමුසෙගෙ කරුමෙට ඒක ගියෙ තමුසෙ පිටින්. අද මෙහෙම බිවට කොය් වෙලේ අපේ බැටරියත් බහීද කියලා කව්ද ඕය් දන්නේ . අද රෑ වෙන්නත් පුලුවන් .හෙට උදේ වෙන්නත් පුලුවන් . ඒ නිසා ඔය පරන යටගියාව අමතක කරනව . අලුත් ජීවිතයක් හෙට ඉදන් පටන් ගන්නවා .
ගමට ගිහින් අම්මට සලකාගෙන ඉන්නවා. ඉන්න ටිකේ හිතේ සතුටින් ඉන්නව. දැන් මෙහෙන්ම කාලා රෑට මෙහෙම කාමරයක් අරන් ඉන්නවා.හෙට උදේ ගමට යනවා . මන් ඒවට ගෙවන්නම්. තමුසෙ ඔය මොනවා හරි බිස්නස් එකක් පටන් ගන්න බලනව ආයෙත් . මමත් පුලුවන් උදව්වක් කරන්නම්.
එහෙනම් මේක ගන්නවා .
මන් වීදුරුව අනිල්ට දුන්නා .
චියර්ස් ..
…ස්තුතිය .
උපුටා ගැනීම: ලලිදු ලියනගේ .