මිනිස්සු (වැල්වටාරම්)

මේත් නොදන්නා මිනිස්සුන්ගේ මනුස්සකම් ගැන කතාවක්.

2017 අවුරුද්දේ සැප්තම්බර් මාසේ අපි දෙන්නා විවාහ වෙලා මාස 06ක් වගේම වේදනාත්මක් හදිසි ගබ්සාවීමකින් මම සුවය වෙමින් පැවති මාසයක් .සැමියාගේ ඕනෑකම නිසාම අලුත් ස්කූටර් රථයක් අරන් සති කීපයක්.

සැප්තැම්බර් මාසේ හදිසියේම දවසක සැමියාගේ මව අඩමින් දුරකථන ඇමතුමක් දෙන්නෙ පියාගේ කට ඇදවී රෝහල් ගත කල බව කියමින්,පියාට බොහෝ ආදරේ සැමියා කලබල වී ඉක්මණින් නුවර යායුතු බව කියා අප දෙදෙනා පසුවදා නුවර යෑමට සැරසෙනවා,පැය දෙකතුන කින් සැමියාගේ අක්කා(නෑනා)දුරකථන ඇමතුමක් ගෙන සදහන් කලේ පියා බැලීමට හදිසියෙ රෝහලට පැමිණෙමින් සිටි අයියාගේ වාහනය හදිසි අනතුරකට ලක්වී අයියා ද රෝහල් ගත කර ඇති බවයි .අම්මාත් අක්කාත් හඩාවැලපෙන විට,තාත්තාත් අයියාත් රෝහල්ගත වී සිටින විට කොලඹ සිටි අප දෙදෙනා බොහෝම දරුණු තීරණයක් ගත්තේ ඉක්මනින් ස්කූටර් රථයේ නුවර බලායාමට.

මින්පෙර කවරදාකවත් එතරම් දුර අප දෙදෙනා නොගිය අතර ඔහු රියදුරු බලපත්‍රය රැගෙන මාස කීයපයක්.බොහොම චකිතයෙන් බියෙන් සෙමින් අප දෙදෙනා කොළඹ නුවර පාරේ පැය 5ක ගමනක් අවසන්කොට මහනුවර මහ රෝහල වෙත සේන්දු වුනා.

පියාගේත් අයියාගේත් තත්වයට ඒ වනවිට යහපත් අතට හැරී තිබුණා.පසුවදා ඉරිදා,සදුදා සිට කෑගල්ලෙ මට රාජකාරි කටයුතු පැවරී තිබූ නිසාත් ඔහු කොලඹ සේවයට වාර්තා කල යුතු නිසාත් හිතුවක්කාර ලෙස තනිවම ඔහු ස්කූටර් රථයේ නැග කොලඹ බලා ගියා .පැය කීපයකින් දුරකත ඇමතුමක් දුන් ඔහුගෙ හඩ වෙනස්වී තිබුණ අතර හේතු විමසීමේදි ඔහු පවසා සිටියෙ මගදි වැස්සට හසුවූ නිසාත් අධික තෙහෙට්ටුව නිසාත් කඩහඩ වෙනස්වී ඇති බවත් ගමන් මහන්සිය නිසා ඉක්මනින් නින්දට යන බවත්.ඔහුගේ වචන විශ්වාස කල මා ඔහුට නින්දයාමට ඉඩහැර පසුවදා රාජකාරි සදහා සූදානම් වූවත් අනිසි බියක් හිත පෙලමින් තිබුනා .

රාත්‍රිය පුරා නින්ද නොගිය නිසා පාන්දරම පියා බැලීමට රෝහලට ගොස් එතනින්ම කොළඹ බස්රථයකට ගොඩවූවේ ඉක්මණින් කෑගල්ලට යාමට.අතරමගදි දුරකතන ඇමතුමක් දුන් ඔහුගේ හඩ බොහෝ වෙනස්වී තිබුණා.පෙරදා එන අතරමග වැස්සට හසූවූ බවත් තමට උණ සෑදී ඇතිබවත් ඉක්මණින් කොළඹ එන ලෙසත් ඔහු ඉල්ලා සිටියා,මින්පෙර රාජකාරි හෝ වෙනයම් කටයුතු වලදි කිසිදු බලපෑමක් නොකළ ඔහුගේ මේ හැසිරීම මට ගැටලුවක් වුණා .කාර්‍යාලයේ ප්‍රධානියාට කතාකොට නිවාඩු ලබාගෙන කෙලින්ම කොළඹ ගිය මා සිත දෙගිඩියාවකින් බියකින් පෙලීගියා.

නිවසට එනවිට මා දුටු දේ ඇදහිය නොහැකිව කුමක් වූවාදැයි සිතාගත නොහැකිව මා තෘෂ්නිම් භූතවූවා .

ඔහුගේ සිරුර පුරා ප්ලාස්ටර් අලවා ,කකුල් වෙළුම් පටි යොදා ,අත බෙල්ලෙ එල්ලා,ඔහු දුටු මා කෑගසා පිස්සියක් මෙන් හඩාවැලපුනේ සිදුවූයේ කුමක්දැයි අසා දැනගැනීමටත් පෙරයි .

ඔහුද හඬමින් මා අස්වසා අතර මගදි වැස්සට හසුවී තමන් යක්කල දී ස්කූටරයෙන් ලිස්සා ගොස් ඇද වැටුණු බවත් අසල සිටි පිරිස තමා මාර්ගයෙන් ඉවත්කර ගෙන ප්‍රතිකාර සදහා රෝහල්ගත කලබවත් සදහන් කලා .

පැය කීපයකින් මා පියවි සිහියට ආ පසු ස්කූටරය පිලිබදව විමසීමේදි ඔහු අනතුරට පත්වූ ගුණවර්ධන කුෂන් වර්ක් ඉදිරිපිට පලතුරු කඩේ සිටි සේවකයින් දෙදෙනා ස්කූටර් රථය ඔවුන් භාරයේ තබා ගත් බවත් යතුර තමන් රැගෙන ආ බවත් ඔවුන්ගේ දුරකථන අංක පමණක් තමන් සතු බවත් ඔහු සදහන් කලා.

මනුස්සකම් ඇරඹෙන්නෙ ඉන් පසුවයි.

වම් අත උරහිසෙන් පැනීම නිසා මාස දෙකක කාලසීමාවක් ඔහුට අත බැදගෙන ඉන්න සිදුවුණා.ඔහු මහන්සියෙන් හම්බකර ගත් මුලු මුදලම ගෙවා ගත් ස්කූටර් රථය ගරා වැටුණ නිවස නොදන්නා මිනිසුන් භාරයේ.නිවසේ තත්වය නිසා කාටවත් සිදුවූ අනතුර පිළිබඳව නොකියන ලෙස ඔහු මා පොරොන්දු කර ගත්තා.යක්කලට කවුරුන් හෝ යවා ස්කූටර් රථය ගෙන්වා ගැනීමට අප දන්නා කිසිවෙකුත් සිටියෙ නෑ.

පුරා මාස දෙකක් ස්කූටර් රථය අදාල තරුණයයින් දෙදෙනා බාරයේ තිබුණා.ඔහු නිතර නිතර දුරකථන ඇමතුම් දි ඔවුන්ට කරදරයක් දැයි ඇසූවිට අහිංසකව සිනාසුණු ඔවුන් කියා සිටියෙ මල්ලී මෙතන වහලා යතුරු දාන්න තැනක් නෑනේ,මහපාර අයිනෙනේ,අපි රෑට විටෙන් විට ඇහැරිලා බලනවා බයයිනෙ මල්ලී ,කවුරු හරි දැකලා කෑල්ලක්වත් ගැලෙව්වොත්,

පුරා මාස දෙකක් නමක් ගමක් ඉන්නා තැනක් නොදන්නා ඔවුන්ගේ බස් විශ්වාස කල අප දෙදෙනාට බලා ඉන්නට සිදුවුණා.මාස දෙකකින් සම්පූර්ණයෙන් සුවවූ ඔහු සමග යක්කලට ගොස් ස්කූටරය භාර ගන්නා විට මට හමුවූයේ කොණ්ඩය පාට කර බුලත්විට කාගෙන කනට කරාබුවක් දාගෙන ශෝටක් ඇදගෙන සිටි තරුණයන් දෙදෙනෙක්.

කිසිදු අඩුපාඩුවක් නැතිවම පුරා මාස දෙකක් කට්ටක් කා බලාගත් ස්කූටරය අපට භාරදෙන විට හිතේ සංතෝෂයට අත මිටමෙලවූ මොනර නෝට්ටු කීපය ඔවුන් දෙදෙනා ප්‍රතික්ෂේප කලේ මල්ලි,ඔයත් කොල්ලෙක් අපිත් කොල්ලෙක්,මල්ලි හොදින් නේ,කොල්ල්ක්ට උදව්වක් කරන්න බැරිනම් අපෙන් වැඩක් නෑනේ මල්ලි කියමින්.

අවසානයේ පලතුරු කඩෙන් ඇති තරම් පලතුරු මිලදී ගත් අප දෙදෙනා ඉන් කාලයක් යන තුරුම ඔවුන් දෙදෙනාව නිතර නිතර සිහිපත් කලා.

ටික කලකින් නුවර ගිහින් එන මග යක්කල නවතා ඔවුන් දෙදෙනා දැක ගැනීමට බලාපොරොත්තු වුවත් ඔවුන් එහෙන් අස්වී ගොස් ඇතිබව නව සේවකයන් පැවසූවා .දුරකතන අංකද වෙනස්වී තිබුණා.

උපුටා ගැනීම: Miyura Dimuni