අද සමාජය භෞතික දේවල් පමණක් නොවෙයි අම්මා අප්පා පවා උගසට තබන කාලයක්. සෑම දෙයක්ම මුදලට තක්සේරු වුණු කාලයක්. ඉතින් ගුණ දම් සෝදාපාළු වී මිනිසුන් නොමිනිසුන් බවට පත්ව සිටිද්දී මෙවැනි දෑ අහන්නට ලැබීම අරුමයක් නෙවෙයි. ඉතින් මේ කියන්නට යන්නේ මුදල් නිසා අහිංසක මිනිසුන්ගේ ජීවිත අවධානමේ හෙළන නරුම මිනිසුන් කොටසකගේ අමානුෂික කටයුත්තක් ගැන. මිනිසුන් දුප්පත්කම නිසා මුදල් නැති නිසා බෙහෙවින් අසරණ වෙනවා. ඉතින් අන්න ඒ වගේ දුප්පත්කමින් බැට කන මිනිසුන්ගෙන් ප්‍රයෝජන ගන්නා නරුම මිනිසුන් මේ ලෝකයේ තවමත් ජීවත් වෙනවා. ඉතින් ලෝකයේ තියෙන එක්තරා අඳුරු ගම්මානයක සිද්ධ වෙන මහ පොළව නුහුලන අපරාධයක් ගැනයි මේ කතාව.
ඉතින් මේ ගම්මානයේ ජීවත් වෙන සෑම මනුස්සයෙක්ගේ බඩේ ඔපරේෂන් එකක් කරලා තියෙනවා දකින්නට පුළුවන්. ඉතින් එයට හේතුව මොකද්ද කියන්නට කලින් මේ ගම්මානය තියෙන්නේ කොහෙද කියලා දැන ගනිමු. මේ ගම්මානය තියෙන්නේ නේපාලයේ කත්මන්දු ප්‍රදේශයට නැගෙනහිරින් හෝක්ස් නම් කුඩා ගම්මානයක පිහිට තියෙනවා. මේ ගම්මානය බොහෝම දුප්පත් ගම්මානයක්. එහි සෑම නිවසක්ම නිර්මාණය කර තිබුණේ මඩ ගඩොල්වලින්. හරිම දුප්පත් අහිංසක ජනතාවක් තමයි මේ ගම්මානයේ වාසය කළේ. නමුත් දුප්පත්කමට එහා ගිය අඳුරු ඛේදනීය කතාවක් මේ ගම්මානයේ සැඟවී තියෙනවා.
ඉතින් මේ දුප්පත් ගමේ ජීවත්වන සෑම පවුලකම එක් සාමාජිකයෙකුගේවත් බඩේ මෙවැනි ඔපරේෂන් එකක් කර තිබෙනු දකින්නට පුළුවන්. ඉතින් ඒ ඔපරේෂන් එක කරපු සෑම පුද්ගලයෙක්ම ජීවත් වෙන්නේ එක වකුගඩුවක් ශරීරයේ තබාගෙන. සාමාන්‍යයෙන් පුද්ගලයෙකුට වකුගඩු දෙකක් සිය සිරුරේ පරිවෘත්තීය ක්‍රියාවලට අවශ්‍ය බව ඔබ දන්නවා. නමුත් ඒ ගමේ ජීවත් වෙන සෑම අයෙක්ටම හිමිවෙන්නේ එක් වකුගඩුවක් විතරයි.
නමුත් ඇතැමෙක්ට මේ මිනිසුන් වකුගඩු විකුණනවා කියලත් සිතෙන්නට පුළුවන්. නමුත් ඇත්තටම සිද්ධ වෙන්නේ එහෙම දෙයක් නම් නොවෙයි. ඇතැම්විට ඔවුන්ගේ අහිංසකභාවය නැත්නම් ඔවුන්ගේ නොදැනුවත්භාවය එහෙමත් නැත්නම් ඔවුන් වංචාකාරයන්ගේ ග්‍රහණයට නතුවීම නිසා මේ ඉරණමට ගොදුරු වෙනවා. ඉතින් කොහොමවුණත් අවසානයේදී ඔවුන්ගේ එක් වකුගඩුවක් ඔවුන්ට අහිමිවෙනවා.
ඉතින් මේ ගම බොහෝම දුප්පත් . මිනිසුන් ජීවත් වෙන්නේ හරිම අමාරුවෙන්. ඒ නිසාම මේ ගම්මානයේ ජනතාව බොහෝමයක් නගරයට යනවා රැකියාවක් බලාපොරොත්තුවෙන්. ඉතින් දුප්පත්කම අසරණකමක් විදියට ගැණුන නිසාම මුදලක් සොයා ගන්නට නගරයට සේන්දු වන ඔවුන්ට හිමිවෙන්නේ ඉතාම ඛේදනීය ඉරණමක්. මේ මිනිසුන්ගේ දුප්පත්කමත් අසරණකමත් අහිංසකකමත් ප්‍රයෝජනයට ගන්නා ජාවාරම්කරුවන් මේ අහිංසක මිනිසුන් රවට්ටලා ඔවුන්ගෙන් වකුගඩු ලබා ගන්නවා. ඇතැම් අය වෙන කරන්නට දෙයක් නැති නිසාම කැමති වුණත් තවත් අයගේ වකුගඩු අහිමි වෙන්නේ මේ කිසි දෙයක් නොදැනීමෙනුයි.කොහොමවුණත් මේ ජාවාරම්කරුවන් මේ ජාවාරම වසර දහයක් පමණ තිස්සේ සිටම කරගෙන යන දෙයක්.
කොහොමහරි ජාවාරම්කරුවන් මේ දුප්පත් මිනිසුන්ගෙන් වකුගඩු ලබාගෙන ඒ මිනිසුන් රවටන්නේ ඒ වකුගඩුව නැවත වර්ධනය වන බව කියමින්. ඒ විතරක් නෙවෙයි තවත් සමහර මිනිසුන් බලහත්කාරයෙන්ම අරගෙන ගිහින් වකුගඩු ගලවා ගන්නා අවස්ථා පවා තියෙනවා. එහෙම නැත්නම් ශල්‍ය කර්මයක් කරන්නට තියෙන බව පවසමින් කිසිම අනුදැනුමක් නොමැතිවම මේ අසරණ මිනිසුන්ගෙන් වකුගඩු ගලවා ගනු ලබනවා.
නමුත් මේ දුප්පත් මිනිසුන්ට තමන් දුන් වකුගඩුව වෙනුවෙන් හිමි වෙන්නේ නම් ඉතාම අසාධාරණ මුදලක්. ලෝකය සමාජය ගැන පුළුල් අවබෝධයක් නැති මේ අහිංසක මිනිසුන් රවටා වකුගඩුවක් සඳහා ඉතාම පුංචි මුදලක් පමණයි ලබා දෙන්නේ. නමුත් ඒ දුප්පත් මිනිසුන්ගේ වකුගඩු අලෙවි කර ජාවාරම්කරුවන් අතිවිශාල මුදලක් උපයා ගනු ලබනවා. ඒ වකුගඩු ඩොලර් දහස් ගණනකට මේ වකුගඩු අලෙවි කරනු ලබනවා.
මේ නිසාම මේ ගම්මානයට නමක් පවා ලැබිලා තියෙනවා කිඩ්නි ගම්මානය කියලා. ඉතින් මේ ගමේ මිනිසුන්ගේ ජීවිත අනතුරේ හෙළමින් වකුගඩු ගලවා ගෙන සොච්චම් වටිනාකමක් ලබාදෙන මේ ජාවාරම නිසා මේ ගම්මානය අද වෙද්දි ඒ නමින් ප්‍රචලිත වෙලා තියෙන්නේ. ඉතින් කණගාටුවට කාරණය තමයි මේ ජාවාරම හා සම්බන්ධ පුද්ගලයන් මේ ගම්මානයේම වාසය කිරීම . මුදල් ලබා ගැනීම පරමාර්ථය වන නිසාම මේ ගම්මානයේ වාසය කරන ඇතැමුන් මේ ගමේ වාසය කරන අහිංසක මිනිසුන්ව ජාවාරම්කාරයන් වෙතට ගෙන යනු ලබනවා. ඔවුන් අතරමැදියන් ලෙස තමන්ගේ ගමේ මිනිසුන්ගේ ජීවිත අනතුරේ දමන්නේත් මුදල් නිසාමයි.
වසර ගණනාවක සිටම මේ අපරාධය නොයෙක් ආකාරයෙන් සිදුවෙමින් පවතිනවා. බොහෝ කාලයක් මේ ජනතාව වෙනුවෙන් කිසිවෙක් හඬනගා තිබුණේ නැහැ. ඔවුන්ගේ දුප්පත්කමට විසඳුමක් ලබාදුන්නේ නැහැ. ඒ නිසා වසර ගණනාවක් ඒ ජාවාරම්කරුවන්ට මේ නින්දිත ක්‍රියා සිදුකරගෙන යන්නට බාධාවක් වුණේ නැහැ. නමුත් වර්තමානය වෙද්දි මේ කනගාටුදායක තත්ත්වය පිළිබඳව වගකිව යුත්තන්ගේ අවධානය යොමුව පවතින අතර එය සැබැවින්ම ප්‍රසංසනීය කාරණයක්.
ඉතින් වර්තමානයේ දී ඉතාම අමානුෂික ලෙස සිදුවන අපරාධයට එරෙහිව ලෝක සෞඛ්‍ය සංවිධානයේ අවධානය පවා යොමුව තියෙනවා. ඒ සඳහා සුදුසු ක්‍රියාමාර්ග ගැනීම සඳහා ඔවුන් ඉදිරිපත්ව සිටීම නිසා ඒ ගම්මානයේ දුප්පත් අසරණ ජනතාවට යම්කිසි පිහිටක් ලැබේවි. ඔවුන්ගේ දුප්පත්කමට වෙනත් විකල්පයක් හිමිවේවි.
ඉතින් මේ ලෝකයේ අප නොදකින නොඅසන සැඟවුණු එවැනි අපරාධ ඕනෑ තරම් ඇති. මිනිසුන් බොහෝමයක් අසරණ වන නැති බැරිකම හමුවේ නින්දිත ලෙස තමන්ගේ මඩිය තර කරගන්නට උත්සාහ කරන ජාවාරම්කරුවෝ ද බොහෝ ඇති. නමුත් අපි අසන්නේ දකින්නේ ඉතාමත් සුළු ප්‍රමාණයක් පමණයි.
උපුටා ගැනීම: VOICE Official Lanka Post Blog