මේ ඉන්නෙ අපණ්ණකා කුලියාපිටිය. වෘත්තීයෙන් ගුරුවරියක්. ඇය සියාවේදී පැවැති ‘මිස් සැෆායර් වර්ල්ඩ්’ 2021 රූ රැජින තරගාවලියේ දෙවැනි ස්ථානය දිනා ගන්නට සමත් වුණා.
රුසියානු කලාපයේ යුක්‍රේනය, ජෝර්ජියාව වැනි රටවල් නියෝජනය කරමින් තරගකාරීන් රැසක් මෙම තරගය සඳහා එක්වෙලා තිබුණා. නොවැම්බර් මාසයේදී ඇරඹලා තිබුණ මේ තරගාවලියේ පළමු වටයෙන් අවසන් 15 දෙනා අතරට තේරී පත්වන්නට අපේ අපණ්ණකා සමත් වුණා. මෙම තරගාවලියේ අවසන් වටය සඳහා තේරී පත්වූ තරගකාරීන් අතර කළු හමක් සහිත තරගකාරියක වූයේ අපණ්ණකා විතරයි.
වැදගත්ම දේ අපණ්ණකා කියපු මේ කතාවයි….
“ලංකාවේදී මට අනන්ත ප්‍රශ්න වුණා. හිත් රිදුණ ඒවා තමා වුණේ. හම සුදු කරගන්න ක්‍රම හොයලා බලන්න කිව්වා. නමුත් මම කැමති මගේ ස්වාභාවික විදිහට යන්න. මම කළුයි. ඒත් මට කවදාවත් සුදුවෙන්න ඕන වුණේ නෑ. මගේ දත් වලට පවා චෝදනා කරපු අවස්ථා තිබුණා. දත් හදාගෙන එන්න කිව්වා. නමුත් මෙහෙ මට ස්වාභාවික විදිහට ඉස්සරහට යන්න ඒක තමා හොඳ කිව්වා. මම මාව හැටියටම ඒ අය පිළිගත්තා. මාව වෙනස් කරලා ගන්න දිනුමක් මට වැඩක් නෑ….”
මෙම තරගාවලිය රුසියාව, අමෙරිකාව, එක්සත් රාජධානිය වැනි රටවල වාර්ෂිකව පවත්වන තරඟයක්. මෙවර තරගාවලියේ අධ්‍යක්ෂ ලෙසින් ඇලෝනා රොෂෙල් නැමති අය කටයුතු කරලා තිබුණා. පහුගිය 24 වෙනිදා තමයි තරඟය තිබිලා තියෙන්නෙ. සිය උසස් අධ්‍යාපනය හදාරමින් රුසියාවේ පිටර්ස්බර්ග්හි දිවිගෙවන අපණ්ණකා සහෝදරිය අපට හොඳ ආදර්ශයක් සහ පණිවිඩයක් දීලා තියෙනවා.
”කවදාවත් තමන්ගෙ හමේ වර්ණය ගැන පසුතැවෙන්න එපා. සුදු කරන්න විවිධ විෂ වර්ග ආලේප කරගෙන හෝ ශරීරගතකරගෙන පිළිකා වලට ගොදුරු වෙන්නත් එපා…. ඔබ ඔබේ විදියට සුන්දරයි.! ”
උපුටා ගැනීම: පූර්ණිමා චාරුණී බණ්ඩාර