චූ කිරීම……..
මට UGC එකට එන්න කියලා ලියුම ආවේ 1st shy එකේ ප්‍රතිඵල ඇවිත් මාස කීපයකින්. කවුද දෙයියනේ දන්නෙ කොළඹ යන්න. ෆෝන් එකක්වත් නෑ අතේ. මන් සුපුනව හම්බෙලා ඌටත් කියලා කතා කර ගත්තා. මිනිහත් හා කිව්වා.
ආ UGC කියන්නෙ විශ්වවිද්‍යාල ප්‍රතිපාදන් කොමිසම.
අපි අගහරුවාදාවක කොළඹට ගිහින් ඇස්වාට්ටු හන්දියෙන් බැහැලා UGC එකට පයින් ගියා. වැඩේ ඉවර වෙද්දි හවස තුන වගේ උනා. Interview එකක් තිබ්බෙ. සූකිරි බෝල වගේ කෙල්ලො ටිකකුත් ඇවිත් හිටියා. ඔක්කොම දකුණු රටේ අය. ඕං ප්‍රසිද්ධ ඉස්කෝලෙක රතු පාට ටයි දාපු ලමයෙකුත් හිටියා. මන් ඉතින් හිනා උනා විතරයි. ඒ ළමයා යනකොට යන්නම් කියලත් ගියේ. හොද සිරිත් දන්න ළමයෙක්.
කොහොම හරි අපි වැඩේ ඉවර වෙලා බම්බලපිටියට ගියා අදුනන අයියා කෙනෙක් හම්බෙන්න. ඕං ඔය හරියෙ තිබ්බා ග්‍රාමාරක්ෂක භටයන්ගෙ කාර්‍යාලයකුත්. ඒ අයියත් එක්ක අපි කතා කර කරා මුහුද අයිනට ගියා. වෙරලක් නම් නෑ. රේල් පාර දිගටම. රේල් පාරත් මුහුදත් අයිනෙ ගල් පුරවලා. අපි ඒ ගල් උඩ නැග නැග හිටියා. සුපුනා ළඟ තිබ්බ ෆෝන් එකෙන් ෆොටෝ කීපයකුත් ගත්තා.
අප්පට සිරි දැන් නේද වැඩේ.
ගල් අස්සට ගොඩ දාල හිටපු මුහුදු නයෙක් සුපුනගෙ කකුලෙ එල්ලුනා. අපිට හිතා ගන්න බෑ මොනව කරන්නද කියලා. එහෙම්මම ත්‍රී වීල් එකක් කතා කරන් ඉස්පිරිතාලෙට ගියා. ඉස්පිරිතාලෙ ගේට්ටුවෙන් ඇතුලට යනකොට මූට සිහිය නෑ. මටත් ඇඬෙනවා. කොහොම හරි ඇටෙන්ඩන්ලා දෙන්නෙක් සුපුනව ට්‍රොලියක දාන් ඇතුලට ගෙනිච්චා. අපි දෙන්නටත් එන්න කියලා කෑව සර්පයාගෙ විස්තර ඇහුවා, පාට මොකද්දා කොයි වගේද අරකයි මේකයි..
ඒ දවස ඉස්පිරිතාලෙම අපි. අර අයියා ගියා. මන් විතරයි. මන් දැන් බයේ වෙව්ලනවා. සිද්දිය කෝල් කරලා තාත්තට කිව්වා. ගෙදර අයත් බය වෙලා. සුපුනගෙ ෆෝන් එක මන් ගාව. ඌගෙ ගෙදරටත් කතා කරල කිව්වා. සුපුන්ගෙ අම්මා කිව්ව දැන් කොළඹට එන්න පිටත් වෙන්වා කියලා.
මෙහෙම ඉන්නකොට නර්ස් කෙනෙක් ඇවිත් කිව්වා සුපුන්ගෙ තත්ත්වය බරපතලයි කියලා.දරුණුම නයෙක් දෂ්ට කරලා තියෙන්නෙලු.එයාලට කරන්න ප්‍රතිකාරයක් නෑලු. ඔක්කොම කරලා ඉවරයිලු. වෙන දෙයක් බලාගෙන ඉන්නලු තියෙන්නේ. මගෙත් එක්ක ඇවිත් සුපුනට වුන දෙයක්.මන් දැන් ඒ ගෙදර මිනිස්සුන්ට මූණ දෙන්නෙ කොහොමද.
මන් උදේ හතර හමාරට ආව පාර.ඇටෙන්ඩන්ට් කෙනෙක්ගෙන් ටොයිලට් එකක් තියෙන තැන අහගෙන ගියා යටි බඩ කැකෑරවපු මුත්‍රා බරින් නිදහස් වෙන්න කියලා. මුත්‍රා කරන ගමනුත් මට ඇඩෙනවා. අපිට බම්බලපිටි නොයා ඉන්න තිබ්බේ. දැන් උන දේ උනා.තවත් මන් මුත්‍රා කරනවා.ඒ මුත්‍රා කිරිල්ලා ඉවරයක් නෑ.මන් දිගටම දිගටම මුත්‍රා කරනවා…………………….
……………………………………………………………..
ඇගම සීතලයි. මන් ගැස්සිලා ඇහැරුනා. දෙයියනේ ඇදේ චූ වෙලා. දැකලා තියෙන්නෙ හීනයක්. හීනෙන් මුලු ඇදේම හොදට චූ කරලා.
මන් සුපුනට මැසේජ් එකක් දැන්මා,
තමුසෙ හොදින්ද අහලා…….
උපුටා ගැනීම: Amila Wijethilake