ජැස්පර්ගේ ආගමනය අහම්බයකි. පෙළපත හොඳය. අම්මා , තාත්තා , ආච්චි , පුංචම්මා සහ වැඩිමල් සහෝදරයන් දෙදෙනුකු ඇතුළුව මේ පෙළපතට අයත් නොවන ටෙරියර් වර්ගයේ අරං හදාගත් සහෝදරයෙක් ද සමග එකම ගෙදර වාසය කළ ජැස්පර් ගේ පවුලේ මුලු සාමාජිකයින් ගණන මිනිසුන් ඇරුණු කොට පහළවකට ආසන්නය.
පවුලේ බර තවදුරටත් දරාගන්නට නොහැකි වීම නිසා කොල්ලන් දෙදෙනෙකු සහ කෙල්ලක දන් දීමට නිවැසියන් තීරණය කළ අතර අපි ප්‍රවාහන කටයුත්ත භාර ගතිමු.
වඳින්න ගිය දේවාලය ඉහට කඩා වැටුනාක් කියනා පරිද්දෙන් මේ හාදයා , ටෙඩියා සහ තවත් එක සාමාජිකයෙකුත් සිටි අපේ ගෙදර පැලපදියම් වූ අතර එක කුස උපන් සහෝදරිය අපේ අම්මාගේ එක කුසේ උපන් සහෝදරියට හිමිවූ අතර සහෝදරයා අපේ තාත්‍තාගේ ලොකු අයියාට භාර කෙරිණ.
අම්මාට අනුව මේ සුදු පුතාය. ඉඳ හිටක හු#&%ගේ පුතා යනුවෙන් ද ආමන්ත්‍රණය කෙරෙනා අතර ඌ වැඩි වශයෙන් ප්‍රතිචාර දක්වන්නේ එසේ ආදරෙන් කතා කළ විට වීම විශේශත්වයකි.
සෑහෙන සාමකාමී චරිතයක් වුවද බ්‍රෑන්ඩ් එකට නොගැලපෙන පඩත්තල ගතු ගුණ වලින් පරිපූර්ණය. ඌට රෙන්න හෝ හුජ්ජ කිරීමට අවශ්‍ය වූ විටක ඌ කරන්නේ අදාළ අවයවය අල්ලපු කූඩුවේ සිටිනා ටෙඩියා දෙසට හැරවීමය. ඉතින් සුද්දා සේ පිරිසිඳු වූ ටෙඩියා විලාප තියමින් කෑගසනා අතර ගෙදර උන් දන්නා කුණුහරප වැලක් කියාගෙන එන විට මූ ඌට නෙවේ වාගේ සිනාසෙමින් පසෙකට වී ඉන්නේය.
අව්ව, වැස්ස , රතිඤ්ඤා ආදිය ගාණක් නැත. පවිත්‍රතාව සහ සනීපාරක්ෂාව පිළිබද අවබෝධය බිංදුවකි..හැබැයි අපරාදේ කිව නොහැකි තරමට කීකරුය. කතා කළ යුත්තේ එක පාරය.
කෑමට කෑදර නැත. පිඟානට බත් කන්දක් බෙදා කන්න කියනකන් ඉන්නේය. සංගීතය / දෙවෙනි ඉණිම ආදිය නැරඹීමට ප්‍රිය වන අතර තුන් හතර වතාවක් පෙරැත්ත කළ පසු ඊලඟට එලඹෙන්නේ මරණ තර්ජනය බව දන්නා බැවින් කාගෙන කාගෙන යන්නේය.
තාත්තා කියන්නේ මූ ලොරියක කා කරත්තයක රෙන බවය. සැබෑය.
හොඳ සන්නිවේදන හැකියාවක් සහිත සතෙක් වන අතර දිනපතා පැය භාගයක පමණ කාලයක් අල්ලපු කූඩුවේ සිටිනා ටෙඩියා සමග ඌ ඌඋ ඌඌඌ ගගා මොනවාදෝ දොඩවමින් ගෙදර උන්ට ඊලඟට පාත් කරනා මරාලය සැලසුම් කරන්නේය.
දවසින් වැඩි කාලයක් කූඩුවකට වී ගත කරන්නට හේතුවී ඇත්තේද වංසයට නොගැලපෙන ඌ අවලං කම් බව මෙහිලා සඳහන් කළ යුතුමය. නැතහොත් දම්වැලක් සහ බල්ලෙකු එකම පින්තූරයක දුටුවනින් රෙදි උස්සාගෙන දිව එන සත්තලෝලීන්ගෙන් බේරීමට අපහසුය.
මේ වනවිට ගෙදර ගත කළාවූ ජීවිත කාලය තුල මිනිසුන් වෙත එල්ල කර ඇති මුළු ප්‍රහාර සංඛ්‍යාව හතරක් වන අතර ඒවායින් තුනකදී සාර්ථක ප්‍රතිඵල අත්කරගෙන ඇති අතර ගෙදර අයිතිකරුවන්ගේ පූරුවේ වාසනාවට ඒ සෑම අවස්ථාවකදීම ගොඩින් ශේප් වීමේ වාසනාව ලැබී තිබේ. ගෙදර ජීවත්වන පවුලේ සිව් දෙනා සහ ආච්චී හැරෙන්නට උපන්දා පටන් වඩාගෙන හුරතල් කළවුන් ද දැන් මූගේ ජම්මාන්තර වෛරක්කාරයින් ය.
විනෝදාංශ කීපයකි.
රූපවාහිනී නැරඹීමට අමතරව. ගෙවතු අලංකරණයට දක්ශය. කොටින් කියතොත් අම්මා මල් පැල හිටවිය යුත්තේ ඌට උවමනා තැන් වලය. යම් හෙයකින් ටෙඩියාගේ වලිගය කූඩුව යටින් උගේ සීමාවට මයිලක් හෝ පැමිණියහොත් ඌ බෙරිහන් දී කෑගසනා තුරු වලිගය කටින් අදින්නේය. නැතහොත් පාගන්නේය. එසේම විවිධ විලාසිතා වලටද කැමතිය.
මේ වන විට වයස අවුරුදු තුනක් පසුවී ඇති අතර තවම මනාලියක සොයා නැත. හාදයා කුකුල් කේන්තිකරුවකු වන බැවින් මනාලියකගේ නිවසේ බින්න බැස්සවීම අතිශය අවධානම් සහගත වන අතරම නිවසේ ඉඩ කඩ මදි වීම නිසා තවම දීග විවාහයක් ද සාර්ථක වී නැත.
බම්ලෝ කූම්ඩු කරම්න එම්පා නිම්දහම්ස දෙම්න කියමින් බුකීගතව වැලලෙන්න හදනා දායක සභාව ජැස්පරයාට පමණක් නොව ලුසී අයියාටද පේන්න බැරිය. එවැන්නවුන්ට ජැස්පරයා අධෝමුඛෙන් සිනාසී පවසන්නේ ආසනම් අපේ ගෙදර විත් මා නිදහස් කර ආයේ හැකිනම් යන ලෙසටය.
උපුටා ගැනීම: ලුසිෆර් මෝර්නින්ග්ස්ටාර්