නිවසේ සමහර බිත්ති කොන් වල වතුර කාන්දු වීම් හා දිය සෙලව බැඳිලා තිබීමෙන් වගේම වාතාශ්‍රයේ තෙතමනය වැඩිකම නිසා නිවස ඇතුළත අප්‍රසන්න පුස් ගඳක් පැතිරෙන්න පුළුවන්. පළමුව නිවස තුළට හොඳින් වාතාශ්‍රය ලැබෙන විදියට ජනෙල් හා දොරවල් විවෘත කර තබන්න.
ඔබේ නිවසින්ම සොයාගන්න පුළුවන් සරල අමුද්‍රව්‍ය කිහිපයක් භාවිතා කරලා පුස් ගඳ ගැටලුව තිකරගන්නේ කොහොමද කියලා දැන් අපි බලමු!
1 කෝපි කුඩු
’ෆියුරිල්මෙතනෙතියෝල්’ නම් සංඝටක අඩංගු වනනිසා කෝපි වල ප්‍රබල හා ඉමිහිරි සුවඳක් වහනය වෙනවා. මේ සුවඳ ඔබේ නිවසේ පුස් ගඳ දුරුකරගන්න ප්‍රයෝජනයට ගන්න පුළුවන්.මෙය ස්වභාවික වගේම ගොඩක් ලාබදායි ක්‍රමයක්.
උපදෙස්: කෝපි කුඩු ටිකක් බඳුනකට දමන්න.එය නිවසේ පුස් ගඳ හමන ස්ථානයේ ටික වෙලාවක් ගත වන තුරු තබන්න. කෝපි මඟින් දුගඳ අවශෝෂණය කරගනියි.
2 ලුණු
පුස් ගඳට එරෙහිව ක්‍රියාකරන තවත් ඵලදායි ක්‍රමයක් තමයි මුහුදු ලුණු.කෝපි වලට වගේම ලුණු වලට ද දුර්ගන්ධය අවශෝෂණය කරගන්න පුළුවන් හැකියාව තිබෙනවා.
උපදෙස්:බඳුනක් පිරෙන්න ලුණු දමා නිවසේ පුස් ගඳ හමන තැනක තබන්න. වෙන කිසිවක් කිරීමට අවශ්‍ය නැහැ. ලුණු මඟින් පුස් ගඳ අවෂෝෂණය කරගනියි.
3 වැනිලා සාරය
වැනිලා වල ඉමිහිරි සුවඳ වාතයේ පහසුවෙන් පැතිරීඉ යයි. මින් පුස් ගඳ සම්පූර්ණයෙන්ම ඉවත්වීමක් සිදුවන්නේ නැහැ. ගඳ ආවරණය වීමක් පමණයි සිදුවන්නේ.
උපදෙස්:බඳුනකට වැනිලා ටිකක් වත්කරන්න.පුස් ගඳ හමන ස්ථානයේ එය තබන්න. මද වෙලාවක් ගත වන විට වැනිලා සුවඳ මුළු කාමරයේම පැතිරෙන්නට පටන්ගනියි.
4 ලෙමන් පොතු
දුර්ගන්ධයන් ඉවත්කරගැනීමේදී ප්‍රයෝජනයට ගැනෙන තවත් දෙයක් තමයි ලෙමන් යුෂ කියන්නේ.මේ සඳහා ලෙමන් වගේම දෙහි ද භාවිතයට ගත හැකියි.පුස් ගඳ ඇතිකරවන බැක්ටීරියා හා දිලීර විනාශ කරයි.
උපදෙස්:උණු කරගත් වතුරට ලෙමන් පොතු දමා තැම්බෙන්නට හරින්න.ඉන් ලෙමන් සුවඳ වහනය වීමට පටන්ගත් පසු , පුස් ගඳ හමන කාමරයේ බිමින් එම බඳුන තබන්න.සිසිල් වූ පසුව, එම වතුර ස්ප්‍රේ බෝතලයක් ආධාරයෙන් අවට ඉසීම වුවත් කළ හැකියි.
5 බේකිං සෝඩා
සෝඩියම් බයිකාබනේට් හෙවත් බේකිං සෝඩා වැසුණු (සංවෘත) ස්ථාන වල දුගඳ නැතිකිරීමට හොඳ පිළියමක්.දුගඳ නැතිකරන විශේෂ සෝඩා නිෂ්පාදන පවා වෙළඳපොලේ තිබෙනවා.ශීතකරණය හා කබඩ් රාක්ක වැනි නිවසේ වැසුණු ස්ථාන වලට මේවා භාවිතා කළ හැකියි.
උපදෙස්:බඳුනකට බේකිං සෝඩා දමන්න.වැසී ඇති ස්ථානයක පැය 24 ක් පමණ තිබෙන්නට හරින්න.තෙතමනය උරාගනිමින්, පුස් ගඳ දුරු වී ගොස් තිබේවි.
6 කුරුඳු
කුරුඳු යනු සුවිශේෂී හා ප්‍රබල සුවඳක් තිබෙන කුළුබඩුවකි.නිවසේ ඇති දුර්ගන්ධයන් දුරුකරගැනීමට අමුද්‍රව්‍යයක් ලෙස මේවා යොදාගන්න ඔබට පුළුවන්.
උපදෙස්:කපු රෙදි කැබැල්ලකට හෝ බෑගයකට කුරුඳු කුඩු ටිකක් දමන්න.රාක්ක, ලාච්චු, කබඩ්, අල්මාරිය වැනි තැන් වල එය පොට්ටනියක් ලෙස තබන්න.නැතිනම් කුරුඳු කැබලි කිහිපයක් මිටියක් ලෙස රිබන් කැබැල්ලකින් ගැටගසා අවශ්‍ය තැනක තබන්න.
7 දුගඳ ඇතිකරවන දියසෙවල ඉවත්කරගන්න හැටි
නාන කාමරයේ , වැසිකිළියේ පුස් ගඳ හැමීමට ප්‍රධාන හේතුවක් තමයි දිය සෙවල බැඳීම.මේවා ඔබේ සෞඛ්‍යයට හානිකර වෙන්න පුළුවන් බව ඇතැම් අධ්‍යයන සඳහන් කරනවා. ඔබේ නිවසේ තැන් නිතිපතා පිරිසිදුව තබාගැනීමෙන් මෙවැනි ගැටලු ඇතිවීම බොහෝ දුරට වළක්වාගන්නට ඔබට හැකියි.
පුස් දිලීර හා දිය සෙවල බැඳීම වළක්වාගැනීමට ඔබට කළ හැකි දේවල් කිහිපයක්:
- බ්ලීංච් කුඩු කෝප්ප 1 ක් වතුර ලීටර් 4 ක් සමඟ මිශ්‍ර කරන්න.දියසෙවල බැඳී ඇති තැන් වල රළු බුරුසුවක් ආධාරයෙන් මෙම මිශ්‍රණය යොදන්න.මෙය වෙනත් පිරිසිදුකාරක දියර සමඟ මිශ්‍ර නොකරන්න.ඉන් රසායනික ප්‍රතික්‍රියා ඇතිවිය හැකියි.
- වැසිකිළිය හා නාන කාමරය නිතර පිරිසිදුව තබාගන්න.
- සෙවල බැඳී ඇති තැන් හයිඩ්‍රජන් පෙරොක්සයිඩ්, විනාකිරි හෝ බ්ලීච් භාවිතයෙන් අතුල්ලා පිරිසිදු කරන්න.මේවා එකට මිශ්‍ර නොකළ යුතුයි.වෙන වෙනම භාවිතා කරන්න. මිශ්‍ර කිරිමෙන් අහිතකර රසායනික සංඝටක ඇතිවෙන්නට පුළුවන් නිසා ඒ අවදානම ගැනත් සැලකිලිමත්වන්න.හානි නොවන පෘෂ්ඨ වල පමණක් මෙම නිෂ්පාදන යොදන්න.
උපුටා ගැනීම: VOICE Official Lanka Post Blog