මෙහෙම ඇහුවම ඔබ කියාවි මම දකුණු අතින් ලියන්නෙ, මම වමතින් ලියන්නෙ ,එහෙම නැත්නම් මට අත්දෙකෙන්ම ලියන්න පුලුවන් , වගේ උත්තරයක්!
මේ මොන විදියට ලියන අයට උනත් හුරු අතක් තියෙනවා . ඒක හොයාගන්න හරිම ලේසියි.කරන්න තියෙන්නෙ අපි අත්දෙකේ ඇඟිල්ලක් අස්සෙන් ඇඟිල්ලක් යන විදියට අත්දෙක එකතුකරන එක විතරයි . බෞද්ධයන් නම් දෙවියන්ට පිං දෙනකොට අත්දෙක තියාගන්නෙ! ආන්න ඒ විදියට .
මෙහෙම තියාගත්තම එක අතක මාපටැඟිල්ල අනිත් අතේ මාපටැඟිල්ලට උඩින් තියෙන බව පෙනේවි. ආන්න ඒ උඩින් මාපටැඟිල්ල තියෙන අත තමයි වඩා හුරු අත. දකුණු හෝ වමතින් ලියනවා කියන අයට ඒ අතේ ඇඟිල්ල උඩින් තියෙන බව පෙනේවි .
දැන් මේ දකුණු අතින් හෝ වම් අතින් හෝ දෑතින් ම ලියනව කියන අය කොලයක් මේසය උඩින් තියල පෑනක් අරන් ඒ ඒ අතින් අර කොලේ ලියන්න බලන්න! වැඩිදෙයක් නෙවෙයි පේලි තුනහතරක් ලියන්න. හැබැයි එක කොන්දේසියක් තියෙනවා , අනිත් අත පිටිපස්සෙන් තියන් ඉන්න ඕන කිසිම දෙයක් නොකර.
මොකක්ද වුණේ! එක්කො ලියන්නම බෑ. එහෙම නැත්නම් ලිව්වට වෙනද ලියන තරම් ලස්සනට පෙළට ලියන්න බෑ. දැන් අනිත් අතත් ඉස්සරහට අරන් සාමාන්‍ය විදියට ආපහු පේලි දෙකතුනක් ලියන්න! කොහොමද වැඩේ!
අපි වැඩ්ඩ කියල හිතන් හිටිය අතට තනියම කරගන්න බැරිවුන දේ හරි අපූරුවට අනිත් අතත් තියෙද්දි කරන්න පුලුවන් !
ඒ කියන්නෙ අපි දකුණතෙන් එහෙම නැත්නම් වමතින් ලියනව කිව්වට ඇත්තටම අනිත් අතේ උදව්ව නැත්නම් අපේ ලිවීම එතරම් සාර්ථක නෑ. නමුත් අපි නිතරම සම්මාන දෙන්නෙ අපිට පුරුදු අතට!
දැන් බලමු අතේ ඇඟිලි ගැන. පුංචිම ඇඟිල්ල නේ සුලැඟිල්ල. ඔබට ඒක තියෙනවද කියල හිතෙන්නෙත් නැතිතරම් උනාට ඔබ කවදාහරි හිතුවාද ඒ සුලැඟිල්ලට හානියක් උනොත් මොකක් වෙයිද කියල ! දැන් උනත් හිතේවි ඒක අනිත් ඇඟිල්ලක් නැතිවෙන තරම් බරපතල නෑ කියල !
ඔබ ඔබේ අතේ එක් එක් ඇඟිල්ලක් නැතිවිදියට නවාගෙන හෝ දිගහැරගෙන ගහක අත්තක වගේ දේක එල්ලෙන්න බලන්න. එහෙම නැත්නම් පිහියක් හැන්දක් අල්ලල වැඩක් කරන්න බලන්න. ඔබට එවිට තේරේවි සුලඟිල්ල කුඩාවුණත් ඒක නැත්නම් යමක් අල්ලන්නත් කොච්චර අමාරුද කියල . සුලඟිල්ල අහිමිවුණාම අපේ අතේ ග්‍රහණ ශක්තියෙන් 50% කට ආසන්න ප්‍රමාණයක් අපට අහිමිවෙනව බවයි විශ්වාස කෙරෙන්නෙ! පුංචි උනාට අපිට නොතේරුණාට අතේ වැඩකාරය සුලැඟිල්ල.
ඒ වගේම ඔබට තේරේවි අපිට අහිමිවුණත් ලොකුවට නොදැනෙන වැදගත්කමින් වඩාත්ම අඩු අපි අනුන්ට දිගුකරණා ඇඟිල්ල නේද කියල ! අපි හිතාගෙන ඉන්නා විදිය කොපමණ වෙනස්ද? අනුන්ගේ දොස් දැකීමත් අපේ ජීවිතයේ වැදගත්කමින් අඩුම කටයුත්ත කියල අපට නොකියා කියනව නේද?
මේ විදියට බලනකොට අපි වැදගත් ,ප්‍රයෝජනවත් කියල වැඩි තක්සේරුවක් දෙන හුගාක් දේවලට වගේම හෝ ඊට වඩා වැඩි වටිනාකමක් අපිට එතරම් වැදගත් නෑ කියල හිතෙන දේවලටත් තියෙන බව පේනවා නේද? .
ඒ වගේ තමයි අපේ වැඩකටයුතු සාර්ථකව කරගෙන යන්න අපට උදව්කරන වෙහෙසමහන්සිවෙන සමහර අයව අපට නොපෙනෙන්නෙ! ඒ අයගෙන් වෙන සේවය කැපිල පේන්නෙ නැතිනිසා නිතරම අපි එයාලව අමතක කරනව.
අපි කාර්යාලයක සේවය කරනවානම් උදේ කාර්යාලය , වැසිකිළිය පවිත්‍රකරන කෙනා නැත්නම් අපි මොනතරම් අපහසුවට පත්වෙනවද?
සමහර විට වෙනත් සුලුසේවකයෙක්ගෙන් විශාල සේවයක් ඉටුවෙන්න පුලුවන් අපි නොදැනුවත්ව ම.
ඉතින් මේ විදියට බලනකොට අපි නොවැදගත් ,වැදගත් කියල හිතන දේවල් ගැන ආපහු හැරිල බලල ,නිවැරදි අවබෝධයක් , නිසි තක්සේරුවක් කලේ නැත්නම් අපිට වරදින්න තියෙන ඉඩකඩ බොහොමයි.
උපුටා ගැනීම: Channa Witha