ඕලු යනු ජලයේ වැඩෙන සුවඳවත් මල් වර්ග අතර තවත් එක් අලංකාරවත් මල් විශේෂයකි. ඕලු මල් රතු ,සුදු, කහ වශයෙන් වර්ණ කිහිපයක් වේ. ඕලු ශාකය අනෙක් මල් අතර විශේෂ වීමට හේතුව නම් එය ඖෂධීය ගුණයෙන් යුක්ත වීමයි. ඕලු ශාකයේ මල් වලින් ලබා ගන්නා ඇට ඕලූ සහල් ලෙස හදුන්වයි.
ඕලු සහල්වල ඖෂධීය ගුණයන්-ඉදිමුම් සුවකරයි, වා ,පිත් ,සෙම් යන තුන්දොස් සමනය කරයි, අර්ශස් රෝගීන්ට ගුණදායක වේ, ආහාර ජීර්ණය පහසු කරයි, උන, පිපාසය වමනය සුවකරයි, මුත්‍ර රෝග සුවකරයි, ගර්භණී මවුවරුන්ට ද ගුණදායකයි. ප්‍රතිශක්තිකරණය වර්ධනය කරයි, ආහාර ජීරණ ක්‍රියාවලිය පහසු කරවයි, වකුගඩු නිරෝගී කරයි, අක්මාව නිරෝගී කරයි,හෘද රෝගීන්ට ගුණදායක වේ. කොලොස්ට්‍රෝල් පාලනය කරයි. රුධිර කැටි ගැසීම පාලනය කරයි. ඇස් පෙනීම වර්ධනය කරයි, වකුගඩු හා පිත්තාශයේ ඇති ගල් දියකර හැරීම හා ගල් ඇතිවීම වළක්වයි.
ඕලු සහල් ලබා ගන්නා ආකාරය-අබ ඇට වලට වඩා තරමක් විශාල වූ ඕලු ඇට රන්වන් පැහැයෙන් යුක්තය. වියළිකලාපයට ඇදහැලෙන වර්ෂාවෙන් පසුව වැව් ජලයෙන් පෝෂණය වන ඕලු ශාකයේ ටික කලකට පසු අලංකාරවත් ඕලු මල් පිපීම ආරම්භ වේ. පිපුන මල් මෝරා පෙති හැලී ගොස් ඕලූ ගෙඩි බවට පත්වේ. මාස දෙකක් තුනක් පමණ ගතවී යත්ම මෝරන ලද ඕලු ගෙඩි කඩාගෙන එහි ඇති ඕලු ඇට ලබාගනී.
මෙලෙස ලබා ගන්නා ඕලු ඇට මගින් ඕලු බත්,රොටී , පිට්ටු,කැඳ, බිස්කට්,කේක් වර්ග සකස් කර ගත හැකිය. එය රසවත් මෙන්ම බොහෝ රෝගවලටද ගුණදායකය. ආහාර මාර්ගයේ හෝමෝන පාලනය කර ඒ හරහා ආමාශයට එන්සයිම ශ්‍රාවය උත්තේජනය කිරීමටද ශරීරයට ශක්තිය ලබා දීමට ද ඕලු සහල් උපකාරී වේ.
ඕලු බත් සකස් කරගන්නා අයුරු -ඕලු සහල් මගින් ආහාර පිසීමේදී පැය 6ක පමණ කාලයක් ඕලු ඇට වතුර දමා පෙඟෙන්නට තැබිය යුතුය. ඉන්පසුව ඕලු සහල් ගරා හොඳින් පිරිසිදු කර බත් පිසින ආකාරයට ඕලු සහල් පිස ගත හැකිය. මීට අමතරව ඕලු සහල් මගින් ඕලු බත් පිසීමේදී සහල් එකතු කර ඕලු බත් පිස ගත හැකිය.ඕලු බත් එලවළු සමග මෙන්ම මී කිරි සමගද ආහාරයට ගත හැකිය.
ඕලු කැඳ සකස් කරගන්නා ආකාරය අවශ්‍ය ද්‍රව්‍ය
- ඕලු සහල්
- පොල් කිරි
- සුදු ලූණු බික් දෙකක්
- ලුණු ස්වල්පයක්
වතුර සමග භාජනයක් ලිප තබා පෙරදින පැය හයක් පමණ පෙඟෙන්නට තබා සෝදා ගරා පිරිසිදු කර ගත් ඕලු සහල් ඔබට අවශ්‍ය ප්‍රමාණයට එකතුකර හොඳින් තම්බා ගන්න. හොඳින් තැම්බුණු පසු කපාගත් සුදු ලුණු එකතු කර මදක් තැම්බෙන්නට හැර පොල් කිරි දමා විනාඩි තුනක් පමණ හැඳි ගාගන්න. ළිපෙන් බෑමට පෙර රස පදමට ලුණු ස්වල්පයක් එකතු කර ගන්න. නිවුනු පසු පානය කරන්න.
ඕලු රොටී -පැය හයක් පමණ පෙඟෙන්නට තබා සෝදා පිරිසිදු කර ගත් ඕලු ඇට හොදින් අඹරා ගෙන පොල් , ලුණු ස්වල්පයක් මිශ්‍ර කර සාමාන්‍ය අයුරින් රෝටී සකසන ආකාරයට ඕලු රොටී සකසා ගත හැකිය.
මෙවැනි ඖෂධීය ගුණයෙන් අනූන ඕලු කැඳ, ඕලු බත්, රොටී,ව්‍යංජන මගින් ඉහත සඳහන් කළ බොහෝ රෝග සමනය කර ගත හැකිය. කෘතිම බෙහෙත් ඖෂධ වලට ප්‍රථමව රසයෙන් ගූණයෙන් යුත් දේශීය ආහාර වර්ග පරිභෝජනය කිරීමට උනන්දු වන්න. එමගින් ඔබටත් අතුරු ආබාධවලට බිය නොවී පහසුවෙන් බොහෝ රෝග නිට්ටාවටම සුව කර ගත හැකිවේවි. යම් රෝගයකට ඖෂධ වර්ග භාවිතා කරන්නේ නම් ඕලු ආහාරයට ගැනීමට පෙර වෛද්‍ය උපදෙස් ලබා ගැනීමට උනන්දු වන්න.
උපුටා ගැනීම: The Lanka Post