පාට පාට කඩදාසි දෑතේ ඇඟිලිවලින් යන්ත්‍රාණුසාරයෙන් ඒ මේ අතට නැවී දෑස් අදහාගත නොහැකි නිර්මාණයක් බිහිවේ. එහි නම ‘ඔරිගාම්’ය. ඔරිගාම් සම්භවය ගැන කවර කතා පැවතිය ද එය ලොවම හඳුන්වන්නේ ජපානයෙන් ලොවට උරුම වූවක් ලෙස ය. එහෙත් එය දැන් අන්තර්ජාතිකය. එපමණක් නොව ‘ඔරිගාමී’ යනු තවදුරටත් විනෝදාංශයක් නොවේ. සිය ගණනක් පමණවූ ඔරිගාම් ක්‍රම අභ්‍යවකාශ විද්‍යාවට, වෛද්‍ය විද්‍යාවට, නවීන තාක්ෂණයට එදිනෙදා ජීවිතයට විසිඑක්වැනි සියවසේ නැතිවම බැරි අපූරු කලාවකි.
පාට පාට කඩදාසි නවා විවිධ හැඩතල මැවීම දෑස් අදහාගත නොහැකි විස්කමකි. යන්ත්‍රාණුසාරයෙන් අතැඟිලි නැවෙමින් සිදුකෙරෙන මේ කාර්යයට ඇත්තේ ඉතා දිගු ඉතිහාසයකි. ඒ ඉතිහාසය දෙවැනි වන්නේ කඩදාසි සොයා ගැනීමේ ඉතිහාසයට පමණි. ‘ඔරු’ යන වචනයෙන් සෑදුණු ‘ඔරි’ වචනයේ තේරුම නැවීමයි. ‘ගාම්’ යනු කඩදාසියි. “කඩදාසි නැවීම” ඔරිගාම් නම්වී ඇත.
ඔරිකටා, ඔරිසු, ඔරිමොනෝ, තතම්ගාමී ආදී විවිධ නම්වලින් ද මෙය ජපානයේ ප්‍රචලිතය. අතැඟිලිවලින් තැනුණ ද දෑතට දිය නොවන මේ කලාව සමඟ ජපානයේ නම අපට නිතැතින්ම සිහියට නැඟුණත් ජපානයට මේ අපූරු කලාව තිළිණ වුණේ 1880දී පමණ ජර්මනියෙන් බවට මතයක් පවතී. දරුවන්ගේ බුද්ධි ප්‍රබෝධයට දැල් වුණු නැණ පහනක් බඳු ඔරිගාම් කලාව තවදුරටත් කාලය පියවන විනෝදාංශයක් පමණක් නොවේ.
බෞද්ධ භික්ෂූන් වහන්සේලා හයවැනි සියවසේදී ජපානයට කඩදාසි රැගෙන පැමිණි අතර මුලදී ඔරිගාම් නිර්මාණ බිහි කෙරුණේ ආගමික උත්සව කටයුතුවලට පමණි. ඊට හේතුව කඩදාසිවල මිල අධික වීමයි. 1680දී ඉහාරා සයිකාකුලිවූ පැදියක, මනාලිය හා මනාලයා නියෝජනය කරමින් ඔරිගාම් සමනලුන් තැනූ බව සඳහන් කර තිබේ.
සමුරායිවරු වාසනාව උදෙසා කඩදාසි තීරු නවා තෑගි ලෙස හුවමාරු කරගෙන තිබේ. මේ සියුම් කලාව ගැන පළමු පොත ‘ලියවුණේ ජපානයේ 1797 දීයි. ‘සෙන්බසුරු ඔරිකටා’ එම කෘතියයි. ‘අබි නො සෙයිමෙයි’ නම් කතාවෙන් කියැවෙන්නේ ප්‍රාණය ලැබූ ඔරිගාම් කඩදාසි කොකෙකු ගැනයි. වර්තමානයේදී ජපානයේ පමණක් නොව බ්‍රිතාන්‍ය, ඇමරිකාව වැනි රටවල පවා ඔරිගාම් සංගම් බිහිවී තිබේ.
ළමා ඉගෙනුම් උපකාරකයක් ලෙස මෙය යොදා ගන්නේ දහනව වැනි සියවසේ මුල සිටයි. කඩදාසි කොකුන් දහසක් තැනූවිට තමන්ගේ ප්‍රාර්ථනා මල්පල ගැන්වෙන බවට විශ්වාසයක් ජපන් ජාතිකයන් අතර පවතී. ඔරිගාම් කොකා සාම සංකේතයක් වූයේ දෙවැනි ලෝක යුද්ධයේදී හිරෝෂිමාවට පරමාණු බෝම්බ හෙළූ පසුවය. පරමාණු බෝම්බයට අසුවී දිවි ගලවා ගත් සදකෝ සසාකි නම් දැරිය වයස අවුරුදු දො‍ළහේදී (1955 වසරේදී) තමන් ලියුකීමියාවට ගොදුරුවී සිටින බව දැනගත්තාය. මරණයේ අබියස සිටි ඇය ඔරිගාමි කොකුන් තැනීමට ගත්තේ තම දිවිය රැකගැනීමට ආශිර්වාද ලබා ගැනීමටය. එහෙත් පරමාණු බෝම්බයට ගොදුරුවී දිවි ගලවා ගත් තවත් බොහෝ දරුවන් ලියුකීමියා රෝගයෙන් පෙළෙන බව දැනගත් ඇය සාමය උදෙසා කොකුන් තැනුවාය.
මියයාමට පෙර ඇයට සෑදීමට හැකිවූයේ කොකුන් 644ක් පමණි. සදකෝගේ පන්තියේ මිතුරන් කොකුන් දහස සම්පූර්ණ කළ අතර, ඇය මිහිදන් කෙරුණේ කොකුන් දහසක් සමඟිනි. ඒ ඇයගේ සිහිනයට ගෞරවයක් ලෙසයි. හිරෝෂිමා සාම උද්‍යානයේ සදකෝගේ ප්‍රතිමාවක් ඇත. එහි සදකෝගේ ඇඟිලිතුඩුවල සිට ඉගිළ යාමට සූදානම් වන කොකෙකු දැක්වෙයි.
ඔරිගාම් කොකකුගේ පියාපත් මත සදකෝ ලියූ හයිකු කවිය අදටද ජනප්‍රියයි.
“මම සාමය ඔබේ තටුමත ලියම් නුඹ ලොව වටා ඉගිළ ගොස් මෙවන් විපතක් යළි දරුවන්ට නොවේවායි පතන්න. ඒ කවේ අරුතයි.
ඔරිගාම් කලාව නොනැසෙන අතේ ඇඟිලිවලට දියවී යන තවත් කඩදාසි කලාවක් නොවේ. සදකෝගේ කොකුන් එයට එක් සාක්ෂියක් පමණි. දැන් එය වෛද්‍ය විද්‍යාවට, අභ්‍යවකාශ විද්‍යාවට පමණක් නොව සමස්ථ නවීන තාක්ෂණයටම නැතිවම බැරි කලාවක් වී අවසානය.
විසි එක්වැනි සියවසේ සිටියද කලක් යනතුරුම අභ්‍යවකාශයට කුඩා රොකට්ටුවකින් විශාල ද්‍රව්‍ය ප්‍රවාහනය කිරීම ගැටලුවක් වී තිබිණි. එයට වසර 2014දී ඔරිගාම් කලාවෙන් විසඳුමක් ලැබිණි. පනස් වසරක අභ්‍යවකාශ ගැටලුවට පිළියම් ලැබුණේ මියුරා-ඔරි ඔරිගාමි ක්‍රමයෙනි.
නාසා රසායනාගාරයේදී, අභ්‍යවකාශයේදී දිග හැරීමට හැකි, පෘථිවියේදී මීටර් 2 – 7ක් තරමට නැවිය හැකි මීටර් 25ක් දිග සූර්ය රුවල් ක්‍රමයක් පර්යේෂකයන් නිර්මාණය කර තිබේ. මේ ඔරිගාමි කලාව අභ්‍යවකාශ විද්‍යාවට යොදාගත් පළමු අවස්ථාව නොවේ. මීට පෙර රොබට් ලෑන්ග් නම් ඔරිගාමී විශේෂඥයා නැවිය හැකි අභ්‍යවකාශ ටෙලෙ‍ස්කෝපයක් ඔරිගාමි කලාව යොදාගෙන නිර්මාණය කළේය.
මියුරි ඔරි ක්‍රමය යොදාගෙන ඇරිසෝනියාවේ පර්යේෂකයන් කඩදාසි පාදක කරගෙන නිර්මාණය කළ ලිතියම් ඉයොන් බැටරි නිර්මාණය කර තිබේ. මෙයින් ඉඩකඩ පිරිමැහෙනවා පමණක් නොව නැවුම් දාහතරක් පමණ ඇති නිසා බලශක්ති ධාරිතාවද වැඩිවේ. ‘මියුරි ඔරි’ නම් ජපන් සිතියම් නැවීමේ කලාව ද ලොව පුරා ප්‍රචලිතය.
කඩදාසි කොකුන්ගේ හැඩයට නැවූ නැනෝ කඩදාසි ඇන්ටනා ද දැන් ජනප්‍රිය ය. මෙය 2013දී ජපන් පර්යේෂකයන්ගේ සොයා ගැනීමකි. සෑම විද්‍යුත් උපාංගයකටම තොරතුරු යැවීම හා ලබාගැනීම සඳහා ඇන්ටනා අත්‍යවශ්‍ය ය. ඔරිගාමි ඩී.එන්.ඒ, රොබෝවරු, කාච ආදී බොහෝ දෑ මේ වනවිට තාක්ෂණික ලෝකයට නැතිවම බැරි අංගවී අවසානය.
වර්ෂ 2003දී ඔක්ස්ෆර්ඩ් සරසවියේ විද්‍යාඥයන් ඔරිගාමි ස්ටෙන්ට් නිර්මාණය කළේ නහර අහිතකර කොලෙස්ටරෝල්වලින් අවහිර වූ රෝගීන්ගේ හිත සුව පිණිසයි. නමකෝ – ඔරි නම් ඔරිගාමි ක්‍රමය යොදාගෙන, බැලුන් කැතීටරයක් මඟින් ස්ටෙන්ට් (කුඩා බටයක්) අවහිරවූ නහරවලට යවා නහරවල පළල වැඩිකර වැඩි රුධිර ප්‍රමාණයක් යෑමට සැලැස්වීමට මෙමඟින් පුළුවන.
කූඩාරම්, කූඩ, වාහනවල එයාර් බෑග්, ආදී එදිනෙදා ජීවිතයට අවශ්‍ය බොහෝ කටයුතුවලදී ඔරිගාමී කලාව ජපන් ජාතිකයන්ට පමණක් නොව ලොවටම නැතිවම බැරි කලාවක් වී ඇත…
………….අන්තර්ජාලය ඇසුරෙනි………….
උපුටා ගැනීම: දැනුම සොයන්න මේ පාරෙන් එන්න