ඒකාට පරයා කීවාට ඔහේලා ගැන්සිය මට ඔරවන්නට ඕනෑ නැතිය. ඒකාගේ පිට පොත්තට රැවටී ඔහේලා ඒකාව අහිංසක කැටගරියට දැමුවාට ඒකා තරම් නසරාණි එකෙක් මේ තුන් ලෝකේම නැතිබව ඒකා නිසාම අගතියට පත් මං වැටෙන හුස්මක් ගානේම අදහන දෙයකි.
අවුරුදු ගානක් තිස්සේම අපගේ නිවස සිය රජදහන කරගනිමින් පරම්පරාගතව පැවත එන පූස් රජ කුලයේ නූතන හිච්චි පුරුක වූ මේකා උපන්ගෙයි ආඩම්බරකාරියකි. කිටියා, සීසියා, මැණිකා කියනවාට වඩා පොෂ් නමක් ඒකාට තබන්නට මට ඕනෑ වූ නිසා ‘ කැස්පර් ‘ යැයි නම් තැබුවාට අද වන තෙක් ඒ නමින් කතා කලාට ඒකා බලන්න තියා හිතන්නේ වත් නැත. උඹේ පොෂ් උඹ තියාගනින් යැයි කනට ගැසුවා සේ කියන්නට බැරි කමට හිටියාට තාත්තා අහල ගම් හතක් එහායින් සිට හෝ ‘ කලූ! ‘ කියා අඩගසනා විට පස්සත් උඩ දාගෙන දුවන් යන්නේ මගේ ගොඩේ නම මට හොදා වගේය..
ගෙදර සියල්ලම අයිති ඒකාටය. තාත්තා ද ඒකාගේය.මා හදාගත්ත දරුවෙකු සේ ඒ තාත්තා ගේ හා පූස් දියණියගේ සෙනෙහස දෙස පැලියාවෙන් බලා සිට කොයි මොහොතේ හෝ පුපුරා හැලී මිය යනවාය. එවිට මමත් අධික ඉරිසියාව නිසා පිපිරී මිය ගිය පලමු එකී ලෙස ඉතිහාස පොතට එකතුවෙනු ඇත. අයියා ඒකාව වඩාගත් වෙලාවට ඒකාව ඉඹිද්දී අයියාගේ රැවුල් කටු ඇනෙන නිසා ඒකාට එය මහ වදයකි. අයියා එනවිට උඩකට නැග හැංගී සිටින්නේ තාත්තා විසින් ඇහැට කනට පේන දැරිවියො පරිස්සම් විය යුතු යැයි ලබා දුන් උපදෙස් අනුව විය යුතුය.
අපේ අම්මා කෙරෙහි ද මේකාගේ ඇත්තේ අමුතුම ප්‍රතිපත්තියකි. ඇදුම් සීයක් තිබ්බද එයින් අම්මාගේ ඇදුම් පමණක් තෝරා බිම දැමීම මේකාට ඇති එකම විනෝදයය. පරම්පරාවෙන් ලේ උරුමයක් ලෙසම ලැබුනා සේ මේකාටත් මේකාගේ අම්මාට,ආච්චීට, ආදීන්ට සේම අපේ අම්මාව පේන්න බැරි කම ලෙසටම ලැබී ඇත. තාත්තා නැති වෙලාවට අම්මා මේකාගේ කෑම පිඟානට කෑම ටික දමා ” කාපන් ” යැයි කීවාට බඩගින්නේ මලත් මේකා ඒ පැත්තවත් බලන්නේ නැතිය. කීයට හරි තාත්තා ගෙදර ඇවිත් කරවල,මාලු කුට්ටි පිටින් ලොස් නැතුව දමා හදන රස කෑම එක කා ඉස්මුරුත්තේ හැදී කටත් ඇරන් වැටී සිටින්නේ බඩගින්නේ හිද කෙසේ වෙතත් කාලා වැඩිවී මං මලා ලෙසිනි.
ඒකා මතක ඇති කලක පටන් නිදාගන්නේ නැත.නිදිකරවන්නට ඕනෑය. ඒකාට නිදිමත වූ වෙලාවට සක්‍ර දේවේන්ද්‍රයා එක්ක චැට් එකක් දාගෙන හිටියත් තාත්තා එය පැත්තක දා යන්නට ඕනෑය. අම්මා කියන්නේ මේ තාත්තා ගේ ගිය ආත්මයේ පෙම්බර බිරිඳ වන්නට ඇති බවයි. සමහර වෙලාවට මටද එසේ සිතෙනවාය.
අනිත් අයට කෙසේ වෙතත් මේකා තාත්තාට නම් දවස ගානේ සප්‍රායිස් ගිෆ්ට් ගෙනත් දෙනවාය. පාට පාට කටුස්සන්, කුරුමිණි වර්ග, එක එක මෝස්තරයේ සමනල්ලු මේ ගිෆ්ට් හැම්පර් වලට අයත් කර විව්ධත්වයක් එක් කරන්නට මේකා අමතක නොකරයි. මිනීමරු දැරිවියක් වුවද තමන්ගේ දරුවානේ කියනා ඇසින් බලනා තාත්තාට අනුව මේකා සියලු චෝදනා වලින් නිදහස්‍ ය.වරද කර ඇත්තේ මේකාගේ කට ළගට පැමිණ කට විවර කර ඒ කටට රිංගා සියදිවි හානිකර ගත් ඒ සතුන්ය. මේ වාගේ කැකිල්ලේ නඩු තීන්දු දිනපතා අප නිවසේ බහුලය. මේකාට ඇති මර විසයට ගේ පුරා ගොස් බිඳිනා බඩු වල තීන්දුවත් එසේමය.වරද ඒ බඩු ඒ ඒ තැන තැබූ අම්මාය.. අම්මා ඒවෙලාවට මේකාගේ ග්‍රැනීට රයිස් ගරන්ඩ යැයි කියා කලුවාගේ හත්මුතු පරම්පරාවටම බැන වදිනවාය.
බළලුන්ට පණ හතක් ඇති බව ඇත්තක් නම් දැනටම මේකාගේ පණවල් දෙකක් ලෙෆ්ට් වී ඇත. එකක් මල පෙරේතකමට අයිස්ක්‍රීම් ගිල දමා වැඩි වෙලාය. අනිත් එක ඇඳට වඩා අල්මාරියේ ඇඳුම් ගොඩ හොදයි කියා එහි සැතපෙන්නට ගොස් හුස්ම හිරවෙලාය. තරහාකාරයා වුවත් ඒකාට පෙරේතකම නම් බෝවෙන්නට ඇත්තේ උපන්ගෙයි පෙරේතී වූ මගෙන් බව නම්බුව පසෙක ලා පිළිගත යුතුය.
මාස හතරකට මේකා කල විනාසය අනන්තය..අප්‍රමාණය.. ඉදිරියේ කරන විනාස ගැන ලියන්නට බලාපොරොත්තුවෙන් දැනට නවතින්නම් ය. හිනාවෙලාම මට හතිය. 
උපුටා ගැනීම: Randi Jay