පරිගණකයක් කොහොමද අපිට ජීවිතයට පාඩම් කියාදෙන්නෙ? (වැල් වටාරම්)

අදවනවිට පරිගණකය අපිට නැතුවම බැරි මෙවලමක්. මේ වසංගත තත්ත්වය සමග එය තවදුරටත් වැඩිවුණා .වර්තමානයේ අපි භාවිත කරණ උපකරණ සියල්ලම වගේ යම් ආකාරයකට පරිගණකගත උපාංග භාවිත කරමින් තමයි නිපදවා ඇත්තේ!

ඉතින් අපිට පුලුවන් ද තව ටිකක් එහාට ගිහින් මේ පරිගණකයට අදාල කොටස් අපේ ජීවිතයට සම්බන්ධ කරල ඒක කොහොමද අපේ ජීවිතය හැඩගස්වාගන්න මගපෙන්වන්නෙක් විදියට හඳුනාගන්නේ කියා සිතන්න.

මෙතෙන්දි අපිට මේ කාරණයට අදාල ප්‍රධාන කොටස් කීපයක් හඳුනාගන්න ලැබෙනව.

දෘඪාංග (Hardware ), මෘදුකාංග (Software) , ජාලකරණය (Network ) 4 මතක ගබඩාව

1 දෘඪාංග (Hardware )-:

පරිගණකයේ වැදගත් කොටසක් තමා මේ දෘඪාංග. ඒකෙ අපිට පේන්න තියෙන කොටස්. මේ කොටස් හොඳ තත්වයෙන් නැත්නම් ඒක නිසි ප්‍රයෝජන ලැබෙන පරිදි භාවිත කරන්න බෑ. යතුරුපුවරුව, මවුස් එක හරියට වැඩකරන්නෙ නැත්නම් ස්ක්‍රීන් එක පේන්නෙ නැත්නම් වැඩක් නෑනෙ.

ඒ වගේම තමයි අපේ ශරීරයේ තියෙන ශරීරාංග . හිසේ සිට දෙපතුල දක්වා තියෙන අපිට පේන අත්පා, ඇඟිලි, ඇස් ,කන් ,නාසා ,දත් වගේම ශරීරයේ ඇතුලෙ තියෙන අංගෝපාංග සියල්ලම තමයි ශරීරයේ දෘඪාංග ,ඒ කියන්නෙ Hardware .

අපිට ජීවිතයේ පල හොඳට භුක්ති විඳින්න නම් මේ දෘඪාංග හොඳට නිරෝගීව පවත්වාගෙන ‍යන්න අවශ්‍යයි! ඒකට මහන්සි වෙන්න ඕන . නිකම් හිටියට මොකුත් වෙන්නෙ නෑ. ව්‍යායාම් කරල මාංශපේෂි ශක්තිමත් කරගෙන, බඩ අඩුකරගෙන , නිසි ආහාරපාන අරගෙන, වගේ. මේ සියලුම අංගෝපාංග හොඳට රැකබලාගන්නා ක්‍ර්‍රමයක් අපිටම කියල හදාගන්න වෙනව.

එහෙම හොඳට නඩත්තු කරගෙන ගියොත් මේ අපිට ලැබිල තියෙන දෘඪාංග සැලකියයුතු කාලයක් කරදරයක් නැතුව භාවිත කරන්න පුලුවන් . අද මම රූපවාහිනී වැඩසටහනකක් දැක්ක. ඒක වයස අවුරුදු 100 ට වඩා වැඩි අයගේ ධාවන තරගයක් . ඒ අය හොඳට දිව්ව!

මේකෙන් කියන්නෙ මේ අපිට ලැබිල තියෙන්නෙ හොඳට නඩත්තු කලොත් අවුරුදු 100 ක් උනත් පාවිච්චි කරන්න පුලුවන් ඉස්තරම් වර්ගයේ දෘඪාංග !!

2 මෘදුකාංග ( Software )-:

දෘඪාංග හොඳට තිබ්බට වැඩක්ගන්න බෑනෙ හොඳ මෘදුකාංග නැත්නම් . ඒව යාවත්කාලීන කරල අපේ දියුණුවට යොදාගන්න පුලුවන් විදියට තියෙන්න ඕන .

අපේ ජීවිතයට අදාල මෘදුකාංග මොනවද? අපේ දැනුම, ආකල්ප , සිතුම්පැතුම්, අගයයන් , සිරිත්විරිත් , හැසිරීම් ඔය වගේ දේවල් . දැන් අතපය ඔලුව හරියට තිබ්බට වැඩක් නෑ තැනකට ගිහින් එතෙන්ට ගැලපෙන විදියට හැසිරෙන්න දන්නෙ නැත්නම් . ඒ වගේම තමන් ගැන, තමන්ගෙ අසල්වැසියන් , ජීවත්වන සමාජය , පරිසරය ගැන තියෙන්නෙ මොනවගේ ආකල්පයක් ද , අවබෝධයක්ද කියන එකත් හරිම වැදගත් !

මේ මෘදුකාංග කාලීනව වෙනස්කරන්න ඕන දෙයක් . නමුත් ඒ කලින්ට වඩා යහපත් ජීවන තත්ත්වයක් ඇති කරගන්න මිසක් ආපස්සට යන්න නෙවෙයි .

3 සම්බන්ධතාජාලය ( Network )

පරිගණකයක් ඒකෙ ප්‍රශස්ත ධාරිතාවෙන් ක්‍රියාත්මක කරන්න යම් ජාලයකට සම්බන්ධ කර තිබීම ඉතාම වැදගත් වෙනවා.

ඉතින් අපිටත් ඒ වගේ ජාලසම්බන්ධතාවලින් තොරව අද ජීවත්වෙන්න බෑ. ගෙදර සාමාජිකයින්ගෙන් පටන් අරන් මුලු ලෝකෙම අද අපේ ජීවිතයට සම්බන්ධ වෙලා. ඉතින් මේ කියන සම්බන්ධතාජාලය ඉතා හොඳින්, ප්‍රවේශමෙන් පවත්වාගෙන ‍යන්න අපි දැනගත්තොත් අපිට දියුණුව කරා පියනගන මගට ඒක ලොකු ආලෝකයක් ගෙනදෙනව.

ඒ ජාල සම්බන්ධතාවය මනාව පවත්වාගෙන යන්න අපි ඇද තිබෙන රැහැන් හොඳින් නඩත්තු කරන්න ඕන . වයිෆයි තියෙනවනම් හරියට කනෙක්ට් කරගන්න ඕන. ඒ වගේ ජීවිතේ අපිට සම්බන්ධ අය එක්ක සම්බන්ධතා නොකැඩී පවත්වාගෙන යන්න ඒව නිරතුරුවම ශක්තිමත්ව නඩත්තු කිරීම අත්‍යවශ්‍යයි. ඒකට අපිට ඒ අයගෙ සිතුම් පැතුම් , ඕනෑ එපාකම් ගැනත් අවධානයෙන් ඉන්න වෙනව.

අපේ මිතුරු ලැයිස්තුවේ ඉන්න අය අපේ පෝස්ට්වලට ලයික් කමෙන්ට්ස් දාල නෑ කියල නෝක්කාඩු කියන අය ඒ මිතුරන් කීදෙනෙකුට අඩුම ගානෙ උපන්දින සුබපැතුමක් වත් යැව්වද? ඒ වගේ තමන්ගෙ බිරිඳගෙන් , සැමියගෙන්, දරුවන්ගෙන් සැලකිලි බලාපොරොත්තුවෙන අය කීදෙනෙක් ඒ අයගෙ ඕනෑ එපාකම් හොයල බැලුවද?

මේ ජාලසම්බන්ධාතාව පවත්වාගෙන යනකොට අපිට විවිධ ගැටලුවලටත් මූණ දෙන්න වෙනව. ඒ ජාලයන් දිගේ නොයෙකුත් වයිරස්, අපිට අනවශ්‍ය දේ එන්න ගන්නව. ඉතින් මේවයින් හොඳ දේ තෝරාබේරාගෙන භාවිත කරන්න පුලුවන් විචාර බුද්ධිය වර්ධනය කරගෙන ඉන්න ඕන අනිවාර්යයෙන් ම. පරිගණකයක නම් වයිරස් ගාඩ් , ෆයර් වෝල් වගේ.

ඒ වගේම වැදගත් දෙයක් තමයි තමනුත් අනුන්ට වයිරස් එකක් නොවී සිටීම.

4 මතක ගබඩාව

අපි අපේ මතක ගබඩාවෙ තියෙන්න ඕන මොනවද? අයින් කරන්න ඕන මොනවද? කියල බොහොම කල්පනාකාරී වෙන්න ඕන. නැත්නම් ඒ මතක හිරවෙලා ,ඕවර්ලෝඩ්වෙලා ,අපිව ස්ටක්වෙන්න පුලුවන් . අපේ පැරණි මතකයන් නිසා සමහරවිට එදිනෙදා වැඩ කරගන්න බැරි මට්ටමකට එනව කියන්නෙ ලොකු ගැටලුවක්!

ඉතින් මේ විදියට බැලුවම අපි භාවිත කරණ පරිගණකය ජීවිතයට පාර කියන උපකරණයක් කරගන්න පුලුවන් කොයිතරම් වටිනා දෙයක් ද?

මේක අපිට විතරක් නෙවෙයි විශේෂයෙන් ම අපගේ දරුවන් සමාජයට හුරුකිරීමේදීත් ඉතාම වැදගත්!

( මගේ කාර්‍ය මණ්ඩලයට මන් කියපු කතාවක්)