මාගේ සැමියාගේ භෞතික විද්‍යා දැනුම පවතින්නේ ඉතා ඉහළ මට්ටමකය.උන්දෑගේ මේ දැනුමේ ආනිසංස ගෙදර වතුර බටයක් පුපුරා ගිය තැනේ සිට නිදන ඇඳේ මදුරු දැළ සවිකර ගැනීම යනාදී මෙකී නොකී බොහෝ අවස්ථාවන්හිදී මා හට අත් දකින්නට ලැබී ඇත. ඒ කෙසේවෙතත් මා සිටින්නේ මුන්දෑගේ ඔය මහානර්ඝ උපාධියට ෆිසික්ස් උගැන්වූ ගුරුතුමා මුණගැහෙන තුරුය. අනේ එතුමාගෙන් අසා ගතයුතු කාරණය වන්නේ මුන්දෑ මට මෙන් එතුමාටත් ෆිසික්ස් ඉගැන්නුවේද යන්නයි.නොඑසේනම් එතුමාට පවුල් ජීවිතය හා ෆිසික්ස් සමානුපාතික නොවන බවට ඇති නියමය නොඉගැන්වූයේ ඇයිද යන්නයි.
ඒ කෙසේ වෙතත් මාගේ සදාදර සැමියා ඉත සිතින් මට ගේදොර වැඩපලට දක්වන සහයෝගයනම් ඉස්තරම්ය.
එදින සෙනසුරාදාවක් බැවින් අදිමදි කරමින් කන් කෙඳිරි ගාමින් මා රැකියාවට ගියේ මුන්දෑ ගෙදර සිටිද්දී මට පමණක් එදින වැඩ කිරීමට සිදුවීම අසාධාරණ බවට දෙස් තියමිනි.මන්ද මට නොමිලේ ලැබෙන ප්‍රවාහන පහසුකම උන්දෑ ගෙදර සිටීමෙන් අහිමි නිසාය.
දවල් කෑම භාගෙට සාදා ගියෙන් පැමිණි විගස ඔම්ලට් සෑදීමට සැරසුනත්
සැමියා – ආ කන්න එන්නකෝ..ඔම්ලට් මම හැදුවා
මම – ශා නියමයිනෙ.හරි බඩගිනි අනේ කමු.
ෆ්‍රයි පෑන් එක පියන හැර බැළූ මට ඔම්ලට් දෙකක් එහි තිබෙණු දුටු මුත් හැන්දත් එහිම තිබෙණු දක්නට ලැබිණි.
මම – මේ මොකද ඒයි ඔම්ලට් එක තැන් තැන් කළු පාට තිත් වගේ ?
සැමියා – ඒකතමයි මාත් දැන් දැක්කෙ.ඔයාගෙ හැන්ද නිසා.
මම – මොකක් මේ හැන්ද පොතු ගැලවිලා ඔම්ලට් එකෙ ඇලිලනෙ.
සැමියා – ඔව් නේද..? (විශ්මයෙන්)
මම – ඉතින් ඇයි හැන්ද රස්නෙ පිටින් පෑන් එකේ තිබ්බේ ?
සැමියා – ඇයි ඔයා දවසක් කිව්වෙ ඒ හැදි හීට් රෙසිස්ටන්ස් (තාපයට ඔරොත්තු දෙනවා) කියලා.
මම – ඇයි අනේ එහෙම කිව්ව කියල හැන්ද ලිපේදාලා උයනවයෑ. (රවාගෙන)
සැමියා – තාපයට කියන්නෙ ඉතිං ගින්දරත් තාපය නැතුව මොන ඉටිගෙඩියක්ද.
මම – ඒ කියන්නෙ සෙල්සියස් 60 විතරනෙ.මෙහෙම ඒකෙම තිබ්බම හරිද.ඒක ජෙනරල් නොලේජ්.
සැමියා – ඕකනෙ ගෑනුන්ට වැඩිය උදව් කරන්න හොඳ නෑ. වඳින්න ගිය දේවලෙ ඉහට කඩන් වැටෙනවා.
ඔම්ලට් සහ හැන්ද දෙකම අහිමිව පෑන් එකද පණ නහගෙන සෝදාහැර ෆිසික්ස් වලට දෙස් දෙමින් භාගෙට කෑවා රසවතුනි පිඟානට ඔරවගෙන.
උපුටා ගැනීම: Hasitha Eranganie