සෑහෙන කාලයක් ගෙටම කොටු වෙලා හිටි අපි කාලෙකට ඉස්සරලා තවත් පවුලක් එක්ක එකතුවෙලා පොඩ්ඩක් එළි පහළියට ගියා.
සමාජ දුරස්ථභාවය ගැන හිතලා කවුරුත් ලඟ පාතක නැති ලස්සන තැනක් හොයාගෙන ගිමන් නිවන ගමන්, ටිකක් වටපිට බැලුවා.
ග්‍රීෂ්ම කාලෙ නිසා පරිසරය බොහොම කර්කෂයි. මහා විසාල ගස් කොල පාටට ලස්සනට තිබුනට පොඩි පොඩි පඳුරු, තණකොල එහෙම වේලිලා ගිහිල්ලා.
නමුත් ඒ අතරෙ තැන් තැන් වල ලස්සන රෝස පාට මල් වර්ගයක් පිපිලා තිබුණා. ලස්සනේ බෑ!
හැබැයි මල් තිබුණට පැලයක් පේන්නත් නෑ. ඈතට පේන්නෙ නිකං හරියට කවුරු හරි ඇවිත් තැන් තැන් වල මල් ගහලා ගිහිල්ලා වගෙයි.
ටිකක් විපරම් කරනකොට දැක්කා පැලේ කොල වේලිලා බිම දිගා වෙලා, නමුත් මල් ලස්සනට හිනා වෙනවා.
මම මීට ඉස්සර කවදාවත් මේ මල් වර්ගය දැකලා තිබුණේ නෑ. දුවලා ගිහින් පින්තූර ටිකක් අරන් ආවා.
“මොකක්ද මේ මල් වර්ගය?”
ගහ කොල සතා සීපාවා ගැන හොඳට දන්න යාලුවෙකුට පින්තූරෙ යැව්වා. ටිකකින් උත්තරේ ආවා.
“මම හිතන්නේ නේකඩ් ලේඩි මල්!”
නේකඩ් ලේඩි මල්!අමුතු නමක් නොවැ!
කොච්චර වුනත් සහතික කරගන්න එපායැ. අනික ඇයි මෙහෙම නමක්?
ඔක්කෝම දැනගන්න හිතාගෙන ‘ඉමේජ්’ දාගෙන ‘ගූගල්’ කලා.
Naked lady………
අන්තර්ජාලයේ වචන ටයිප් කරන විට එක වචනයක් ඇති ඔක්කෝම කණපිට පෙරලෙන්න.
මගෙ දෙයියනේ!’ඉමේජ්’ දැකලා මට දවල් තරු පෙනුනා.
පොඩි කෙල්ල එහා පැත්තෙ මේසෙට වාඩිවෙලා බත් කනවා.කොම්පියුටරේ ‘ඩිලීට් බට්න්’ එකක් තියනවා නේද කියලා මතක් වුනෙත් ටික වෙලාවකට පස්සෙ.
අප අවට ළමයින් සිටින විට අන්තර්ජාලයේ වචන ටයිප් කරන විට අපි බොහෝම පරිස්සම් වෙන්න ඕනේ.
විශේෂයෙන් ‘ඉමේජ්’ දාගෙන ‘ගූගල්’ කරනකොට!
දරුවන්ට නුසුදුසු හා අවදානම් රූප අන්තර්ජාලයේ එකවරම ප්‍රවේශ වෙන්න පුලුවන්!
අන්තර්ජාලයේ අන්තර්ගතය වර්ග කර නොමැති නිසා අපට නොදැනුවත්වම දරුවෙකුට මානසික වශයෙන් හානිකර විය හැකි ලිංගික රූප වගේම, අතිශය ප්‍රචණ්ඩකාරී හෝ නුසුදුසු අන්තර්ගතයන් ඒ තුලින් මතුවෙන්න පුලුවන්!
දරුවන්ට අන්තර්ජාලය භාවිතා කරන්න දෙනවිටත් අපි බොහෝම සැලකිලිමත් වෙන්න ඕනෙ.
මේ දිනවල ඉගෙන ගැනීමට මෙන්ම මිතුරු මිතුරියන් සමඟ සම්භන්ධ වීමටද අන්තර්ජාලය අපූරු ස්ථානයක්!
ඒත් අවාසනාවට අපට, දරුවන්ට හානි කිරීමට හැකි දේත්‍ අන්තර්ජාලයේ අන්තර්ගතයි. ඒ නිසාම මේ අන්තරායන් පිළිබඳව දැනුවත් වීම ඉතා වැදගත්‍.
ඒක එහෙමයි කියමුකෝ!
ඒත් හැබෑට මොන එකට මේ වගේ නම් මල් වලට දානවද?
ඔය පහලින් තියෙන්නේ මම ගත්ත පින්තූර.
උපුටා ගැනීම: Sripali Kotuwella