පිරිසිදු කරන ලදී (වැල් වටාරම්)

ඉතින් මම උදේ පාන්දර 6.30 ට ගෙදරින් එලියට බැස්සෙ මගේ සේවාස්ථානයට යන්න. මම වැඩ කරන ගොඩනැගිලි පරිශ්‍රයෙ අද අලුත් ගොඩනැගිල්ලක් විවෘත කරනව. හරියටම උදේ 9.00 වෙනකොට ඒක පිරිසිදු කරල පිලිවෙලට තියන එක අද මගේ ප්‍රධාන රාජකාරිය.

රථගාලට ස්කූටර් එක ඇතුල් කරල කාර්යාලයට යනකොට 6.50යි. අපි හතට වැඩ පටන් ගන්නව. කාර්යාලයේ තියෙන්නෙ පොඩි ඉඩකඩක්. පරිශ්‍රයෙ සිතියම, දෛනික පිරිසිදු කිරීමේ නාමාවලි වගේ ලියකියවිලි ඇරුනම වැඩි ඉඩකඩක අහුරල තිබුනෙ පිරිසිදු කිරීමේ උපකරණ. කොසු, ඉදල්, වයිපර්, මොපර්, ටොයිලට් පේපර්, ටිෂූ බන්ඩල් බොහොම පිලිවෙලට අසුරල තිබුන. ඉතින් මම මොපර් එකයි බකට් එකයි ටයිල් පිරිසිදු කරන දියර බෝතලයයි අරගෙන නාමාවලියෙ ලකුණු කරල අත්සනක් දැම්ම. බඩු ටිකත් අරන් කෙලින්ම විවෘත කරන ගොඩනැගිල්ල පැත්තට ගියා. හතට පටන් ගත්තෙ නැත්නම් වෙලාවට ඉවර කරන්න අමාරුයි.

මගදි හම්බුනේ මගේ බොස් නිහාල්

“ගුඩ් මෝනින් ටයිටස්..”

“ගුඩ් මෝනින් නිහාල්..”

“ටයිටස්, වීදුරු ටිකත් ආය පිහදාන්න වෙයි..දූවිලි හිටල.. අලුත් ලික්විඩ් එක වැඩක් නෑ ආයමත් පරණ එකට මාරු වෙන්න වෙනව..”

“ඕකේ බොස්..ෂුවර්” මම උත්තර දුන්නෙ ගමන ඉක්මන් කරන ගමන්

මාව පහු කරගෙන ගිය නිහාල් ආපහු හැරුන..

“ටයිටස්..තත්පරයක්”

“ඔව්”

“ටයිටස්..අද දුවගෙ උපන්දිනේ..හවස පොඩි‍යට ටී පාටි එකක් තියනව ගෙදර. ඔයා හවස ෆ්‍රීද?”

හවස වැඩ කීපයක්ම යොදාගෙන තිබුනත් බොසාගෙ මූනෙ තිබුනෙ ආයාචනාත්මක බැල්මක්.

“අනිවාර්යයෙන් නිහාල්..තෑන්ක්ස් මට ආරාධනා කලාට”

ජනිතාව මට මුනගැහුනෙ දොර ළඟදි. ඇය හිටියෙ අතුගාපු කොල පිරුණු ට්‍රොලියක් තල්ලු කරගෙන එන ගමන්.

“ගුඩ් මෝනින් ජනිතා..අද ඔයා කලින්ම ඉවර කරල”

“ගුඩ් මෝනින් ටයිටස්..මම ඔයාගෙ ඒරියා එකත් අතුගාගෙන ආව..කෙලින්ම ගිහින් මොප් කරන්න තියෙන්නෙ”

“ඔයා නියමයිනෙ..මේවට අපි සලකනව”

ඉතින් මම මොප් කරන්න පටන් ගත්ත. ටයිල් මොප් කිරීම කියන්නෙ එක්තරා විදිහක කලාවක්. ඒක හැමෝටම හොදට කරන්න පුලුවන් දෙයක් නෙවෙයි. පිරිසිදු කිරීමෙ දියරයයි වතුරයි හරි අනුපාතෙට මිශ්‍ර වෙන්න ඕනි. වතුර වැඩි උනොත් හොදට පැල්ලම් යන්නෙ නෑ දියරෙ වැඩි උනොත් ඒක යවන්න වතුර ගොඩක් වැය වෙනව. එතකොට ඒකක වර්ගඵලේකට යන වියදම වැඩි. ගොඩක් වේගෙන් මොප් කලොත් පැල්ලම් හිටිනව. එක පැත්තක ඉදන් පිළිවෙලට යන්න ඕනි. එහෙම නැති උනොත් අතරින් පතර හිඩැස් හිටිනව. මොප් කරල ඉවර උනාම ඒක කරන කෙනාගෙ අඩි සටහන් තිබුනොත් වැඩේ අසාර්ථකයි. ඒක වෘත්තීයමය පිරිසිදු කිරීමක් නෙවෙයි. වැඩේ ආධුනිකයි. පෙණ ඉතිරි වෙන්න බැහැ. මොපර් එකෙන් හැලුණු නූල්, කෙස්, පොඩි ගල් කැට තියෙන්න බැහැ. ඉතින් වෘත්තීයමය පිරිසිදු කිරීමක් කියන්නෙ සංයමයෙන් ලබාගත්ත පුහුණුවකින් හා පළපුරුද්දෙන් ලගා විය යුතු දෙයක්.

බිම වැඩ ටික ඉවර කරල මම වීදුරු පැත්තට හැරුන. ඊයෙ හවස පිරිසිදු කරල තියෙන්නෙ පුහුණු වෙන පිරිසිදු කරන්නෙක්. එක බැල්මෙන් මම ඒක තේරුම් ගත්ත. හරියට සේදිලා ගියෙ නැති සේදුම් දියර පෙණ පාරවල් වේලිලා හයි වෙලා. ඒව උඩ තුනී දූවිලි ස්ථරයක් තැන්පත් වෙලා. වට දෙකක්ම පිරිසිදු කරන්න උනා සෑහීමකට පත්වෙන්න පුලුවන් නිමාවක් ලබා ගන්න. පුහුණු වෙන කාලෙ මමත් එහෙමයි. එහෙම අයට අවස්ථාව දෙන්න ඕනි. වැරදි වලින් තමයි මිනිස්සු ඉගන ගන්නෙ.

අවසානයේ මම එතන වැඩ ඉවර කලා. මහන්සියක් දැනුනත් වැඩේ ගැන මම තෘප්තිමත්. ඇත්තටම ඒක සාර්තක පිරිසිදු කිරීමක්. දැන් ඉතින් මෙතන විවෘත කිරීමකට වඩා ලොකු උත්සවයකට උනත් සුදුසුයි.

උපකරණ ටික රිටර්න් කරපු මම කැෆටේරියා එක පැත්තට යන්න හැරුනෙ සතුටු සිතින්. කෝපි කෝප්පයක් බීල රී ෆ්‍රෙශ් වෙලා එතන පිරිසිදු කිරීම පටන් ගන්න ඕනි. ඕනිම මොහොතක මම කෝපි කෝප්පෙකට ගොඩක් කැමතියි.

උත්සවය පැය තුනකට වඩා පැවතුනා. පිළිගැනීමේ බෙර හඩවල්. ඝෝෂාකාරී පසුබිම් සංගීතය අස්සෙ කතා කීපයකුත් ඇහුන. කැෆටේරියා එකෙන් පස්සෙ එලිමහන් රග හල. අද මගේ වැඩ ඔක්කොම තිබුනෙ උත්සවයෙන් ඈත. ඒක ලොකු දෙයක්. ඝෝෂාව මට ඒ තරම් ප්‍රිය නැහැ.

ආයෙත් මම විවෘත කරන ගොඩනැගිල්ල පැත්තෙන් යනකොට උත්සවය ඉවරයි. මම ප්‍රධාන දොර ළඟින් යද්දි මන්ත්‍රීවරයා එලියට බහිනව. ආරක්ෂයො කීපදෙනෙක් සහ තව පිරිසක් වටකරගෙන ඔහු ආවෙ මගේ පැත්තට. අධික අව් රශ්මිය ඔහු වෙත ඇති කරල තිබුනෙ වෙහෙසකාරී බවක්. කලු අව් කණ්ණාඩි යුගල ඔහු ඇදල හිටපු ජාතික ඇඳුමට එකතු කලේ නොගැලපෙන බවක්. පැණිවරකයි ලැවරියයි වගේ. ඔහු ස්ථූලතාවය පාලනය කරන්න උත්සාහයක් ගන්නෙ නැති හේතුව මට හිතා ගන්න බැහැ.

“ආ…මෙතුමත් ඇවිත් ඉන්නෙ”

ඇමති වරය අඩියක් තිව්වෙ මගේ පැත්තට

මමත් ඉස්සරහට අඩියක් තියන ගමන් මගේ දකුණු අත දිගු කලේ ඇමති වරයට අත දෙන්න.

“ඔව් මම මෙහෙ…” මම උත්සාහ කලේ මම මෙහි පිරිසිදු කරන්නා බව ඔහුට පවසල ඔහුට කොහොමද අහන්න.

නමුත් ඔහුගේ අව් කණ්ණාඩි පැළඳි දෑස් යොමු උනේ මට ඉහලින් මගේ පිටු පසට.

මගේ පිටුපස සිටියේ කලු කලිසමක් සුදු අත් දිග කමිසයක් ඇදි පුද්ගලයෙක්. දත් දෙපළම කටින් එලියට එනකන් හිනා වෙමින් සිටි ඔහුගේ පරගැති පෙනුම ඔහු පැළඳි මහත ටයි එකට ගැලපෙන්නෙ නෑ කියල මට හිතුන. මන්ත්‍රී වරය ඉස්සරහට ඔහු පැන්නෙ මාවත් පැත්තකට විසි කරගෙන. මන්ත්‍රී වරයට මීටරයක් ඈතින් නැවතුන ඔහු ඉස්සරහට නැවිල කොන්ද පාත් කරන කොට ඉදිරියට නෙරපු ඔහුගේ බඩ එල්ලුනේ බිමට වැටෙන්න වගේ.

“සර්ට මහන්සි පාටයි”

“අනේ ඔව් අබේනායක. විවෘත කරල හරි මහන්සියි”

පිරිස සමග මන්ත්‍රීවරය ඉදිරියට ඇවිදගෙන ගියා. අබේනායකත් ඒ එක්කම තව මොන මොනවදෝ කියමින් හරි හරියට ගමන් ඇල්ලුවෙ හරහට කකුලුවෙක් වගේ.

මන්ත්‍රී වරයට විවෘත කරල මහන්සියි. යන ගමන් කූල් මොනව හරි බොයි. රස්නෙ වැඩි දවාලට හැමෝටම කෝපි කෝප්පයක් ගැලපෙන්නෙ නෑ.

******************

රථගාලෙන් ස්කූටර් එක අරගෙන මම පිටත් උනේ දවල් කෑමට එලියට යන්න. අලුත් ගොඩනැගිල්ල ඉස්සරහින් යන ගමන් අලුතින් හයි කරල තිබුන ඵලකය කියවන්න මම ටිකක් නැවතුනා.

අතිගරු රාජ්‍ය අමාත්‍ය

නිලන්ත ප්‍රියලත්

මැතිතුමාගේ උපදෙස් පරිදි,

ගරු ඉදිකිරීම් අමාත්‍ය

නලීන් චින්තක ගොඩගේ

මැතිතුමාගේ මග පෙන්වීම යටතේ,

ගරු පාර්ලිමේන්තු මන්ත්‍රී

ක්‍රිස්ටීන් තෝමස් ජයසේකර

මැතිතුමාගේ අධීක්ෂණයෙන්,

ගරු පළාත් සභා මන්ත්‍රී

ඉරෝශන කොතලාවල

මැතිතුමා විසින්

විවෘත කරන ලදී

ඉතින්, මම හිතුව මගේ ඵලකයත් හයි කරන්න.

පිරිසිදු කිරීම් අධීක්ශක

නිහාල්

මහතාගේ අධීක්ෂණය යටතේ,

පිරිසිදු කිරීමේ නිලධාරිණී

ජනිතා

මහත්මියගේ සහයෝගයෙන්,

පිරිසිදු කිරීමේ නිලධාරී

ටයිටස්

මහතා විසින්

පිරිසිදු කරන ලදී

හැබැයි ඒක හයි කලේ මගේ හිතේ.

දවල් කෑමට කලින් තව කෝපි කෝප්පයක් ගන්න ඕනි. සමහර කෝපි වර්ග පාට හොද උනත් රස නෑ. බර මදි. දැනෙන්නෙ නැහැ. ප්‍රමිතියෙන් අඩුයි. තව සමහර කෝපි වර්ග උසස්. බරයි. ප්‍රමිතියෙන් වැඩියි. රසවත්.

මම වෘත්තියමය පිරිසිදු කරන්නෙක්. (a professional janitor)

සියලු නම් ගම් මනඃකල්පිතයි

උපුටා ගැනීම   -මලිත නිමාන් ජයන්ත-