පොඩිකාලෙ ඉඳලම ප්ලේන්ටිය එක්ක මගේ තියෙන්නෙ ආද්‍යාත්මික බැඳීමක්. වෙන කිසිම පුරුද්දකට වඩා මගේ ජීවිත කාලෙම ආව එකම පුරුද්ද සැර කෑම වේලක් එක්ක ප්ලේන්ටිය. කන ගමන්ම බොන්න ඕන. කාල ඉවරවෙලා නෙමෙයි
ඉස්සරම ගෙදර ඉන්න පොඩි කාලෙ දවල් කෑම එක කන්න පටන්ගන්නෙ අම්මට කියල ප්ලේන්ටියක් හදාගෙන. අම්ම තමයි මේ පුරුද්ද මට නැති නොකර ඉතුරුකරපු පව පුරව ගත්තෙ. එදා එපා කිව්වනම් අද මේ කතාව නෑ
ඊට පස්සෙ කැම්පස් එකේ කැන්ටින් එකේ බත් පෝලිම. රුපියල් පහලවේ බත් එකට රුපියල් දෙකේ ප්ලේන්ටිය අනිවාර්යයි මට. සකන්ඩ් ඉයර් එක වෙනකොට කැන්ටින් අක්ක මන් එනකොට බත් පිගානට අමතරව ප්ලේන්ටිය රෙඩි කරල තියනව. ප්ලේන්ටි මල්ලි. ඒ අක්ක ආදරේට මට කියපු නම.
කැම්පස් එකේ දවල් දහයට විතර බොන ප්ලේන්ටිය බැදපු මාලු කූරියෙක් එක්ක බොන්න බැජ් එකේ උන්ට පුරුදු කරේ මන්. කොහොමද මාලු කූරියෙක් හප හපා ප්ලේන්ටි ගහන කොල්ලො ඉන්න ටේබල් එකක් කැන්ටිමට දෙන ආලෝකෙ.
රුහුණු කැම්පස් එකේ සහ මාතර අය දන්නව ඇති මයුර එක බීච් රෝඩ් එකේ. ඒකෙන් අඩුම මාසෙකට සැරයක් අපෙ උන් ටික ගිහින් කෑමක් කාල එනව රෑට. ඒ කද්දි ප්ලේන්ටි දෙකක් ඉල්ලගන්න එකම එකා මම.එකකින් ඩිනර් එකක් ගොඩ දාන්න බෑ.
අම්මට බැරිවුන පුරුද්ද යටපත් කරේ ප්‍රියම්බිකාව. දවල් කෑම එක එක්ක ප්ලේන්ටිය තහනම්. අවසානෙ ඒ ප්ලේන්ටි බීම කඩේකින් කන කෑම වේලකට සීමා කරන්න එයා සමත් උනා. බඳින්න එපා යකුනේ උඹලට ප්ලේන්ටියක් වත් බොන්න වෙන්නෙ නෑ හිතේ හැටියට.
බින්තැන්නෙ හත්පත්තුවෙ වෙච්චි අපි ඉතින් හිටි හැටියෙ ඔය කොහෙහරි ගියාම ටිකක් නමගිය රෙස්ටොරන්ට් එකකින් එහෙම කන්න ආසයි. ලොකුකමකට නෙමේ. පෙරේතකමට. කෑම බන්දේසි ටික එහෙම ටේබල් එකට ආවම මම අහනව
“මල්ලි,ප්ලේන්ටියක් ගන්න පුලුවන්ද??”
ඌ උඩබිම බලනව. ඌට ශුවර් නෑ. ආය අහනව මොකක්ද කියල.
ඊටත් පස්සෙ අහනව කාල ඉවරවුනාම නේද ඕන කියල.
“නෑ නෑ.දැන් ගේන්න. කන ගමන් බොන්න ඕන.”
මෑන් ඔලුව කස කසා ගිහින් ප්ලේන්ටි ගේනව. වතුර උනුකරවලා හරි ප්ලේන්ටියක් හදාගන්නව.
සමහර හොටෙල්වල අනෙක් කන බොන උන් පෙප්සි, කොකා කෝලා, ජින්ජර් බියර් බිබී කනකොට ප්ලේන්ටියක් බිබී කන මන් දිහා අමුතු විදියට බලනව. ඉතින් මගෙ මොකෝ.
පහුගිය වසරාවසාන සතියෙ එක දිගට මට නයිට් ඩියුටි සෙට් උනා. ඒ නිසා ඒ හැම හවසකම බැජෙක් එක්ක ගිහින් ෆ්‍රයිඩ් රයිස් පාරක් දැම්ම. පිට පිට දවස් දෙකක් ඒ දාල දුන්න ප්ලේන්ටිය පොඩි නිසා දෙවනි ප්ලේන්ටියකුත් දාගත්තා. තුන්වෙනි දවසෙ මෙන්න මට ලොකු කෝප්පෙක ප්ලේන්ටියක්. අන්න නියම ජයග්‍රහණ.
හොඳම ජයග්‍රහනෙ ඒක නෙමේ දැන් කෑමට එලියට ආවම ප්‍රියම්බිකාව කියන දේ තමා වටින්නෙම.
“ඒයි, මටත් ප්ලේන්ටියක්”
(උත්සාහ කරන්න හිතවතුනි. කුජීත පුරුද්දක් උනාට රයිස් ඇන්ඩ් කරි එක්ක ප්ලේන්ටියක් පට්ටයි. ඒ වගේම ඔයාගෙ කුජීත පුරුද්ද ලියල යන්න. මාත් ට්‍රයි කරන්නම්)
උපුටා ගැනීම: සයුරු ආමන්ත