මේ කියන්නහදන්නෙ අපේ ගෙදර ඉන්න ජීවීන් හතර දෙනාගෙන් පොඩිම ජීවියා ගැනයි. ඔහු හරිම හුරතලෙකි, දගයෙකි,සමයමකි. කොහොම හරි මගේ ප්‍රථම රාජකාරිය නම් ඔහුව බලාගැනීමයි. ඔහු කිව්වට එයා අවුරුදු තුනක් වත්නැති චූටි කොලු පොඩ්ඩෙකි. ඔහුට පණ මෙන් ආදරය කරන තුන් දෙනෙකි. ඒ අම්මා තාත්තා සහ අක්කා ය. අක්කා නම් බොහොම හොද ආදර්ශමත් දරුවෙකි. ඒකටත් හරියන්න මල්ලි! ඉතින් ඔන්න මේ සමයම උදේ 7 ට පමණ ඇදේ ඃ රෙදි ඔක්කොම දිය බත් කොට හොදට සනීපෙට අවදි වේ. ඒ වෙලාවට මා මාගේ සියලු වැඩ අ‍තහැර ඔහුව නැලවීමට සැනසීමට සැදී පැහැදී සිටිය යුතුය. නැතිනම් ඔහු අප සැමගේ දවස හොද හැටි අවුල් කොට දැමීමට සමතෙකි. කුක්කු උගුරක් නොබී ඔහුට දවස සුබ වන්නේ නැත. ඔයලෙස දවස අරඹන මේ සමයම පලමුව අසල්වාසීන් අවදිව සිටී දැයි විමසා බැලීමට වැට අසලට යයි. “නැන්දේ නැන්දේ ගුම්මෝනින්” “ආ පැටියෝ ඔයා නැගිට්ටද? ඊයේ ලස්සන හීනයක් හෙම දක්කද?’ “ආ ඔව් ඔව්. මම දැක්කා ලොකු ටලගොයෙක් (ත තවම කියාගත නොහැක) මගෙ පස්සෙන් අවා.(ඔන්න නිර්මානාත්මක මනෝ ප්‍රබන්ද ගෙතීම පටන් ගත්තා. ඒ වයසෙ හැටිය.) මම පණ කඩාගෙන දිව්වා”
” ඇත්තද? ඉතින් ඉතින්” ඔහුගේ අල්ලපු ගෙදර නැන්දා තව තව පෝර දමයි.
ආ ඔකු අක්කේ කෝමද?
නැන්දගෙ ලොකු දුව දොරෙන් එබෙනු දකින ඔහු ඇයවද සබයට කැදවා ගනී.
“ඉටින් ඔන්න එක පාලටම හූනෙක් දුවගෙන ගීල්ලා දබොක් ගාලා ලිදට වැන්නා”
ඈ චූටියෝ ඔයාගෙ තලගොයා එකපාරටම හූනෙක් උනාද?
ඒ චූටි අක්කාය. දැන් සබයට අඩුවට ඉන්නේ මාමා පමණි. කොහොමහරි තම අසල්වැසියන් විනෝද සාගරයක ගිල්වමින් සිටියදී මේ සමයම මහා හඩින් කෑ ගසන්නට පටන් ගත්තේ නැතෑ.
“අයියෝ නැන්දේ නැන්දේ ඔය ඔය ඔයාගෙ ඉට්ටලා දට්ටික නෑනේ “
හක හක ගා සිනාසෙමින් හිටි නැන්දා කට අතින් වහගෙන ගෙතුලට පැන ගත්තේ තවත් මෙතන හිටියොත් කොලුවාගේ ඊයේ තිබී අද වෙන විට අතුරුදහන් වූ දත් සැට් එක පිලිබද ප්‍රශ්න පත්‍රයට මුහුණ දීමට බැරුවය.
“අපි දැන් බත් කන්න යමු “යි පවසා ඔහුව ඔසවාගෙන මමද ගෙට පැන ගත්තේ අසල්වාසීන් අමාරුවේ නොදමිය යුතු නිසාය. දවල් තිබී රෑට ඇද ලග තිබෙන ලුණු වතුර කෝප්පයට බහින නැන්දාගේ ඇවිදින දත් සැට් එක ගැන බත් කට කට කවමින් අපෙ චූටි සමයමට සෙමෙන් පහදා දුන්නෙමි.
එදා සිට හැමදාම නැන්දගේ දත් සැට් එක තිබේ දැයි ඔහු පරීක්ෂා කර බලයි. අල්ලපු ගෙදර ආදරණීය නැන්දාද එදා පටන් තම දත් සැට් එක උදේම දා ගැනීමට අමතක නොකරයි.
මෙසේ දවස පුරාම සමයන් වැඩ තොගයක් කර රත්‍රී 8ට පමණ නිදි මත වී බෙරිහන් දීමට පටන් ගනී. එවිට නම් අම්මා තාත්තා අක්කා යන සියල්ලෝම එකතු වී මහා යුද්ධයක් කර දත් මැදීම හා ඇග සේදීම කර ඔහුව නිදි කරවීමට සූදානම් කරයි. අවසානයේ කුක්කු උගුරක් හා නැලවිලි ගීයක් අසමින් මුලු ගෙදරම සන්සුන් කරම්න් ඔහු නිදන්නට වේ.
“ඇති යන්තම් සමයම නිදා ගත්තා” පියකරු සිනාවක් මුවේ රදවා නිදන සමයම දෙස බලා සමයමගේ තාත්තා සැනසුම් සුසුමක් හෙලන්නේය.
උපුටා ගැනීම: Nilwala Athapattu