ඔන්න දවසක් අපි යාළුවෙකුගෙ මඟුල් ගෙදරක ගිහින් හාල හාල යක්කු ගස් නැඟලා යකින්නියො එක්ක පෙම් කෙළින වෙලාවෙ ආයේ ගෙදර එන්න දඬු මොණර යන්ත්‍රයට නැඟල ටික දුරක් එද්දි තමා මතක් උනේ අඩේ අද නේද සන්ෆ්ලවර්ස් සංගීතෙ කියල.
” මොකද කියන්නෙ යමුද සංගීතෙ බලන්න “
එකෙක් දැම්ම යෝජනාවට හැම එකාම අත් දෙකම උස්සලා ඒකමතිකව ස්ථිර කිරීමෙන් ගෙදර යෑම පැත්තක තියල සංගීතෙ බලන්න යන්න තීරණය කලා.
මේ දෙගොඩ හරි ජාමේ ගිහින් ගෙදර අය අහරවන එක මහා අකුසලයක් නිසා මිසක් සංගීතයක් බලන්න කිසිම අදහසක් තිබුණෙ නෑ.
” යකෝ තෝ ඕක අරූගෙ වෙඩිමෙදි මතක් කරන්න එපැයි දැන් ගහපුවත් බැහැගෙන එන්නෙ අමුවෙන් වගේ ගිහින් කොහොමද යකෝ සංගීත බලන්නෙ “
දිම්ම ගෝරනාඩු කලේ සාධාරණ කේන්තියෙන්.
” මෙහ් මා ළඟ නම් තුන් කාලකට ටිකක් අඩුවෙන් තියෙනවා මොකද කියන්නෙ ඒකවත් ගහමුද “
” තුන් කාලක් මොනව කරන්නද යකෝ අට දෙනෙක්ට හලපන් ඕක ආන් අර බෝක්කුවට ” කියල දිම්ම හසියට කිව්වා.
ලස්සන බෝක්කුවක් දැක්කම සාම්ප්‍රදායික චාරිත්‍ර ඉස්ට කිරීම පුරාණයේ සිට පැවත එන සංස්කෘතික අංගයක් හින්ද තමා දඬු මොණර හතර බෝක්කුව උඩම නවත්තලා අට මහා දිය ඇල්ලෙන් ගලා ගෙන ගිය ජල දහරාවෙන් දොළේ ජල කදට පුළුවන් ශක්ති ප්‍රමාණයෙන් දායක උනේ..
” ගනින් අර තුන් කාල බෝක්කුව උඩම තියාගෙන ගහමු කිව්ව දිම්ම හරි බරි ගැහිල ඉඳ ගත්තා බෝක්කුව උඩම. කෝ යකෝ වීදුරුවක් කෝප්පයක් අහද්දි මේන් විප්පගෙ සාක්කුවෙන් මතු උනා වෙඩිමෙ තිබ්බ වගේම වීදුරුවක් ඒ මල් රටාමයි ඒ වීදුරුවෙත් තිබ්බෙ. ඌ ගෙදරින් ගෙනාපු එකක් බං නැතුව වෙඩිමෙන් උස්සපු එකක් නෙමේ. සත්තම සත්තයි මැරිච්ච ආරොං සීයා පල්ලා.
සනිකව ළඟ නවල එක වටයයි ගියේ ජගතා ගියා උගෙ දඩු මොණරෙ ලඟට ගිහින් එද්දි වෙඩිමෙ කෑම මේසේ බිලි බබා හිටිය මනුස්සයයි අනිත් අතින් තව තුන් කාලකුයි වැඩම්මුව බෝක්කුව උඩට.
උඹල හිතුවද මාත් සෙකන්ඩ් වෙයි කියල පිස්සුද බං මගෙ දඬු මොණරෙ තිබ්බෙ ෆුල් එකක්……
භාග තුන් කාල වැඩ මගෙ නෑනේ. මගඳි ගහපන් කියල මනමාලයමයි දුන්නෙ හාපු හෑම ඌට ඒ තරමට සංතෝෂයට කාරණාවක් වෙලා තිබ්බා.
තුන් කාල එකයි තුන් කාල වෙලා අනිත් එවුන්ගෙ සාක්කු අස්සෙන් තව තව සූටි සූටි කොට මතු වෙද්දී වෙඩිමට වඩා නැගල ගිය බෝක්කු පාර්ටිය නැවතුණේ සිංදුවක් දෙකකුත් කියල.
දෙයියනේ කියල සංගීතෙ බලන්න යන්න පුළුවන් මට්ටමකට ආවට පස්සෙ කුඹුරු යායක් උනත් හාන්න පුළුවන් මහා ශක්තියක් ලැබුණ වෙලේ දඬු මොණර යන්ත්‍ර පන ගැන්නුවේ සංගීතෙ බලන්න යන්න.
කෙලින් පාරේ ගියොත් ඉස්සරහින් තියෙන පොලිස් චෙක් පොයින්ට් එකට මාට්ටු වෙන හින්දා හතරමං හන්දියෙන් වමට හරෝල චෙක් පොයින්ට් එක මග අරින්න කතා කරගෙන හැටට හැටේ පෑගුවෙ ඈතින් ඇහෙන සප්ත ස්වරයට හිත ගත නැලවෙන ගමන්.
කතාව පිටම ආපු මමයි දිම්මටයි තරු විසි උනේ ඔහොම මෙහෙම පේන චෙක් පොයින්ට් එක දැක්කම. අනේ අහිංසක පොලිස් මාමා කෙනෙක් හෙමීට හෙමීට අඩිය තිය තිය ඇවිත් පාර අයිනෙම හිට ගන්නවත් දැක්කා.
” ඕෆ්ෆ් කරපිය ලයිට් නවත්තපිය බයික් එක ” එහෙම කිව්ව මං ලයිට් ඕෆ්ෆ් කරල බයික් එක නවත්තගෙන ටික වෙලාවක් ඉඳල බයික් එක තල්ලු කරන් ඉස්සරහට යනවා. ඕන් දෙයියනේ කියල පොලිස් මාමව පහු කලා..අඩි දහයක් පහලොවක් ගියා. මාරකයක් පැන්න කියල හිතුවෙ.
” ඔහොම නැවතියව් %&*%$ පුතාල දෙන්නම ” කියල හරි ආදරෙන් ඒ පොලිස් මාම අපිට කතා කලේ.
” වරෙව් බයික් එක හරෝගෙන ආයේ “
හැරෙව්ව බොහොම අමාරුවෙන් බයික් එක ගියා පොලිස් මාම ගාවට.
” තොපි කොහෙද ගියේ “
” සර් යාළුවෙකුගෙ වෙඩින් එකක් තිබ්බ මේ ගිහින් එන ගමන් “
” බීල නේද ඉන්නෙ “
” බියර් එකක් බිව්වා සර් “
” හොඳ බියර් එක තෝ එනවද $%% පුතෝ මට බියර් ගැන උගන්වන්න “
” නෑ සර් ඇත්තමයි බියර් එකක් බිව්වෙ “
” එහෙමද…. බීල වාහන පඳින්න බෑ කියල දන්නෙ නැද්ද යකෝ “
” ඒ හින්දා තමා සර් බයික් එක තල්ලු කරන් ආවේ “
ඔන්න පුතේ පොලිස් මාමට මල් හතම පැන්න තැන. කුනුහරප වැපුරුව වැපිරිල්ලක් අපි දෙන්නගෙ කන් පිරෙන්නම. රෝඩ් බ්ලොක් එකට දාල තිබ්බෙ බැරල් දෙකක්..
” නැගපිය එකෙක් බැරල් එක උඩට “
අපායට ගියත් මුලින් යන මං නැග්ගා බැරල් එක උඩට.
තෝ ඩ්‍රම ගහපන් අරූට සිංදු කියන්න කියල දුන්න දිම්මට පොලු කෑලි දෙකක්.
සිංදු නම් මොනවද පුතේ වැදිල ඉන්න වෙලාවට ඇල්ලුව ජෝතිපාල මහත්තයගෙ
පාට පොදක් තිලක ලා නළල් තලාවෙ..
පොලිස් මාමට සිංදුව අල්ලලා ගියා කියාන්කෝ
දිම්මා බැරල් එකට ඩ්‍රම ගහනව මං සිංදු කියනව බැරල් එක උඩ නැඟලා….
මං ඩ්‍රම ගහනව දිම්ම බැරල් එක උඩ නැගල සිංදු කියනවා
මාරුවෙන් මාරුවට දෙන්න එක්ක කිව්ව කිවිල්ලක් පුතේ ආයෙ පොලිස් මාම හොල්මන් වෙන්න…
ඔය සංගීතෙ ඉවර වෙන්න කලින් ගෙවල් වලට යන එවුන් එකා දෙන්න ඇවිත් අන්තිමට විස්සක් තිහක් විතර නැවතිලා පස්සෙ බලද්දී අපේ සංගීතෙ බලන්න.
සැපයි සනීපයි අඳුරන එවුනුත් ඒ අතර.. ඒ මදිවට අර අපි එක්ක හිටපු උන් හය දෙනත් උන් අතර ඉදන්ම හිනා වෙවී අපි දෙන්න්ගෙ සංගීතෙ බලපු එකනෙ කාල ඉන්න බැරි. අපි පරක්කු නිසා බලන්න ඇවිත් බයික් උඩහින් නවත්තලා පයින් ඇවිත් උනුත් බලා ඉදල තියෙන්නෙ.
අනේ පැයක් එකමාරක් විතර සිංදු කියෝල කියෝල තොපි මට ආයෙ අහු වෙන්න එපා කියල එලෙව්වා. ගෙදර පලයල්ල කියලා.
අපි නම් අහයි පොලිස් මාම කියන දේ කෙලින්ම ගියේ සංගීතෙට එතනත් පැයක් දෙකක් හාල හාල ගෙදර එද්දි එලිවෙන්න ඔන්න මෙන්න… වෙලාවට සංගීතෙ ඉවර උනේ නැත්තම් තාමත් නටනව අපි…… ඕං ඔහොමයි වෙඩිමයි සංගීතෙයි ඉවර උනේ……
උපුටා ගැනීම: සිතිජ ආමන්ත