මේ තියෙන්නෙ අපේ ගෙවල් වලට කිට්ටුව තියෙන පොන්ට්කසල්හ්ටෙ ඇක්විඩක්ට් (වෙල්ශ් වචනයක්) (Pontcysyllte Aqueduct) කියල කියන උඩින් ඇලක් යන ආරුක්කු පාලමක් .Pontcysyllte Aqueduct and canal
බ්‍රිතාන්‍ය කාර්මික විප්ලවය කාලෙ තිබුන ඉංජිනේරු තාක්ශණය සහ ප්‍රවාහන පද්ධතියේ දියුණුව මේ ආරුක්කු පාලමෙන් දකින්න පුළුවන්. 1795-1808 අතර කාලෙ තමයි මේක නිර්මාණය කරලා තියෙන්නෙ. මේ කාලයේ සිවිල් ඉන්ජිනේරු ක්ෂේත්‍රයේ හිටිය දක්ශයෝ දෙන්නෙක් වෙන තෝමස් ටෙල්ෆර්ඩ් සහ විලියම් ජෙසප් කියන දෙන්න තමයි හදල තියෙන්නෙ.
මේක 2009 දි යුනෙස්කෝ එක ලෝක උරුමයක් කියලා නම් කරලා. ඩී නිම්නය (Dee valley) උඩින් යන මේ ආරුක්කු පාලම පහල එංගලන්තේ ඉඳලා උතුරු වේල්සයට අමුද්‍රව්‍ය ප්‍රවාහනය කරන්න භාවිතා කරලා තියෙනවා.
මේ දක්ශ සිවිල් ඉන්ජිනේරු නිමැවුම කරලා තියෙන්නෙ වාත්තු යකඩ ආරුක්කු වලට සිහින් ශක්තිමත් උස අඩි 126ක් උන ගල් කණු 19ක් සම්බන්ධ කරලා.
1830දි දුම්රිය පද්ධතිය ආරම්භය වෙනකන් භාවිතා කරලා තියෙන්නෙ මේ ඇල මාර්ග ප්‍රවාහන පද්ධතිය. අද වෙද්දි මේක සංචාරකයන් සඳහා බෝට්ටු ප්‍රවාහනය කරනවා මාර්තු ඉඳලා සැප්තැම්බර් වෙනකන්. එක් දින බෝට්ටු සේවය වගේම බෝට්ටුවක් මාස හයටම බුක් කරලා රට පුරා සංචාරය කරන්න පුලුවන්. ඒ බෝට්ටු ඇතුලේ නිවසක සියලු පහසුකම් තියෙනවා. දවසේ ට්‍රිප් යන බෝට්ටු අතුලෙ පොඩි කැෆේ එකක් තියෙනවා.
බෝට්ටු යන ඇලමාර්ග තියෙන ආරුක්කු පාලම් ඇක්විඩක්ට් කියද්දි කෝච්චි යන ආරුක්කු පාලම් වලට කියන්නෙ වයාඩක්ට් (Viaduct) කියලා. Pontcysyllte ඇක්විඩක්ට් එක තමයි මේ රටේ තියන උසම සහ දිගම ඇලමාර්ගයක් යන ආරුක්කු පාලම. මේක පිහිටලා තියෙන්නෙ ක්ලැන්ගොහ්ලන් Llangollen කියන ප්‍රදේශයේ. ඒ වගේම රටේ දකුණට වෙන්න තියෙන චර්ක් කියන ප්‍රදේශයේ ඇක්විඩක්ට් සහ වයාඩක්ට් දෙකම එක ලඟ පිහිටලා තියෙනවා.
බ්‍රිතාන්‍ය පුරා මේ ඇල මාර්ග සහිත ආරුක්කු පාලම් විශාල ප්‍රමාණයක් තියෙනවා. හේතුව රේල්ලුව බිහිවෙන්න කලින් ප්‍රවාහනය සිදුවෙලා තියෙන්නෙ මේ හරහා නිසා. නමුත් 15 වෙනි සියවස වෙනතෙක් මේ ඇක්විඩක්ට් මගී ප්‍රවාහනය සඳහා භාවිතා කරලා නෑ.
18 වෙනි සියවස වෙනකන් ඉංජිනේරුවන් ඇලමාර්ග සහිත ආරුක්කු පාලම් හදන එක ගැන සතුටු උනේ නෑ වතුර ප්‍රවාහනය සඳහා සුදුසු විදියට මේ පාලම් ඉදි කිරීම අපහසු කටයුත්තක් වෙලා තිබුන නිසා. නමුත් 18 වෙනි සියවසේදි වාත්තු යකඩ භාවිතා කරලා මේ පාලමේ නිර්මාණය කරන්න පරන්ගත්තට පස්සෙ වාත්තු යකඩ සහිත ඇක්විඩක්ට් ඉදිවෙන්න පරන්ගත්තා.
දැන් මේවා භාවිතා වෙන්නෙ සංචාරකයින් සඳහා පමණයි. මේ ඇලමාර්ගත් විශේෂයි. බ්‍රිතාන්‍ය පුරාම මේ බෝට්ටු වලින් යෑමේ පහසුකම තියෙනවා.
වීසා සම්බන්ධව මම ලියපු පෝස්ට් ඉවර කරන්න බැරි උනා. අධික කාර්‍යබහුල උන නිසා සහ නිවැරදි තොරතුරු ලියන්න කල් යන නිසා ලියන්න හැකියාවක් තිබුනේ නෑ. ඉක්මනින් ලියලා ගේන්නම්.
උපුටා ගැනීම: නිල්මිණී සමන්තිලක