අමරදේව ශුරීන්ගේ , …”මිහිරියේ පිය බඳේ … සඳවතියේ … ගීතයේ එන එක චේදයක් සිහිවෙන අවස්ථාවක් ඇත. ඒ ගීතයේ … “ඔබ මුහුණ දුටු සඳ – නොපිපි වන මල් පිපේ” … “කියඹු වැල් මා බලා ඔබේ නළලත හැපේ” … සේ ඔහු ගායනය කරන විටය. ….
මේ ලොව සිටින සෑම මිනිසාම ගැහැණියකටම මානසික අසනීපයක් ඇතැයි කියති. ඔබට එසේ අසනීපයක් තිබේ නම්, එය අවබෝධ වන හොඳම වෙදැදුරා ඔබම වේ. ඒ අනුව මට ඇති අසනීපය වන්නේ, යම් විශේෂ කෙනෙක් දුටුවිට කිසියම් ගීතයක් සිහිපත් වීමය.
මා දිනපතා දකින ඇය, ඒ තරම්ම සුන්දර වේ. ඒ සුන්දර බව පමණක් නොව, ඇය උපතින්ම ඉතා ඉහළ තලයේ ගායිකාවක්ද වේ. විශේෂයෙන් තවත් ගීතයක, … “පායන් රන් සඳ පෙරදිග අහසේ – නැග එන පාළුව නිවා දමා”…යන චේදයේ ආකාරයට සවස් වරුවේ, … “යුගයෙන් යුගයට පෙමාතුරයන් හෙළු සුසුම් වැල්”… සිහිපත් කරමින් වරත්තු පූසන් නිවස දෙසට ඇදෙමින් ඇය දෙසට එනවිට ඒ ගායනය ඉබේම ඇති වේ.
ගෙදර පූසි දකින විට ඉහත ගීතය අහවල් දේකට මතක් වෙනවාදැයි නොදනිමි. සමහරවිට මගේ ප්‍රියතම සතුන් පූසන් වන හෙයින් විය හැක. මිනිසා මෙන්ම ඕනෑම සතෙක් ආදරය හඳුනයි. නමුත් ඕවා ගායනා කලාට උන් ඔබට කැමති වන්නේ නැත. ඔබ උන්ට ආදරේ බව පෙන්වන්නට කල යුත්තේ කුමක්දැයි දන්නවාද ?
පූසාගේ ඇස් දෙස කෙලින් බලන්න. පූසාද ඔබේ ඇස් දෙස කෙලින් බැලිය යුතුය. දැන් සාමාන්‍ය ආකාරයට නොව ඉතා හෙමෙන් ඇස් දෙක වසන්න. තව තත්පරයක් ඇස වසාම තබා ගෙන නැවත ඉතා හෙමෙන් ඇස් අරින්න. මෙය පූසා, ඒකාට ඔබ ආදරය කරන බව දැන ගන්නා ක්‍රමයයි. ප්‍රතිඋත්තර සේ පූසාද එසේ කරනු ඇත. මේ සතුන්ට අමුතුම ආකාරයේ සංනිවේදන ක්‍රමයක් ඇත.
ඒ ක්‍රම දන්නේ නම් පූසන් ඔබ සමඟ බොහෝ මිතුරු වනු ඇත.
අනෙක් දේ වන්නේ ඔබ පූසන්ට වසර දෙකක පමණ ළමයෙක්ට කතා කරනවා මෙන් ආදරයෙන් කතා කිරීමයි. මක්නිසාදයත් උන්ට ඇත්තේ ඒ ආකාරයේ දරුවෙකුගේ මානසිකත්වයක් වීමය. මා දන්නා එක ගැහැණු ළමයෙක්ට පූසන්ගේ පුදුමාකාර ආකර්ෂණයක් ඇත. යන ඕනෑම තැනක සිටින පූසන් ඇයට ආකර්ෂණය වේ. රහස කුමක්ද යන්න ඇසු විට ඇය ඉහත ක්‍රම දෙක මට කියා දුන්නාය.
යම් හෙයකින් ඔබ වෙතට පැමිණෙන පූසා, විශේෂයෙන්ම ඔබ කුමක් හෝ වැඩක් කරන විට පැමිණ, වල්ගය ඇන්ටෙනාවක් සේ කෙලින් තබා පස්ස ඔබට උස්සා පෙන්වන්නේ නම්, ඒ වල්කමකට හෙම නොවේ. ඒ ඔබ ගැන ඇති විශ්වාසය පෙන්වීමය. එවිට ඔබ කල යුත්තේ වල්ගය උඩ පිට යාන්තම් අත ගෑම වේ. නමුත් පූසන් උන්ගේ බඩ අතගානවාට නම් අකමැතිය.
එයට හේතුව වන්නේ පූසන්ට උන්ගේ බඩ අධිසංවේදී කලාපයක් වීම නිසාය.
ඔබ නිදා ගන්නා විට පූසා ඔබේ ඇඟ උඩ නිදාගන්නවා නම් ඊට ඉඩ දෙන්න. හේතුව වන්නේ එය ඒ පූසා ඔබව වැඩි දුරටත් විශ්වාස කරන බවය. එහෙත් ඒ ආකාරයට අපට නම් නිදා ගැනීම අපහසු වන්නේ, අප නින්දෙන් ඉරියව් වෙනස් කරන හෙයිණි. අනෙක් දේ වන්නේ, පූසා අපේ ශරීරයට ගෑවී ඇති තැන සෑහෙන තරමකට රත් වීම වේ. එය එතරම් සුවදායක ඉරියව්වක් නොවේ.
පූසෙක් නිදාගන්නට පෙර සමරවිට ඔබව මසාජ් කරන අවස්ථාවන් ඇත.
එයට එක හේතුවක් වන්නේ, උන් උන්ගේ, ‘ෆොරමෝන’ අපේ ශරීරයේ තැවරීම වේ. ඉන් අදහස් කරන්නේ උන්ට අප අයත් බවය. බල්ලෙක් අප ගැන සිතනවාට වඩා සම්පූර්ණයෙන් වෙනස් ආකාරයකින් පූසන් අප ගැන සිතති. එනම් බල්ලා අප ගැන සිතන්නේ, අප උගේ ස්වාමියා ලෙසය. නමුත් පූසා සිතන්නේ, ඌ අපගේ ස්වාමියා කියා වේ. ලොකු ලෙවල් එකෙන් ඉන්නේ ඒ නිසාය.
ඒ නිසාම පූසන්ට කිසි විටෙක ශාරීරික දඬුවම් කල යුතු නැත. කටින් කියන දෙ ඌට නොතේරෙනවා නොවේ. පූසා, ඔබ ඒකාට දමා ඇති නම දනී. එහෙත් ඔබ ඌට ඒ නමින් කතා කලාට පූසා එය එතරම් ගණන් නොගන්නේ නොතේරෙන නිසා නොවේ. ඒකත් උගේ ලොකු ලෙවල් එක පෙන්වීම නිසා වේ.
ගෙදර පූසා ලේනෙක් හෝ මීයෙක් අල්ලාගෙන බාගෙට මරා ඔබේ පුටු සැටිය, ඇඳ හෝ එළිපත්තේ තියාගෙන ඉන්නවා නම් එය එක්වරම විසි කිරීම ගැන පූසා එතරම් කැමැත්තක් දක්වන්නේ නැත. එය කර ඇත්තේ,… “මෙන්න මේ ආකාරයට උඹත් සත්තු අල්ලපන් !… කියා ඔබට අවවාදයක් දීමට වේ. එය අගය කිරීමට පොඩ්ඩක් පූසාගේ ඔලුව අතගා මළ කුණ විසි කිරීම නියම ක්‍රමය වේ.
බොහෝ උග්‍රව ඇදුම ඇත්නම් හැර පූසෙක් ඔබේ ඇඳේ නිදා ගත්තාට ඇති අවුලක් නැති බව කියති. පූසන්ගේ ලෝම අප හිතන තරම් නරකක් නැත. නමුත් දිනපතා ලෝම බුරුසුවකින් පූසාව පිරි මැදීම කරන්නේ නම් වඩා හොඳය. ඒ හීනි යකඩ කෙඳි ඇති බුරුසු වෙළඳපොලෙන් ගත හැක. ඉන් පූසාව පිරිමදින විට මුහුණ පිරිමැදීම කල්පනාවෙන් කල යුත්තේ ඒ කෙඳි පූසාගේ ඇස් වල වදින්නට හැකි හෙයිණි. බොහෝ පූසන් ඒ තද කෙඳි බුරුසු වලින් පීරනවාට කැමැත්තක් දක්වා මුහුණ ඉන් පිරි මැදීමට බල කරති.
විශේෂයෙන් එවිට පූසන් එවිට ඔවුන්ගේ බෙල්ල දික් කර කසා ගන්නට උත්සාහ කරති. එවිට උන්ගේ ඇස් සහ කට ගැන ප්‍රවේශම් විය යුතුය.
පූසන්ගේ ලෝම වලට වඩා නරක වන්නේ, ලෝම තුල සිටින්නට හැකි සතුන් සහ කෙඳි වල ඇතිවන හොරි වැනි දේ වේ. එහෙත් නිවසක ඇති කරන පූසෙක්ට කලාතුරකින් ඒ ආකාරයේ ලෙඩ ඇතිවන්නේ කොහොමත් ස්වභාවිකවම පූසන් පිරිසිදුව සිටීමට කැමති හෙයිණි. දිනපතා බ්‍රෂ් කිරීම, පණු බෙහෙත් දීම මෙන්ම පූසාගේ අකමැත්තක් නැත්නම් සතියකට දෙකකට වතාවක් නෑව්වාට ඇති වරදක් නැත.
එහෙත් පූසෙක් නාවන්නට නම් කුඩා කාලයේ සිට ඌව පුරුදු කල යුතු වේ. බලහත්කාරයෙන් නාවන්න ගියොත් පූසා ඔබව අවිශ්වාස කිරීමට පටන් ගනී. පූසාගේ නමට අමතරව ඉඳ හිට හෝ ඔබද ඌ දෙස බලා “ඤාව්” කියන එක හොඳය. මව් භාෂාවෙන් කතා කරනවාට ඌ කැමතිය. කෙසේ වුවද පූසා “ඤාව්” කියන්න පුරුදු වී ඇත්තේ මිනිසා සමඟ සංනිවේදනය කිරීම සඳහා වේ.
පූසන් නිවසේ වැඩියෙන්ම ආදරය කරන්නේ උන් සමඟ වැඩියෙන්ම ගැවසෙන, සෙල්ලම් කරන තැනැත්තා සමඟ වේ.
බොහෝ විට උන් ඔහු හෝ ඇයගේ පසුපස එයි. එවැනි අවස්ථාවක පූසන් ඒ තැනැත්තාගේ ජීවන් රටවාට අනුගත වන්නට පෙළඹේ. ඔහු හෝ ඇය සමඟ නාන කාමරයට ඒමට වැඩි කැමැත්තක් දක්වන්නේ එය නිවසේ සීතලම ස්ථානය හෙයිණි. සමහරවිට උන්ට උන්ගේ ශරීරයේ උෂ්ණත්වය අඩු කර ගැනීමට අවශ්‍යතාවය ඇති හෙයිණි.
පූසා ඔබ සමඟ එකම ඇඳේ නිදාගන්නා එක හොඳ දෙයකි.
ඊට හේතුව වන්නේ පූසා සහ ඔබ දෙදෙනාම එකිනෙකාට ප්‍රිය හෙයිණි. සීතල දිනයක පූසෙක් කකුල් උඩ නිදා ගන්නවා තරම් සැප නින්දක් තවත් නැත. එහෙත් එහි පොඩි අවුලක් ඇත. එනම් කකුල හෙලෙව්වොත් විකන එකය. එවිට දඟලා පූසාට රිදවනවාට වඩා තරමක් සැරෙන් ඒ ගැන කීවොත්, ඒ විකා ගෙන ඇති ප්‍රමාණය ලිහිල් කරති. ඕනෑම පූසෙක්ට ඒකාට අදාළ චරිතයක් ඇත. ඒ අනුව ඌට හැඩ ගැසිය යුතුය.
ඊජිප්තු රජ සමයට පෙර සිටද පූසන් මිනිසාට හීලෑව සිටි බව පෙනී යයි. එකල පූසෙක් මැරීමේ වරදට දඬුවම මරණය විය. සමහරවිට ඊට එක හේතුවක් වන්නට ඇත්තේ පුරාණ ඊජිප්තු ජාතිකයන් පූසාව දේවත්වයේ දමා සැලකීම විය හැක. අනෙක් හේතුව වන්නේ ඊජිප්තු කාන්තාර වැල්ලේ දරුණු විෂඝෝර සර්පයන් සිටීමත්, පූසන් උන්ව මරා දමන බැවිනුත් වටිනා මෙහෙයයක් උන් කරන හෙයින් වන්නට ඇත.
ඊජිප්තියානු රැජිනක් වූ ක්ලියෝපැට්‍රා මිය ගියේ සර්ප දෂ්ටයකිනි.
පූසන්ට උගේ සේවකයා වන ඔබ ගේ සතුට මෙන්ම, දුකද අවබෝධ කර ගත හැක. ඒ ගැන උන්ට පුදුමාකාර ඉවක් ඇත. විශේෂයෙන්ම කෙනෙක් දුකෙන් සිටී නම්, පූසාගේ විශේෂ කරුණාවක් ඔහුට හෝ ඇයට හිමි වේ. නිවසක මන්ද බුද්ධික දරුවෙක් සිටින්නේ නම්, ඒ ගෙදර පූසෙක් ඇති කිරීම ඉතා වටී. එහෙත් කිසිම අවස්ථාවක පූසන් එකෙක්ට වඩා ඇති කිරීම නම් පරිසරයේ විෂයේ හොඳ දෙයක් නොවන්නේ, උන් වන සත්ව ජනගහණය සෑහෙන්න විනාශ කරන හෙයිණි.
පූසෙක් සිටින පරිසරයේ ලේනුන් කුරුල්ලන් වැනි සතුන්ගෙන් හයෙන් එකක් පමණ පූසා විසින් මරා දමන බව සොයාගෙන ඇත. පූසා ස්වාභාවික ආකාරයට අපට අනුගත වූ සතෙක් නොවීම මේ අසමබරතාවයට හේතුව වේ. එනම් පූසා මිනිසාගේ අවශ්‍යතාවය නිසා පාර්ශවික හීලෑ වූ සතෙක් හෙයින්ද අන් සතුන් මරා කන සතෙක් වීමද මීට හේතුව වේ. [Domesticated predators]
බොහෝ කාලයක් මිනිසා සිතා ගෙන සිටියේ, පූසෙක්ගෙ කරේ සීණුවක් එල්ලුවහොත් පූසා සතුන් අල්ලන්ට එන විට ඒ සීණුව ශබ්ද වීම නිසා සතුන් පැන දුවන බවය. එය වැරදි අදහසකි. මොන තරම් සංවේදී සීණුවක් පූසාගේ කරේ එල්ලුවද, ඒ සීණුවෙන් කිසිම ශබ්දයක් නොඑන ආකාරයට ගොදුර කරා ලඟා වීමට පූසා දක්ෂ වේ.
උපුටා ගැනීම: Lalith Karunaratna