ඤාව්..ඤාව්..
“ඔන්න ආවා වෙලාවට කන්න හොයාගෙන. ෂිප් නරියා.. අවා මෙතන ඇඟේ ඇතිල්ලෙන්න.”
ඔය ඇහෙන්නේ අපේ පූස් ලලනාවට හැමදාම උදේට අහන්න ලැබෙන ආශීර්වාද පූජාවයි. කැට් වෝක් එකත් දා ගෙන බලල් නැටි ධජයත් ඔසවාගෙන අම්මා ලඟට කිට්ටු උනේ කරවල කට්ටක් හරි ඉල්ලා ගැනීමට උවත් සිදු වන්නේ කුණු බැනුමක් අසා දොරෙන් එලියට විසි වීමටය.
අපෙ අම්මාට පූසන් අරහං ය. ඉස්සර පූස් ලෝලියෙකු වු මා හටත් දැන් පූසන් අරහං ය. ඒ පූසන් ගෙන් සෑදෙන Toxoplasmosis නම් වූ රෝගය ගැන දැනගත් දා සිටය. මෙම රෝගය වැලඳුන මවකට උපන් කුඩා දරු පැටියෙකු නොවිඳිනා දුක් විඳ අවසන් ගමන් යනු බලාසිටි මා හට පූසන් සදහටම එපා විය. උපතින්ම දරුවා විකුර්තිය. හිස විශාලය. දෑසම නොපෙනේ. මේ සියල්ලටම වග කිව යුතු දරුවාගේ අම්මා විසින් සුරතල් කල පූසන් ය.
Toxoplasmosis වනාහි බල්ලන් පූසන් වැනි සතුන්ගේ ශරීරයේ ජීවත් වන පරපෝෂිතයෙක් මිනිස් ශරීරයට ඇතුල් වීම නිසා ඇති වන රෝගී තත්වයකි. මෙම සතුන්ගේ මළ මුත්‍රා අපේ ඇගේ ගෑවීමෙන් එහි සිටින පරපෝෂිතයා අපේ සිරුර තුලට ඇතුල්වේ. පූසන් තම පස්සා පැත්ත සෝදන කටෙන්ම තම ඇඟද ලෙවකා සෝදයි. ඌට පස්සා පැත්ත සේදූ පසු කට සේදීමට කිහිප වරක්ම ඉගැන්වීමට මා උත්සාහ කල ද කියන සිංහල තේරුම් ගන්නේම නැත.
ඒක විතරයෑ කොටියාට තවමත් සොයා ඒවි කියන බයට තමන්ගේ මළ පහ කල තැන වසා දැමීමට පූසා අමතක නොකරයි. ඒ වැහිල්ලට ගොස් නියපොතු වලද පූස් බෙටි ගා ගන්නා පූසන්ට වැසිකිලි යාමෙන් පසු අත් සේදීමට කියලා දුන්නත් එයද තඹේකට මායිම් නොකර අතත් කටේම දමා සෝදා ගනී. ඔය විදිහට මුලු ඇඟේම අර කිව්ව පරපෝෂිතයා සිටින මළ ජරාව ගා ගන්නා පූසන් ව ඉඹ ඉඹ පොෂ් යැයි කියාගන්නා පිස්සු නෝනලා හෙම දකින විට මගේ බඩත් දඟලයි.
ඉතිං කොහොම හරි අපේ ඇඟට ඇතුල් වෙන පරපෝෂීතයා වසා පද්දතිය තුලට ඇතුල්වී වසා ගැටිති තුල සැඟවේ. අපේ ආරක්ෂාවට සිටින ප්‍රතිශක්තිකරණ පද්දතිය අවුල් වෙන අවස්ථාවක් බලා අපට පහර දෙයි. බඩ දරු අම්මලා සහ කුඩා දරුවන් ප්‍රධාන ඉලක්කයන්‍ ය.
මෙම රෝගය සුව කල හැකි නමුත් ගැබිණි මවකට වැලඳුන හොත් දරුවා බේරා ගැනීමට නම් නොහැකිය. සුරතලයට සතුන් ඇතිකල යුතු නමුත් උන්ව ඇඟේ දවටාගෙන ලෙවකාගෙන ඉන්නවාට වඩා අපෙ අම්මා කියනවා මෙන් කොහු මිටේ දුරින් තබා ගැනීම නුවනට හුරුය.
එහෙම කිව්වට ඉතින් පුංචි කාලෙ ඉඳන් අපේ ගෙදර හැදුනු පූස් ලලනාවි ව ගෙයින් එළියට ඇද දැමීමට නොහැකි නිසාත් ඇයගේ හඩු ගඳ දැනුනු විට මී පුලුටක් වත් ගේ දෙස නොබලන නිසාත් ඇයව තව දුරටත් ගෘහ මූලික ලයිස්තුවේ රඳවා ගන්නා ලදි.
අපේ පූසී කොහොම උනත් හොඳ හැඩකාරී. ඒ වගේම හොඳ දඩයක්කාරී. ඇය දැන් දීග තල යෑමට සුදුසු වයසේ සිටින නෑම්බියකි. ඇගේ ආදරය පතා පූස් නාම්බෝ කිහිප දෙනෙකුත් ගේ වටා භ්‍රමණය වේ. ඔය වයසක නාම්බන්ට නොරැවටී හොඳ පවුලකින් තරුණ පූස් කොල්ලෙකු සොයා දෙන තුරු හිටින් කියා මම නිරතුරුවම ඇයට අවවාද කලෙමි.
අපේ පූසී සොයා පැමිණෙන මනමාලයන් අතරින් එකෙක් තැඹිලි පාට ය, ලස්සන ය. අනෙකා කරුවල කොටයක් මෙන් කළු පාටය, කැතය. තැඹිලි පාට මනාලයාට පූස් මනාලී ද මනාප බවක් පෙන් වුවද කට්ට කළු ව නම් දුටු තැන සැඟවේ. නමුත් කළුවා දිවා රෑ නොබලා පූසිගේ කැමැත්ත පතා වෙහෙසෙන නොපසුබස්නා උත්සාහයක් ඇති පෙම්වතෙකි. මේ නිසා කළුවා අපටද මහා හිසරදයක් වී ඇත.
ඌ මහ රෑ පුරාම “ආ..ව්.. ඥානෝ..විමලෝ ආ..ව්.. ඤාව් ..” කියමින් තම අමාරුව පූසිට පැහැදිලි කරමින් ගේ වටා කරකැවේ. ඒ මදිවට උදේ පාන්දර දොර අරින විට දොර ඉස්සරහට ම වී බලා සිටී.
” යකඩෝ..කළු කුමාර දිෂ්ඨිය වගේනෙ මේකා ..දුවපිය නරියා උඹට දෙන්න ගෑනු මෙහේ නෑ..ආවා මෙතන මනමාල කමේ..'”
අම්මා දැක්කොත් ඌට අසා ගැනීමට සිදු වන්නේ එවැනි බැනුමක් ය. පූසිගේ බඩ ගෙඩිය ලොකු වෙන විට තමයි අපි දැනගත්තෙ පූස් මනාලී හොර රහසෙම පූස් මනාලයෙකු සමඟ පැන ගොස් ආපසු ගෙදර ඇවිත් විත්තිය.
“ආපෝ.. දැන් ඉතිං අපට කළුම කළු පැටව් ටිකක් නලවන්න තමයි වෙන්නේ…”
අම්මා පූසි දිහා බලා විස්සෝප වූවාය. ටික දිනකින් පූසියා මුහුදේ පාවෙන නැවක් මෙන් අලි බඩකුත් උස්සගෙන පැද්දි පැද්දී යද්දී ඈ සොයා ආ මනමාලයෝ ලොවෙත් නෑ ලොවි ගහෙත් නැති විය.
ඔන්න දැන් පූසියා ව ලේබ
රූම් දාන වේලාව ඇවිත්. වින්නඹු වැඩේ මම භාර ගත්තේ වගකිමක් ඇතුව එය සිදු කල යුතු බැවිණි. පූසියා හති හලාගෙන දිව හපා ගෙන තටමන විට මා
“ලොකු හුස්මක් ගන්න දැන් තටමන්න “
කියා ඇයව දිරිමත් කලෙමි.
“ඌට පාඩුවේ ඒ වැඩේ කරගන්න දීලා මෙහාට එන්න”
ඒ අම්මාගේ නියෝගයකි. ඊටත් එතන මට කිරීමට තරම් දෙයක් නොවූයේ පූසි විසින්ම තම වින්නඹු වැඩේ කරගත් නිසාය. සවස් වන විට ඇය පැටවු හතර දෙනෙක්ගේ මවක් වූවාය. මොනවා වුනත් දරු පැටව් ගැන පූස් තාත්තාව දැනුවත් කිරීම අපේ වගකීම නිසාත් පැටවන් ගේ නමේ අගට පියාගේ වාසකම යෙදිය යුතු නිසාත් මා පූස් පැටවුන්ගේ පාට පරීක්ෂා කලෙමි.
“දෙයියනේ ..මේ පූසිට තිබිලා තියෙන විසයක් ! තාත්තලා තුන් හතර දෙනෙක් ගේ ළමයි ?”
කළු , තැඹිලි ,සුදු හා කළු සහ අළු යන පාට හතරක පැටව් එහි විය. පූස් තාත්තා සෙවීමත් වාසගම යෙදීමත් පූසිටම බාර දී මම එතැනින් නික්ම ගියෙමි.
උපුටා ගැනීම: Nilwala Athapattu