මෙයට වසර කිහිපයකට උඩදි වැලිකඩ බන්ධනාගාරයට පර්‍යේෂණ කටයුත්තක් සඳහා ගිය අවස්තාවකදි මරණ දඬුවම නියම වී සිටි නීතඥ මහතෙකු එහි සිටි නිලධාරියෙකු විසින් මා හට හඳුන්වා දුන්නා. දන්ඩ නීත්‍රි සංග්‍රහය හා අපරාධ නඩු විදාන සංග්‍රහය වැනි නීතිමය කරුනු හොදින් හඳුනන නීතීඥයෙකු වැනි පුද්ගලයෙකුට මිනිමැරුම් නඩුවකින් ගැලවීමට නොහැකි වුයේ මන්දැයි යන පැනය මගේ සිත් සතන් තුල දෝංකාර දෙන්නට වුනා. ඔහු නමින් අමරදාස ලෙස හඳුන්වන්නම්. අද අමරදාසගේ කතාන්දරය ඔබ වෙනුවෙන් අකුරු කරන්නට හිතුනා.
අමරදාස ජීවත් වුනේ තංගල්ල ප්‍රදේශයේය. හොඳ පවුල් ජීවීතයක් ගත කරන්නට අමරදාසට ඉඩක් ලැබුනේ නැහැ. ඔහුගේ බිරිඳ අනියම් සම්බන්ධතාවයකට පැටලුනා. එහි ප්‍රතිඵලයක් ලෙස අමරදාස හා සිය බිරිඳ අතර අඩ දබර පවුල් කුටුම්භය තුල නිරන්තරයෙන්ම හට ගත්තා . සමහර සිදුවිම් වලදි අමරදාස බිරිඳට පහර දුන්නා. බිරිඳ ඒ වෙනුවෙන් පොලිසියට පැමිණිලි කරා. අනියම් සම්බන්ධතාවය නවත්වන්නට අමරදාස කොතරම් උපදෙස් බිරිඳට ලබා දුන්නද ඇය විසින් එය නවත්වන බවක් පෙනෙන්නට තිබුනේ නැහැ. බිරිඳට අවශ්‍ය වුනේ අමරදාසට එරෙහිව පොලිසියට පැමිණිලි කර ඔහුගෙන් දික්කසාදය ලබා ගෙන සිය අනියම් සැමියා සමඟ වෙනම ජිවත් වීමටයි. දිනක් අමරදාසගේ බිරිඳ තංගල්ල පොලිසියට ගොස් අමරදාසට විරුද්ධව යලිත් පැමිණිල්ලක් ඉදිරිපත් කරනවා. මේ ගැන වියරු වැටුනු අමරදාස පැමිණිලි දමා ආපසු පැමිණෙන තම බිරිඳව දෙනෝ දාහක් දෙනා බලා සිටියදිම තංගල්ල නගරයේදිම පිහියකින් ඇණ ඝාතනය කරනවා. පසුව සිය බිරිඳ ඝාතනය කිරිමේ චෝදනාවට පොලිස් අත් අඩංගුවට පත් වෙන අමරදාසට ශ්‍රි ලංකා දණ්ඩ නීති සංග්‍රහයේ 296 වගන්තියට අනුව සාවද්‍ය මනුෂ්‍ය ඝාතනයක් කිරීමේ වරදට හම්බන්තොට මහාධිකරණයේ අධි චෝදනා ගොනු කරනවා.
අමරදාසගේ උගත් නීතීඥයින් මහාධිකරණයේ නඩු විභාගයේදි උත්සාහ කරේ මෙය අමරදාස විසින් හිතාමතා සිදු කරන ලද සාවද්‍ය මනුෂ්‍ය ඝාතනයකට නොවැටෙන අමරදාසගේ බිරිඳ පොලිසියට අසත්‍ය පැමිණිලි කිරිම නිසා ඇය විසින්ම අමරදාස ප්‍රකෝප කරවීම නිසා ඔහු අතින් සිදු වු අනියම් මිනිමැරුමක් බවට මහාධිකරණයේ ඔප්පු කිරීමටයි. මරණිය දණ්ඩනය වෙනුවට ඔහුට ලිහිල් සිර දඬුවමක් ලබා ගැනීමට අමරදාසගේ නීතීඥයින් උත්සුක වුනා.
ස්වාමිනි..නීතීඥ අමරදාසගේ බිරිඳ නිරන්තරයෙන්ම තංගල්ල පොලිසියට ගොස් අමරදාස සම්බන්ධයෙන් බොරු පැමිණිලි කරා..ඇයට ඕනේ වුනේ මෙම පැමිණිලි කවදා හෝ දිනක සාක්ෂි බවට පත් කර ගනිමින් ඔහුගෙන් දික්කසාදය ලබා ගැනීමයි..මේ සියල්ල දරා ගත නොහැකි තත්ත්වයට අමරදාස පත් වුනා ස්වාමිනි. ඇය විසින්ම මේ සිදුවීම් වලින් ඔහුව ප්‍රකෝප කරා.ඒ නිසා අමරදාසට සිය ආත්මය දමනය කර ගත නොහැකි වුනා. ඒ මොහොතේදි ඔහු පියවි සිහියෙන් හිටියේ නැහැ ..එහි ප්‍රතිඵලයක් ලෙස ඔහු පිහියකින් ඇණ සිය බිරිඳ ඝාතනය කිරිම අනියම් මිනිමැරිමේ චෝදනාවට ගැනෙන වරදක් ස්වාමිනි …එබැවින් ඔහුට ලිහිල් දඬුවමක් නියම කරන ලෙස ඉල්ලා සිටිනවා.
මේ නඩුවේදි පැමිණිල්ල මෙහෙය වු රජයේ නීතීඥයා ලෙස කටයුතු කලේ ලංකාවේ ජනප්‍රිය දක්ෂ නීතීඥයෙක් වු සාලිය පීරිස් මහතාය. ඔහු විසින් මේ නඩු විභාගයේදි කවුරුත් නොසිතපු මුලු නඩු විභාගයම උඩු යටිකුරු කල අපූරු සාක්ෂිකාරයෙක් මහාධිකරණයේ සාක්ෂි විමසීම සඳහා කැඳවීමක් කරනවා. ඒ තමයි අමරදාස විසින් සිය බිරිඳ ඝාතනය කිරීම සඳහා යොදා ගන්නා ලද පිහිය එදිනම අමරදාසට විකුණපු සති පොලේ පිහි වෙලෙන්දාව.
සාක්ෂිකරු මේ ඝාතනය සඳහා යොදා ගත් පිහිය ඔබට දැක්කොත් හදුනා ගන්න පුලුවන්ද
ඔව් ස්වමිනි..මං වෙලඳාම් කරපු පිහි තලයේ ඇති මේ සලකුනෙන් හා පිහියේ දුබුරු පාට මිටෙන් මං එදා සති පොලේ විකුණපු පිහියක් බව හඳුනා ගන්න පුලුවන්
සාක්ෂිකරු මේ විත්ති කූඩුවේ සිටින විත්තිකරු හඳුන ගන්න පුලුවන්ද බලන්න
ඔව්..පුලුවන් ස්වාමිනි..මේ මහත්තයා එදා සති පොල දවසේ කලබලෙන් දුවගෙන ඇවිත් හොඳ උල් පිහියක් මගෙන් සල්ලී දිලා ගත්තා හොඳට මතකයි.
සාක්ෂිකරු ..ඔබට මොහුව හොඳට මතකයි කිව්වේ ඇයි
මුලින්ම මං මේ පිහිය රුපියල් 350 ක් වෙනවා කියලා මේ මහත්තයාට කිව්වා.. ඊට පස්සේ ගාණ වැඩියි රුපියල් 300 ට මේක දෙන්න බැරිද කියලා මගෙත් එක්ක මිල ගණන් හෙට්ටු කලා මතකයි..මාත් පුදුම වුනා ටයි කෝට් දාපු මහත්තයෙක් රුපියල් 50 කට හෙට්ටු කිරිම ගැන..
අවසානයේදි ඔහු රුපියල් 350 ටම පිහිය මගෙන් සල්ලී දිලා අරගෙන ගියා..
ස්වාමිනි අමරදාසගේ නීතීඥයින් අධිකරණයේදි පෙන්වා දිමට උත්සාහ කලේ අමරදාස මෙම මිනිමැරුම පියවි සිහියකින් තොරව කල එකක් බවට ඒත්තු ගැන්වීමටය.එහෙත් මෙම ඝාතනය සඳහා අමරදාස විසින් යොදාගත් පිහිය විකුණන ලද වෙලෙන්දාගේ සාක්ෂියෙන් ඔහු පියවි සිහියෙන් සිටි බව මනාව ඔප්පු වී තිබේ. හොඳ පියවි සිහියක් තිබු නිසායි ඔහු පිහි වෙලෙන්දා සමඟ පිහියේ මිලට හෙට්ටු කරන ලද්දේ. ඒ අනුව අමරදාස තම පියවි සිහියෙන් සැලසුම් සහගතව නීතියේ පිහිට සොයා පොලිසියට ගොස් ආපසු පැමිණෙමින් සිටි සිය බිරිඳව ම්ලේච්ඡ ලෙස ඝාතනය කිරිම අනුමත කල නොහැකියි ස්වාමිනි. ඒ අනුව අමරදාස සාවද්‍ය මනුෂ්‍ය ඝාතනයක් සිදු කිරිමේ වරදට මරණිය දණ්ඩනය නියම කරන ලෙස ගරු අධිකරණයෙන් ඉල්ලා සිටිනවා
මේ අනුව සියලු සාක්ෂි විමසා බැලු විනිසුරුතුමා විසින් අධිකරණ ශාලාවේ ඇති සියලු විදුලි පහන් නිවා දමමින් සිය අසුනෙන් නැඟි හිදිමින් ගෞරව ගාම්භීරව නීතීඥ අමරදාසට මරණීය දණ්ඩනය නියම කරනවා.
ශ්‍රි ලංකා ප්‍රජාතන්ත්‍රික සමාජවාදි ජනරජයේ ජනාධිපතිතුමා විසින් නියම කරන ලද දිනයක හා වේලාවකදි යුෂ්මතා වැලිකඩ බන්ධනාගාර සීමාව තුලදි ප්‍රාණය නිරුද්ධ වන තුරු එල්ලා මැරිමට නියෝග කරමින් සිය අවසන් තීන්දුවට අත්සන් තැබූ පෑනද අතින් කඩා දමනවා.
ඔන්න කතාව කියවපු අයව මොහොතකට හරි උසාවියකට එක්කගෙන ගිය බව මේ අපූරු ලියවිල්ල අවසන් කරපු මටත් දැනුනා. ඔබගේ අදහස් උදහස් වලට ඉඩ තබමින් අලුත් කතාවකින් නැවත හමු වෙමු.
උපුටා ගැනීම සංකල්ප හේරත්