කතා ලියන්න දක්ශයෙක් නං නෙවෙයි මං .ඒත් කතා කියවනකොට කතාවක් මටත් දාන්න හිතුනා .මේ සිද්ධිය වුනේ මං දෙවෙනි වතාවට උසස් පෙල ලියලා රිසාල්ට්ස් එනකං ඉන්න කාලේ .ඒ දවස් වල මට වගේම අපේ අම්මලාටත් ලොකුවටම උවමනාව තිබුනා මාව ඉංග්‍රීසි කෝස් එකක්ට යවන්න .පඳුරකට පයින් ගැහුවත් ඉංග්‍රීසි කෝස් වීසි වෙන කාලේ මට ඕන වුනේ වියදම ගොඩක් අඩුවෙන් කඩ්ඩ ගොඩදාන තැනක් හොයාගන්න .ඒකට හේතුව අපේ තාත්තට රස්සාවක් නෑ ඒ වෙනකොට .අම්මා තමා ඔක්කොම කරන්නේ .
ඉතිං ඔන්න කොහොමිං කොහොම හරි ගෙවල් ලඟ මාමා කෙනෙක් කිව්වා කාර්මික විද්‍යාල වල ඉංග්‍රීසි කෝස් තියෙනවා .සම්පුර්ණයෙන් නොමිලේ කරන්නේ කියලා .බලනකොට වැඩේ ඇත්ත . ඉතිං ඔන්න දැං කෝස් එකට රෙජිස්ට වෙලා මායි මගේ හොඳම යාලුවයි යන්නත් ගත්තා .මාස හයක කෝස් එකක් තමා තිබුනේ .හෝඩියේ ඉඳලම මූලික ඉංග්‍රීසි එක්ක ස්පෝකන් ඉංග්ලිශ් කෝස් එකකුත් යනවා .මාත් ආසාවෙං කෝස් එකට යනවා .
ඒ ලෙවල් කරලා ඉන්න ලමයින්ට ඉංග්‍රීසි කරාට පුංචි අයට වගේ ගේම්ස් , පුංචි පුංචි තරඟ වගේ දේවලුත් ඒකේ කරා .උගන්නන්න ඉඳියෙත් තරුණ මිස්ලා කීප දෙනෙක් .ක්ලාස් තුනකට කඩලා තමයි කෝස් එක පටං ගත්තේ .
ඔන්න දැං තමා කතාව පටං ගන්නේ .මං කිව්වනේ අපිට පුංචි ගේම් එහෙමත් තිබ්බා කියලා .අපේ ක්ලාස් එකේ ඉඳියා අඩි හයක් විතර උස උසට හරියන මහතක් තියෙන ලස්සන කොල්ලෙක් .ජිම් යන නිසාද මන්දා අත් වල එහෙම අර ටෙනිස් බෝල එහෙමත් තිබ්බා . ලස්සන උනාට හෙන පොශ් ලුක් එකකිං අඩි තුනක් විතර උඩිං තමා ගියේ .මට කොහොමත් ඉස්සර ඉඳම්ම පොශ් පුස් පාට් ඇලජික් .ඒ නිසාම මං ඌව ඩෝන්ට් කෙයා ලයින් එකේ තමා ඉඳියේ . කොහොමත් මං ටිකක් දැඟලිලි අඩු කොනේ ඉන්න චරිතයක් ඉස්සර ඉඳම්ම .කට පොඩ්ඩක් වාචාල උනාට
ඉතිං දවසක් ගේම් එකක් කරන්න කෙල්ලයි කොල්ලයි කපල් වෙන්න කිව්වා .මිස්ලා තමා කපල් සිලෙක්ට් කරේ .කරුමෙද උරුමෙද මන්දා එදා මට සෙට් වුනේ අර පොශ් පුස් නාම්බව .කොහොම හරි එදා වැඩේ ඉවර වුනා .හොඳම හරිය ඊට පස්සේ .පස්සෙන්දා මං ටෙක් යනකොට පොස් ඩයල් එක ඉන්නවා ක්ලාස් එකේ දොර ලඟ .මාත් ඉතිං ගනං නොගෙන ඇතුලට යන්න ගියාම පොස් ඩයල් එක කවදාවත් නැතුව මට ගුඩ් මෝනිං කිව්වා .මොනා උනත් ගුඩ් මෝනිං කිව්වම අහක බලං ගස්සන් යන්න බැරි නිසා ලාවට මන්දස්මිතයක් පා කරලා ගුඩ් මෝනිං කියාගෙන ඇතුලට ගියා .ඔය විදියට සතියක් විතර වුනා .ඊට පස්සේ පස්සේ මූ මාත් එක්ක කතාවට එනවා එල්ලි එල්ලී .මාත් ඉතිං හා හූ ගගා ඉඳියා .සතියකට විතර පස්සේ මූ ඩෙස් එකකුයි පුටුවකුයි උස්සං මං ඉන්න තැනට ආවා . මට සාදාරණ සැකයක් ආවා මූ මේ එන්නේ වෙන මගුලකටවත්දෝ කියලත් .ඒත් ඒක ලත් තැනම ලොප් කරගත්තා .මොකද ඌ වගේ පොස් ගොබිලෙක් මං වගේ ගොඩේ හුචක්කුවකට මැච් වෙන්නේ නැතෙයි කියලා .
ඔහොම මාසයක් විතර ගිහිං මගේ අර සාදාරණ සැකේ සාදාරණම උනා .ඌ මගෙං කැමැත්ත ඇහුවා .ඒත් මං කිව්වනේ මට පොස් ඇලජික් කියලා .මං ගත් කටටම බෑ කිව්වා .ඊට පස්සේ ඌ යන්න ගියා .ආපහු කවදාවත් ඇහුවෙත් නෑ .කතා කරෙත් නෑ .මට ගානක් වුනෙත් නෑ .හැබැයි කතාව ඕක නෙවෙයි .මට ජීවිතේ අමාරුම වුන වැටිල්ල වැටෙන්න ඕක හේතුවක් උන එක . ඒක වුනේ මෙහෙමයි .මං ඉස්කෝලේ යන කාලෙවත් ඊට පස්සෙවත් කා එක්කවත් යාලු වෙලා ඉඳලා නෑ ( දැං නං තියෙනවා බාගයක් ප්‍රපොසල් බාගයක් ලව් උන හුටපටයක් .ඒවා අතුරු කතා). ඒකට හේතුව ලෙඩක්වත් සැමට කීකරු ඉතා හොඳ බොදු දරුවෙක් වීම නං නෙවෙයි .මං ඉස්කෝලෙං පිටදී කොල්ලෙක් එක්ක කතා කරත් ඒක අපේ තාත්තට ආරංචි වෙනවා .ගෙදර යනකොට තාත්තා ඉන්නවා දොර ලඟ කා එක්කද කතා කරේ අහන්න .යාලු වෙන්න ඇහුවා කිව්වොත් ඊට පස්සෙන්දම තාත්තා යනවා ඒ කොල්ලගේ ගෙදර .ඒ නිසා ඉස්කෝලේ යන කාලේ මට ලව් තියා ඉලව්වක්වත් තිබ්බේ නෑ .
ඔය ටෙක් එකේ පොස් බුවා යාලු වෙන්න ඇහුව කතාව මං ගෙදර ගිහිං තාත්තට කිව්වේ නෑ .ඇයි වනාහී මං තුමී අප්පොච්චා තුමාට අතිශය බයයි .තාත්තා රැව්වත් ඇති මට චූ යන්න .එහෙමයි කියලා අපේ තාත්තා ලෝකේ ඉන්න නපුරුම තාත්තා නොවන බව කරුණාවෙං සලකන්න . දැං ඔය සිද්ධිය වෙලා දවස් කීපෙකට පස්සේ මං ටෙක් යනකොට ක්ලාස් එකේ කෙල්ලෝ කොල්ලෝ මං දිහා අමුතු විදියට බල බල කතා කරනවා .ඇඳුමේ හරි මූණේ හරි අවුලක්ද කියලා බැලුවත් එහෙම අව්ලකුත් නෑ .පස්සේ ඉතිං අනේ උං කොහොම බැලුවත් මයේ මොකෝ කියලා මං ස්තානගත උනා මගේ ඩෙස් එකේ.
දවස් දෙක තුනක්ම ඕකම උනා මට.තුන් වෙනි දවසේ මං ක්ලාස් එකේ ඉඳගන්නවත් එක්කම මගේ යාලුවා දුවගෙන ඇවිත් කිව්වා කතා කරන්න ඕන වරෙං කියලා .මේකී මාව ඇදං ගිහිං කියනවා උඹ ගැන කැතකතා ටිකක් පැතිරෙනවා බං .කියලා .මං ඇහුවා ඒ මොනාද කියලා “.උඹ අරූගෙං කැමැත්ත ඇහුවලු .කැමති නැත්තං මැරෙනවා කිව්වලු .උඹ ජරා විදියට ඉඳලා ගහපු ෆොටෝ පවා ඌට යැව්වලු ” සිරාවටම මට ඇඬුනා එවලේ .ජීවිතේට නොකරපු දෙයක් කියලා කතා පතුරවන්න තරං චීත්තේ අර පොස් බුවා කියලා දැනගත්තම මට හිතාගන්න බැරි උනා .පස්සේ මං හිතාගත්තා මං වැරැද්දක් කරලා නැත්තං අඬන්නේ නෑ කියලා .ක්ලාස් එකෙං එලියට ගිය විදියටම ආපහු මං ක්ලාස් එක ඇතුලට ආවා .
එදා දවසේ වැඩ ටික වෙනදා විදියටම කරන්න මාර ගේමක් ගැහුවා .ඇත්තටම මං ගොඩක් මනසින් වැටිලා හිටියේ .හිතාගන්න බැරි උනා මොනාද කරන්න ඕන කියලා .පුරුදු විදියටම වැඩි කතා බහක් නැතුව කෝස් එකේ වැඩ ටික කරා .ගෙදර ගියෙත් හීනෙං වගේ .යාලුවා නොහිටින්න එදා මං ජීවත් වෙන අන්තිම දවස වෙන්න තිබුනා .මොකද සිහියක් නැතුව පාරේ ගිහිං වාහන දෙක තුනකම හැප්පෙන්න ගිය නිසා .ඒකි මාව ගෙදරටම දාලා තාත්තටත් විස්තරේ කියලා තමා ගියේ .
යාලුවා ගියාට පස්සේ තාත්තා මං ලඟට ආවා .ලොකු අධ්‍යාපනයක් නැතත් තාත්තා ගොඩක් බුද්ධිමත් .ඕනම ප්‍රශ්නෙකට තාත්තා ලඟ උත්තර තිබුනා .තාත්තා මාව තුරුල් කරගෙන කිව්වා පුතේ ඔයාට කෝස් එක කරන්න බැරි නං ගෙදර ඉන්න .ඒකට මං මුකුත් කියන්නේ නෑ .ඒකෙං ඔයාට එයාලට මූණ නොදී ඉන්න පුලුවන් .ඒත් ඔයාට වුන අවමානෙං ,ලැජ්ජාවෙං කවදාවත් ගැලවෙන්න බැරි වෙයි .ඔයාට රිද්දන්න ඕන කෙනාට වෙන්න ඕන දේත් වෙයි .එයාට ඕන දේ වෙන්න ඕන නැත්තං ඔයා දිගටම කෝස් එක කරන්න .ඔයාට රිදුනේ නැ කියලා පෙන්නන්න .තීරනේ ඔයාගේ අතේ . කැමති තීරණයක් ගන්න ඔයාට අයිතිය තියෙනවා .මතක තියාගන්න පුතේ පාරක් ගහපු ගමං කඩාගෙන වැටෙන්නේ දුර්වල අත්ත මිසක් හයිය අත්ත නෙවෙයි කියලා .
එදා මං තීරණය කලා දිගටම මං කෝස් එක කරනවා කියලා .එකට හිටපු කෙල්ලෝ මගේ මූණටම බැන්නා ලැජ්ජාවක් නෑ කියලා .මගේ යාලුවා ඇරෙන්න අනිත් හැමෝම මාව කොන් කරා .මිස්ලා තුන් දෙනා පවා මං දිහා බැලුවේ වරදක් කරපු ගානට .මං ඒ හැමෝටම හිනා වුනා .කෝස් එක ඉවර කරන්න කලිං ෆයිනල් එග්සෑම් කිට්ටු කරලා මිස්ලා මාව ගෙන්නුවා ක්ලාස් එක ඉස්සරහට .මට හොඳටම බැන්නා පන්තියේ නම කැත කරා කියලා හැමෝම ඉස්සරහා .මං කරේ හිනා වුන එක විතරයි .
කොහොම හරි ෆයිනල් එග්සෑම් එකත් ලිව්වා මං .රිසාල්ට්ස් එන්නේ සතියකිං .ඔන්න ඉතිං රිසාල්ට්ස් ආපු දවසේ හැමෝවම කැඳෙව්වා ආපහු ටෙක් එකට .ඔය වෙනකොට ටෙක් එකේ වයිස් ප්‍රින්සිපල් පවා මේ සිද්ධිය දන්නවා .රිසාල්ට්ස් කියන්න ආවේ වයිස් ප්‍රින්සිපල් මැඩම් .ශීට් එක දිග ඇරලා බලපු මිස් කිව්වා මේ පාර ෆස්ට් ක්ලාස් රිසාල්ට්ස් තියෙන කෙනෙක් ඉන්නවා කියලා .ටෙක් එකේ ඉතිහාසය තුල පලවෙනි වතාවට තමා ෆස්ට් ක්ලාස් රිසාල්ට් එකක් ඇවිත් තියෙන්නේ .මොකද ඒ කෝස් එක ලේසියෙං කරාට එග්සෑම් එක පට්ටම අමාරුයි .දැං හැමෝම කට ඇරං බලං ඉන්නවා කවුද මේ වැඩ්ඩා කියලා බලන්න .මැඩම් එකපාරම කිව්ව නම ඇහිලා මුලු හෝල් එකම සද්ද නෑ .මොකද පන්තියේ නම කෑවා කියපු කෙනා එච්චර රිසාල්ට් එකක් දැම්මම .
එදා මට පුලුවන් උනා ඇත්තම සිද්ධිය හැමෝටම කියන්න .පස්සේ අදාල පුද්ගලයා ප්‍රසිද්ධියේම මගෙං සමාව ඉල්ලුවා .එදා ඒ සිද්ධියෙන් පස්සේ මං ඒ පුද්ගලයාව දැක්කෙම නෑ . හැබැයි ඒ සිද්ධිය නිසා එක හොඳක් වුනා .ඒ තමා තාත්තා මට ගොඩක් සමීප වෙච්ච එක .කලිං තිබුන බය වෙනුවට ඒ සිද්ධියෙන් පස්සේ මායි තාත්තයි අතර කිසිම රහසක් නැති වෙන තරමටම අපේ බැඳීම ශක්තිමත් එකක් වුනා.
කතාව කියන්න ප්‍රධානම හේතුව මේකයි .මොන ප්‍රශ්න ආවත් වැටෙන්නේ නැතුව ඉන්න බලන්න .මොකද පාරක් ගහපු ගමන් වැටෙන්නේ දිරච්ච අතු මිසක් හයිය අතු නෙවෙයි .හයිය අත්තකට ගැහුවම ගහපු කෙනාගේ අත රිදෙනවා විතරයි .
………………………………..
උපුටා ගැනීම: Chathuu Pothuwila