ප්‍රීතිරාජ් හංස (වැල් වටාරම්)

කලාකාමියා රසකාමියා ……සකුන්තලා තමුසෙ ඒක දන්නේ නැද්ද …….

කිය කියා ප්‍රීතිරාජ් හුඟක් දවස් වලට ගෙදර ආවේ හතරගාතෙන් .එතකොට අපි හිටියේ මාලිගාවත්ත නිවාස සංකීර්ණයේ .එදා කවුද දොරට තට්ටු කරපු හින්ද මම ගිහිල්ල දොර ඇරියා .මුස්ලිම් විදිහට සම්පූර්ණයෙන්ම කලුවලින් වහගෙන හිටිය කෙනෙක් මම දැක්කේ.මගේ අතට ලියුමක් දීපු ඒ කෙනා පඩිපෙළ බොහොම වේගෙන් බැහැල ගිය තාලෙන් මම හිතුවා ඒ කලු කබාය ඇතුලෙ හිටියෙ පිරිමියෙක් කියලා.

බ්ලු ලැගූන් එකේ විසිපස් වැනි කාමරයේ අන්න ඔයාගේ මහත්තයා තාරාදේවි එක්ක ඉන්නවා දැන්ම ගියොත් අල්ල ගන්න පුලුවන්….

කියල ඒකෙ ලියලා තිබුණ .මට උන් හිටි තැනුත් අමතක උනා ..ඉස්සරහ ගෙදර රත්නා අක්කට ළමයි හතර දෙනා බාර දීපු මම අතට අහුවෙච්ච සාරියක් පටලගෙන ටැක්සියක එවලෙම බ්ලු ලගුන් එකට ගියා .අවුරුදු තිහකට පස්සේ මට දැන් හිතෙනවා එදා මම කලබල වුණා වැඩියි කියලා .

ලොකු පුතා නං අදටත් අහනවා ඇයි අම්මා එයාගෙන් වෙන් වුනේ නැත්තෙ කියලා .

වෙන් උනානං මං කොහොමද බං උඹලට කන්ඩ බොන්ඩ දෙන්නේ …

මම රස්සාවකට ගියා නං කවුද උඹ ලව බලාගන්නේ…… කවුද උඹලව ඉස්කෝලේ ගෙනියන්නේ….. ඇයි උඹලට මෙලෝ දෙයක් තේරෙන්නෑ වගේ මහා රැඩිකල් විදිහට ඇයි අම්මා වෙන් වුනේ නැත්තෙ කියලා ගෙඩිපිටින් අහන්නෙ …….

කියලා නං ඒ වෙලාවෙ මම ලොකු පුතාට බැන්නා .

බ්ලූ ලැගූන් එකේ

විසිපස්වෙනි කාමරේ දොරට තට්ටු කළාම ප්‍රීතිරාජ් එළියට ආවා. ඒ ආවෙ තුවායක් ඇඳගෙන .මට ඉහිලුම් නැතුව ගියා .යක්ෂණියක් වගේ යක්ෂාරූඪ වෙච්ච මම ප්‍රීති වත් දොරෙන් තල්ලුකරගෙන කාමරේ ඇතුලට ගියා. යනකොට තාරාදේවි බීම එකක් බිබි හිටියා. මම තාරාදේවි ට බිම පෙරලගෙන ගහනකොට ප්‍රීතිරාජ් කිසිම කලබලයක් නැතුව හෙමින් සීරුවේ එයාගේ ඇඳුම් ඇඳ ගත්තා .ඒ අතරේ මම තාරා දේවියට හොඳටම ගැහුවා. තාරාදේවිත් නිකං හිටියෙ නෑ… අතේ තිබුණු බීම බෝතලෙන් මගේ නලලට ගැහුවා .

දැන් මගේ නළලෙන් ලේ වැක්කෙරෙනවා… හොඳට ඇඳ පැළඳගෙන ඉවර වෙච්ච ප්‍රීතිරාජ් ඇවිල්ල මගේ කොන්ඩෙන් ඇදල පැත්තකට කළා .වචනයක්වත් කතා නොකර මාව අතින් ඇදගෙන කාමරෙන් එළියට ඇවිල්ලා මිනිස්සු පිරිලා හිටපු කොරිඩෝව දිගේ මූණ නමාගෙන එළියට ගිහිල්ලා ටැක්සි කාර් එකකට නග්ගගෙන දොස්තර ගාවට ගෙනිහිල්ලා තුවාලයට මැහුම් දැම්මෙව්වා .

ගෙදර ගිහිල්ලා ප්‍රීතිගෙන් හොඳට ගුටි කන්න වෙයි කියලා හිත හදාගෙන මයි මම උන්නේ …යන අතරමඟ නවත්තලා මාස දෙකකට විතර ඇතිවෙන්න සිල්ලර බඩු අරගෙන මාවයි සිල්ලර බඩුයි ගෙදර දාලා ප්‍රීතිරාජ් වචනයක්වත් කතා නොකර යන්න ගියා.

ප්‍රීතිරාජ් කියන නම දාලා එයාව සිනමාවට ගෙනාවේ සුප්‍රසිද්ධ අධ්‍යක්ෂක මෝහන්‍ රාජ්.මම ගෙදර ගිහිල්ලා ටික වේලාවකින් මෝහන් රාජ් මට කතා කරලා කිව්වා ……

නංගි මේක දුර දිග අරින්න එපා…. මාධ්‍යයෙන් කතා කරල ඇහුවොත් එහෙම දෙයක් වුණේ කොහෙද …..

කියලා කිසිම දෙයක් දන්නේ නැති විදිහට කතා කරන්න කියලා ….මේ වගේ ප්‍රසිද්ධ නළුවන්ට ඔහොම කතා හැදෙන එක බොහොම සාධාරණයි කියලත් කියන්න කිව්වා .ලඟදිම ප්‍රීතිරාජ් ගේ අලුත් චිත්‍රපටයක් වෙච්ච මුතුලැල් සයුර එළියට එන හින්දා ඕවා ඊරියාකාරයින්ගේ කතා කියලා කියන්න කිව්වා ..

කිව්වා වගේම හැන්දෑවේ හතර පහේ ඉඳලා ගෙදර ස්ථාවර දුරකථනයට එක දිගටම ඇමතුම් එන්න පටන් ගත්තා .සති දෙකකට විතර පස්සේ මගේ තුවාල හොඳ උනහම ප්‍රීතිරාජ් ගොඩක් සති අග පත්තර වලිනුයි සිනමා පත්තර වලිනුයි මාධ්‍යවේදීන් ගෙන්න ගෙන්න මාවයි ළමයින් වයි තුරුළුකරගෙන පොටෝ ගග හ ලොකු ලස්සන ලිපි පල කරවන්න පටන් ගත්තා .එදා දවස ඉවර උනයින් පස්සේ වත් ප්‍රීතිරාජ් අපිත් එක්ක ඉඳියි කියලා හිතුවට එදා රෑම ප්‍රීතිරාජ් ගෙදරින් ගියා .ඊට සතියකට පස්සේ මුතුලැල් සයුර චිත්‍රපටිය එළියට ආවට පස්සෙයි මම දැනගත්තේ ප්‍රීතිරාජ් එක්ක රඟපාලා තියෙන්නේ තාරාදේවියි කියලා .

ඒ විතරක් නෙමේ ඒක ශූට් කරලා තියෙන්නේ මැලේසියාවෙ යි කියලා .මෙච්චර දවසක් මම හිතාගෙන හිටියේ ප්‍රීති හිටියෙ ලංකාවෙ කියලයි එදා නං මං හරියට ඇඬුවා. ලොකු පුතා ඇවිල්ලා

ඇයි අම්මේ අඬන්නේ ……ඇයි අම්මේ අඬන්නේ …

කිය කියා ඇහුවත් ඌට කොහොමද මම කියලා දෙන්නේ අඬන හේතුව .

මගේ උදවුවට ආවේ ගිය නන්දාවතී නැන්දා නං මගෙන් ඇහුවේ

අනේ නෝනේ මේ පවුලට හූනියමක් වත් කරලා ද දන්නෑ ……කියලයි .

මට දැන් හූනියම් හතේ හත ගැහුවත් හූනියම් වදින්න නෑ නැන්දේ ……..

කියලා නං එදා මම හයියෙන් ඇඬුවා .

ප්‍රීතිරාජ් කවදාවත් මගෙන් දික්කසාද වෙන්න ඕනේ කියලා කිව්වේ නැහැ .

මට පෙන්නන්න බැරි අප්‍රසන්නම දේ උනේ මාද්‍යකාරයෝ ඉස්සරහ බොහෝම ආදරණීය පවුලක් හැටියට රඟපාන්න තිබිච්ච ජවනිකාවයි .එක සැරයක් ප්‍රීතිරාජ් ගේ වාර්තා වැඩසටහනක් කරන්න එන්ජීඕ කණ්ඩායමක් අපේ ගෙදර ආවා .එදා ප්‍රීතිරාජ්ට සර්පිනා එකක් ගගහා සින්දු කියන්න තිබුණා .

මට තිබුණෙ හිනාවෙවී පැත්තකට වෙලා තාලෙ අල්ල අල්ල බලන් ඉන්න විදිහට ඉන්න. ෂූටිං සේරම ඉවර වෙලා ඒ මිනිස්සු ගියාට පස්සේ විනාඩි දහයක්වත් ප්‍රීතිරාජ් හිටියේ නෑ එයත් ගියා.

උදේ ඉඳන් කාපු බීපු සේරම මට ඒ වෙලාවෙ හෝස් ගාලා වමනෙ ගියා මතකයි .ඒ තරම් අප්පිරියාවක් මට කවදාවත් දැනිලා නෑ .ප්‍රීතිරාජ්ට හොඳම ආසියානු සිනමා නළු සම්මානය හම්බ උනේ සිංගප්පූරුවේදී .මෝහන් රාජ් අපේ ගෙදර ඇවිල්ල බලෙන්ම මාව ඇදගෙන එයාර්පෝට් එකට ගෙනිච්චෙ මාධ්‍ය කාරයෝ ඉස්සරහ කිසිම දෙයක් පෙන්නන්න නැතුව හිනාවෙලා ඉන්න කියලා පොරොන්දු කරවගෙනයි.

ඊට සතියකට පස්සේ නවරස පත්තරේ කරපු වැඩ සටහනකදි මගෙන් ඇහුවේ

මුතුබෙලි පොකුණ චිත්‍රපටියෙදි ඔබේ සැමියා සිංගප්පුරුවේ දී හොඳම නළු සම්මානයට පාත්‍ර වුණා .නමුත් ඒ ගමනට ඔබව සහභාගී නොකරගෙන ඔහුට

මිහිරිමලීව ම ගෙනියන්න ඕනේ කියලා අධ්‍යක්ෂකත් එක්ක රණ්ඩු කරපු කතාවක් දැන් පැතිරීගෙන යනවා .ඒ ගැන ඔබට මොනවද කියන්න තියෙන්නේ කියලයි……

.මගේ තොල් සුදුමැලි වෙනවා මටම තේරුණා .මේ වගේ ප්‍රශ්නයක් කසාද ගෑනිගෙන් මූණටම අහන්ඩ තරම් මේ මාධ්‍ය කාරයෝ කොයි තරම් පහත්ද කියලා මට හිතුනා.

මට දරුවෝ හතර දෙනෙක් ඉන්නවා….. මට එයාලගේ වැඩ හොඳටම ඇති කියලා මම එයාල ඉස්සරහ හිනා උනා .

ප්‍රීති ට වයස අවුරුදු හැත්තෑ තුනේදි රිය අනතුරක් සිද්ධ වෙලා නුවරඑළියේදී නැති වුණා .ඒ වෙලාවේ නවක නිළියක් වෙච්ච නතාලියා තමයි එයාගේ කාර් එකේ ඉඳල තිබුනේ .නතාලියාටනම් සුළු තුවාල තිබුනේ .මුළු ලංකාවම ප්‍රීතිරාජ් වෙනුවෙන් අඩා වැලපෙන කොට මං විතරක් කාමරයේ ඇඳ උඩ ඉඳගෙන හිනා උනා ….ඔයාට ඔය මරණය ගොඩක් සැපදායක වැඩියි ප්‍රීති…….. කියලා මං හෙමින් කුටු කුටු ගෑවා .ඒ උනාට ඊළඟ විනාඩි පහේදී තනි සුදු ඇඳගත්ත මට මාධ්‍ය ඉස්සරහ ප්‍රීතිරාජ් ට වඩා රඟපෑමක් රඟපාන්න සිද්ධ වුණා .

ලොකු පුතාගේ අත් දෙක අල්ලලා මට කියන්න සිද්ධ වුණා මේ දේවල් කිසි දෙයක් එළියට දැනෙන්න තියන්න එපා කියලා .ලෝකයේ හිටපු හොඳම තාත්තලගෙනුත් හොඳම තාත්තා හිටියේ තමන්ට කියලා කියන්න කියලා මම ලොකු පුතාට කිව්වා .

අම්මිගෙ මූණ බලාගෙන මට අම්මිට රිද්දන්න බැරි හින්දා මං මේ බොරු කියනවා …..කියලා එදා පුතා මට කිව්වා .අනිත් උන් තුන් දෙනාටත් ඒ විදිහේම බොරු කියන්න කියලා මම නොවදිනා වැදුම් වැන්දා .තුන්වෙනි පුතා කොහොමත් වේදිකා නාට්‍ය ශිල්පියෙක් .ඌ එදා මාධ්‍ය ඉස්සරහ කිව්වේ අපි හතර දෙනාගේම හැම උපන් දිනයකටම තාත්ත ගෙදර හිටියා .එදාට තාත්තා තමයි අම්මත් එක්ක එකතු වෙලා අපිට බුරියානි හදන්නේ කියලා ..

පස්සේ දවසක තුන්වෙනියා මාත් එක්ක හිනා උනා තාත්තට වඩා මම රඟපාන්න දක්ෂයි නේද අම්මේ කියලා ….

ලක්වාසී කදුලු ගගේ

ගිල්වා දුක් සුසුම් ගොඩේ

අප අතරම යලි ඉපදේ..

ප්‍රීතිරාජ් ..නුබ මිතුරේ….

පරන පත්තරයක තිබුනු හැටි නිකමට මතක් වෙලා මගේ කට කොනකට හිනාවක් ආවා.