මම අම්මට කිව්වා ප්‍රියංකර කියන්නේ මහා ගොඩේ නමක් කියලා . ඒ වගේම මට එයත් එක්ක රෑ කෑමකට අද යන්න බෑ මයි කියලත් කිව්වා. .අම්මා පස්සෙන් ආවා මට කන්කෙඳිරි ගගා.ජෙරල්ව මට අමතක කරන්න බැරි වුණා .ඇත්තටම මම ජෙරල්ට ආදරය කලාද එහෙම නම් ඇයි ….ඇයි …..ඒ විදියට අපි දෙන්න වෙන් වුනේ…. ජෙරල් අපේ ඔෆිස් එකේ හිටපු බර්ගර් ජාතික පිරිමි ළමයෙක් .ලොකු විනෝදකාමීයා.හිනා සාගරයක් …කතා පෙට්ටියක්.මම ආස වෙලා හිටියෙ ඒවට . ඒත් ජෙරල්ට කවදාවත් ඕනෙ උනේ නෑ මාත් එක්ක එක වහලක් යටට එන්න. මාස ගනං ප්‍රජෙක්ට් වලට පිටරට ගිහිං උන්නේ නීලියා කියලා කෙනෙක් හුස්මකවත් හිටියේ නැති ගානට. ප්‍රියංකර අම්මලා ගෙදරින් කතා කරපු මනමාලයා. ප්‍රසව හා කාන්තා රෝග විශේෂඥ ක් වෙච්ච ප්‍රියංකර ඇයි තාමත් කසාද බැඳලා නැත්තේ කියලා මම අම්මගෙන් එදා ඇහුවා .
ඉතින් උඹත් තාම බැඳලා නෑ නේ ..ඒ වගේ වෙන්න ඇති …අම්මා කිව්වා.
ප්‍රියංක රත් එක්ක මේ යන ගමනට ගවුමක් ඇඳගෙන යන්න කියලා අම්මා මගින් මගටම කිව්වා .
මහා ගොඩයෙක් නේ … ගවුම අඳින ගමන් මම කිව්වා .
ප්‍රියංකරගේ කාර් එකට මම නගිද්දි හවස 6ට විතර ඇති . කන්නාඩි දෙකක් දාලා උන්නු ප්‍රියංකර ප්‍රසන්නයි කියලා හිතුනා.
බොහොම හොඳට වායුසමීකරණය කරලා තිබිච්ච කාර් එක ඇතුලෙ ප්‍රියංකරට දාඩිය දානවා දැකලා මට හිනා ගියා
ඇයි හිනා වෙන්නෙ ….
ප්‍රියංකර මගෙන් ඇහුවා …
මම මොකුත් නොකියා බිම බලාගෙන දෙතුන් පාරක් ඔලුව දෙපැත්තට වැනුවේ මුකුත් නෑ කියන්න වගේ.
මට දාඩිය දාල තියෙන එකට නේ…
මම ඔලුවෙන්ම ඔව් කියන එක කිව්වේ හිනාවෙවීමයි..
දවසට ගෑනු විස්සක් තිහක් අතගෑවා මගේම කියලා ගෑනු කෙනෙක් එක්ක ඉඳගෙන යන්නේ මම අදමයි …
පිස්සු…… කියලා මම හිනා උනාට ….
මොන මල විකාර කතාවක් ද ඒ …මගෙම කියලා ….කොහොමද එහෙම කියන්නේ …මට හිතුනා .
අපි සන්ලැගූන් එකට ආවේ ..
ඒ වෙලාවේ ඉර බැහැගෙන යනව හරි ලස්සනයි .ඉතිං නීලියා එදා මුකුත් කතා කරන්න බැරි උනානේ… මොනවද බොන්නෙ …මම නං ඉතින් ආසම ඉඟුරු දාපු හොඳ ප්ලේන්ටියක් බොන්න ඒ උනාට මේ වගේ තැනකට ඇවිල්ලා ගෑනු ළමයෙක් එක්ක කතා කර කර ප්ලේන් ටි බොන්නේ නෑනෙ නේද…
කියලා එයාම හයියෙන් හිනා වුණා .මම ඒකට හිනා උනාට මට ඒවට හිනා ගියේ නෑ. මට තනියම හිතුනා දොස්තරලාට ඉතිං ඕව මහ විහිළු කියලා .
ෆෘට් ජූස් හොදයි …මම කිව්වා .
අපි හුඟක් විස්තර කතා කළා පොඩි කාලේ ඉස්කෝලෙ ගියපු තැන්, විභාග කරපු හැටි, කැම්පස් ගිය හැටි ,පත්වීම් ගත්ත හැටි මේ හැම දෙයක්ම.
මම ඔයාගෙන් දෙයක් අහන්නද….
මම ඇහුවා .
මේසේ මැද්දේ පත්තුවෙන ඉටිපන්දම ට එහා පැත්තේ ඉඳන් ලස්සන ඇස් දෙකකින් ප්‍රියංකර මන් දිහා බලන් හිටියේ ඕනම දෙයක් අහන්න කියනවා වගේ .
ඔයා කවදාවත් ගෑනු ළමයෙකුට ආදරේ කරල නැද්ද …
ඉටිපන්දම දිහාම ටිකක් වෙලා බලාගෙන හිටපු ප්‍රියංකර මං දිහා ආපහු බැලුවා. නීලියා ඔයා විශ්වාස කරයිද නැද්ද මම දන්නේ නැහැ… මම කවදාවත් කිසිම ගෑනු ළමයෙකුට ආදරේ කරලා නැහැ… ඉස්කෝලේ යන කාලේ වුණත් නැහැ… මට කැම්පස් එකේදි ලමයි කිව්වේ අහිංසක කියලා …..
මම හයියෙන් හිනා වුණා හිනාවෙලා කිව්වා අහිංසකලා තමයි අංගුලිමාලල වෙලා ඇඟිලි කපන්නේ කියලා …
ඇඟිලි නෙමෙයි ගෑණුන්ගේ බඩවල් නේ කපන්න වෙලා තියෙන්නෙ කිවුවහම නම් මට හයියෙන් හිනා ගියා. ප්‍රියංක‍රත් මාත් එක්ක හිනා උනා .
ප්‍රියංකර ගෙන් ඈත් වෙන්න …එයාගේ හිත කැඩෙන්න හොදම දේ ජෙරල් ගැන කියන එක කියලා මට හිතුනා.
මටනං එෆෙයාර් එකක් තිබුනා. එයා ජෙරල් …. එහෙම කියලා පටං ගත්තු මගේ අගකුත් නැති මුලක්නම් කොහොමවත් නැති ආදර කතාව ඔහේ කියාගෙන ගියා..
ඉටිපන්දමේ වැක්කෙරෙන කිරි ටූත් පික් එකකින් එහා මෙහා කරන ගමං ප්‍රියංකර මගේ කතාව අකුරක් නෑර අහං උන්නා. ඒත් වචනයක් වත් කිව්වේ නෑ. ඒත් මූන අදුරු වෙලා ගියේ මහා පුදුම විදිහට .
දන්නවා ද නීලියා … අද හරි වැඩක් උනේ… මං කියපු ප්‍රේම කතාව එහෙමම තියෙද්දි එයා කියන්න ගත්තා.
අද මං අම්මෙක්ගේ නෝර්මල් ඩිලිවරි එකක් කලා. බබා අඩනවා… මං ඒ අම්මට කෑ ගැහුවා.. මොනවා කරනවද ඉක්මනට කිරි දෙනවා ලමයට කියලා … ඕහ් ශිහ්… කියපු ප්‍රියංකර කන්නාඩි ය ගලවලා කදුලු පිහදගද්දි මට හිතාගන්න බැරිඋනා.
ඇයි… ඇයි ප්‍රියංකර ….
අනේ නීලියා ඒ අම්මා හයියෙන් ඇඩුවා..
එයාට බ්‍රෙස්ට් කැන්සර් එකක් තිබිලා බ්‍රෙස්ට් දෙකම අයින් කරපු කෙනෙක්.
මට පුදුම වේදනාව ක් දැනුනා. මං ඒ අම්මගෙන් සමාව ගත්තා .
මට ලැජ්ජා හිතුනා. වැඩකට නැති ජෙරල් ගැන මං උඩ දදා කියවනවා. මේ මනුස්සයා අතිශයින්ම මානුශීයව හැමදේම දරාගන්න වා කියලා හිතුනා.
අපි රෑට නූඩ්ල්ස් කෑවා. ප්‍රියංකර මගෙන් උයන්න පුලුවන් ද ඇහුවා.
හ්ම්….. අහල ගං හතම දන්නවා මං උයද්දි…
ඒ මොකෝ… කර ගද එච්චර දුර යනවද…
පුන්චි පුන්චි හිනාවල් පුන්චි පුන්චි කතාවල් දුක් බර කතාවල් සිද්දි අමතක කර කර ඉස්සරහට ඇදි ඇදි ගියා.
අපි හෝටලෙන් එලියට ඇවිත් කාර් පාර්ක් එකට ගියා. කාර් පාර්ක් එක පාලුයි. කලුවරයි . ප්‍රියංකර මං දිහා බලං උන්නේ වාහනේට නගින්නේ නැතුව.
මං එයා දිහා බැලුවේ ඇයි මේ කියලා අහන්න වගේ
තෑන්ක්ස් නීලියා …. ඔයා ජෙරල් ගැන ඇත්තම කිව්වට ….. දැන් මට පුලුවන් අතපය දිග ඇරලා ඔයාට ආදරේ කරන්න .අවුරුදු ගානක් ලගින් උන්නු ජෙරල් කවදාවත් මට කටින් ආදරෙයි කියලා තිබුනේ නෑ. ජෙරල් ලගදි මට ලැජ්ජා වක් දැනුනේ නෑ. ජෙරල් මාව තුරුල් කරගත්තත් සිපගත්තත් මට ලැජ්ජා වක් දැනුනේ නෑ. එත් ප්‍රියංකර …එක්ක ඉද්දි …. මාව කීරිගැහෙනවා වගේ දැනුනා. ප්‍රියංකර දිහා කෙලින් බලන්න බෑ වගේ දැනුනා.
අපි ගෙදරට ලං වෙද්දි රෑ දහයට විතර ඇති. ම්ම්… නිදිමතයි …. ගිය ගමං මංනං වොශ් දාලා නිදියනවා … කියලා මං හිනාවුනා.
දැං මං ඩියුටි යන්න ඕනේ ලමයෝ කියලා ප්‍රියංකර හිනාවුනේ මං දිහා බලලා .
ගේ පේන නොපෙනෙන මානේ ප්‍රියංකර වාහනේ නැවැත්තුවා. මං ප්‍රියංකර දිහා බලද්දී දැක්කා ඒ ඇගිලි වෙව්ලනවා. ආපහු දාඩියත් දාලා තිබුනා . ප්‍රියංකර අහිංසක යි කියලා මට හිතුනා . බොහොම හෙමින් මං ඉන්න පැත්තට නැමිලා මගේ හිස් මුදුනට සීරුවෙන් හාදුවක් දිපු ප්‍රියංකර ගුඩ් නයිට් කියලා ඇහෙන නෑහෙන හඩින් හෙමින් කියද්දි මට කදුලු නවත්තන්න බැරිඋනා.
මං කාමරේට ගිහිං ඇදට වැටුනට නින්ද ගියේ දෙගොඩ හරියත් පහුවෙලා.
උදේ ප්‍රියංකර ඉන්ග්‍රීසියෙන් වට්සැප් පනිවිඩ යක් එවලා තිබුනා .
3.20 in the morning I took four twins . Someday I will Caesar you too
පාන්දර තුනයි විස්සට මං නිමුන්නු හතරක් ගත්තා . කවදා හරි ඔයාව සීසර් කරන්නෙත් මමයි….
උපුටා ගැනීම: Indika Peiris