තිස්සමහාරාමයේ ධනවත් ගම්බාරයකුගේ පුතෙකුට මා විවාහ කර දීමට තීරණය කළේ
අම්මා සහ තාත්තාය.මෙම විවාහය මගේ ජීවිතයම අඳුරු කාලපරිච්ඡේදයකට යොමු කරවන බවක් මට නිතර නිතර හැඟෙයි.එහෙත් දෙමව්පියන් වෙනුවෙන් ඔවුන්ගේ සතුට වෙනුවෙන් මගේ ජීවිතය අඳුරට ගමන් කළාට ප්‍රශ්නයක් නැත යනුවෙන් සිත සනසා ගැනීමට මම උත්සාහ කරමි.
සියලුම නෑදෑ හිත මිතුරන් ගෙන් අවසර ගැනීමෙන් පසු මම මධුසමය සඳහා මංගල රථයට ගොඩ වූ පසු රථයේ දොර වැසුවේ මගේ හොඳම මිතුරියක වන ටෙක්ලාය.මම ආසනයට හේත්තුවෙමින් , විවේක ගන්නා බවක් අඟවමින් සිතුවිල්ලට වැටුණෙමි.
සර්,අපේ ගමේ කෙනෙක් වෙන්න බැහැ වගේ “
අපට ආසන්නයෙන් පිටුපසින් ඇවිද එන කඩවසම් තරුණයා ගෙන් විමසුවේ පාසල් මාවතට පිවිසුණාත් සමගය.හිමිදිරියේම මහ වැස්සක පෙර නිමිති පහළ වෙමින් තිබිණ.ඊයම් පාට අහස කලු වැසි වළාවෙන් වැසී යයි.
” ඔව් ,මගේ පළමු පත්වීම ඔයාලගේ ගමේ ඉස්කෝලෙට.ඒත් පුදුමය කියන්නේ ඔයාලා මාව පිලිගන්න හදන්නේ මහවැස්සකින් තෙමලද ?
” අපේ ගමේ වැස්සට තෙමෙන කිසිම ආගන්තුකයෙකුට හෙම්බිරිස්සාවක් ,කැස්සක් හැදෙන්නේ නෑ ” .මම සිනාවෙමින් පවසද්දී ම මොර ගෙඩි තරම් වැසි බිංදු ඇද හැලෙන්නට විය.
” එන්න සර් මේ කුඩ යටට “
” නෑ ඔය පුංචි කුඩේ මට දෙන්න .ඔයාලා දෙන්නා ලොකු උදේ කුඩේ යටට යන්න “
පොඩි ළමයි රංචු පිටින් සුදු කොක්කු රෑනක් සේ පියාඹා ගියා .මගේ ප්‍රථම ඉල්ලීම ඔහු ප්‍රතික්ෂේප කළේ ඉතාමත් විනීත අන්දමිනි.
” සර් බයවෙන්න එපා .මේ මාධවී ටීචර්ගේ තාත්තා හොඳ වෙද මහත්තයෙක්. “
මගේ හොඳම මිතුරිය නාමලී කතාවට හවුල් වුණා.
” අව්වයි වැස්සයි” මම වැස්සේ ආකර්ෂණීය ස්වභාවය විඳිමින් ගීතවත් ලෙස ගායනා කලෙමි.
” මාධවී ටීචර්ගේ මඟුලයි ” නාමලී සිනාසුනාය.
ගයාන්ත තිරාණගම නම් උපාධිධාරී ගුරුවරයා අපේ ගුරු මණ්ඩලයට එකතු වූ මුල් දවස පිළිබඳව ප්‍රීතිමත් සටහනක් තැබීමට හැකිවීම අමතක නොවන සිද්ධියකි .
පෙර දින රාත්‍රියේ වට වැස්සෙන් පසු අපේ නිවස පහලින් ගලායන දොල සැඩව තිබිණ.දොළට සමාන්තරව තාත්තා වවා තිබුන උණ පදුරු නිසා අපේ නිවස පාරේ යන එන්නන්ට පැහැදිලිව නොපෙනේ .ගයන්ත අප නිවස ඉදිරිපිට පාරේ නැවතී සිටිනවා මා දුටුවේ අහම්බෙනි .
මම පාර දෙසට දිව ගියෙමි .
” කොහොමද මේ නේරංජනාව මම තරණය කරන්නේ “
“සපත්තු ගලවන්න .කලිසම් කකුල් ටිකක් උස්ස ගත්ත නම් හොඳයි ” මම යෝජනා කළෙමි .
මම සුරත දිගු කළෙමි .ගයන්තගේ සුරතේ උණුසුම මගේ මුළු සිරුර පුරා පැතිරී ගියේ නිමේෂයකිනි .
මද සුළඟට සෙලවුණ උණ පදුරේ රැඳී තිබුණ වැහි බිංදු කීපයක් අපේ දෙඅත් මතට වැටෙත්ම ගයන්ත මා දෙස බැලුවේ පුදුමයෙනි.
” පෝරුවේ සෙරමනි එක ගලන දොළක් ළග දී “ගයාන්ත විහිලු කරයි .
” ජීවිතයක් නිරන්තරයෙන්ම ගලා යන එකක් නේ.”
” ඔයාලගේ වත්ත හරි බෙහෙත් සුවඳයි ඒ වගේම
හරි ලස්සනට නඩත්තු කරලා තියෙනවා .කවුද මෙච්චර මහන්සි වෙන්නේ . මේ උණ පඳුරු නිසා ඔයාලා ගෙ වත්තේ එක පස් බිඳක් සෝදාපාලු වෙන්නේ නැහැ .
” මගේ තාත්තා හොඳ ආරක්ෂකයෙක් ,පස් විතරක් නෙවෙයි නංගියි මායි හොඳින් බලා ගන්නෙත් තාත්තයි අම්මයි .” මම මහත් සතුටින් කිව්වෙමි .
” ඔයාලා ගෙදර පෞද්ගලික පන්ති කරනවද ? “
“අයියේ උත්තරය ඔව් හෝ නැහැ .”විශාකා නංගිගෙන් පිළිතුරක් .
‘” ගයන්ත ,අපි උගන්වන්නේ මුදල් අය කරලා නොවෙයි ,ආත්ම තෘප්තිය සඳහා පමණයි .
” ආ එහෙම නං මටත් චිත්‍ර විෂය උගන්නන්න පුළුවන් .ඔයාලා කැමතිනම් . “
” හරි ෂෝක් .’ විශාකාගේ සතුට ඉතිරි පැතිරී ගියේ
අම්මාගේ තරවටුවක් සමගයි .
” අයියා කොහෙද නැවතිලා ඉන්නේ “
” වෙලේගෙදර වික්‍රමසිංහ වෙල් මුලාදෑනියාගේ ගෙදර “
” ඒ අපේ ලොකු මාමා .අපේ අම්මගේ ලොකු අයියා”
දිවා ආහාරය සඳහා තාත්තා ඉදිරිපත් කළ යෝජනාව ගයන්ත ප්‍රතික්ෂේප කළේ ඉතාම නිහතමානී අයුරිනි .ඔහු අප නිවසින් පිටත්ව යාමට පෙර ගමන් මල්ලේ තුබූ තිබූ කුඩා පාර්සලයක් මා වෙත පිරිනැමීය .
“:අක්කේ ගලවන්නකෝ “
මම සෙමින් එහෙත් ප්‍රවේශමෙන් කවරය විවර කළෙමි .දෙවියනි එය මගේ ආලේඛ්‍ය චිත්‍රයකි .
” අක්කෙ,ඔයා පනපිටින් ඉන්නව නේ .අනේ අයියේ ඔයා කොහොමද මේක ඇන්ඳේ .”
අම්මටත් තාත්තටත් පසඟ පිහිටුවා වැඳ අවසර ගත් ගයන්ත ,නංගිටත්, මටත් ‘යන්නම් ‘කියමින් පිටත්ව ගියේය .
මම පින්තූරය ලයට තුරුල් කරගනිමින් මගේ කාමරයට දිව ගියේ නෙත්වල කඳුලු පුරවා ගනිමිනි .නිල් අහසේ පියාඹා යන වැහි ලිහිණියක සේ සතුට දෝරේ ගලමින් බොහොම වෙලාවක් මම කාමරයේ ඔබ මොබ ඇවිදිමින් මගේම ආලේඛ්‍ය චිත්‍ර දෙස බලා හැඬුවෙමි .
” ඒ දරුවා ඔයා ගැන බලාපොරොත්තුවක් කියාගෙන වගෙයි මට හිතෙන්නේ .” අම්මා රාත්‍රී කෑම මේසේදි සිහිපත් කළාය .
” නෑ නෑ අපි කලබල වෙන්න ඕනැන්නෙ නෑ බලමු “
තාත්තා සංසුන්ව මා දෙස බලමින් කිව්වා .
හුදකලා වන මම මට අමුත්තක් වූ ආලේඛ්‍ය චිත්‍රය
සිහිපත් කරමින් මීදුලේත් වත්තේ අහුමුලු වලත් ඇවිද්දෙමි .
ගයන්ත අපේ චිත්‍ර පන්තියට සහභාගි වී සති දෙකකට පමණ පසු ටෙක්ලා ලියනගම ද ස්වකැමැත්තෙන් ඉංග්‍රීසි ඉගැන්වීමට සහභාගි වූවාය .ඇය නාගරික සුරූපී තරුණියකි. ඉතා උනන්දුවකින් ඇය දරුවන් සමඟ සමග කාලය ගත කළා ය .
ජපන් තානාපති කාර්යාලය විසින් පවත්වනු ලබන ලෝක ළමා චිත්‍ර ප්‍රදර්ශනයකට අපේ දරුවන් හය දෙනෙකුගේ චිත්‍ර කිරීමට කටයුතු කළේය .මේ අතරතුර ම ගයන්ත ද චිත්‍ර ප්‍රදර්ශනයක් සඳහා සූදානම් වෙමින් සිටියේය .ඔහුට ඉතා ලගින් සිට ටෙක්ලා උදව් කරන බව ගයන්ත පැවසුවේ ඉතාමත් නිහතමානීව ය .නමුත් මගේ සිත හඬා වැටෙන්නට පටන් ගත්තේ මට නොදැනුවත්මය.
” මාධවී ඔයාගෙන් ලොකුම උපකාරයක් මම බලාපොරොත්තු වෙනවා .ඒක ඔයා තරමක් හිතලා මතලා ගන්න ඕන තීරණයක් .” ගයන්තගේ දෙනෙත් මා වෙත සෘජුව එල්ල වී තිබිණ .
” මොකක්ද?”
” මගේ චිත්‍රයකට ඔයාට පෙනී සිටින්න පුලුවන්ද?
මේක අඩ නිරුවත් චිත්‍රයක්.”
” අනේ කණගාටුයි.මට දෙපාරක් හිතන්න දෙයක් නෑ ඒකෙ.මම උපන්නෙ ගමක ,හැදුනෙ වැඩුනෙ ගමක ,උගන්නන්නෙ ගමක .”
” නෑ කමක් නෑ .ඔයාගේ හිතට දුකක් දැනුන නම් සමාවන්න.”
ජපන් ලෝක චිත්‍ර ප්‍රදර්ශණයෙන් අපේ දරුවන් අතරින් දෙදෙනෙකු ට රන් පදක්කම් සහ එක් අයෙකුට රිදී පදක්කමක් ලැබී තිබිණ .මෙය අපේ ගමට ලැබුණු විශේෂ ගෞරවයක් බව පුවත්පත් වාර්තා කර තිබිණ .අපි දරුවන් සමග ජපන් තනාපති කාර්යාලයට ගොස් නියමිත ත්‍යාග සහ සම්මාන ලබා ගත්තෙමු .ටෙක්ලා අපි වෙනුවෙන් ඇගේ නිවසේ දී දහවල් ආහාරය සූදානම් කළා ය.
” නංගි ගයන්ත ඉස්කෝලේ මහත්තයයි ,ටෙක්ලා නෝනයි අද උදේම ගියා .යන තැනක් නම් කියලා ගියේ නෑ . දවස් දෙක තුනකින් තමයි ආපසු එන්නේ කියල කිව්වෙ. ” වික්‍රමසිංහ මාමා අම්මට කිව්වේ තාත්තත් ඉදිරිපිට.
” ඒගොල්ලොන්ගෙ පෞද්ගලික කාරණා අපිට එච්චර අදාල නෑ මස්සිනා” තාත්තා කිව්වෙ හිනා වෙමින්
ගයන්තගේ චිත්‍ර ප්‍රදර්ශනය පැවැත්වූයේ කොළඹ ලයනල් වෙන්ට් ශාලාවේදි .ගුරුමණ්ඩලයේ අපි වැඩි දෙනෙක් චිත්‍ර ප්‍රදර්ශනය නැරඹීම සඳහා කොළඹ ගේමු .ටෙක්ලා වේලාසනින් ඊට සහභාගී වී සිටියා. එක් විශේෂ චිත්‍රයක් ඉදිරිපිට ගුරු මණ්ඩලයේ අය නැවතුනා. එය අඩ නිරුවත් කාන්තා චිත්‍රයකි.
” මාධවී ටීචර් මේ චිත්‍රය ඉන්නේ ටෙක්ලා නේද?”
” මං දන්නෑ කෙල්ලෙ.”
ජයන්ත සහ ටෙක්ලා අප වෙත ආවේ පෙම්වතුන් දෙදෙනෙක් වගේ .විදුහල්පතිවරයා මුහුණ ඇඹුල් කර ගනිමින් ඉවතට ගියේ අමනාපෙන් මෙනි.
” මේ චිත්‍රය ලොකු මුදලකට පෝලන්ත ජාතිකයෙක් මිලට ගත්තා.’ ටෙක්ලා කිව්වේ හරිම සන්තෝෂයෙන් .
” ඒ විතරක් නොවෙයි එයාගෙන් කෙල්ලට විවාහ යෝජනාවක්.” ගයන්ත කිව්වා.
” ඇයි මාධවී ඔයා මාව මඟහරින්නේ. මම මොනවද ඔයාට කළේ.” ටෙක්ලා පාසැල්
විවේකාගාරයෙදී මගෙන් ප්‍රශ්න කළා.
” මාධවී , ඔයාට ඒ චිත්‍රයට පෙනී සිටින්න ගයන්ත යෝජනා කළානේ.ඔයා ඒක ප්‍රතික්ෂේප කලා.ඊට පස්සේ එයා මට යෝජනා කළේ .එයා හරි වැදගත් කෙනෙක්. විශ්වාස කරන්න බැරි තරම් අවංක කෙනෙක්.”
ටෙක්ලා රැකියාවෙන් ඉවත් වී ස්විට්සර්ලන්ත ජාතිකයා සමඟ විවාහ වූ බව ගයන්ත මා සමග
කියා සිටියේ හදපිරි සන්තෝෂයෙනි.
ගයන්ත තිරානගම ගේ චිත්‍ර ප්‍රදර්ශනය පිළිබඳ මහ ඉහළින් පුවත්පත් වාර්තා කර තිබිණි .ඔහු
ජාත්‍යන්තර තලයේ මහ ඉහළින් පිළිගත් චිත්‍ර ශිල්පියෙක් බව මා දැන ගත්තේ පුවත්පතිනි .
මේ අතර වික්‍රමසිංහ මාමා අම්මා වෙත රහස් පණිවුඩයක් එවා තිබිණි.මේ විශ්ව කීර්තියට පත් චිත්‍ර ශිල්පියා අපේ පවුලට නොගැළපෙන බවකි.
ගයන්ත අපේ පාසලෙන් ඉවත්ව ගියේ කොළඹ විශ්වවිද්‍යාලයේ සහකාර කථිකාචාර්යවරයෙක් වශයෙන් පත්වීමක් ලබාගෙනය .
කඳුළු නැගී දෙනෙතින් මා දෙස බැලූ කථිකාචාර්යවරයා සිනාසුනේය.
උපුටා ගැනීම: Dharmasena Jayawickrama