අපිට අපේම නොවන ඤාව්වෙක් ඇත. ඌ සුපිරි ඇණයක්ය. නිකන් නොව පොල් පරාල ඇණයක්ය. පිස්සු පූසාට හපන් ඇණ රාජයෙක්ය. පොඩ්ඩ බැරි වෙනකොටත් හුස්ම අල්ලා ගන්නට බැරිව යන මා හා මාගේ මළණුවන් හේතු කොට ගෙන බූල් සහිත ජීවීන් සදහා අප නිවසේ නිල වශයෙන් වරණයක් ඇත. එනිසා මෙම හෝන්තු ඤාව්වා අපගේ අනුග්‍රහය මත නිවස්නයට වැඩැම්මවූවෙක් නොවන බැව් ඉන්තේරුවෙන්ම කිව හැක. අනෙක් අතට යන්ග් ඇඩල්ට් වයසේදී මාගේ සත්තලං පාදය සපා කෑම හේතුවෙන් විදින්නට වූ හැට හුටාමාරක් වූ ඉන්ජෙක්ෂන් කටු හේතුවෙන් මට ඕකුන් කෙරෙහි ඇත්තේ බලවත් අප්‍රසාදයකි.
කෙසේ වූවත් බන්දුල මාමා කියනා පරිදි පරෙයියෙකු මෙන් සහල් පරිභෝජනයෙන් මැමත් සරීරය බස්සා ගන්නට මානා බලමින් සිටින මා හට මේ හැකර පූසා බලවත් තර්ජනයකි. මන්ද මූ නිසා කඩාකප්පල් වන බියුටි ස්ලීප් එක නිසා ලාබ සහල් සෙවීමට තියා අමාරුවෙන් ඇවිද ගන්නා කිලෝමීටර් පහවත් යා ගන්නට බැරිය. එසේම මේ යස්ස පැටියා හෙට අනිද්දා සින්ගල් හෑන්ඩඩ්ලි අපගේ සමස්ත සිවිලිමම ගලවනු ඇති බවට මට කැට තැබිය හැකිය. මෙම වල් ඤාව්වා තමා තනියෙන්ම සිවිලිම මත බුබුළු නගින බෙලි කටු මෙන් හොලමන් කෙලියේ යෙදීම නොමැනවි යැයි සිතා අසල්වැසි නිවසක බරට හදනා පූසන් රොත්තෙන් කීප දෙනෙක්ට ද ආරාධනා කොට අර පාර මැද්දේ වන්නම් නැටූ පොලිස් අන්කල් මෙන් රෙස්ලින් කෙලියේ යෙදෙන්නේය. මුන්දෑ තැඹිලි සහ සුදු පැහැයෙන් ඔපනැංවුණු හීන්දෑරී දිගැටි ස්ලිම් ෆිට් හාදයෙක් වූවත් තාමත් කෑල්ලක් සෙට් කරගෙන ඇති බවක් පෙනෙන්නට නොමැති හෙයින් කොහේවත් යන ඔටුන්නකට රණ්ඩු වෙනවා වෙන්නට බැරිය.
කුස්සියට අලුතෙන් පුරුදු වන්නට තතනන කොම්බු චැනල් එකේ නිව්ස් මෙන් යන යන තැන හැප්පිලාවැටෙන නට් ලූස් මීයාව තියා හූනෙක් හෝ කැරපොත්තෙක් වත් අල්ලා සහායක් දෙන්නට හිතේ කොනකවක් නැති මේ උන්දා අප ඉන්නේ උන්දෑගේ නිවස්නයේ බැව් මතක් කරන්නට මෙන් මට සහ මාගේ මව් යානාවට බෑගිරි ගසමින් ගෙම්බර් දමන්නට නොපැකිලෙන්නේය. පියානෝ අප මෙන් මෙලෝ රහක් නැති වාක්‍යාංශ මගින් නොව කැම්පස් පාගමනට ජල ප්‍රහාර එල්ල කරනා පොලීසිය මෙන් දුටු තැන ජල ප්‍රහාර ආදී දැඩි පීඩන එල්ල කරනා හෙයින් ලොකු උන්නැහේ ඉන්නා පැත්ත පළාතට නොඑන්නට වග බලා ගන්නේය.
උදෑසනට කෙසේ හෝ කන්කෙදිරිගා දොරකින් හෝ ජනේලයකින් ගෙට රිංගාගෙන උණුසුම් මුල්ලකට වී තිබෙන ඔක්සිජන් පොඩ්ඩත් අදිමින් තෙල් ඇමති නැවට නැග්ගා වගේ හෙන ලෙවල් එකෙන් පොඩි රෙස්ට් එකක් ගෙන නැවත එළියට පැන යන්නට මගක් සොයමින් සූවස් ඇලේ හිරවූ නැව මෙන් හූ තියයි. එවිට ඒ මහා රාජෝත්තමයාට එළිබසින්නට දොරවල් විවෘත කිරීම අපගේ රාජකාරියයි.
මොනවා කරත් උන්දෑ අපේ ගෙදරින් ආහාර නොගනියි. ඒ සදහා අදාල නිවස වෙතම වාර්තා කරයි. මේ සදහා ආසන්නතම හේතුව විය හැක්කේ SLS සහතිකයෙන් යුක්ත වසවිස සහිත ආහාර අප පරිභෝජනයට ගැනීම විය හැකි බැව් මම අපේ මව් යානයට දැන්වූ අතර සයන්ස්කාරියක් වන ඈද එය එසේ විය හැකි බැව් පිළිගත්තාය. මොනා උනත් මොළේ තියෙන හාදයෙක්ය.
මෙව්වා එව්වා කෙසේ වෙතත් සීලිමයි වහලෙයි හිස මත වැටී ජරා ජීර්ණ වූ ආණ්ඩුවක් මෙන් ස්වර්ගස්ථවීමට ප්‍රථමයෙන් මේ උන්දාව බද්දට ගැනීමට කැමති සුපිංවතෙක් වේ නම් කාරුණිකව දැනුම් දෙනු මැනවි! ඔරිජිනල් ගැනුම් කරුවන්ම විමසන්න. අතරමැදියන් අනවශ්‍යයි. සතයක් වත් බද්ද ලෙස අවශ්‍ය නොමැති අතර අවශ්‍ය නම් නට්ලූස් මී නගුටාද නොමිලයේ ලබා දිය හැක.
පලි – එක්ස්පෙරිමන්ටල් සයන්ටිස්ට් කෙනෙක්ට මේ පුරුපුරුවා ඉතා හොදින් ගැලපෙනු ඇත. ඉතා සුලු මෙහෙයකින් මුන්දෑගෙන් ගොඩ්සිලාවෙක් නිර්මාණය කරගෙන නොබෙල් තෑග්ග වූවත් දිනා ගත හැකි වෙනු ඇත.
ඉහත ඇත්තේ අප පියස්ස මත එම වංසක්කාර බිළාල රාජෝත්තමයානන් වහන්සේ සුබ නැකතින් හිරු රශ්මියේ පහස විදිමින් ගිමන් හරිනා අකාරයයි.
උපුටා ගැනීම: Kethma Kalhari Wickramasinghe