වෙනදා වගේම හැන්දෑව බොහොම නිස්කලංකයි. ඒ වගේම සුන්දරයි. මේ හැන්දෑවේ සුන්දරත්වය විඳින එකතරා වයසක මිනිහෙක්, අවන්හලකට වෙලා කෝපි උගුරක් තොලගාමින් හිටියා. මේ මිනිහා හොඳටම වයසයි. මුලු කොන්ඩයම රිදී පාට වෙන්න ඉදිලා. ඒ මදිවට තඩි බෝතල් අඩි කණ්නාඩි දෙකක් දාගෙන ඉන්න නිසා මුළු මූනම විකාර පාටයි. මේ මනුස්සයගේ එක කනක් හරියට ඇහෙන්නෙත් නෑ. ඉතින් කෝපි කෝප්පය තොලගාලා ඉවර වුනාට පසසේ මේ වයසක මනුස්සයා අමාරුවෙන් පුටුවෙන් නැගිටලා පුටු ඇන්දේ වනලා තිබුනු ලෙදර් ජෙකට් එක අතට අරගෙන ඇඳගත්තා. ඉන් පස්සේ සාක්කුවෙන් සල්ලි කොළ කීපයක් අරගෙන මේසය උඩට විසි කරලා හෙමින් හෙමින් එළියට ඇවිදගෙන ගියා.
මේ විදියට ඇවිදගෙන යන අතරතුරේ මේ මනුස්සයා තමන්ගේ වෙව්ලන දකුණු අත ජකට් එක ඇතුලට දාලා ඇතුල් සාක්කුවේ තිබුනු දුම් පයිප්පය එලියට අරගෙන පත්තු කලා. පත්තු කරපු දුම් පයිප්පෙන් දුම් උගුරක් ඇදලා දුම් වළල්ලක් පිටකරන ගමන් අවන්හලේ දොර ඇරගෙන එලියට ආවා. වයසක මනුස්සයා අවන්හලේ දොරින් එළිය බහිනවත් එක්කම කළු බෙන්ස් රථයක් වේගයෙන් ඇවිත් ඔහු ඉදිරියේ නතරකරනවා. බෙන්ස් රථයේ ඉස්සරහ දොර ඇරගෙන එලියට බැහැපු කඩවසම් අරාබි තරුණයෙක් වයසක මනුස්සයට පිටිපස්සේ දොර ඇරලා දුන්නා. වයසක මනුස්සයා මේ අරාබි තරුණයාගේ පිටට තට්ටුවක් දාගෙන මේ මෝටර් රථයට ගොඩවෙනවා.
ඉන් මිනිත්තු කීපයකට පස්සේ මේ බෙන්ස් මෝටර් රථය ටෙල් අවිව් නගරයේ වාහන තදබදය අතරින් හෙමින් හෙමින් ඉදිරියට ඇදෙමින් තිබුනා. අවසානයේදී බෙන්ස් රථය එක්තරා විශේෂ ගොඩනැගිල්ලක් ඉදිරිපිට නතරකරනවා. මේ ගොඩනැගිල්ල තමයි ටෙල් අවිව් වල තියෙන මොසාඩ් මූලස්ථානය. එතකොට කවුද මේ වයසක හාදයා???? මොකද්ද මේ වයසක මෑන්ගෙන් ඇති වැඩේ??? මේ වයසක හාදයාගේ නම රෆායල් එයිතාන්. රෆි එයිතාන් කියන්නේ ලෝකයේ එතෙක් මෙතෙක් බිහිවුනු සුපිරිම ඔත්තුකරුවෙක්. අතිදක්ශ බුද්ධිඅංශ නිළධාරියෙක්. මොසාඩ් සංවිධානය කියන්නේ ලෝකයේ තියෙන කාර්යක්ෂමබව අතින් අංක එකේ ඔත්තු සේවාවක්. රාෆි එයිතාන් කියන්නේ මොසාඩ් සාර්ථකත්වය පිටිපස්සේ හිටපු ප්‍රධානම මැජික්කාරයන්ගෙන් එක්කෙනෙක්. එයිතාන්ගේ කියුම් කෙරුම් නිසා රහස් ඔත්තු සේවා ඇතුලේ ඔහුව හැඳින්වෙන්නේ පුරාවෘතයක් විදියට. චරපුරුෂයන් අතරේ කිරුළු නොපලන් රජතුමා ලෙස ඔහුව හඳුන්වන්න පුලුවන්.
ඇඩොල්ෆ් අයික්මාන්ගේ ලෝකප්‍රකට නඩුවත් සමඟ තමයි රාෆිගේ නම මුල් වතාවට කරළියට එන්නේ. ඒ ගැන පුළුවන් තරම් කෙටි හැඳින්වීමක් කරලම කතාවට බහින්නම්. හිට්ලර් ජර්මනියේ චාන්සලර්වරයා වශයෙන් පත්වීමත් එක්ක ලෝක දේශපාලනය උඩුයටිකුරු වෙනවා. එක පැත්තකින් ඔහු මුළු ලෝකයම යුද්ධයක් දිහාවට එක්කගෙන ගියා. අනිත් පැත්තෙන් ඔහු යුදෙව් ජාතිය මහපොළොවෙන් අතුගාලා දාන්න දැවැන්ත වැඩසටහනක් ආරම්භ කලා. මේ වැඩසටහන හැඳින්වුනේ “අවසන් විසඳුම” නමින්. වාර්තාවෙන ආකාරයට මිලියන හයකට ආසන්න යුදෙව්වන් ප්‍රමාණයක් මේ අවසන් විසඳුම වැඩසටහන හරහා ඝාතනය වුනා.
දෙවනි ලෝක යුද්දයෙන් පස්සේ නාසි ජර්මනිය දැවැන්ත යුධ පරාජයකට ලක්වෙනවා. හැබැයි මේ “අවසන් විසඳුමට” සම්බන්ධ වුනු බොහෝ නාසි නිලධාරීන් ඒ වෙනකොටත් විවිධ රටවල් වලට පලා ගිහින් තිබුනා. මේ විදියට පලාගිහිපු අපරාධකාරයන්ව හොයාගෙන ඔවුන්ව ඝාතනය කරන්න ඊශ්‍රායලය ඇතුලේම විශේෂ කණ්ඩායමක් නිර්මාණය වුනා. ඔවුන්ව හැඳින්වුනේ Avengers (හඹායන්නන්) කියන නමින්. මේ ඝාතන කණ්ඩායමේ බොහෝ දෙනෙක් නාසි වදකාගාර වලින් දිවි බේරගත්ත යුදෙව්වන්.
1957 අවුරුද්දේ එක දවසක මොසාඩ් මූලස්ථානයට විශේෂ ආජෙන්ටිනාවෙන් බොහොම විශේෂ තොරතුරක් ලැබෙනවා. මේ තොරතුරට අනුව “අවසන් විසඳුම” වැඩසටහනේ ප්‍රධානම නිර්මාණයශිල්පියා විදියට සැලකෙන ඇඩොල්ෆ් අයික්මාන් Ricardo Klement කියන නමකින් බොහොම රහසිගතව ආජෙන්ටිනාවේ බුවනෝර්ස් අයර්ස් නගරයේ ජීවත්වෙනවා. අයික්මාන්ව ඊශ්‍රායලයට ගෙනල්ලා නඩු විභාගයකට ඉදිරිපත් කරලා, ප්‍රසිද්දියේ මරණ දඩුවම ලබා දෙන්න, ඊශ්‍රායල් අගමැති ඩේවිඩ් බෙන්ගූරියන්ට බරපතල අවශ්‍යතාවක් ඇති වෙනවා. මොකද නසිවාදයේ රෙද්ද ගලවලා හෙළුවෙන් යවන්න පුළුවන් හොඳම ක්‍රමය තමයි මේක. ඒ වෙනකොටත් නාසි මතවාද අළු යට ගිනි පුපුරු වගේ තැන තැන ව්‍යාප්ත වෙලා තිබුනා. මේ වැඩෙන් ඒවට රිදෙන්න ගහන්න පුළුවන්.
ඒ නිසා මේ වෙනුවෙන් මෙහෙයුමක් දියත් කිරීම අත්‍යවශ්‍යයි. කොහොම නමුත් මේ අයික්මාන්ගේ ප්‍රජෙක්ට් එක බාරදෙන්නේ ඒ වෙනකොටත් මොසාඩ් එකේ නැගීගෙන එන තරුව වුනු රෆි එයිතාන්ට. රෆි බොහොම ඉවසීමෙන් අවුරුදු දෙකක් මේ මෙහෙයුමට අදාල තොරතුරු එක්රැස් කරීම සිදුකලා. අවසානයේදී 1960 මැයි පළමුවෙනිදා රෆි ඇතුළු කණ්ඩායම, අයිච්මාන්ව හොයාගෙන ආජෙන්ටිනාවට පිටත් වුනා. සති කීපයක් මොසාඩ් ආරක්ෂක නිවාසයක රැඳී ඉඳිමින් අයිච්මාන්ගේ තොරතුරු එකතු කරගත්තට පස්සේ මැයි 10 වෙනිදා රාෆි ඇතුලු කණ්ඩායම ගේමට බහිනවා. මැයි 10වෙනිදා හැන්දෑවේ රෆි ගිහිල්ලා අයික්මාන්ව බෙල්ලෙන්ම අල්ලගෙන කුදලගෙන ඇවිත් ආරක්ශක නිවාසයට ගෙනත් දානවා. 1960 මැයි 21 දා රෆි ඇතුළු කණ්ඩායම අයික්මාන්ව කුලී ගුවන් යානයක් මාර්ගයෙන් ඊශ්‍රායලයට අරගෙන එනවා. 1962 මැයි 31 නඩු විභාගයකින් පස්සේ ඇඩොල්ෆ් අයික්මාන්ට මරණ දණ්ඩනය ලබා දෙනවා. (මේ මෙහෙයුම ගැන දැනගන්නනම් operation final කියන චිත්‍රපටය හොයාගෙන බලන්න.) මේ සිදුවීම්න් පස්සේ රාෆිගේ මෙහෙයුම ලෝකප්‍රසිද්ධ වෙනවා. කොටින්ම කියනවානම් ඊශ්‍රායලයේ පාසැල් පෙළපොතට පවා රෆිගේ මේ මෙහෙයුම ඇතුලත් කරලා තියෙනවා.
හැටේ දශකය ඉවරවෙලා ඊළඟට එන්නේ අරාබි ත්‍රස්තවාදයේ නැගිටීම. මේ වෙනකොට රෆි මොසාඩ් එකේ නියෝජ්‍ය අධ්‍යක්ෂ විදියට කටයුතු කලා. රෆිට දැන් සටන් කරන්න වෙලා තියෙන්නේ යුරෝපය පුරා වේගයෙන් පැතිරෙන අරාබි ත්‍රස්තවාදය එක්ක. ඇත්තටම රෆි ගැන කියනව නම් රෆි තරම් දරුණු, කපටි, ඒ තරම් තියුණු බුද්ධියක් තියෙන, තමන්ගේ අවස්තාවක් එනකන් ඉවසගෙන ඉන්න මිනිහෙක් සමහරවිට කිසිම ඔත්තුසේවාවක නැතුව ඇති. රෆි සාමාන්‍යයෙන් කිසිම මෙහෙයුමකට තුවක්කුවක් අරගෙන යන්නේ නෑ. ඒක අනවශ්‍ය අවධානමක් කියලා ඔහු විශ්වාස කලා. රෆි කියන විදියට රාෆිට තියෙන හොඳම ආයුධය තමයි තමන්ගේ බුද්ධිය. වෙලාවේ හැටියට ඔළුව පාවිච්චි කරලා කරන්න ඕනිදේ තමයි රාෆි ඒ වෙලාවට කරන්නේ.
රෆි තමන්ගේ අත් දෙකෙන් ඝාතනය කරපු ත්‍රස්තවාදීන් ගණන ගැන නිශ්චිත තොරතුරක් නැහැ. රෆිට ත්‍රස්තවාදියෙක් අහුවුනොත් සොරිම තමයි ඉතිං. ආයේ උගේ වලදාන්න කෑල්ලක්වත් ඉතුරු කරන්නේ නං නෑ. රෆි කියන්නේ ගැජට් කෑලි වලට ගොඩක් ආස චරිතයක්. රෆිගේ ගෙදර එක එක ජාතියේ වාහන වල කෑලි, කැඩුණු රේඩියෝ, ටීවී, බයිසිකල් චේන් වගේ කුණු කන්දල් වලින් පිරිලා තිබුනා. නිකන් ඉන්න වෙලාවට රාෆි කරන්නේ මේවගෙන් එක එක ජාතියේ ගැජට් හදන එක. රාෆි මේවා හදන්නේ එක පැත්තකින් ආසාවට. අනිත් පැත්තෙන් ඔහු අල්ලගත්ත ත්‍රස්තවාදීන්ව එක එක ක්‍රම වලට ඝාතනය කරන්න මේ ගැජට් කෑලි යොදාගන්නවා. ඇත්තටම කිව්වොත් මේ වගේ වැඩ වලින් ත්‍රස්තවාදීන් අතරේ රාෆිට තිබුනු බය තව තවත් තීව්‍ර වෙනවා. ඒ ගැන රාෆි මෙහෙම කියනවා
“මම කොයි වෙලාවක කාව මැරුවත්, මට උගේ ඇස් දෙක දිහා කෙලින් බලාගෙන ඉන්න ඕනි. මට උගේ ඇස් දෙකේ තියෙන සුදු පාට දිහා කෙළින් බලාගෙන ඉන්න ඕනි. ඊට පස්සේ මම ගොඩක් සන්සුන් වෙනවා.ඊට පස්සේ මම අවධානය දෙන්නේ මට කරන්න සිද්දවුනු දේ ගැන විතරයි. මට කරන්න තිබුනු දේ මම කලා. එච්චරයි.”
ඒ වගේම තමයි රෆි කිසිම රටකට, කිසිම වෙලාවක වෙලාවක තනි ගුවන් යානයකින් යන්නේ නෑ. ගුවන් තොටුපළ කීපයකටම ගිහින් ගුවන් යානා කීපයකට මාරුවෙලා තමයි තමන්ගේ ගමනාන්තයට එන්නේ. ඔහු ඒ හැම ගමනකටම වෙන වෙන පාස්පෝට් පාවිච්චි කලා. ඒ හැම පාස්පෝට් එකක්ම වෙනම චරිතයක් රඟපෑවා. රාෆි එක දොරකින් ඇතුලට ගියොත් එලියට එන්නේ වෙන දොරකින්. එකම කාර් එක කීපසැරක් පාවිච්චි කලේ නැහැ. කිසිම කෙනෙක්ට රාෆිව ලුහුඹඳින්න බැහැ. ඒතරම්ම ඔහු පරික්ශාකාරීයි. ඒ වගේම සූක්ශමයි.
ඝාතනයන් කරන්න තියෙන දක්ශකම වගේම මොසාඩ් සංවිධානයට කෙනෙක් බඳවගන්නත් රාෆි අතිදක්ශයි. ඕන ජාතියක එකෙක්ට කොක්ක ගහන්න රාෆිට වෙනම වචන සෙට් එකක් තිබ්බා. අදාල කෙනා ළගට ගිහින් රාෆි මෙහෙම කියනවා
“ඔයා දන්නවද?? අවුරුදු දෙදාහක් තිස්සේ අපේ මිනිස්සු හීනයක් දැක්කා. යුදෙව්වන් විදියට අපි අපේ වහල්කමෙන් ගැලවීම වෙනුවෙන් අවුරුදු දෙදාහක් තිස්සේ හීනයක් දැක්කා. අපි අපේ සිංදු වල, අපේ කතාවල, අපේ කවි වල , අපේ හිත්වල අපේ හැම දේකම ඒ හීනය අවුදුරුදු දෙදාහක් තිස්සේ ජීවත් කෙරෙව්වා. ඒ වගේම ඒ හීන අපිව මේ වෙනකන් ජීවත් කරවලා තියෙනවා.ඔයා දන්නවද? අන්තිමේදී ඒ හීනේ කොහොමහරි ඇත්තක් වෙලා තියෙනවා. හැබැයි ඒ හීනයට දිගටම ජීවත් වෙන්නම් අපිට ඔයාලා වගේ මිනිස්සු ඉන්නම ඕනි”.
මේ වචන සෙට් එක දාලා රෆි අල්ලපු මිනිස්සු සියගණනක් මුළු යුරෝපය පුරාම විසිරිලා හිටියා. නීතීවේදීන්, වෛද්‍යවරු, ඉන්ජිනේරුවෝ ව්‍යාපාරිකයන්, ගුරුවරු, ගණිකාවන් එකී මෙකී නොකී සියලුම වෘතීන් වලට සම්බන්ද පුද්ගලයන් සිය ගණනකගේ ජාලයක් රෆිට බුද්ධි තොරතුරු සැපයුවා.
රෆි සම්පූර්ණයෙන්ම වගේ අවධානය දීලා තිබුනේ හෙමින් හෙමින් වැඩෙන අරාබි ත්‍රස්තවාදය දිහාවට. මේ කාලයේදී මොසාඩ් සංවිධානයේ අධ්‍යක්ෂ විදියට වැඩ කරන්නේ රාෆිගේ ළඟම හිතවතා වුනු මයීර් අමිට්. මයීර් කියන්නේ මොසාඩ් සංවිධානය පණ ගස්සලා ගන්න සෑහෙන්න කැපවුනු කෙනෙක්. රෆි තරම්ම දක්ශයෙක්. මෙයීර් අමිට්ගේ විශ්‍රාම යෑමෙන් පස්සේ අධ්‍යක්ෂ පුටුවට ලිස්ට් එකේ ඊළඟට ඉන්නේ රෆි එයිතාන්. ඒත් ලංකාවේ වගේම ලිස්ට් එක කපලා, දේශපාලන බලපෑමෙන් Zvi Zamir කියන මෑන්ස් අධ්‍යක්ශක දූරයට පත් වෙනවා. මේ සීන් එකෙන් මලපැනලා රාෆි මොසාඩ් එකෙන් ඉල්ලා අස් වෙනවා. “සමීර්ගේ පොතේ හැටියට කෙරෙන වැඩ මට හරියන්නේ නෑ” කියලා මූනටම කියලා රාෆි බඩු මුට්ටු අස් කරගෙන ගෙදර යනවා. ඉන් පස්සේ මිනිහා තමන්ගේ පුරුදු මැකෑනික් වැඩ කරමින් අවුරුදු කීපයක් ගතකලා.
මේ අතරේ තමයි 1972 මියුනික් සංහාරය සිද්ධවෙන්නේ. 1972 මිනුනික් ඔලිම්පික් උළෙලට සම්බන්ධ වන ඊශ්‍රායල් ක්‍රීඩකයන් 11ක්ව බ්ලැක් සැප්තැම්බර් කියන ත්‍රස්තවාදී කණ්ඩායම විසින් ඝාතනය කරනවා. මේ බ්ලැක් සප්තැම්බරය මීට කලින් ගැහුවා පැන්නා ටයිප් එකේ ගේම් කීපයක්ම යුරෝපයේ රටවල් දෙක තුනකදී දීලා තිබුනා. නමුත් ත්‍රස්තවාදී සංවිධානයක් විදියට කරලියට එන්නේ මියුනික් සංහාරයත් එක්ක. මේ මියුනිච් සංහාරයෙන් ඇතිවුනු වේදනාව නිසා, මේ බ්ලැක් සැප්තම්බරයෙන් පළිගනීමේ බරපතල අවශ්‍යතාවයක් ඊශ්‍රායලයට ඇති වෙනවා. ඒ අනුව අගමැති ගෝල්ඩා මයර්ගේ නියෝගය මත, the operation worth of god කියන දැවැන්ත මෙහෙයුම ආරම්භ වෙනවා. (මේක ගැන දැනගන්න නම් ස්පීල්බර්ගේ munich චිත්‍රපටය බලන්නම වෙනවා).
ඒ අනුව බ්ලැක් සැප්තම්බරයට සම්බන්ධ පළවෙනි පුද්ගලයා ඝාතනය වෙන්නේ රෝමයේ නිවාස සංකීර්ණයකදී. මොසාඩ් සංවිධානයට වැඩ කරන ඝාතකයෙක්, උණ්ඩ 11ක් මේ පුද්ගලයට ශරීරයට බස්සනවා. මේ උණ්ඩ 11න් අදහස් වුනේ මියුනික් සංහාරයේදී ඝාතනය වුනු ඊශ්‍රායල් ක්‍රීඩකයන් 11දෙනාව. බ්ලැක් සැප්තම්බරයට සම්බන්ධ ඊළඟ පුද්ගලයාව ටෙලිෆෝන් බෝම්බයක් පාවිච්චි කරලා ඝාතනය කරනවා. තවත් ත්‍රස්තවාදියෙක්ව ඝාතනය වෙන්නේ හෝටලේ ඇඳකට හයි කරපු බෝම්බයකින්. මේ හැම කෙනෙක්වම ඝාතනය වෙන්න කලින් ඔවුන්ගේ ගෙවල් වළට මල් වඩමක් යවලා ශෝකය ප්‍රකාශ කරන්නත් මොසාඩ් එක අමතක කලේ නෑ.
මේ විදියට අවුරුදු ගණනාවක් තිස්සේ මොසාඩ් සංවිධානය බ්ලැක් සැප්තම්බරයට සම්බන්ධ පුද්ගලයන් එකින් එකා දඩයම් කිරීම කරමින් හිටියා. ඒ අතරේ මොසාඩ් එකට කිසිම විදියකට ගේමක් දීගන්න බැරි වුනු එක මිනිහෙක් හිටියා. ඔහුගේ නම තමයි Ali Hassan Salameh. මොහුව හැඳින්වුනේ රතු කුමාරයා (the red prince) කියන නමින්. මොසාඩ් එක අවස්තා කීපයකදිම අලීව ඝාතනය කරන්න උත්සාහ කලත් ඒ එකක්වත් සාර්ථක වුනේ නෑ. ඒකට ලොකුම හේතුව තමයි CIA සංවිධානය.
අලී කියන්නේ බ්ලැක් සැප්තම්බරයේ හිටපු අංක එකේ සාමාජිකයෙක්. අනිත් පැත්තෙන් පලස්තීන නායක යසර් අර්ෆත්ගේ විශ්වාසවන්තම ගෝලයෙක්. මෙතනදී CIA එක අලී එක්ක බොහොම රහසිගත් විදියට සම්බන්ධතාවක් මේන්ටේන් කරගෙන ගියා. CIA එක අලීට අවශ්‍ය ආරක්ෂාව, සුපිරි වාහන, මුදල් වගේ විවිධ පහසුකම් ලබා දුන්නා. ඒ වෙනුවෙන් අලීගෙන් ලැබුනු රිටර්න් එක තමයි කිසිම ඇමෙරිකන් ජාතිකයෙක්ට හෝ ඇමෙරිකන් දේපලකට බ්ලැක් සැප්තැම්බරයෙන් හානියක් වෙන්නේ නෑ කියන තහවුරුව. කලින් අවස්තා කීපයකදී මොසාඩ් එක අලීව ඝාතනය කරන්නව හැදුවත් ඒ හැම මෙහෙයුමක්ම CIA එක මැදින් පැනලා අල කලා.
මේ අතරේ 1977දී Menachem Begin ඊශ්‍රායලයේ නව අගමැතිවරයා වශයෙන් පත්වෙනවා. අළුත් අගමැතිවරයා මුලින්ම කරන්නේ රාෆි එයිතාන්ව තමන්ගේ ප්‍රධාන ආරක්ෂක උපදේශකයා විදියට පත් කරගන්න එක. මොකද ඒ වගේ මිනිහෙක් ගෙදරට වෙලා රේඩියෝ හද හදා ඉන්න එක මොසාඩ් එකට කියන්න බැරිතරම් ලොකු පාඩුවක්. සාමාන්‍යයෙන් ඊශ්‍රායලයට අළුතෙන් අගමැති වරයෙක් පත් වුනාම මොසාඩ් එක මුලින්ම කරන්නේ මොසාඩ් එකේ තියෙන kill list එක අළුත් අගමැති වරයාගේ අතට දෙන එක.මේ අළුත් පත්වීමත් එක්ක රාෆිත් මුලින්ම කලේ පරණ ලිස්ට් එකේ ඉතිරි වෙලා හිටපු අයගේ නම් ටික උඩට ගත්ත එක. ඒ අතරින් උඩින්ම සඳහන්වුනේ අලී හසන් නොහොත් රතු කුමාරයාගේ නම. රාෆිට තමන්ගේ පරණ තොරතුරු ජාලයෙන් දැනගන්න ලැබුනා ඒ වෙනකොට රතු කුමාරයා ලෙබනනයේ බේරූට් නගරයේ රැඳිලා ඉන්නවා කියලා තොරතුරක්. බේරූට් කියන්නේ රාෆිට හොඳට කරක් ගහලා පුරුදු නගරයක්. ඒ නිසා රතු කුමාරයාට බේරූට් වලදිම වැඩක් දෙන එක තවත් ලේසියි.
මින් දවස් කීපයකට පස්සේ ග්‍රීක ව්‍යාපාරිකයෙක් විදියට වෙස්වලාගත්ත රාෆි බේරූට් නගරයට පැමිණියා. ඔහු සති කීපයක් පුරාවටම බේරූට් නගරයේ රැඳිලා ඉඳිමින් රතු කුමාරයා යන එන තැන්, කනබොන තැන්, ඉන්න තැන්, හම්බවෙන අය, බුදියගන්න ගෑනු මේ සියළුම දේ ගැන ප්‍රවේසමෙන් තොරතුරු අධ්‍යනය කරන්න පටන්ගත්තා. රාෆිගේ මේ ගමන ගැනවත් මේ කරන්න හදන වැඩේ ගැනවත් CIA එකට කිසිම තොරතුරක් දැනගන්න ලැබුනේ නෑ. මොකද CIA එකේ රාෆිව ට්‍රැක් කරන්න පුළුවන් ජාතියේ එකෙක් නෑ. කොහොම නමුත් ඉන්පස්සේ රාෆි නැවතත් ටෙල් අවිව් වලට පිටත් වෙලා රතු කුමාරයාගේ කතාව ඉවරයක්ම කරලා දාන්න අවශ්‍ය වැඩපිළිවෙලක් නිර්මාණය කලා.
සියළුම දේවල් සැලසුම් කරලා ඉවරවුනාට පස්සේ රාෆි නැවතත් ලෙබනනයේ බේරූට් නගරයට එනවා. හැබැයි ඒ එන්නේ තනියම නෙවෙයි තවත් විශේෂ කණ්ඩායමක් එක්ක. විවිධ අරාබි රටවල් හරහා විවිධ ගුවන් යානා වලට මරු වෙලා තමයි මේ කණ්ඩායම බේරූට් වලට ළඟාවෙන්නේ. ඔවුන් කණ්ඩායම මුලින්ම බේරූට් වල තියන මොසාඩ් ආරක්ෂක නිවාසයට ඇතුල් වුනා. ඉන් පස්සේ මේ කණ්ඩායමේ එක නියෝජිතයෙක්, බේරූට් නගරයේ තියෙන ආයතනයකින් කාර් එකක් කුලියට අරගත්තා . දෙවනි නියෝජිතයා කාර් එකේ චැසියට, ඉරාක ජාවාරම්කාරයෙක්ගෙන් ලබාගත්ත semtex වර්ගයේ ප්ලාස්ටික් පුපුරණ ද්‍රව්‍ය සම්බන්ධ කරලා සම්පූර්ණ කාර් බෝම්බයක් නිර්මාණය කලා. කාර් බෝම්බයේ සියලුම වැඩ අහවර වුනාට පස්සේ තුන්වෙනි නියෝජිතයා මේ කාර් එක අරගෙන ගිහින් රතු කුමාරයා පදිංචි වෙලා ඉන්න ගෙදර ආසන්නයේ පාරේ කොනක පාක් කලා. ඉන් පස්සේ තත්පර ගණන් විනාඩි ගනන් පැය ගණන් ගෙවිලා ගියා.
හැන්දෑවේ හයට විතර කළු පැහැති සුපිරි බෙන්ස් රථ පෝළිමක් මේ වීදියට ඇතුළු වුනා. රතු කුමාරයා ගමන් කරන්නේ මේ බෙන්ස් රථ පෝළිමේ මැදින් ගමන් කරන රථයේ. රතු කුමාරයා මේ වෙලාවේ බර කල්පනාවක වැටිලා හිටියා. රතු කුමාරයාට ඕනිවෙලා තිබුනේ ඉක්මනින් ගෙදරට ගිහින් තමන්ගේ සුරූපී බිරිඳගේ පෙම් පහස විඳින්න. ලෙබනනයේ රූප සුන්දරියක්ව තමයි ඔහු විවාහ කරගෙන හිටියේ. ඔහු ඒ ගැන සිහින දකිමින් හිටියේ.
හදිස්සියේම රථ පේලිය ගමන අඩාල වුනේ වීදියේ ඉස්සරහා තිබුනු තදබදය නිසා. කල්පනාවක වැටිලා ඉන්න අතරේ රතු කුමාරයා කාර් එකේ වීදුරුවෙන් දකිනවා ටිකක් ඈතින් ඉන්න ලොකු බෝතල් අඩි කණ්නාඩි දෙකක් දාගත්ත කොට මිනිහෙක් තමන් දිහා අමුතු විදියට බලාගෙන ඉන්න හැටි. රතු කුමාරයා උනන්දුවෙන් මේ අමුතු පුද්ගලයා දිහා හැරිලා බැලුවා. මේ අමුතු මිනිහා දාගෙන හිටපු කණ්නාඩි දෙක ගලවලා ආයෙත් රතු කුමාරයා දිහා බලාගෙන හිටියා. රතු කුමාරයාගේ ඇස් දෙකත් මේ මිනිහගේ ඇස් දෙකත් එක මොහොතකදී එකට මුණගැහුනා. ඒ ඇස් දෙකේ පිරිලා ඉතිරිලා ගිහින් තිබුනේ අනුකම්පා විරහිත දරුණුකම විතරයි. තමන් දිහා උනන්දුවෙන් බලාගෙන ඉන්න මේ අමුතු මිනිහා යාන්තමට කට කොනකින් හිනා වුනා. රතු කුමාරයාගේ ඉවට ක්ශණිකව අනතුරක සේයාවක් දැණුනා. ඒ නිසා රතු කුමාරයාට උනන්දුවෙන් වට පිට බැලුවා. ඔහු ඒ වෙලාවේ දකිනවා තමන්ගේ බෙන්ස් රථයට සමාන්තරව, පාරේ එහා පැත්තේ අයිනේ අතර කරලා තියෙන වොක්ස්වැගන් කාර් එකක්. තමන්ට කෙළවෙලා ඉවරයි කියලා රතු කුමාරයට ඒ වෙලාවේ තේරුම් යනවා. රතු කුමාරයා ශීට් එකෙන් ඉස්සරහට පැනලා පුළුවන් තරම් හයියෙන් තමන්ගේ රියදුරාට කෑගැහුවා. ඒ ක්ෂණයෙන් මුළු පළාතම දෙවනත් කරගෙන වොක්ස් වැගන් එකේ චැසියෙන් මතුවුනු ගිනි ජාලාවෙන් රතු කුමාරයා වැහිලා ගියා. ළඟපාත හිටපු මිනිස්සු පිස්සු හැදිලා වගේ බෙරිහන් දීගෙන හතර අතට දුවන්න පටන්ගත්තා. මුලු වීදියම දුම් වළාවකින් පිරිලා ගියා. ඈතින් සයිරන් නලා සද්දේ දෝංකාර දෙන්න ගත්තා. මේ කලබල සියල්ලම අස්සේ බෝම්බයෙන් රතු කුමාරයා කෑලි වෙලා යනහැටි ඈත ඉඳන් බලාගෙන හිටපු රෆි කණ්නාඩි දෙක ආයෙත් දාගත්තා. ඉන් පස්සේ පුරුදු විදියට සාක්කුවට අත දාලා දුම් පයිප්පය අරගෙන පත්තු කරලා දුම් වළල්ලක් පිට කලා.
කොහොම වුනත් මේ ගැන ආරන්චි වුනු අගමැති Menachem Begin රෆි එක්ක සෑහෙන්න මල පැනලා තියෙනවා. ඒ වෙන මොකටවත් නෙවෙයි. මේ වගේ අවධානම් මෙහෙයුමකදීත් මේ යකා මේ තරම් කිට්ටුවට යාම ගැන. ඒත් රෆි කියන්නේ සැප පුටුවකට වෙලා නියෝග දීලා වැඩ වෙනකන් බලාගෙන ඉන්න ජාතියේ මිනිහෙක් නෙවෙයි. කොහොම වුනත් 2019 මාර්තු 23 වෙනිදා රෆායල් එයිතාන් අවුරුදු 92 ආයු විඳලා තමන්ගේ කාබන් ශරීරය හැර දාලා යනවා. ඔහු තමන්ගේ රාජ්‍යය සහ තමන් විශ්වාශ කල දෘශ්ඨිවාදය වෙනුවෙන් සිදු කල කැප වීම, මෙහෙය අසමසමයි. (මේවා සාධාරණද අසාධාරණද කියන එක සදාචාරාත්මක කරුණක්. ඒක ඔබ පෞද්ගලිකව තීරණය කරන්න). නමුත් ඔහු රහස් ඔත්තු සේවය ඇතුලේ අමරණීය සලකුණක් ඉතිරි කලා. ඔහු රහස් ඔත්තු සේවයේ, සධාකාලික පුරාවෘතයක් වශයෙන් අවිවාධයෙන් තොරව හඳුන්වා දෙන්න පුලුවන් බව සැකයක් නැහැ. මේ පසු කාලයේදී රෆිගේ චරිතය බොහෝ නවකතා, සිනමාපට වැනි නිර්මාණ වලට පාදක වුනා. ජෝන් ලෙ කාරේ විසින් රචිත The little drummer girl නවකතාව නිර්මාණය වෙන්නේ රෆිගේ චරිතය යම් දුරකට පාදක කරගෙන. (මේකේ මිනි TV සීරීස් එකක් තියෙනවා) ඒ වගේම ඩැනියල් සිල්වා කියන ප්‍රසිද්ධ නවකතා කරුවාගේ නවකතා කීපයකම රාෆිගේ චරිතයට සමාන චරිතයක් මුනගැහෙනවා. ඒ වගේම මොසාඩ් සංවිධානය ගැන ලියවෙලා තියෙන ඕනෑම පොතක, රෆි වෙනුවෙන් අනිවාරෙන්ම වෙනම පරිච්ඡේදයක් වෙන් වෙලා ඇති.
තොරතුරු මූලාශ්‍ර – Gideon’s Spies Book by Gordon Thomas
Spies Against Armageddon: Inside Israel’s Secret Wars Book by Dan Raviv and Yossi Melman
පලි – අර අන්තිම කොටස පොඩ්ඩක් සිනමැටික් විදියට ලිව්වේ කතාවේ ආකර්ශණය සහ රහ වැඩි වෙන්න. කොහොම වුනත් රෆි ඒ මෙහෙයුම ඉතාම ආසන්නයේ සිට මෙහෙයුවා කියලා Gordon Thomas තමන්ගේ පොතේ සටහන් කරලා තියෙනවා.
උපුටා ගැනීම: Nisal Ekanayaka