රට ගේම (වැල් වටාරම්)

ඔන්න එක පුද්ගලයයෙක් හිටිය. අපි එයාට දැනට සමන් කියමු. ඔන්න සමන්ට ඩුබායි යන්න චාන්ස් එකක් හම්බවුනා. ඉතින් මිනිහා කොහොම හරි ටිකට් එකක් හදාගෙන ඩුබායි ගිහිල්ල ඉදිකිරීම් සමාගමක සේවයට බැඳුනා. ඔය ඉදිකිරීම් සමාගම එංගලන්‍ත සමාගමක්. ඒකෙ විවිධ රටවල අය වගේම සුදු ජාතික සේවකයනුත් සෑහෙන ප්‍රමාණයක් හිටියා. ඔහොම මාස ගණනක් සේවය කරන කොට හැම අංශයකම සේවකයින්ව හඳුනගන්න සමන්ට පුලුවන් වුනා. ලංකාවෙන් ගිය සේවකයනුත් බොහෝ ප්‍රමාණයක් හිටියා.

ඉතින් සමන් ඔය විදියට වැඩ කරගෙන යන අතරෙ බොහෝ අය පොඩි පොඩි හොරකම් කරනවා සමන් දැකල තිබුනා. රස්සාවට අමතරව කීයක් හරි වැඩිපුර හොයාගන්න සමන්ට උවමනා වෙලා තිබුනත් චූටි චූටි හොරකම් කරන්න සමන්ට ඕන වුනේ නැහැ. සමන් එක්ක එකට වැඩකරන යාළුවො පොඩි පොඩි ඉදිකීරීම් ද්‍රව්‍ය, උපකරණ වගේ ඒවා හොරකම් කරලා ඒවා පිටට විකුණලා ඒ හම්බවෙන සල්ලි ගෙවල්වලට යැව්වා.

සමන් ඔහොම ඉන්නකොට එක දවසක් දැක්කා ස්ටෝර්ස් භාරව ඉන්න සුද්දාගේ පොඩි අවුලක්. පොඩ්ඩක් කල්පනා කරන කොට මිනිහට මතක් වුනා කාටවත් අහු නොවෙන්න ගහන්න පුළුවන් හොඳම ගේමක්. ස්ටෝර්ස් වල දොරවල් වලට දාල තිබුනෙ දිග පට්ටමක්. ඒකට ඉබ්බො දෙන්නෙක් දෙපැත්තෙන් දාල හිටියා. ස්ටෝර්ස් බාරව ඉන්න සුද්දා හැමදාම උදේට ස්ටෝර්ස් වල දොරවල් ඇරල ඉබ්බො දෙන්නව දොරේ කොක්කක එල්ලනවා. ඒ එල්ලනකොට ඉබ්බන්ව ආපහු ලොක් කරන්නෙ නැහැ. සුද්දා යතුරු විතරක් ආපහු බෑග් එකට දාගන්නවා. හවස යනකොට දොරවල් වහලා ආපහු පට්ටම දාලා ඉබ්බන්ව ලොක් කරනවා. මේක දවස් ගානක් සමන් හොඳට නිරීක්ෂනය කලා.

ඊට පස්සෙ සමන් ස්ටෝර්ස් වලට එන හැම වෙලාවකදීම කරන්නෙ එල්ලල තියෙන ඉබ්බො දෙන්නව හොඳට නිරීක්ෂනය කරන එක. ඉබ්බන්ගෙ වර්ගය, සයිස් එක, පරණ වෙලා තියෙන ප්‍රමාණය, බර, මලකඩ කාපු තැන් වගේ හැම දෙයක්ම හොඳ විමසිල්ලෙන් සටහන් කර ගත්තා. මේ හැම දෙයක්ම කලේ කිසිම කෙනෙක්ට පොඩි හරි සැකයක් ඇති නොවෙන විදිහට. ඊට පස්සෙ ඒ ඉබ්බන්ට ගැලපෙන විදිහෙ ඉබ්බො දෙන්නෙක්ව සමන් හොයා ගත්තා. ඊට පස්සෙ තමයි සමන් වැඩේට බැස්සෙ.

සමන් තමන්ගෙ ඉබ්බො දෙන්නව වැඩට ගෙනියන කොට පාවිච්චි කරන බෑග් එකේ දාගෙන හැමදාම සයිට් එකට අරන් එනවා. සුද්දා ස්ටෝර්ස් වල දොර අරිනකම් බලන් ඉන්න මිනිහ කරන්නෙ දොර ඇරපු ගමන් සුද්දගෙ ඉබ්බො දෙන්නව අරන් තමන්ගෙ ඉබ්බො දෙන්නව කොක්කෙ එල්ලන එක. ඊට පස්සෙ සුද්දගෙ ඉබ්බො දෙන්නව බෑග් එකට දා ගන්නවා. මේ මොකුත් නොදන්න සුද්දා කරන්නෙ හවසට ස්ටෝර්ස් වහලා කොක්කෙ එල්ලල තියෙන සමන්ගෙ ඉබ්බො දෙන්නව දාල දොරවල් ලොක් කරන එක. ඉබ්බො දෙන්න තියෙන්නෙ ලොක් ඇරල නිසා යතුරු ඕන වෙන්නෙ නෑ. නිකම්ම ලොක් වෙනවා.

ඊට පස්සෙ සමන් කරන්නෙ රෑ එකට දෙකට විතර හොරෙන්ම සයිට් එකට පනින එක. ඒකත් කරන්නෙ කාටවත් නොදැනෙන විදිහට. ඒ එනකොට සුද්දගෙ ඉබ්බො දෙන්නවත් අරන් එනවා. දොරවල් වලට දාල ඉන්න ඉබ්බො දෙන්නගෙ යතුරු තියෙන්නෙ සමන් අතේ නිසා නිකන්ම ස්ටෝර්ස් වලට ඇතුල් වෙන්න පුළුවන්. ඊටපස්සෙ තමන්‍ට ගන්න පුළුවන් හැම දේම අරගෙන දොරවල් වහල ආපහු සුද්දගෙ ඉබ්බො දෙන්නව දොරට දානවා. සමන් එක පාර බඩු ගොඩක් ගන්නෙ නැහැ අහුවෙන්න පුළුවන් නිසා. එහෙම වුනොත් මේක දිගටම කරගෙන යන්න බැරි වෙනවා.

උදේට ආපහු ස්ටෝර්ස් වලට එන සුද්දා දොරවල් අරින කොට තියෙන්නෙ සුද්දගෙ ඉබ්බො දෙන්නා. මිනිහ මේ මොන දෙයක්වත් දන්නෙ නැතුව දොරවල් ඇරල කරන්නෙ ආපහු ඉබ්බො දෙන්නව කොක්කෙ එල්ලන එක. ආපහු සමන් කරන්නෙ කලින් වැඩේමයි. මේක කාලයක් කරගෙන යනකොට ස්ටෝර්ස් වල බඩු අඩු වෙන බව තේරුනත් කිසිම හොරකමක් වෙච්ච බවට සාක්කියක් වත් නැති නිසා ඉහල නිලධාරීන් හැමෝටම ඒ වෙනුවෙන් කරන්න දෙයක් තිබුනෙ නෑ. ඔය අතරෙ සමන් උස්සන බඩු පිට තැන් වලට ඉක්මනට විකුණලා ඒ සල්ලි එහෙමම ගෙදරට යවනවා. සමන්ගෙ අවුරුදු දෙකක කොන්ත්‍රාත් කාලය ඉවර වෙනකොට පඩිය වගේ විසි තිස් ගුණයක් සමන් ලංකාවට එවල තිබුනා. සමන්ගෙ ගෙදර අයවත් මේ ගැන දැනගෙන හිටියෙ නෑ.

ලංකාවට ආවට පස්සෙ සමන් තනියෙන් ඉදිකිරීම් කොන්ත්‍රාත් ව්‍යාපාරයක් පටන් අරගෙන ඒක දියුණු කරගෙන ගියා. කාලෙකට පස්සෙ සමන් එක්ක පිටරට වැඩ කරපු යාළුවෙක් සෙට් වෙච්ච දවසක තමයි මේ ගැන මුලින්ම සමන් එලි කලේ. යාළුවටත් පුදුමයි රට ඉන්නකොට හොඳට වැඩ කරගෙන හිටපු සමන් මෙහෙම ගේමක් ගහපු එක ගැන. එහෙම දෙයක් කරනකොට යාළුවටවත් නොකියපු එකට යාළුවා සමන්ට දොස් කිව්වා. සමන් ඒකට කිව්වෙ එක දෙයයි.

“උඹලට කිව්ව නම් මේක එච්චර කාලයක් කරන්න හම්බ වෙන්නෙ නෑ බං”