රට වෙනුවෙන් ඉදිරියට (වැල් වටාරම්)

ඕනෑම පණිවිඩයකට එක් එක් අය සංවේදී වෙන්නේ එක් එක් ආකාරයෙන්. කෙනෙක් උපදෙස් අනුගමනය කරද්දී, තවත් කෙනෙක් එය සම්පූර්ණයෙන් නොසලකා හැරීමට ඉඩ තිබෙනවා. මේක ඕනෑම සමාජයක දක්නට ලැබෙන සාමාන්‍ය ලක්ෂණයක්. නමුත් වසංගත පාලනයේදී මේ ලක්ෂණය දැඩි අභියෝගයක් වෙනවා. මක්නිසාද යත්, වසංගතයක් පාලනය කරන්න පුළුවන් වෙන්නේ අපගේ සාමූහික වගවීම තුලින්ම බැවින්. ආරම්භයේ සිටම අප සමග රැදී සිටි බුද්ධිමත් සහෘද ඔබගේ සමාජය තුළ භූමිකාව වෙනස්වන්නේ මෙතනින්.

සාමූහික වගකීමක් වෙනුවෙන් වග වෙන සමාජ ක්‍රියාකාරීන්ගේ මැදිහත්වීම අවශ්‍ය වෙන්නෙ මේ සඳහායි. නෑයෙක් වේවා, හිත මිතුරෙක් වේවා, අසල්වාසියෙක් වේවා, කෝවිඩ් නිවාරණ උපදෙස් වලට පටහැනිව හැසිරෙනවා නම්, කරුණු පැහැදිලි කර දී, ඒ උපදෙස් වලට අනුගත කරවීම ඔබේ ජාතික වගකීමක් වෙනවා.

කොවිඩ් ඔබට බෝවිය හැක්කේ නන්නාදුනනා පුද්ගලයන්ගෙන් පමණක් නොවේ. නිතර දෙවේලේ හමුවෙන මිතුරන්, අසල්වාසීන් හා නෑයන්ගෙන් කොවිඩ් බෝවීමේ අවදානම ඉතාමත්ම ඉහළයි. විවෙකී හවසක හොඳින්ම හඳුනන කිහිපදෙනෙක් එකතු වෙලා, දොඩමලු වීම වෙනත් කාලයක නම් බොහොම සාමාන්‍ය ප්‍රසන්න අත්දැකීමක් වෙන්න පුළුවන්. එහෙත්, කෙනෙකුට කොවිඩ් ආසාදිත දැයි ඒ පුද්ගලයාවත් නොදන්නා මේ වගේ කාලයක,මෙවැනි හමුවක් මහා විනාශයක් ගෙන එන්න පුළුවන්. ඔබේ මැදිහත්වීමෙන් එවන් අවස්ථාවක් නවත්වනවානම් ඔබ, ඔබේ සමීපතමයන් කිහිප දෙනෙකුගේ ජීවිත බේරගත්තා වෙන්න පුළුවන්. දන්නා හඳුනන කෙනෙක් මුව ආවරණයක් පැළඳීමට පොළඹවා ගන්නේ නම් හෝ සෙනඟ ගැවසෙන ස්ථානයක් මගහැරීමට පොළඹවා ගන්නේ නම්, ඔබ ඔහුගේ පමණක් නොව ඒ පවුලේ අයගේද ජීවිත රැක දෙනවා වෙන්න පුළුවන්.

මෙය සබුද්ධික ඔබගෙන් හිතමිතුරන්ට, නෑදෑයින්ට හා අසල්වාසීන්ට විය හැකි වඩාත්ම වැදගත් උපකාරය වීමට පුළුවන්.

ඒ වගේම ඔබ දන්නා කවරෙකු හෝ තමාගේ පෞද්ගලික වගකීමෙන් ඔබ්බට ගොස් ඉහත ආකාරයෙන් තම සමීපතයන් අතර කොවිඩ් අවදානම අඩු කිරීමට කටයුතු කරන්නේ නම්, මුහුණු පොත හරහා එවැනි පුවත් අප හා බෙදා හදා ගන්න අමතක කරන්න එපා.

මෙය, අප ආදරය කරන රට, කොවිඩ් රැල්ලකට යටවීමට නොදී බේරාගැනීමට ඔබට කලහැකි සුදුසුම මැදිහත් වීමයි. මේ අපේ රටට ඔබගේ සමාජ ක්‍රියාකාරීත්වය අත්‍යවශ්‍යම මොහොතයි