රාත්‍රී දුම්රිය (වැල් වටාරම්)

දෙවන කොරෝනා රැල්ලේ ආරම්භයත් සමග දුම්රිය දෙපාර්තමේන්තුව විසින් රාත්‍රී තැපැල් දුම්රිය අවලංගු කිරීමට තීරණය විය.

නමුදු අවලංගු වීමට දිනකට පෙර අවසන් රාත්‍රී තැපැල් දුම්රිය ලෙස ධාවනය වූ කොළඹ කොටුව – මඩකලපුව/ත්‍රිකුණාමලය දක්වා ධාවනය වන සීග්‍රගාමී තැපැල් දුම්රියේ උපනියාමකවරයා වශයෙන් සේවයේ යෙදීමට සිදුවිය.

කොලඹ කොටුවෙන් රාත්‍රී 9:30 ගමන් අරඹන අපගේ ගමනාන්තය වූයේ ගල්ඔය දුම්රිය ස්ථානයයි..

එතැන් සිට දුම්රිය කොටස් දෙකකට බෙදී ඉදිරි කොටස ත්‍රිකුණාමලය දක්වාත් පසුපස කොටස මඩකලපුව දක්වාත් ගමන් කරයි..

වෙනදා මෙන් නොව එදින දුම්රිය සදහා මගීන් නොමැතී තරම්‍ ය..

රාත්‍රී 09:30 කොලඹ කොටුවෙන් ගමන් ඇරබූ දුම්රිය මහව දුම්රිය ස්ථානයෙන් හරවා ගල්ඔය දුම්රිය ස්ථානය දෙසට ගමන් අරඹන විට වේලාව අලුයම 02 පසුවී මිනිත්තු කිහිපයක් ගතවී තිබුනි..

අදුරු වලාවන් අහස්තලය වසා සිටින මොහොතක කැලේ මැදින් ඉදහිට හෝ සියුම් එලියක් දිස්වූයේ ඈතීන් වූ පැල්පත්ක විදුලි බුබුලක් හෝ පැල් රැකීමට ගසක් උඩට වී සිටින ගොවියකුගේ ලන්තෑරුම් එලියක් ම පමනි..

මෙම මාර්ගයේ ගමන් ගන්නා විට දුම්රිය රියදුරු මහතුන් දුම්රිය වේගය තරමක් අඩාල කොට වඩාත් අවධානයෙන් ධාවනය කරන්නේ කොයියම් මොහොතක හෝ දුම්රිය මගෙහි ගමන් ගන්නා අලි රංචුවක් දුම්රියේ ගැටී සිදුවන අනතුරු වලක්වාලීමට බව නොරහසකි…

රාත්‍රී තරු කැට අතරේ එකම රටාවකට ශබ්ද නගමින් කෑගසන රැහැයියන්ගේ නාදයටත් දුම්රිය එන්ජිමේ වූ ගෝෂාවටත් මැදිව හුදකලාවූ මැදිරියක ඝන අන්දකාරය දෙසට නෙත් යොමා ගමන් ගන්නා විටක ඕනෑම කෙනෙකු කල්පනා සයුරකට වැටෙන්නට ගතවන්නේ නිමේශයක් බව ඔබ හට අමුතුවෙන් කිවයුතු නැත…

මොහොතකින් කෙනෙකු විසිල් කරන්නාක්(සූස් හඩක්) මෙන් සියුම් ශබ්දයක් නගමින් දෑස් නිලංකාර වූ ආලෝකයක් නැරඹුම් කවුලුවෙන් ඉදිරිය බලාසිටි මා විශ්මයට පත්කරමින් ඇතිවී නැතිවී ගියේය..

ඒත් සමගම කලාවැව දුම්රිය ස්ථානයට අපි සේන්දු වීමු.. දුම්රිය ස්ථානයේ විදුලිය බිදවැටී ඇති බව කල්තියා දැනගැනීමට හැකිවූයේ ටැබලට් ලබා ගැනීමට සිටි සේවකයා අත වූ විදුලි පන්දම ඈත සිටම නිරීක්ෂනය වීමෙනි.

සුපුරුදු පරිදි දුම්රිය නැවැත්වූ පසු දුම්රිය ස්ථානාධිපතිතුමා විසින් ඉදිරි කොට්ඨාසය සදහා වූ ටැබ්ලටය ගෙන මා පසුකර ගොස් රියදුරු සහායකට ලබාදී මොනාදෝ පවසා මාගේ තිරිංග මැදිරිය අසලට පැමිනෙමින්

“ගාඩ් මහත්තයා මේ දැන් ලයිට් ගියානේ, ලග ට්‍රාන්ෆෝමරයක්වත් යන්න ඇති විදුලිකොටනවා වගේ එලියක් දැක්කා එකපාරටම” යනුවෙන් කීය..

එවිට මාහට මා දුටු ආලෝක කදම්බයත් මතකයට ආ මුත් ඒ ගැන කිසිවක් නොපවසා

” SM මහත්තයා අද නම් පාර්සල් නෑ ඕන් සෙනගත් නෑ එහෙව් එකේ ලයිට් නැති උනාට මොකෝ ” කියමින් සිනාසුනෙමි..

ඔහුත් සිනාසී ” හරි එහෙනම් පරිස්සමින් යන්න ” යනුවෙන් පවසා තිරිංග මැදිරිය පසුකොට ගියේය..

කලාවැව දුම්රිය ස්ථානයෙන් කැකිරාව දුම්රිය ස්ථානය දක්වා දුම්රිය ගමන් ඇරඹූ අතර, වෙනදා මෙන් නොව දුම්රිය ස්ථානාධිපතිවරයා විසින් පෙර කියූ” පරිස්සමින් යන්න” වදන් මාගේ දෙසවන් තුල දෝංකාර දෙන්නට වූයේ මන්දැයි මම නොදනිමි.

කලාවැව දුම්රිය ස්ථානය පසුකර මිනිත්තු හයක් පමන ගතවූ තැන දුම්රියේ විදුලිය විසන්ධි වී දෝංකාර දෙන එන්ජිම නතර වුනේ වල් අලි ගහනය සහිත ලදු කැලෑවක් සහිත ප්‍රදේශයක වීම ම ” පරිස්සමින් යන්න” යැයි ඔහු පැවසූ වදන් වලට අරුතක් එක් කලේය..

දුම්රිය රියදුරුමහතාත්, සහයකමහතාත් එන්ජිම නැවත පනගැන්වීමට උත්සාහකල අතර තවත් මිනිත්තු කිහිපයක් ගතවත්ම ප්‍රධාන නියාමක මහතාත් මාගේ මැදිරියට පැමිනියේය..

අඩ හෝරාවකට ආසන්නවූ මුත් කිසිදු සතුටුදායක ප්‍රථිපලයක් නොවීය..

මාත් ප්‍රධානනියාමක මහතාත් පීලි වෙඩි තමා දුම්රිය ආරක්ෂාකල මුත් සැතපුම් දෙකක් හෝ තුනක් පමන ඉදිරියෙන් ඇති කැකිරාව දුම්රිය ස්ථානයට ටැබ්ලටය රැගෙනයාමනම් බාර වූ යේ නම් මා හටය.

විදුලිපන්දම දල්වාගෙන කෙමෙන් කෙමෙන් ඝන අදුර මැදින් ඉදිරියට ඇදුනේ ගැහෙන හදින් බව නොසගවා පවසමි..

රැහැයියන්ගේ නාදය අතරින් සිල්පරෙන් සිල්පරේට පය තබමින් ඉදිරියට යන විට දැහැන බිදෙන්නේ නම් ඒ කොන්ක්‍රීට් ගලක පය පැටැලී වැටෙන්නට ගිය විටෙක පමනක්‍මය.

. තවත් අඩහෝරාවක් පමන ගතවිය එක්වරම රේල්පාර එක්පසකින් දිරාගිය කෝටුවක් කැඩීයන හඩ ඇසීමත් සමග මොහොතකට නතර වූ මා විදුලි පන්දම නිමා දැමුවේය,

සිහින් දා බිදු නලල පුරා විහිදෙන අයුරු මට දැනෙන්නට විය…

මම වඩා හොදින් කන්දුන්නෙමි..

රැහැයි නාදය හැරෙන්න ඇසුනේ ඉදහිට හෝ හඩලන වවුලකුගේ බියකරු නාදය පමනි. ..

අලියෙක් හෝ අලිරංචුවකට මැදී වූ අත්දැකීම දෑස් මත්තෙන් මැවී පෙනුනත් එය එසේ නොවන බව විදුලිපන්දම් එලිය ක්‍රමයෙන් වැඩිකරමින් දෙපස වූ වනලැහැබට යොමු කල විට මා හට වැටහුනි…

සැනසුම් සුසුමක් හෙලූ මා තවත් තත්පරයක්වත් නොයිද දෙපසටත් උකුසු ඇස් යොමා වේගයෙන් පියවර තබන්නට විය..

පියවරක් තබන විට පියවර දෙකක හඩ ඇසුනි..පිටුපසින් කෙනෙකු එන්නාසේ දැනුනි..

මොහොතකට නතරවූ මම වඩා හොදින් සවන් දුන්නෙමි..

නිහැඩියාව පමනක්ම වැජබෙයි..

නැවතත් වේගයෙන් ඉදිරියට ගියෙමි..

නැවතත් පෙරසේම ශබ්දයක් දැනෙයි..

සිත බයවෙලාද??

හොල්මනක්ද??? මම මගෙන්ම ප්‍රෂ්න කරයි..

නැවතත් නතර වූ මා දහඩිය වැගිරුනු මුහුනින් කෙමෙන් කෙමෙන් හැරී පිටුපස බැලුවෙමි…

මගේ දෙවියනේ!!! අරුමයකි!!

විදුලිපන්දම් එලියෙන් මෙතක් නොදුටු අරුම පුදුම දසුනක් මීටර් කිහිපයක් එහායින් තිබේ..

දෑස් තවමත් අදහාගත් නොහැක.. කුඩා ජීවියෙකි අඩි 3/4 පමන උස ඇති ඌට තිබුනේ විශාල ඇස් දෙකකි..

කිසිවක් නොපවසා දෙදෙනා මුහුනට මුහුන බලා සිටී.. .

මම හොදටෝම බයවෙලා සිටියමුත් යටි සිතට වෙනත් ආරක සිතිවිලි ගලා එන්නට විය…

පිටසකවලින් ආ ජීවියෙක්ද??

නීට්ටෑවෙක්ද??

එසේත් නොමැතිනම් අරුම වූ සත්වයෙක්ද???

දෑතේ ඇගිලි තුනකි..

මොකක්දෝ භාෂාවකින් යමක් කීවේය..

එක් අතක් දිගුකොට යම් දිශාවක් පෙන්වීය..

කිසිවක් නොතේරුනු මා ගල් ගැසීබලා සිටියමුත් ඌ විසින් යමක් මට කියන්නට උත්සාහ කරන වගනම් පැහැදිලිය..

නැවතත් අතු බිදිමින් යමෙක් දිවඑන ශබ්දයකි..

වන ලැහැබ තුලින් එක්වරම තවකෙක් මතුවිය සමාන උසින් සිටි දෙදෙනා යමක් ඔවුනොවුන් හට පවසා එක්වරම වනලැහැබ තුලට වී නොපෙනී ගියේය..

තවත් මිනිත්තු කිහිපයක් යත්ම කැකිරාව දුම්රිය ස්ථානයට ටැබ්ලටය සමග යාමට මට හැකිවිය..

සිදු වූ දේ විස්තර ඇතිව දුම්රිය ස්ථානාධිපතිතුමාත් දුම්රිය ස්ථානයේ සිටි සේවකයත් සමග පැවසු අතර අතරමග වින්නැහිය කිවූ විගස කැකිරාව දුම්රිය ස්ථානය ආසන්නයේම පදිංචිව සිටි දුම්රිය සේවකයා

“ඔය නීට්ටෑවෙක් මහත්තයා.. ඕක ගැන හිතන්න එපා, පහුගිය කාලේ නිතර නිතර ගමේ කට්ටිය දැකලා තිබුනා”

ලෙස පැවසූයේ මා කිවූ දේ තුට්ටුවකටවත්මායිම් නොකරය..

“ඒ බව මා හටද සැකයක් නැතුවාම නොවේ ” යැයි හැගවෙන පරිදි දුම්රිය ස්ථානාධිපතිතුමා ද හිස සැලීය..

කෙසේ වුවත් මා දුටු දසුන් වෙනස් බවත් දුටු ආලෝක කදම්බයත් ඇසුනු ශබ්දයත් මාතුල වෙනස්ම ආකාරයක චිත්‍ර මැව්වේය..

කෙසේ හෝ සහන එන්ජිම ගෙන්වා අපි ගල්ඔය දුම්රිය ස්ථානයට යනවිට පසුදා එලි වී තිබුනි..

ගල්ඔය දුම්රිය ස්ථානයෙන් රාජාකාරී නිමාකල අපිට නැවත යාමට තිබුනේ සවස 6 පමන ගල්ඔය සිට කොලොන්නාව දක්වා දිවෙන හිස් තෙල් ටැංකි රැගත් දුම්රියේ රාජාකාරී කරමින්‍ ය..

එහෙයින් පසුදා රාත්‍රීයම අවදිව ගතකල අප ඉක්මනින් සුවබර නින්දක් දැමීම සදහා මුහුනකට සෝදා පිරිසිදු වී ප්‍රධාන නීයාමකමහතා සමග උදෑසන ආහාර ගැනීමට ගල්ඔය දුම්රිය ස්ථානය ආසන්නයේ වූ කඩමන්ඩියට ගියෙමු..

අපි එතැනට යනවිටත් ගින්න පත්තූ වී තිබුනු බව මාගට වැටහුනේ ඔවු නොවුන්ගේ කතාබහ කනවැටුනු විටය..

” අන්න පැලේ හිටපු කරෝලිස් මාමා ඊයේ දේවතා එලි දැකලා ” එකෙකු කීවේය..

“දේවතා එලිනම් මන්දන්නෑ නීට්ටෑවෝ නම් මේ දවස් වල ඕසෙට, ලොක්කී දැකලා තිබුනා” තවත් එකෙක් කීය..

” ඊයේ පෙනිලා තියෙන්නේ දේවතා එලිනෙවේ පිටසක්වල යානයක්ලු , අන්න කොලැබින් මහත්තුරු ඇවිත් පරේශන කොරනැවැයි කියන්නේ ” ඒ නම් කඩේ මුදලාලිය…

ඒ වදන් දෙසවන් වැටුනු විට මම නොයිවසිලිමත් විය ..

ඊයේ රෑ උනු සිද්ධිය කියන්නටත් හිතයි.ඒත් ගම්මු හිනාවුනොත් එහෙම නීට්ටෑවෙක් කියලා.. මට වස නෝන්ඩිය.. එනිසා මම දන්නා,දැකපු,ඇසුනු සියලු දේ හීනයක් යැයි සිතා සිටියෙමි…

කෙසේ උවත් ගම්මුන්ගේ කතාබහට හොදින් සවන් දෙමින් උදෑසන ආහාරයගත් මා නැවත ගල්ඔය දුම්රිය ස්ථානයට පැමින විවේක ගැනීමට ගියේය..

අඩ නින්දේ පසු වූ මට විවේකාගාරයේ තිබූ රූපවාහිනියේ දහවල් පුවත් සිරස්තල යන්තමින් වගේ ඇසී දෙලොව රත්වී ඇදෙන් පැන රූපවාහිනිය ඉදිරියට දිව්වේය..

කැකිරාවට පිටසක්වල යානයක් පැමින ඇති බව එමගින් තහවුරු කලේය..

බඩ ඉරිගු වගාවක් යම් රටාවකට විනාශ කරමින් යානය ගොඩබා ඇති බව ඩ්‍රෝන කැමරා මගින් ලබාගත් වීඩියෝ පට සාක්ෂි දැරීය..

කොළඹ විශ්වවිද්‍යාලයීය ප්‍රවීන තාරකාවිද්‍යා කතිකාචාර්ය ලුවිස් ඇන්තනී මහතා රූපවාහිනිය අමතමින් ප්‍රකාශ කර සිටියේ..

ඒ අවට තවමත් අපට සිතාගැනීමට නොහැකි තරම් වූ ප්‍රභල චුම්භක ක්ෂේත්‍රයක් පවතින බවය.. අභ්‍යාවකාශ චාරිකාවට ප්‍රමානවත් බලශක්තිය ලබාගැනීමට හෝ යානය සතු බලශක්ති ප්‍රභවයන් ආරෝපනය කර ගැනීමට පෘථිවිය නම් ග්‍රහලොවේ තාරකා දොරටුවක් උපයෝගී කරගන්නට ඇතැයි ඔහු තවදුරටත් අනුමාන කලේය..

එසේනම් මා දුටු දේ සත්‍යක්‍,

බාගවෙලාවට විදුලිය විසන්ධි වී තිබුනේ ඔවුන් බලශක්තිය උරාගත් නිසාද????

දුම්රිය එන්ජිම අක්‍රිය උනේ අධික චුම්භක ක්ෂේත්‍රයට නතු වූ නිසාද???

කියවා ඇති පොත පතෙහි සදහන් තාරකා දොරටුවක් අපේ මේ පුංචි රටෙත් තියනවාද???

ගුවනින් ගත් ජායාරූප වල තිබූ බඩ ඉරිගු ගොයමේ රටා මවන්නේ කුමක්ද???

මෙ ආකාර ප්‍රෂ්න රාශියක් විසදුම් සොයමින් මා හද තුල රැව් දෙයි..

…

” ඕඕ ශිට් ……ඌ කියන්නට උත්සාහ කල දෙය මට තේරුනානම් “

යැයි සිතමින් මා දින සති ගනන් ගෙවමින් කිසිවෙකු හෝ නොපිලිගන්නා වූ සත්‍යක් සමග ජීවත්වෙමි!!

(සැ..යු.. රසාස්වාදය පිනිස අතිශෝක්තිය එක් කර ඇත

දින වකවානු හා නම් ගම් මනංකල්පිතයි)

උපුටා ගැනීම:  KTN පෙරේරා