සැලකිය යුතුයි (වැල් වටාරම්)

යාලුවෝ සීනිද අහන ගානට ඩයට් කලා,

නෑයෝ කුඩු ගහනවද අහන ගානට ඩයට් කලා,

ඇඳපු ඇඳුම් ටේලර් ශොප් එකකින් හදන්න වෙන ගානට ඩයට් කලා,

කිලෝ 87 හිටපු මම කිලෝ 67ක් වෙන ගානට ඩයට් කලා,

මගේ මිතුරෝ 15ක් විතර කිලෝ 10ට වඩා ඇඟ අඩු කරගත්තා මම කරපු විදිහටම කරලා,

මමත් ඉතින් කැටයම් දාලා ඩයට් කරන හැටි කියා දුන්නා…

ඊට පස්සේ මම ඇඟ අඩු කරගන්න එක පැත්තක දාලා කුම්භාණ්ඩයෙක් වගේ කන්න ගත්තා,

බොන්න ගත්තා,

ඩයට් කැලේ,

දවසට වේල් 4ක් වගේ කෑවා,

සුගර් නැග්ගා,

සෝල්ට් නැග්ගා,

කොලා නැග්ගා,

සයිස් අඩු කරපු ඇඳුම් අඳින්න බැරිවුණා,

මම මහත් වුණා….

මම බොන එක නැවැත්තුව තීරණේ එක්කම ඩයට් කරන්න ඕනේ කියන තීරණේට ආවා,

අද ලොක්ඩවුන්නේ,

ඊයේ ෆුඩ්සිටියක් පැත්තේ ගියා වයිෆ් එක්ක බඩු ගන්න,

මමත් ඉතින් ඩයට් සීන් එකට සෙට්වෙන්න බොන්ලැක් නන්ෆැට් මිල්ක් එකයි,

පෘට්ස් වගයකුයි එහෙම ගත්තා,

ඊට පස්සේ සුගර් ෆ්‍රී බිස්කට් පැකැට් දෙකක් එහෙමත් ගත්තා,

ගැම්මෙන් ඩයට් කරන්න පුලුවන්නේ,

ඔය මොනා හරි දෙයක් හපන්න තියනවානම් අවුලක් නෑ ඉතින් බඩගින්න එන්නේ නෑනේ,

අනික කරපු වියදම මතක් වෙද්දීත් මෝටිවේශන් එකක් එනවානේ අපරාදේ මෙච්චර වියදම් කරපු එකේ ඩයට් එක කරනවා කියලා,

ඩයට් කරද්දී බිස්කට් හොඳම නෑ,

ඒත් මම හිතුවක්කාර වුණා,

ඕවා මානසික අල්ලස්.

ගෙදර ආවා,

පොඩි බඩගින්නක් එක්ක අර බිස්කට් 3ක් වගේ කෑවා නන්ෆැට් ඩ්‍රින්ක් එක සීනි නොදා බොන ගමන්,

මගේ පුරුදු ඩයට් ප්ලේට් එක වන බිත්තර 2යි,

තම්බා ගම්මිරිස් ඉහින ලද චිකන් එකයි,

බත් පිඟානක් පුරවලා කොල මැල්ලුමයි කෑව,

ආයේ රෑට රෑට එන පොඩි බඩගින්නට මම ආයේ අර සුගර් ෆ්‍රී බිස්කට් එක කෑවා…

උදේමත් නන්ෆැට් මිල්ක් එකයි බිස්කට් 6ක් වගේයි කෑවා,

දැන් කොහොම හරි බඩ ගුරු ගුරු ගානවා,

බඩ කකියනවා,

ඉන්න බෑ,

ඇඬිලා ඉන්නේ මේ පෝය දවසේ උදේ ඉඳන්ම,

එක පාරට වේගෙන් දිව්වා බාතෲම්,

ආවා එළියට,

ආයේ ඉන්නවා බඩේ කැක්කුමේ,

ආයේ බඩෙන් දෙනව පණිවිඩේ මොලේට,

මොලෙන් දෙනවා කකුල් දෙකට,

මම දුවනවා උසේන් බෝල්ට් වගේ,

සම්සාරේ…

මට ඩයරියා,

ඩයරියා හොඳම එක,

බෙලි ලයිට් යනවා හොඳටම,

දැන් මම ඉතින් රිලවා මැරුණ කූටාඬි වගේ ලැට් යනව එනවා,

බාතෲම් යනවා එනවා,

සම්සාර චක්‍රේ වගේ…

ඔය දුවන අතරේ මටකල්පනා වෙනවා,

යකෝ…

මොකද්ද මේ වුණේ,

චිකන් එක නරක් වෙලාද,

නන්ෆැට් මිල්ක් එක එක්ස් පයර් වෙලාද,

කොල මැල්ලුමට කැරපොත්තෙක් වැටිලාද,

කිකිලි දාපු එග්ස් වල අවුලක්ද,

එන්නේම නෑ හිතට…

හවස් වෙද්දී අඩු වුණා,

ඒත් ඉඳලා හිටලා බඩ ගුරු ගුරු ගානවා,

කොහොම හරි හවසට පොඩි බඩගින්නට බිස්කට් පැකැට් එකේ ඉන්ස්ට්‍රක්ශන් කියෙව්වා,

මෙන්න ගහලා තියනවා සැලකිය යුතුයි කියලා වරකට අනුමත බිස්කට් ප්‍රමාණය 3කිලු,

වැඩිපුර පරිභෝජනයෙන් විරේක තත්ව ඇතිවිය හැකිලු.

දුක හිතුණා රත්තරනේ

උපුටා ගැනීම: Tharu Rajapaksha