ශ්‍රී ලංකාවේ දක්නට ලැබෙන ඖෂධීය පැළෑටි අතර ඒකාවේරිය යනු සුවිශේෂී ඖෂධයකි.මීටරයක් පමණ උසට , සෙන්ටිමීටර 7 – 13 පමණ පළලට වැඩෙන ඒකාවේරිය Apocynaceae කුලයට අයත් වේ.මෙම ශාකයෙහි මුල සර්පයකුගේ හැඩය ගනියි .
ලා කොළ පැහැති මෙම ශාකයෙහි හට ගන්නා මල් සුදු පැහැති ය . එම මල් හට ගනු ලබන්නේ මාර්තු , මැයි සහ නොවැම්බර් මාසවල ය . වර්තමානයේ දී Rauvolfia tetraphylla නම් උද්භිත නාමයෙන් හඳුන්වන විදේශීය ශාකයක් වල් ඒකාවේරිය නමින් හැඳින්වුව ද එය ඒකාවේරිය වෙනුවට භාවිත කිරීම සුදුසු නොවේ .
ශ්‍රී ලංකාවේ කඳුකර වියලි ප්‍රදේශවල බහුලව දක්නට ලැබෙන මෙම ඒකාවේරිය ඖෂධීය ශාකය නේපාලය , ඉන්දියාව , සිංගප්පූරුව වැනි රටවලින් ද හමු වේ . ඒකාවේරිය ශාකවල බීජ තරමක් දුඹුරු පැහැ වන අතර ඒවා වගා කිරීමට සුදුසු කාලයේ වන්නේ මැයි සහ ජූනි මාසයන් ය.ඖෂධවලට යොදා ගැනීම මෙන් ම ආර්ථිකමය වාසි ලබා ගැනීම සඳහා ද ඒකාවේරිය වගා කිරීම දක්නට ලැබේ . දේශීය හෙළ වෙදකම තුළ සහ විදේශීය වෛද්‍ය විද්‍යාවන් තුළ ඒකාවේරිය ශාකය ඖෂධයක් ලෙස යොදා ගන්නා අවස්ථාවන් රැසක් හමු වී ඇත .
- අතීතයේ සිට ම දේශීය හෙළ වෙදකම තුළ සහ විදේශීය ජාතීන් අතර ද අධි රුධිර පීඩනය වැලැක්වීමට යොදා ගන්නා ඖෂධයක් වශයෙන් ඒකාවේරිය ප්‍රසිද්ධියක් උසුලයි.ඒකාවේරිය මුල් එළකිරෙන් තම්බා , වේලා කුඩු කර කුඩා ගුළි සාදා දිනපතා උදේ සහ සවස පානය කිරීමෙන් සතියක් පමණ යන විට අධි රුධිර පීඩනය සමනය වන බව කියවේ .
- සෙම් රෝග සහ වාත රෝග සුවපත් කිරීමට ද ඒකාවේරිය යොදා ගනියි . ඒකාවේරිය මුල් , එළබටු ගෙඩි දොඩම් ඇඹුලෙන් අඹරා ආලේප කිරීමෙන් සෙම් ගෙඩි සුවපත් වේ .
- ගර්භණී කාන්තාවන්ට ඇති වන වමනය , ඔක්කාරය වැනි තත්ත්ව නැති කර වේදනා සහ කැක්කුම් සමනය කර ගැනීමට ඒකාවේරිය යොදාගෙන විවිධ ප්‍රතිකාර කරනු ලබයි .
- කාන්තාවන්ගේ ආර්තව වේදනා සහ ප්‍රසව වේදනා අඩු කර ගැනීමට ද මෙය කදිම ඖෂධයකි .
- විවිධාකාර විෂ නැසීමට ද ඒකාවේරිය භාවිත කරයි . සර්ප විෂ , ගෝනුසු විෂ , මකුළු විෂ , මීයන්ගේ විෂ නැසීම සඳහා ප්‍රතිකාර කිරීමේ දී ඒකාවේරිය යොදා ගැනීම දක්නට ලැබේ.
- සෙම් ගෙඩිවලට ඒකාවේරිය මුල් එලබටු ගෙඩි දොඩම් ඇඹුලින් අඹරා ගෑම
- මීයන්ගෙ විෂ ආදියට ඒකාවේරිය මුල් දෙහි ඇඹුලෙන් හෝ ඇල් දියෙන් ගල ගා ආලේප කිරීම සිදු කරයි . එමඟින් වේදනාව සමනය වී විෂ සිරුරෙන් ඉවත් කරයි .
- කොලරාව , ළදරු අතීසාරය පමණක් නොව කුසගිනි වර්ධනය කර ගැනීමට ඒකාවේරිය යොදාගනී .
- උණ , පණු අමාරු සුවපත් කරමින් රුධිරවාහිනී ප්‍රසාරණය කොට , ස්නායු පද්ධතිය ලිහිල් කර සිරුරේ ප්‍රාණවත් බව ඇති කරයි . එමගින් හෘදයාබාධ ඇති වීම ද වළක්වා ගත හැකිය .
- මානසික රෝග සුවපත් කිරීමේ දී ද ඒකාවේරිය යොදා ගැනීම ඇතැම් අවස්ථාවල දී දක්නට ලැබේ .
- ඒකාවේරිය ඖෂධ පැළෑටි යොදා ගනිමින් ,චන්දාර වටී,සර්පගන්ධාදී වටී ,චන්දාර පැණිය ,සර්පගන්ධාදී චූර්ණය වැනි ඖෂධීය තෛල හා ඖෂධීය පැණි නිෂ්පාදනය කරනු ලබයි .
ඇතැම් පුද්ගලයින් ඒකාවේරිය ශාක ගෙවතු අලංකරණය සඳහා වැවීම ද දක්නට ලැබේ . එමෙන් ම ලාභ ඉපයීම සඳහා මහා පරිමාණයෙන් මෙම ශාක වගා කිරීම ද ඇතැම් රටවල සිදු කරයි . කෙසේ වෙතත් ඖෂධීය ගුණයෙන් යුතු ඒකාවේරිය ඖෂධීය පානයක් හෝ ආහාරයක් ලෙස ලබා ගන්නා විට වෛද්‍ය උපදෙස් පිළිපැදීම අනිවාර්යයෙන්ම සිදු කළ යුතුය . මෙවැනි වටිනා ඖෂධ වර්තමානයේ දී වඳ වී යාමේ තර්ජනයට ලක් වී ඇති නිසා එය රැක ගැනීම ද ඔබගේ වගකීමකි .
උපුටා ගැනීම: The Lanka Post