“ශ්‍රී දේවි, ශ්‍රී දේවි නෙමෙයි මේකි මූ දේවි” කියල ඉස්සර ඉස්කෝලෙ මගෙ එහා පුටුවෙ හිටිය කෙල්ල කියනවා. ශ්‍රී දේවි කියන්නෙ මගේ නම. ගෙදරට කියන නම නෙමෙයි තාත්තා දාපු නම, උප්පැන්නෙ තියෙන නම. අපේ තාත්තා හින්දි චිත්‍රපටිවලට තිබ්බ බලවත් ආසාව නිසා අපිට ඒ නම් දාල තියෙනවා.
අපේ පවුලෙ ලමයි පස් දෙනයි. අක්කලා තුන් දෙනයි අයියයි මමයි. මම බඩ පිස්සි. අපේ අම්මයි තාත්තයි බැදල තියෙන්නෙ යාලු වෙලා. ඒකට පාදම වැටිල තියෙන්නෙත් ශෝලේ බලන්න ගිය වෙලාවක කියල ආච්චි කියනව මම අහගෙන. අපේ තාත්තා අමිතාබ් වගේ කොන්ඩෙ පීරල , කන් දෙක ලගින් කම්මුලට වෙනකන් කොන්ඩෙ වවලා , බෙල් කලිසම ඇදලා යාලුවො එක්ක ගහපු කලු සුදු පොටෝ ගෙදර තියෙනවා.
තාත්තාගෙ මේ බලවත් චිත්‍තරපටි පිස්සුව නිසා අපි හැමෝටම හින්දි නලු නිලියන්ගෙ නම් වැටුනා. අක්කලා තුන් දෙනා ලොකු අක්කා ශර්මිලා, මද්දු අක්කා වෛජයන්ති මාලා , පොඩිම අක්කා සීනත්තමාන්. එතකොට අයියා ධර්මේන්ද්‍ර උනා. මං ඉපදෙන කොට හිටපු ලස්සනම නිලිය ශ්‍රී දේවි හින්ද එයාගෙ නම මට වැටුනා.
නමටම ගැලපෙන ලස්සන අක්කල තුන් දෙනෙක් ඉන්න එක ගැන අපි හරි ආඩම්බර උනා. මගෙ. කෙල්ලො තුන් දෙනා තරම් රූප සුන්දරියො අහල ගං හතක නැති බවයි තාත්තා කිව්වෙ. තාත්තා බීල එනකොට පාරෙ ඉදන්ම නම් කියල කෑ ගහ ගහ තමයි ගෙදරට එන්නෙ.
” මගෙ සෙර්මිලෝ , මගෙ මාලෝ , මගෙ සින්නම්මා ” කියල කෑ ගහනව වැනි වැනී. ලොකු අක්කල දෙන්නා ඉස්සරහට ගියත් පොඩි අක්කා කිසි දාක ඒවට ගියෙ නෑ.
” මල වදේ අදත් බීල, සින්නම්මා සින්නම්මා මට ඔය නම පෙන්නන්න බෑ. ” කියල අඩනවා.
පොඩි අක්කා එයාගෙ නම ගැන හරිම විස්සෝප උනා. ඉස්කෝලෙ කොල්ලො එයාට අනම් මනං කියනව කියල එයා නිතරම ඇඩුවා. ලොකු අක්කලට ලස්සන නම් දාල එයාට කැත නමක් දාල කියල එයා කිව්වා. මට නම් නම ලොකු ලස්සනක් නැතත් පොඩි කාලෙ ඒ ගැන ඒ තරම් තැකීමක් තිබුනෙ නෑ.
පොඩි අක්ක ලස්සන උනත් එයාගෙ නම කැත නිසා කොල්ලො එයා එක්ක යාලු උනේ නෑ. නම හොයන්නෙ නැති කොල්ලන්‍ට එයා කැමති උනේ නෑ. අන්තිමේදි එයා විස්ස විද්යාලෙ ගියාම ජේෂ්ඨයින්ගෙ උසුලු විසුලු වලට නිතර ලක් උන බව කියල ඒ කාලෙ ගෙදර ඇවිල්ලා ඇඩුවා. නම ගැන නොතකා එයා එක්ක යාලු වෙන්න ආව රංජිත් අයියාට අන්තිමේදි එයා කැමැත්ත දුන්නා නවක වදයෙන් ගලවගත්තට උපකාරයක් වශයෙන්. පස්සෙ කාලෙක අක්කා නම මාරු කරෙත් එයාගෙ උදව්වෙන් තමයි. වැඩිමනක් රංජිත් අයියලගෙ අම්මල නමට එක එක ඒව කියන නිසා වෙන්න ඕන.
අක්කගෙ නම වෙනස් කිරිල්ල ගැන තාත්තා හිටියෙ හරිම හිතේ අමාරුවෙන්. මංගල සභාවෙදි පටබැදි ආරච්චිලාගේ සීනත්තමාන් වෙනුවට පටබැදී ආරච්චිලාගේ සීගිරි අත්සන් කරා. මගුල් ගේ ඉවර උනාම
” මගේ සින්නම්මා ගියා, ඒකිට මට වඩා උන් ලොකු උනා” කිය කිය තාත්තා හොදටම ඇඩුවා.
පොඩි අක්කා කොච්චර නම වෙනස් කරත් හැමෝම එයාව ඇමතුවෙ පරණ නමින්මයි. විශේෂයෙන්ම අපේ නෑදෑයෝ. සින්නා, සින්නම්මා , සින්නක්කා ඔය වගේ ඒවයින්. ගොනා පස්සෙ එන කරත්තෙ වගේ මේ නමෙන් නම් එයාට ගැලවීමක් නැති බව එයා නිතරම කිව්වා. අක්කගෙ වෙලාවට අයියට ශිෂ්‍යත්වයක් ලැබිලා ඒගොල්ලො රට ගියා. එහේදි නම් නමෙන් කිසි ප්‍රශ්නයක් නැති බවක් අක්කා කිව්වා.
පොඩි අක්කා ඉද හිට ලංකාවට එනවා. අදින පලදින විදිය, කොන්ඩෙ , පෙනුම ඔක්කොම අලුත් වෙලා. ඒත් හැමෝගෙම මතකයේ තිබ්බා සින්නත්තමාන් නම නම් වෙනස් කරන්න මොනව කරත් බැරි උනා.
(ප්‍රබන්ධකි )
( පින්තූරය අන්තර්ජාලයෙන් – සීනත්තමාන් කියන නම ඊට වෙනස් වෙන්න ඕන. මේක මට ඇහුන නම )
උපුටා ගැනීම: Buddhika Abeysundara