” මේ මරණ දෙක එකකට එකක් සම්බන්ධයි කියලා හිතෙන්නේ නැද්ද ජයන්ත ? ” දිගු කල්පනාවකින් පසු තම කණිෂ්ඨ නිළධාරියා දෙස බැලූ ඉන්ස්පෙක්ටර් නිශාන් වීරසූරිය පැවසුවේය.
” මටත් එහෙම හිතුනා සර්, එතකොට පවුලේ අනිත් දෙන්නටත් තර්ජනයක් තියෙන්න පුළුවන් “
” හ්ම්ම්ම් එහෙම වෙන්නත් පුළුවන් , නොවෙන්නත් පුළුවන් “
” සර්, නොවෙන්නත් පුළුවන් ?”
” මේක දේපල වලට කරපු දෙයක්නම් එයාලට තර්ජනයක් තියෙන්න විදියක් නෑනේ , මොකද මං හොයලා බලපු විදියට සූරියවැව පවුලේ එහෙම ලඟ නෑදෑයෝ කවුරුත් නෑ, ඔක්කොම වගේ පිටරට, ඉතිරි වෙලා ඉන්නේ ඔය සූරියවැව මුදලාලිගේ ලොකු දුවයි, බෑනයි විතරයි.”
ව්‍යාපාර රැසකම අයිතිකාරීත්වය දරමින් සිටි සූරියවැව මුදලාලි මීට මාසයකට පමණ පෙර සියදිවි නසාගෙන තිබුනි. ඒ අධිකලෙස නිදිපෙති ගැනීම හේතුවෙනි. ඔහුගේ බිරිඳ මීට වසර කීපයකට පමණ පෙර හෘද රෝගයක් හේතුවෙන් ජීවිතක්ෂයට පත් විය. සූරියවැව මුදලාලිට දරුවන් දෙදෙනෙක් විය. පවුලේ බාලයා වූ නිම්නදී සූරියවැව උපතින්ම ශ්‍රවණාබාධිත අයෙක් විය. ඇය මීට මාසඑකහමාරකට පමණ පෙර පවුලේ විනෝද චාරිකාවක් අතරතුරදී සිදුවූ අනතුරක් හේතුවෙන් මරුමුවට පත්විය. දැන් සූරියවැව පවුලේ ඉතුරු වී සිටින්නේ වැඩිමහල් දියණිය වූ මේඝා සූරියවැව සහ ඇයගේ ස්වාමිපුරුෂයා වූ විහස් වික්‍රමසිංහ පමණි.
” සාජන් ජයන්ත “
“ඔව් සර් “
” මිස්ටර් විහස් ගැන සෝදිසියෙන් ඉන්න අපේ එක්කෙනෙක් දාන්න වෙනවා. රූපසිරිට ඒ වැඩේ භාරදෙන්න “
” හරි සර් “
” ආ තව දෙයක්, මේ වැඩේ කාටත් නොදැනෙන්නයි වෙන්න ඕනි. මොකද මේක ක්ලෝස් කරපු කේස් එකක්නේ “
…………………………………………………………………………
” මේඝා මැණික , ආ මේක බොන්න “
” අද ඔයා ඔෆිස් යන්නැද්ද “
” නෑ, අද උදේ ඉඳන් ඔයාගෙ ඇඟට හරි නැති නිසා යන්න හිතුන් නෑ “
” විහස් “
” ම්ම්ම් “
” තාත්තගේ බිස්නස් ගැන බලන්න ඕනි. නැත්නම් වැඩ කරන එවුන් මොනාකරයිද දන්නෑ, ඔයාට පුළුවන් නේහ් ජොබ් එකෙන් අයින් වෙන්න “
” බෑ මේඝා , ඔයා හොඳටම දන්නවනේ මං බිස්නස් වැඩ වලට කැමති නෑ කියලා, අනික මැනේජර් ධම්මික හොඳට ඒ වැඩ ගැන බලනවනේ. තාත්තා ඉද්දිත් ඒ මනුස්සයානේ හැමදේම කලේ.”
” හ්ම්ම් “
” ළමයෝ කෝ තාම ජූස් එකෙන් භාගයක්වත් බීලා නෑනේ , තව ටිකකින් විටමින් ටික බොන්නත් ඕනි. එතකොටනේ බබා ලස්සන වෙන්නේ “
” කොයිවෙලෙත් කටේ තියෙන්නේ බබා බබා. දරුවා හම්බුනාම මට ආදරේ නැතිවෙයි නේහ් “
” ඔව් ඔව් එතකොට බබා ඉන්නවනේ, ඔයා ඕන්නෑ ” යැයි කියමින් විහස් සිනහවන්නට විය.
” එහෙනම් අපිට ළමයි ඕනි නෑ, මෙයාව නැතිකරමු “
” පිස්සුද ළමයෝ , මං විහිළුවට කිව්වේ, ආයෙ එහෙම ඔය වගේ මෝඩ කතා කියන්න එපා හරිද ” කියමින් විහස් එතනින් ඉවතට ගියේය.
අතේ ඇති බීම වීදුරුව දෙස බලා සිටි මේඝාට තම අතීතය සිහිපත් වන්නට විය.
…………………………………………………………………………
මීට මාසයකට පමණ පෙර,
” තාත්තේ, තාත්තාව හැමතැනම හෙව්වා, තාත්තා මොනාද හොයන්නේ මගෙ කාමරේ ? “
” මේක කොහෙන්ද ලොකූ ?”
” මං දන්නේ කොහොමද , තාත්තා අතේ වළල්ල තියාගෙන මගෙන් අහන්නේ ? “
” වළල්ල තිබ්බේ තමුන් අම්මගේ බඩු දාගෙන ඉන්න කබඩ් එකේ, පොඩිඩි මේක එදා නුවරඑළියේ ට්‍රිප් එකෙත් දාගෙනනේ හිටියේ. එයා මේක කවදාවත් අතින් ගලවන කෙනෙක් නෙමෙයි එයා කොච්චර ආසාවෙන්ද අම්මගේ මේ වළල්ල දාගෙන හිටියේ “
” ඔව් ඔව් පොඩ්ඩි තමයි ඔක්කොටම ලොකු, ඒකි ඉපදුන දවසේ ඉඳන් හැමදේටම ඒකි විතරයි , ඉස්සර තාත්තා කවදාවත් මාත් එක්ක කොහෙවත් යන්න එනවද, සෙල්ලම් කරනවද , මං ඇහුවොත් හැමවෙලේම වැඩ වැඩ, ඒත් පොඩ්ඩි එක්ක හැමතැනම යනවා”
“‘මොනවද පුතේ මේ කියන්නේ , ඒ ළමයා උපතින්ම ආබාධිත දරුවෙක්, මායි අම්මයි එයාව එක්ක ගියේ හොස්පිට්ල් වලට “
” හහ් කියලා ගියේ එහෙමයි , ඒ උනාට හැම සැරේම ගෙදර එද්දී සෙල්ලම් බඩු පුරවගෙනනේ ආවේ “
” ඒ හැමදේම ඔයාටත් ගෙනාවා නේද “
” ගෙනාවා තමයි , ඒ උනාට ඒ මං කැමති දේවල්ද? නෑ නෑ ඒ ඔක්කොම පොඩ්ඩි කැමති දේවල් , දන්නවද පොඩිකාලෙ මං උඩ තට්ටුවෙන් පනින්නත් ගියා. මට ඕනි උනේ අබ්බගාතයෙක් වෙන්න. එතකොටවත් මට සලකයිනේ කියලයි හිතුවේ “
තම ලොකු දුව මේඝා වියරුවෙන් මෙන් කියවනු දුටු සූරියවැව මුදලාලිට කිසිත් සිතාගත නොහැකි විය. ඇයට මේ තරම් කේන්තියක් කොහෙන් ආවද. හඬනගා වචනයක්වත් පිටකරන්නේ නැති මේඝා වියරුවෙන් මෙන් කෑගසයි. නිම්නදී ගේ මරණය ගැන සැකයක් සූරියවැව මුදලාලිට ඇතිවිය.
” එතකොට ලොකූ ඔයාද ?”
” ඔව් මං තමයි ඒකිව කන්දෙන් පහලට තල්ලු කලේ, ඒකි අපිත් එක්කම ඉඳගෙන තාත්තලාව රවට්ටගත්ත වගේ ඒකිගෙ ආබාධෙ පෙන්න පෙන්න මගෙ මිනිහගෙන් අනුකම්පාව ගන්න හැදුවේ. හැබැයි තාත්තා මේක කාටහරි කියලා තිබ්බොත් මායි ,මේ බඩේ ඉන්න දරුවයි දෙන්නම මැරෙනවා මැරෙනවාමයි “
එදා දවසම සූරියවැව මුදලාලි සිටියේ සිහිවිකල් වූඅයෙක් මෙනි. ඔහු තම කාමරයෙන් පිටතටවත් පැමිණියේ නැත. එයට හේතුව මේඝා දැනසිටියත් විහස් සිතුවේ , නිම්නදීගේ මරණය නිසා ඔහු දුකෙන් පසුවනු ඇතැයි කියාය. එදා රාත්‍රියේ සූරියවැව මුදලාලි තම දරුවන් දෙදෙනා ගැනම පසුතැවිල්ලෙන් යුතුව ජීවිතෙන් සමුගත්තේය.
…………………………………………………………………………
නිම්නදී ගේ මරණයෙන් පසුව සිතට සැහැල්ලුවක් දැනුනත් , ලැබෙන්නට යන දරුවා ගැන විහස් දක්වන අසීමිත ආදරය ඇයගේ මනසට දරාගත නොහැකි විය. ඇය නැවතත් දරුවා නැතිකිරීම ගැන විහස් සමඟ කතා කරන්නට සිතුවාය.
” විහස් “
” ඕ මැණික “
” අපි දෙන්නට අපි දෙන්නා විතරක් හිටියම ඇති බබා, ළමයි ඕනි නෑ”
” මේඝා තමුසෙට පිස්සුද ? ආයෙත් ඔය විකාර කතාව ඇදලා ගත්තොත් සත්තයි මං තමුසෙව දාලා යන්නම යනවා “
මේඝා හඬමින් කාමරයට දුව ගියාය. මේඝගේ හැසිරීම ගැන සැක පහලවූ විහස් ඇයව පසුදිනම මානසික රෝග හා සම්බන්ධ වෛද්‍යවරයෙක්ට පෙන්වීමට තීරණය කලේය.
එදින හවස්වරුවේ මේඝා නිවසින් පිටතට යාමට සූදානම් වී සිටියේය.
” මේඝා මේ හවස් වෙලා කොහෙ යන්නද ?”
” මං පොඩ්ඩක් එළියට ගිහින් එන්නම් “
” ඔහොම ඉන්න මාත් එන්නම්, අපි එළියෙන් කාලා බීල එහෙම එමු “
” එපා බබා, මට චුට්ටක් නිදහසේ ඉන්න ඕනි. ” යැයි පවසා මේඝා නිවසින් පිටවිය.
…………………………………………………………………………
ට්‍රීං ට්‍රීං ට්‍රීං
” සර් “
” රූපසිරි , මොනාද අළුත් තොරතුරු ?”
” තාම විශේෂ මොනවත් දැනගන්න ලැබුනේ නෑ සර්, මිස්ටර් විහස් ඔෆිස් යනවා එනවා විතරයි , වෙන කොහේවත් යන්නෑ “
” ම්ම් තව ටික දවසක් මිනිහා ගැන සෙවිල්ලෙන් ඉමු “
…………………………………………………………………………
මේඝා ගැබිණියක් වූ දා පටන් රාත්‍රී නින්දට පෙර ඇයට කිරි එකක් සාදා දීම විහස්ගේ පුරුද්දක් විය.
” ආ මේ මොකද අද මෙයා කිරි එක තනියම හදාගෙන , මං මේ වැඩ ටික ඉවර කරලා හදන්න යන්න හැදුවේ “
” ඔයා වැඩ නිසා මං ඉතින් කරදර කලේ නෑ, ආ මෙන්න ඔයාටත් “
” අයියෝ මැණික මං රෑට කිරි බොන්න කැමති නෑනේ , බඩ එනවා ළමයෝ “
” අනේ විහස් අදට විතරක් බොමු, දවලුත් අපි රණ්ඩු වුනා. ඔක්කොම අමතක වෙන්න බොමු “
” හ්ම්ම් හරි හරි බොමු කෝ දෙන්නකෝ “
” මට සමාවෙන්න විහස්, ඔයා මට වඩා මේ ලෝකේ කාටවත් ආදරේ කරනවට මං කැමති නෑ. පොඩි කාලෙ මට නොලැබුන ආදරය, අවධානය ඔක්කොම ලැබුනේ ඔයාගෙන්. දරුවෙක් නිසා ඒ හැමදේම බෙදෙනවට මං කැමති නෑ. ඒ නිසා මට මේ ලැබෙන්න ඉන්න දරුවව එපා, මට ඔයාව නැති කරගන්නත් බෑ, ඔයාව දාලා යන්නත් බෑ, යන තැනකට අපි දෙන්නම එකටම යමු විහස් ” එලෙස සිතමින් විහස් දෙස බලා සිටි මේඝා, ඔහුත් සමඟම වස මිශ්‍ර කිරි පානය කරන්නට විය.
නිමි.
උපුටා ගැනීම: බුද්ධි ජයවීර