“මාරියා ! මට බැහැ තවත් මෙය ඔබෙන් සගවා සිටින්න. එදා පටන් මගේ සිත සොරාගත්තේ ඇලෙන්කා පමණයි. “
මාරියාගේ දුඹුරුවන් ඇස් වටා ක්ශණයෙන් රත් පැහැ ඉරි ඇදී ගිය නමුත් එය විලී දුටුවේ නැහැ. ඇය සිහින් හඩින් ඉකිබින්දා. වෙනදා මෙන්ම තඹ පාට අහසේ ශ්‍රයික් කුරුල්ලන් පියාසර කලා. මාරියා පිලියෙල කල උණුසුම් කෝපි කෝප්පය තවමත් දුම් දමමින් සිටියා. ලැවෙන්ඩර් මල් ඉත්තකින් සැරසුනු පලිගු පෝච්චිය, සුදු පැහැ බීරලු මේස රෙද්ද මත හිනැහුනා.
“විලී ! ඔබේ ඔය වචන මගේ හදවත සිදුරු කරනවා.ඔබේ හිත වෙනස් වනතුරු මම ඔබ වෙනුවෙන් බලන් ඉන්නම්. මොනවා නමුත් මම ඔබේ බිරිද”
“හහ් හා . මාරියා ! ඔබ කියන්නේ මේ විවාහ උගුලෙහි පැටලී සිටින්න කියලාද? ඇලෙන්කා වන් රූමත් කතක් මගහැරීමට තරම් මම උන්මන්තකයෙක් නොවෙයි මාරියා. කරුණාකර මා නිදහස් කරන්න. “
ගිම්හානයේ දහවලක දැක්වූ ගින්නක උණුසුම මාරියා වටා විය. “විලී! මගේ සිතේ ඉපදි ප්‍රේමය නුබටමයි. එදවස පොප්ලර් යායේදී නුබ වෙත පිදු සෙනෙහස තවමත් එලෙසමයි විලී !” මාරියා සිහින් හඩින් ඉකිබිදීය.
හේමන්ත වැසි නිද්‍රාවට පෙරම විලී, කලු කබාය සහ දිගු කුඩය ඇතැතිව සුරුට්ටු දුමාරය නිදන කාමරයෙහි පුරවා පිටමංව ගියේය. “විලී! ඔබ කෙරේ මසිත උපන් ආලයත් මේ සමග රැගෙන යන්න” බොහෝ කාලයක සිටම අසීමිත ඉවසීමක් සමග එතී තිබූ කදුලු දහරාවක් නිල් පැහැ සැටින් කොට්ටය මත ඇය වගුරවාලීය.
අවුරුදු දෙකකට පසු!
මාරියා! දොර අරින්න. මම විලී. මාරියා! ඔබේ රෝස මල් පාත්තිය කොහිද. මාරියා! දොර අරින්න. මම ඔබට හිරිහැර කරන්නට නොවෙයි පැමිනියේ.යේසුස් වහන්සේගෙ නාමයෙන් මම ඔබට දිවුරනවා. මාරියා! ඔබ මා කෙරේ ඇති ආලය වටහා ගන්නට මට බොහෝ කලක් ගියා. ඇලෙන්කා මා හට චපල වූවා. ඔව්! ඇය මා නොසලකා හැරියා. ඇය වැනි කතක් ඉදිරියේ ඔබ දියමන්ති යක් සේ බැබලෙන්නට ගත්තා මාරියා! දෙවියන්ගේ නාමයෙන් දොර අරින්න.
යන්තමින් අඩවල් කල දොර අමිහිරි ශබ්දයක් නගිමින් සුලගට විවර වන්නට විය. දොර පාමුල විසිරී තිබූ ලියුං කඩදාසි වල තරමක් දුහුවිලි රැදී තිබුනද, ඒ තුලින් නැගුනු ප්‍රංශ රෝස විලවුන් සුගන්ධය මාරියාගේම බව හදුනා ගන්නට විලීට වැඩි වේලාවක් ගත නොවීය.
දයාබර විලී,
මම දන්නවා ඔබ කවදා හෝ පැමිනේවි කියා. මම කවදාවත් ඔබට වෛර කලේ නැහැ විලී. ඇලෙන්කාටත් ඔබටත් මම පල්ලියේදී හද්වතින්ම ආශිර්වාද කලා. ඒ නිසාම දෝ තවත් එක් වසන්තයක් මට උදා වූවා. ඔබට මතකද ඔබේ මිතුරා , බ්‍රයන්? ඔහු මා සමග පෙමින් වෙලුනා විලී . මගේ සිතේ බ්‍රයන් කෙරේ ආලයක් නැතත් මා බ්‍රයන් විවාහ කර ගැනීමට තීරණය කලා. නමුත් විලී! මගේ ආශිර්වාදය ඔබටත් ඇලෙන්කාටත් නිසැකයෙන්ම ලැබෙනවා.
විලී! සොයායන ආදරයට වඩා සොයා එන ආදරය උතුම් බව ඔබ මට පසක් කරා. ඔබට ස්තූතියි . මේ සමග අමුනා ඇති රතු රෝස මල ඇලෙන්කාට දෙන්න. මම ඇය සමග අමනාපයක් නැති බව පවසන්න.
-මාරියා-
විලී රතු රෝස මල සිපගත්තා.
මාරියා! ඔබ කී දේ ඇත්ත. සොයා යන ආදරයට වඩා සොයා එන ආදරයයි උතුම්. ඒ නිසා මේ පාලු නිවසේ මම තනිව සිටින්නම්. ඒ ආදරය සොයා එනතුරු අපි මධුසමයේ ප්‍රීතියෙන් පානය කල මිදි වයින් බෝතලුත්, ඔබ මට තෑගි දුන් ඉස්තරම් වර්ගයේ දුම්වැටිත් ඉතිරි වී සිටිවී.
ආදරෙයි මාරියා!
-නිමි-
උපුටා ගැනීම: -ජිනාලි ඒ. ගමගේ-