සුද්ද පුතාලව ඇරලවල එනකොට හිතට දැනුනෙ කියාගන්න බැරි ප්‍රීතියක්. මම සුද්ද පුතා කිව්වට ඒ නැන්දම්මලගෙ ලොකු බෑණා හෙවත් සුදු බෑණා. අරයගෙ ලොකු අක්කල ඉන්නෙ එංගලන්තෙනෙ.
මගුලට එන්න බැරිවුනු නිසා අක්කයි මස්සිනයි කොල්ලයි ඇවිල්ලා මාසෙකුත් දවස් තුනකුත් ගෙදර ඉදලයි ගියේ. මම නම් ඒ ටිකට දවස් හතර පහකට වඩා ගේ ඇතුලට ගියේ නෑ. අරය නම් අක්කල ආවෙ කාලෙකින් කියල මහ ගෙදර වැටී ගෙන හිටියා. මම නොගියෙ මගේ ඉංග්‍රීසි දැනුම මදි නිසා කියල හැමෝම හිනා උනා. ඒකම නෙමෙයි ඒ පොඩි එකාගෙ ඉංග්‍රීසි මට තේරෙන්නෙ නැති නිසා. අම්මෝ එහෙම ඇක්සැන්ට් එකක් අහං ඉන්නත් ආසයි හැබැයි මොකක්වත් තේරෙන්නෙ නෑ. තේරුම් ගත්තෙත් හතරපාරක් විතර ආයි ආයි හිතින් කියවල තමයි.
පොඩි එකා මාව මුලින්ම දැක්ක දවසෙ අක්කා මාව අදුන්වල දුන්නා
“බේබි දිස් ඉස් යුවර් අන්කල් පුශ්ප” කියලා.
මූ ඒක ඉස මුදුනින් පිලිගත්ත විදියක් තමයි පෙන්නුම් කරේ. එංගලන්තෙ හැදුනත් හොද හැදිච්ච හුරතල් දරුව. දෙවනි දවසෙ මම ගෙට ගොඩ වෙනකොටම මූ මට කෑගැහුවනෙ
” හේ යූ ස්ටින්කි පෑන්ට්” කියලා.
අපේ නැන්දම්මත් කොහෙද ඉදන් පැනගෙන ආපි.
” අනේ ඔව් පුතේ එහෙම තමයි ඉන්න ඕන කතා බහ කරල. ඔයා බාප්පට නමකුත් දැම්මද ඉස්ටිකි පෑන් කියල හරියට පීටර් පෑන් වගේ නේද “
කොලුවට නැන්දම්මා කිව්ව එකවත් නැන්දම්මට කොලුව කිව්ව දේවත් තේරුනේ නැති බවනම් මට තේරුනා. මොකද ඊලගට ගෙදරට යන යන පාරට
” පුතේ මෙන්න ඉස්ටිකි පෑන් බාප්පා ඇවිල්ලා “
කියල නැන්දම්මා කෑගහල කිව්වා. ඔයින් මෙයින් මම ගෙදර යන එක නැවතුනා. මට මහා වැඩ රාජකාරි තියෙනව වගේ මම රෑ වෙලා ගිහින් එලියෙ ඉදන්ම අරයව ගෙදර එක්කන් ආව.
” බලන්න අනේ ඔයාගෙ දින චරියාව, අම්මල ඔයාව බබා කරලනෙ හදල තියෙන්නෙ, ඒකෙනුත් කරදරේ ගෑනු අපිට තමයි. සරම ගැලෙව්වම වලල්ල පිටින් ඇද පාමුල, ඇදුම් දාපු දාපු තැන්වල. සපත්තු ගදේ බෑ අහලකින් යන්න, අර පොඩි එකාට ඔයාගෙ ඔය ඩෙනිමෙ ගදට වෙන්න ඇති ඔය නම මතක් වෙන්න ඇත්තෙ. මාත් ඕක කියා ගන්න බැරුව හිටියෙ. ගන්දස්සාරෙ කාමරේකවත් ඉන්න බෑ. ඕක ඇතුලෙ නයි පොලොන්ගු හිටියත් ඔහේ දාපු තැනකින් අරන් සෙන්ට් ටිකක් උලන් ඇදගෙන යනවනෙ. චික්”
” ඔයාට පිස්සුද චූටි මට එක වගේ ඩෙනිම් දෙකක් තියෙනවා.”
” බොරු කියන්න එපා අනේ මටත්, මට පුදුමයි බලන්න ආව දවස් වල මට මේව නොපෙනුනේ ඇයිද කියල”
” ඒ දවස් වල ඔයාට ඒව හොයන්න උවමනාවක් තිබුනෙ නෑනෙ. කාගෙ හරි කරේ එල්ලෙන්නනෙ බලන් හිටියෙ.”
ගෑණි ගස්සගෙන බාත් රූම් එකට ගියා.
කුස්සියෙ අද ලිද ලග සංගමේ රැස්වෙලා ,මගුල් ගෙදරට පස්සෙ කාලෙකින් අක්කලයි ආච්චියි ගෙදර ඇවිල්ලා නිසා මාත් ඒ පැත්තට සේන්දු උනා.
” හලෝ ස්ටින්කි පෑන්ට් බොමුද ප්ලේන්ටියක්. කෝ මස්සිනාල ඊයෙ ගියාද”
ලොකු අක්කා මාව දැකල ඔලොක්කුවට වගේ ඇහුවා. මුනුත් දන්නෙ නැති රෙද්දක් නෑනෙ. කවුරු කියලද මන්ද?
” මොකද්ද බං ඒ නම, මස්සිනා කිව්වම මතක් උනේ අර සුදු මහත්තයා රැජිනගෙ මාලිගාව පේන නොපෙනෙන දුර කිව්ව ඉන්නෙ නේද. උඹලගෙ නැන්දම්මා කිව්වෙ මගුල් ගේ දවසෙ. ටිකක් වයස උනාට හරිම ගුණ යහපත් වගේ. කටක් හොල්ලන්නෙ නෑනෙ කියන කිසි දේකට. මාව ඉඹලත් ගියේ යනකොට. මටනම් ලැජ්ජත් හිතුන බං. ආදරේට උනත් අපිට ඕව ඒ හැටි පුරුදු නෑනෙ “
ආච්චි මස්සිනාගෙ ගුණ කදම්බය වර්නනා කරන්න පටන් ගත්තා.
” කට අරින්න සුද්දට සිංහල බෑනෙ. අනික අපේ නැන්දම්මලට ඉංග්‍රීසි බෑ. ඉතින් කියන ඕන එකකට සුද්ද ඔලුව වනනවා. සුද්ද කියන ඕන එකකට මේ ගොල්ලො ඔලුව වනනවා” මං කිව්වා.
” හැබැයි කිරි පුතේ ඔය නැන්දම්මා සුද්දවත් සුද්ද කරන ජාතියෙ බඩ්ඩ. දැක්කනෙ කපටි හිනාව, මේ අතේ තියෙන දේ අනිත් අතින් ගනීවි මේ අතට නොදැනෙන්න. ” ආච්චිත් නොදන්න දෙයක් නෑ.
” ඒක ඇත්ත වෙන්න ඇති කට්ටිය කියන්න ඔය මුලු පවුලම ගොඩ ගියෙ සුද්දගෙන් කියල” පොඩි අක්කත් කට දැම්මා.
” උඹල ඕන නැති ඒව කියවන්න එපා, අර ලමයට ඇහුනොත් හරිනෑනෙ. නිකන් නැති ප්‍රශ්න මෙතන.” අම්මා කිව්වා.
” ඒක නෙමෙයි බං කිරෝ, මොකද්ද උඹ අර දෙවනි දවසෙ ඇදන් හිටපු සූට් එක. රෙද්දත් නෙමෙයි කලිසමත් නෙමෙයි රැලි අල්ලල. හරියට නිකං නයි නටවන්නගෙ රිලව වගේ බං. “
” ඒක ඉන්දියාවේ ඇදුමක් ආච්චි , ආරච්චිලයි , සුද්දයි, පූසරියි මුහුන් වෙච්ච එකක්. අපි නම් මූට කිව්වා. අපි කියන ඒව අහන්නෙ නෑනෙ ආච්චි දැන්. ඒකත් ඇදන් හරියට ඇවිදින්නවත් බෑනෙ. අනික මෙයා පරම්පරාවෙන්ම උපදෙස් දෙන්න ආපු පවුලකින්නෙ බැදල තියෙන්නෙ. ” පොඩි අක්කා කිව්වා.
” නෑ ඕයි ඔය අන්දන එක්කෙනානෙ කිව්වෙ ඕක අදින්න කියලා. මම නම් බෑ කිව්වා. කොහෙද , දුරින් නෑ කමක් තියෙනව කියල හිත රිද්දන්න එපා කිව්වෙ. ගානත් ටිකක් අඩු කරා මං හිතන්නෙ” මාත් කට වහන් හිටියෙ නෑ.
” කොහොම උනත් කොලුවො ඒකනම් උඹට ගැලපෙන්නෙ නෑ. මොකද්ද අර පරම්පරා ගත උපදෙස් කතාව”
” මේක්නෙ ආච්චි අපේ නෑනගෙ ආච්චි මිඩ්ඩැයිස් කෙනෙක්ලුනෙ, අම්මා කෘෂිකර්ම නිලධාරී, කෙල්ල නර්ස්. උපදෙස්ම විතරයිනෙ”
” අනේ සාදු අපේ එකාව හදල ගනී එහෙනම්”
වසුන්දරා වැඩට යන්නත් ලෑස්ති වෙලා. කුස්සියට එබිලා මල් මල් හිනාවක් පා කරල එව්වා.
” ඒයි මාව ඇරලලා එන්නකො අනේ පරක්කුත් වෙලා. හොද එක්කෙනා වගේ මගෙ රෙදි ටිකත් වැලට දාන්න හොදේ. වොශින් මෙශින් දැම්මම සවුත්තු වෙන ඒවා දෙකක් එලියෙ ඇති, නානකොට හෝදල දානවද, අක්කෙ මම යනවා. ආච්චි අද ඉන්නව නේද? අම්මේ මම එනකොට රෑ වේවි අද. පුශ්ප යංකෝ”
උපුටා ගැනීම: Buddhika Abeysundara