සුදු ලූනු ගේන්න කඩේ යෑම (වැල් වටාරම්)

(මගේ මොබයිල් එකේ සද්දෙ මේක නොවුනත් කතාවට ප්‍රවේශයක් ගන්න ඕනේ හින්දා කියලා දැම්මා)

කෝල් එකක්, වස්තු-කොටේගෙන්.

මේහ්. කොහෙද ඉන්නේ

ටවුමෙද, ඉඩමෙද ?

ඉස්සර වගේ අයියේ බබෝ පැටියෝ කෑවද බීවද බඩගිනිද මහන්සිද … එවුවා සුම්මා, කෙලින්ම කෝල් කලා, පනිවිඩේ කිවුවා, ෆෝන් එක තිබ්බා. ලමයි 3ක් එක්ක ඔට්ටු වෙනකොට හුරතල් වෙවී ඉන්න වෙලාව නෑ තමයි, ඒ ටිකටත් එකෙක් එක්කෝ තාප්පයක් උඩ නැත්තං ගහක් උඩ නැගලා ඉඳීවි, නැත්තං ලොකු උන් දෙන්නා ගුටියක් ඇනගනීවි. එහෙම නැත්නම් ලොකුවුන් දෙන්නා එකට සෙට් වෙලා පොඩි එකාව කොලොප්පම් කරාවි. දැන් නං අපරාදෙ කියල හිතිල තියෙන්නේ ලොකු උන් දෙන්නව අවුරුදු දෙක තුනක් කරාටේ පන්ති ඇරපු එකට. දැන් මේ ළඟදි ඉදන් ගංගා ප්‍රශ්නයක් අහනකොට කෙලින්ම බහුවරණ උත්තර දෙක තුනකුත් දීලාමයි ප්‍රශ්න අහන්නේ. මටත් ඒක ලේසී. ගැලපෙන උත්තරයක් තෝරාගන්න තියෙන්නේ.

ඉඩමේ – මම ඒ උත්තරේ තෝරාගත්තා

ටවුම පැත්තේ යනවා ඇතිනේ බඩු මොනවා හරි ගේන්න නේද ?

සිමෙන්ති දෙකකුයි තව පොඩි පොඩි බඩු වගේකුයි ගේන්න තියෙනවා. ටිකකින් යනවා .. මොනවද වෙන්න ඕනේ

සුදුළූණු ඉවරයි සුදුළූනු ටිකක් ගේන්න

එච්චරද

සුදුලූනු ගන්න ගමන් ලොකු ලූනු ටිකකුයි රතු ලූනු ටිකකුයිත් ගේන්න. රතුළුණු ගන්නකොට පොඩ්ඩක් බලල ගන්න. ඔය හූනු බිජු වගේ පොඩි පොඩි ඒවා ගේන්න එපා.

එච්චරද

හාල් කිලෝ 10කුයි, පරිප්පු 500යි, කඩල ඇට 500ය්, පොඩි සැමන් ටින් එකකුයි – සැමන් ගන්නකොට පොඩ්ඩක් ගනන් බලල ගන්න, එක එක ඒවා එක එක ගනන්. යෝගට් 10කුත් ගේන්න, මතක් කරලා ෆ්‍රී හම්බවෙන යෝගට් 2 ඉල්ලන් එන්න

තව තියෙනවද

ඔයාට ඉතින් කඩේ කැශියර් දැක්කම මෙලෝ සිහියක් නෑනේ, හැදී ටික අමතක කරලා යෝගට් විතරක් උස්සන් එන්න එහෙම එපා. ගිය පාරත් හැදි ටික දාලා ඇවිල්ලා

හරි.

3-5 ඉවරයිද කොහෙද ?

3-5 නේද ?

3-5 බැදපු නැති එක අරන් එන්න.

අමතක වෙලා බැදපු 3-5 එහෙම උස්සන් එන්න එපා. ඔයා ඉතිං කොහොමටත් වැඩිපුර ආසා බැදපු ඒවටනේ

ම්හ්..

පලතුරුත් ඉවරයි, තව කෙසෙල් ගෙඩි 1-3ක්ද කොහෙද තිබ්බා

හරි මම බලලා පලතුරු මොනාහරි ගෙන්නම්

ෆ්‍රිජ් එකේ පතෝලයි, වැටකොලුයි ලීක්සුයි තිබුනා, කනවද ?

හරි මම එලවලු ටිකකුත් බලලා ගේන්නම්.

අදනම් චිකෙන් කඩේ ඇරලා ඇති

හරි, මම බලලා බිත්තරයි චිකනුයි ගේන්නම්.

අයියට බත් කන්න බෑලු අද රෑට

මෙයත් ඉතින් ඒවා කියන්නේ චූංපාං එක ගියාට පස්සෙනේ

බේකරිය ඇරලද දන්නේ නෑ, මම බලන්නම්.

එදානම් පොලට හැරෙන තැන සුදු බතල තිබුනා, ඉවරද දන්නේ නෑ..

සුදු බතල නේද ? හරි මං බලන්නම්

මේ කොස්සෙන් කොච්චර අතුගෑවත් වැඩක් නෑනේ. දැන් කෙදි ඈත් වෙලා

කොස්සක් නේද ?

ඔවු, ප්ලාස්ටික් කොස්සක් ගේන්න, ඔයා ගියපාරට කලින් පාර ගෙනාපු එක වගේ එකක්නම් ගේන්න එපා, පොඩ්ඩක් අතුගාලා බලලා ගන්න.

දැන් මට එතකොට මුදලාලිගේ කඩේත් අතු ගාන්නද කියන්නේ. ඉවරද දැන් බඩු ලිස්ට් එක. (අමාරුවෙන් යටපත් කරගෙන ඉන්න මහසෝන් යක්සයා චුට්ටක් ඔලුව දාලා ගත්තා).

ආ.. පැටී, මේහ් ?

(පැටී.. ???? දතක්වත් ගැලවෙන්නද යන්නේ)

ඔයාලගේ අම්මා කතා කරලනේ දවල්. මට ඇහුනෙ නෑ . ඉතින් මිස් කෝල් වෙලා .මම කෝල් එකක් ගන්න කියලා කියලා බලනකොට තමයි දන්නේ ෆෝන් කාඩ් එක ඉවරවෙලා කියලා . වට්සප් කෝල් එකක්වත් ගන්නං කියලා බලනකොට ඉන්ටනෙට් එකත් ඉවරවෙලා. දැන් ඉතින් හදිස්සියේ ඔයාට රීලෝඩ් දාන්න යන්න අමාරුයි නේ.ඔයා හවස ආපුවාම ඔයාගේ ෆෝන් එකෙන් වත් කෝල් එකක් ගන්නම්. ඒත් ඉතිං හදිසියකටද දන්නේ නෑ කතා කළේ.

(සැනසුම් සුසුමක් පිටවිය, ඇති ඔයින් ගියා)

හරි මං රීලෝඩ් එකක් දාන්නම්

ඉවරද ? තියන්නද ?

ඉවරයි, පරිස්සමට ඉන්න

ම්හ්හ්..

ආ.. මේ.. තිබ්බද ? හලෝ ! හලෝ !

ඇයිහ් ?

මේ පපඩම් පැක්ට් 2කුත් ගේන්න

බීප් බීප් බීප්

වැලි ගොඩ උඩ පහුරු ගගා හිටපු අල්ලපු ගෙදර පූස් තඩියට තඩි ගලකින් ඇරලා දාපු මම, ගෝලයෙකුට බයිසිකලේ දීලා සිමෙන්ති ගේන්න පිටත් කරලා මමත් වීල් එකක් අරන් කඩේ ගියා – ටවුමේ උඩම කොනට.

ප.ලී.

පිරිමියකු ගේ ජීවන චක්‍රයේ අවස්ථා තුනයි තියෙන්නේ .

1 අම්මට කඩේ යෑම

2 නෝනට කඩේ යෑම

3 ලමයින්ට කඩේ යෑම