සූට් එක.. (වැල් වටාරම්)

ලොන්ඩරියෙ අයියා ලොන්ඩරි වැඩ වලට අමතරව මඟුල් ගෙවල් වලට ඕන කරන ඇඳුම් කුළියට දෙන වැඩෙත් කලා..

සාමාන්‍යයෙන් නිමල් මඟුල් ගෙවල් වලට අඳින ෆුල් සූට් දෙක තුනක් ලොන්ඩරියෙ තිබ්බා..එදා නිමල්ට පුරුදු එක සූට් එකක්වත් තිබ්බෙ නෑ..ඒ සතිය මඟුල් නැකැත් තිබ්බ සතියක් නිසා හොඳ ලස්සන සූට් ඔක්කොම වගේ එක් එක්කෙනා කුළියට අරං ගිහිල්ල… ලොන්ඩරියෙ අයියත් කිව්වා කලින් කියල තිබ්බ නම් අරං තියනව කියල..නිමල්ට මේ වෙඩින් එක අමතක වෙලයි තිබ්බෙ..පහුවෙනිදා තියෙන වෙඩින් එකට එනවා නේද කියල යාලුවෙක් කතා කරල අහපු නිසයි නිමල්ට වෙඩිම මතක් උනෙත්..

කොහොම හරි ලොන්ඩරියෙ ඉතුරු වෙලා තිබ්බ සූට් වලින් ටිකක් ලොකු සූට් එකක් තමයි නිමල්ගෙ ඇඟට සෙට් උනේ..

“ආ මේක ගිය මාසෙ ලැබුණු සූට් එකක්…පරණ කෝට් මල්ලි ගෙනත් දුන්නෙ..ලොකු අවුලක් තිබ්බෙ නෑ..වොෂ් එකක් දාල ගත්තම අලුත් එකක් වගේම ආවා..” කියල ලොන්ඩරි අයියා පාරම් බෑවා..

නිමල් පහුවෙනිදා කෝට් එකත් ඇදං ගියා..

ඒ යනකොට පෝරුවේ චාරිත්‍ර ඉවර වෙලා..යාලුවො සෙට් එක හිටිය මේසෙට නිමලුත් ගිහින් වාඩි වෙලා කයිය දාගෙන හිටියා..

ටික වෙලාවකින් එක මනමාලිගෙ පැත්තෙ කියල හිතෙන තරුණයෙක් මේ

මේසෙ ලගින් යන ගමන් නිමල් දිහා බලාගෙනම ගියා..

නිමල් හිතුවෙ තමන්ගෙ ලුක් එක නිසා බලනව කියල..නිමල් ඉතින් පොඩ්ඩක් ඒ තරුණයා එක්ක හිනා උනා..ඒත් ඒකා හිනා නොවීම ඇවිදගෙන ගියා….මාව වෙනකෙනෙක් කියල රැවටිලා වෙන්නැති කියප හිතාගත්ත නිමල් මේසෙ වාඩිවෙලා හිටිය යාලුවො එක්ක සෙල්ෆි ගන්න පටන් ගත්තා..

විනාඩි පහළොවකට විතර පස්සෙ අර කොල්ලා තව සෙට් එකක් එක්කගෙන නිමල් වාඩිවෙලා හිටිය මේසෙ ලගට ඇවිත් නිමල්ගෙ වටේට පුටු ඇදගෙන වාඩි වුනා..ටික දෙනෙක් නිමල්ගෙ පිටිපස්සෙනුයි දෙපැත්තෙනුයි හිටගෙනත් හිටියා.. නිමල්ගෙ ‍යාලුවොත් නිකං හොල්මන් වෙලා හිටියා.

“අයියා මේ ලඟද?”

“නෑ මල්ලි මම හීන් මැදිරියෙ”

“මේ සූට් එක අයියගෙද? “

“ඇයි මල්ලි මොකො ප්‍රශ්නෙ?”

” අහපු දේට උත්තර දෙන්නකො අයියෙ”

“ඔ…ඔව්..මගේ තමයි..”

“ෂුවර්ද?”

දැන් මගුල් ගෙදර කට්ටියම මේ දෙබස දිහා බලාගෙන ඉන්නෙ..

“ඔව් මල්ලි..මම මේ වෙඩින් එකටම මැස්සුව සූට් එක”

“ටිකක් ලොකුයි වගේනෙ?”

“ඔව් මේ දවස් වල මම ඩයටිං..ඒකයි”

“ඔය කෝට් එකේ ඇතුලෙ සාක්කුව පොඩ්ඩක් බලමුද?”

නිමල්ට මල පැන්නා..”අඩෝ මේ නිකං වදන් දෙන්නෙපා..උඹ කව්ද ඩෝ මගේ සාක්කු චෙක් කරන්න? පොඩ්ඩක් වැදගත් විදියට කතා කරනකොට කරේ නගින්නත් එනවා..පව් නොදී පලයං මිනිහො”

” පව්? මචං අල්ලගනිං මූව හෙල්ලෙන්නෙ නැති වෙන්න..එකෙක් එන්නෙපා බාධා කරන්න..ආවොත් දෙන්නෙ ඉදිමෙන්න”

අර තරුණයා එහෙම කිව්වම නිමල්ගෙ ‍යාලුවො මුකුත් කියන්න කරන්න ආවේ නෑ..

වට කරං හිටිය කොල්ලො නිමල්ගෙ විරෝධය උඩම කෝට් එකේ ඇතුලෙ සාක්කුව පේන්න කෝට් එක ඇරියා.. ඒ සාක්කුව දිහා විනාඩියක් විතර බලං හිටිය අර තරුණයා “උඹෙ අම්…”කියල නිමල්ට එතැනම ගම් පෝරියල් එකක් දෙන්න ලෑස්ති උනා..

එතැනට දුවගෙන ආව මනමාලය වහාම මැදට පැනල වලිය නැවැත්තුවා..

මනමාලයා : “ඇයි මල්ලි මොකක්ද ප්‍රශ්නෙ?”

තරුණයා: ” අයියෙ මගේ යාලුවා සමන් හැප්පිල මලාම ඌට ඇන්දුවෙ මගේ මේ කෝට් එක..සමනා වළ දාලා සතියෙන් උගේ වළ හාරලා සූට් එකයි ඔලුවයි උස්සල කියල අයියත් දන්නවනෙ? මූ තමයි ඒක කරල තියෙන්නෙ..පර බ….”

“මේක ගිය මාසෙ ලැබුණු සූට් එකක්…පරණ කෝට් මල්ලි ගෙනත් දුන්නෙ..ලොකු අවුලක් තිබ්බෙ නෑ..වොෂ් එකක් දාල ගත්තම අලුත් එකක් වගේම ආවා” කියල ලොන්ඩරි අයියා කියපු වචන ඈත ඉදන් නිමල්ට ඇහෙන්න ගත්තා…