ශ්‍රී ලාංකික අපිට තේ වගාවත් එක්ක ඓතිහාසික සම්බන්ධ කමක් තියෙනවා. ඒ විදේශිකයන්ගෙන් තේ වගාව අපිට ලැබුන නිසාමත් නෙමෙයි.සොබාදහමත් එක්ක කඳුකරයේ ලස්සන සංචාරක පුරවරයන් බොහොමයක් තේ වගාවන් හා සමීපයෙන් පිහිටි නිසා. මේ සටහන මගින් අපි කතා කරන ගමනාන්තයත් වරක් දුටුව කෙනෙකුගේ නෙත් සිත් යලි යළිත් විඳින්නට ප්‍රිය කරන තරම් ලස්සන තේ වගාවත් සමග අතිශයින්ම සමීප වූ සොඳුරු නැවතුමක්.
මහනුවර සිට පේරාදෙණිය මාර්ගය ඔස්සේ මහකන්ද ගලහා පැත්තෙන් කිලෝමීටර 35 ක් පමණ දුරක් ගමන් කොට දෙල්තොට නම් ප්‍රදේශයේදී අපිට හේවාහැට ලුල්කඳුර වතුයාය නම් මේ සුන්දර නැවතුමට ළඟා වෙන්න පුළුවන්.සොබාදහමේ ලස්සන විඳින්න කැමති අයට එක් දිනයක සංචාරයක් සදහා හොදින්ම ගැලපෙන ස්ථානයක් ලෙස ලුල්කඳුර හඳුන්වන්න පුළුවන්.මෙම භුමිය ශ්‍රී ලංකාවේ පළමු තේ ගසට ජිවය දුන් භූමිය වන අතර මහනුවර සහ නුවරඑළිය දිස්‌ත්‍රික සීමාවේ පිහිටා ඇත.
පේරාදෙණිය ගලහා මාර්ගයට අමතරව මහනුවර සිට තලාතු ඔය බෙල්වුඩ් මාර්ගය ඔස්සේද ලුල්කඳුරට ඕනෑම කෙනෙක්ට පහසුවෙන් පැමිණිය හැකියි. නුවරඑළිය දිස්ත්‍රික්ක සිමාවට යාබදව පිහිටා ඇත්තා සේම දේශගුණයද නුවරඑළිය දේශගුණයට සමාන වීම නිසා වෙහෙස මහන්සියෙන් පැමිණෙන අයෙක්ට වුවත් මොහොතකින් තම වෙහෙස නිවා ගැනීමට හැකි තරම් සොබාව සෞන්දර්යෙන් මේ පරිසරය පරිපුර්ණයි. එනිසා සොබාදහමේ ලස්සන නිසා පමණක් නොවෙයි සිතල පරිසරය හා දේශගුණය නිසාත් සංචාරකයන්ගේ සිත් ලුල්කඳුරට ආකර්ෂණය කරගන්නේ නිරායාසයෙන්මයි.
වර්තමානය වන විට ලෝකය පුරාම මිහිරි තේ ලෙස ප්‍රසිද්ධ ව ඇති ශ්‍රී ලංකාවේ ප්‍රධාන ආර්ථික භෝගයක් බවට පත් වූ තේ වගාවේ පුරෝගාමී චරිතය ඉංග්‍රීසි ජාතික ජේම්ස් ටේලර් මහතායි. වර්ෂ 1825 මාර්තු 29 වෙනිදා ස්කොට්ලන්තයේ දී උපත ලද ජේම්ස් ටේලර් මහතා වයස තරුණ වියේදී දී ශ්‍රී ලංකාවට පැමිණ දෙල්තොට ග්‍රාමයේ අක්කර 19 ක පමණ වූ භූමියක කොපි වගා කර ඇති අතර අක්කර 5 ක් පමණ වූ කුඩා ප්‍රදේශයක තේ වගාව කර ඇත. එතුමාගේ වගාවන් ගෙන් තම වත්තේ හැදුනු තේ දළු කඩා නිවසේදීම තේකොල නිෂ්පාදනය කර වෙළඳපොළට සැපයීමට එතුමා සමත් වී ඇත.
ලුල්කඳුර නමින් හඳුන්වන රමණිය වතු යායේ ජේම්ස් ටේලර් මහතාගේ එකළ නිවස පිහිටා තිබු බවට සාක්ෂි සපයන නටඹුන් අදත් එහි යන ඕනෑම කෙනෙක්ට දකින්න හැකි වුවත් අවාසනාවකට සම්පුර්ණ නිවසම දකින්න නෑ. නමුත් නිවස තුළ උණුසුම රැක ගැනීම සඳහා භාවිත කරපු චිමිනිය සහිත කුළුණ අපිට දැකිය හැකියි. ඒ වගේම ජේම්ස් ටේලර් මහතා විසින් වාඩි වී තම තේ වත්ත දෙස බලා ඉඳපු Teylor Seat නම් ගල් ආසනය එහි යන ඕනෑම කෙනෙකුට දකින්න පුළුවන් අතර ඒ හැමෝටම Lipton seat නිරායාසයෙන්ම මතක් වීම වළක්වන්න නම් බැහැ කියලයි මට හිතෙන්නේ. මොකද ඒ ආසනයේ වාඩිවෙලා ටේලර් මහතා වගේම වත්තෙන් කඩා ගත්තු තේ දළුවලින් හැදු උණුසුම් තේ කෝප්පයක් රස විඳින්න ඇත්නම් කියලා ඒහි යන ඔබටත් හිතෙන්න පුළුවන්.
හාත්පසින් තොප්පිගල,බ්‍රැන්ඩි ගල සහ හන්තාන ආදී කදු වැටී විශාල ප්‍රමාණයකින් වටවී ඇති සේ පෙනෙන ලුල්කඳුර වතුයායේ සුන්දරත්වය තවත් වැඩි වන්නේ එහිදී කොණ්ඩගල කන්ද තරණය කරද්දියි. සුන්දර තේ වත්ත මැද තනි වූ කොන්ඩගල මගහරින්නෙම නැතිව තරණය කලයුතු කන්දක්. කන්දක් ලෙස හැඳින්වුවත් ස්වාභාවිකවම උලක් ලෙසට පිටතට නෙරා ආ කොන්ඩගල ගිරි ශිකරයක්. එහෙත් මෙහි ඇති සුන්දරම දෙය වන්නේ කොන්ඩගල තරණය කිරීමට යා යුත්තේ සුන්දර ලූල්කදුර තේ වත්ත මැදින් වීමයි.
අතීතයේ සිටම සිංහල සහ දමිල ජනතාව සහයෝගයෙන් ජිවත් වන දෙල්තොට ප්‍රදේශය සොබාදහමේ ලස්සන තවත් වැඩිකරන කඳුකරයේ පිහිටි සොඳුරු නැවතුමක් බව සිතෙන්නේ කොන්ඩගල දක්වා ලුල්කඳුර වතුයාය මැදින් ඇවිදමින් යන ගමනේදී තේ දළු නෙළන තේ කර්මාන්තයෙන් ජීවිතේ ගැට ගහ ගන්නා කඳුකරයේ ජනතාවත් අපිට දැක බලා ගන්න පුලුවන් වීම නිසයි. මේ ගමනේදී පරිසරයේ ලස්සන වගේම ටේලර් ගේ නිවසේ නටඹුන්,ටේලර් භාවිතා කල ලිඳ, ශ්‍රී ලංකාවේ පළවෙනි තේ ගස,ටේලර් භාවිතා කල ගල් ආසනය විතරක් නෙමෙයි අඩි දහයකටත්වැඩියෙන් ඉහළ ගිය උස තේ ගස් ද එහි යන අපිට දකින්න පුළුවන්.
සොබාදහම විඳින්න වගේම කඳු නගින්න ආස ඒත් කාර්යබහුල බව නිසාම ජිවිතයේ වෙනසක් සොයන කොයි කාටත් දවසේ සංචාරක නැවතුමක් ලෙස තෝරා ගැනීමට හැකි ලුල්කඳුර ගමනාන්තය වෙහෙසකර ජිවිතයේ වෙහෙස නිවන අපුරු නැවතුමකි. එහි අපුරු බව ගැන විස්තර් කරනවාට වඩා එහි සිරි විඳින්න ආරාධනා කිරීම වඩා වැදගත් වුවත් අපි රැගෙන යන පොලිතින් සහ අප ද්‍රව්‍ය මේ පරිසරයේ තැන තැන විසි නොකර සිටින්නත් අපි හැමෝටම වගකික්මක් තියෙන බව මතකයේ තබාගත යුතුම කරුණක්
………අන්තර්ජාලය ඇසුරෙනි………
