හරියටම උදේ නමය හමාරට ගෙදර සිනුව නාද කරනවා ඇහුනු මම ගේට්ටුව ලගට දිව්වේ හරිම කුතුහලයකින් .
ගේට්ටුව ලග නතර කරලා තිබුනේ ලංකාවේ ප්‍රසිද්ධ , නම ගියපු මල් සැකසුම් කරුවෙක්ගේ කුඩා ලොරියක් .
” ගුඩ් මෝනින් මැඩම් ..”
හරි පිළිවෙලට කොන්ඩේ , රැවුල කපපු පිරිමි ළමයෙක් සුදු රෝස ලා කොළ පාට මිශ්‍රවුනු ටීෂර්ට් එකක් සහ නිල් ඩෙනිමක් ඇදගන ගේට්ටුව ලග හිටගන මට හරිම ප්‍රසන්න විදියට සුබ පැතුවා .
” ගුඩ් ….. මෝනින් …..”
මම ටිකක් පුදුම වෙමින් එහෙම කියද්දී , ඔහු නැවතත් කියවන්න පටන්ගත්තා .
” මිස් … තරූ …මිස්ට මල් බොකේ එකක් තියනවා . ටිකක් ඉන්න ”
ආයෙත් අර ස්මාර්ට් පිරිමි ළමයා ලොරිය ලගට ගිහිං ලොරියේ දොර ඇරලා අතට ගත්ත දෙයින් මම පුදුම උනා . ඇත්තටම ඒක මට අදහගන්න බැරි උනා . ඒ රතුම රතු රතු පාට රෝස මල් පනහක් හැටක් එකට එකතු කරලා හදපු ලස්සනම ලස්සන ලොකුම ලොකු මල් පොකුරක් .
” සුබ උපන්දිනයක් මිස් ”
අර රතු රෝස මල් පොකුර මගේ අතට දෙන ගමන් පිරිමි ළමයා එහෙම කිව්වත් මට සියළු දේ ප්‍රකෘති තත්වයට ගන්න තත්පර කිහිපයක් ගත උනා .
” අහ්හ් …. තෑන්ක්ස් ”
ඊට පස්සේ කොලෙකට අත්සන් අරගන ඒ ලොරිය යන්න ගියා . එත් මම කලේ මල් පොකුරේ සුවද බලමින් , ඇගිලි තුඩු වලින් එය අතගාමින් , එහෙට මෙහෙට හරවමින් , විවිධ කෝණ වලට තබාගනිමින් එහි සුන්දරත්වය නැරඹීම පමණි .
ටික වෙලාවක් මල් පොකුරේ සුවද බල බලා හිටපු මම මගේ අතේ තිබුණු මොබයි ෆෝන් එක අරගන සෙල්ෆියකුත් ගත්තා . සෙල්ෆියක් නෙවේ මම හිතන්නේ සෙල්ෆි සියක් දෙසීයක් විතර ගන්න ඇති . ආයෙත් මම ගේට්ටුව වහගන මිදුලට ඇවිත් අඹ ගහ ලග තිබුණු කොට බැම්ම උඩ වාඩි වෙලා විවිධාකාර විදියට සෙල්ෆි කීපයක් ගත්තා .
ඊට පස්සේ මම කරේ නිදහසේ එතැනින් මම ලස්සනම , රතු රෝස මල් ටිකත් ලස්සනට පෙනෙන ලස්සනම ෆොටෝ එක හිමින් සීරුවේ තෝරගන පොඩ්ඩක් ෆොටෝ එඩිට් ඇප් එකකින් ලස්සන කරලා අරගන ඉක්මනින් ෆේස් බුක් අප්ලෝඩ් කරපු එක .
මට ඒ වෙලාවෙනම් එයගැන පුදුම ආදරයක් ඇති උනේ . හොර ගෙඩියා වගේ උදේ පාන්දර විෂ් නොකර ගෙදරින් එලියට බහිද්දී මට දුක හිතුනත් , මගේ යටි හිතේ වැඩ කරා දවල් වෙද්දී එයා මාව ස’ප්‍රයිස් කරයි කියලා . ඊයේ උදෙත් මගේ උපන්දිනේ හෙටනෙ කියලා මතක් කරලත් , රෑ නින්දට කලිනුත් මගේ උපන්දිනේ හෙට නේද කියලා මතක් කරලත් එයාට ඒක එහෙම අමතක වෙන්න බැරි බව මම දැනගන හිටියා . හොර ගෙඩියා , මගේ සුදු මහත්තයා ඒ නිසා මම ෆොටෝ එකේ කැප්ෂන් එකටත් මෙහෙම දැම්මා .
” සුදු මහත්තයාගෙන් ස’ප්‍රයිස් මල් මිටක් . ආදරෙයි හොර ගෙඩියෝ ….. උම්ම්මා …”
ඒක දාලා මම ඉක්මනින් එයාගේ වට්ස් ඇප් එකටත් ඒ ෆොටෝ එකම සෙන්ඩ් කරලා , ” හොරගෙඩියා තින්කියුව්….. ” කියලා සෙන්ඩ් කාරා .
ඒ අතරේ මම මගේ ෆොටෝ එකට වැටෙන ලයික් , කමෙන්ට් ගණන් කරන්න පටන්ගත්තා . ගොඩක් අය කියලා තිබුනේ මම වාසනාවන්ත බිරිදක් , ආදරණිය පව්ලක් , රොමැන්ටික් හස්බන්ඩ් කෙනෙක් වගේ කතා . මමත් ඒවා දිහා බලමින් අහිංසකව ආඩම්බර වෙමිනුයි හිටියේ .
ටික වෙලාවකින් අර මම යවපු මැසේජ් එකට මැට්ටාගෙන් රිප්ලයි එකක් ආවා .
” කව්ද ඕක එව්වේ ”
හෑ …. මෙයා තවමත් මාව පුදුම කරවන්න හදන හැටි . අද හවසට එයි කේක් එකකුත් අරගන . එහෙම හිතමින් මම එයාට රිප්ලයි කරා.
” පිස්සා …. ආදරෙයි මම ඔයාට . ඔයාගේ මල් ටික දැකලා මම පුදුම උනා . ඇත්තටම මේක පුදුම උපන්දින තෑග්ගක් ”
ඊට පස්සේ ආවේ මට එයාගෙන් කෝල් එකක් . ඉක්මනින් මම කෝල් එක අන්ස්වර් කරේ මගේ හිත පුරා දුවන ආදරෙන් .
” හෙලෝ …. කව්ද මල් එව්වේ ඔයාට ”
මම කෝල් එක අන්ස්වර් කරපු ගමන් එයා පුදපු ගමන් කාපි යකා වගේ ඒ දේ ඇහුවේ මගෙන් තරහට .
” ඔයානේ …”
මම නැවතත් පුදුම වෙමින් එයාට උත්තර දුන්නත් එයා කියපු දෙයින් මාව පුදුම විදිහට කඩාගන වැටුනා .
” මම එවපු මලක් නෑ …. මොකාද ඕක එවලා තියෙන්නේ බලනවා ”
එතකොටයි මම මල් පොකුරේ පැත්තකින් අමුණලා තිබුණු ටැග් එක බැලුවේ . ඒ ටැග් එකේ ලියලා තිබ්බෙත් ” හැපී බර්ත් ඩේ තරු…” කියලා විතරයි . ඉතිං මම එයාට කිව්වා
” එවපු කෙනෙක් ගැන මේකේ සදහනක් නෑ කියලා ” .
ඉතිං සුපුරුදු පරිදි යකා අවේස වෙලා එයා මට බනින්න පටන්ගත්තා . ඇත්තටම මම වරදක් කරාද ? නොදන්නා කෙනෙකු එවපු රතු රෝස මල් ටිකක් පිලිගත්තාද ? කව්ද ඒ මට මල් එවන නොදන්නා පුද්ගලයා ? වගේ දාහක් ප්‍රශ්ණ මගේ හිතේ වැඩ කරද්දී එයා කරපු එකම දේ මට බැනීම විතරයි .
ඒ බැනුම් අහගන අර රතු රෝස මල් මිටියත් තුරුළු කරගන අඩමින් ඉද්දි මම දැක්කා කව්දෝ ගේට්ටුව ඇරගන ඇතුලට එනවා .
” අක්කා … මගේ මල් පොකුර ආවද ?”
ඒ මගේ නිවුන් නංගි .
” ඔයාගේද මේ මල් පොකුර ”
මම පුදුමයෙන් එයාගෙන් ඇහුවේ තව තවත් රතු මල් පොකුර මගේ පපුවට තද කරගන්න ගමන් . ඒක එයාගේ කියලා හිතන්නවත් මම කැමති උනේ නෑ .
” ඔව් ….. රංග මට එවපු මල් පොකුර , තවම අපේ සම්බන්දේ ගෙදරින් දන්නේ නැති නිසා ගිෆ්ට් එක එවන්න කියලා මම මෙහෙ ඇඩ්රස් එක දුන්නා ”
කියමින් ඇය මගේ අතේ තිබුණු රෝස මල් පොකුර ඉක්මනින් උදුරා ගත්තා .
” එතකොට මේ .. තරූ .. කියන නම ”
මම මගේ වෙව්ලන ඇගිලි තුඩු වලින් සුබ පැතුම එක්කකර තිබු ටැග් එක පෙන්වන ගමන් නංගිගෙන් ඇහුවා .
” අයියෝ …. ඔයා තරුදී , මම තරුෂි , අයියා ඔයාට තරූ කියනවා වගේම , රංග මට කියන්නෙත් තරූ …”
සිනාසෙමින් එසේ කියූ ඇය ඩෙනිම් සාක්කුවෙන් ඇයගේ ජංගම දුරකථනය ගෙන සෙල්ෆි කීපයක් ගෙන ජංගම දුරකථනය මට දික්කරේ
” ෆොටෝ එකක් ගන්නවකො …” කියමින් .
උපුටා ගැනීම: – හසිකා විජේතුංග –