ශානිකා ටීචර් ලමයින්ට ගොඩාක් ආදරේ ටීචර් කෙනෙක්. හරීම කරුණාවන්තයි. හයේ පන්තියේ ලමයි පුදුම ලෙන්ගතුකමක් තිබ්බේ ටීචර්ට. ඉතින් ටීචර් ඉස්කෝලෙන් අස් වෙලා යනව කිව්වම ගොඩ කෙල්ලෝ ඇඬුවා. කොල්ලො ඇඬුවෙ නැති වුනත් හරීම දුකෙන් හිටියේ.
පන්තියේ කටකාර ඩිලක්ශන් යෝජනා කරා ටීචට තෑගි ගේන්න එතුමියගේ අන්තිම දවසේ. ‘ඔක්කොමලා මොන මොනව හරි ගේන්න’ ඩිලක්ශන් නියෝගයක් දුන්නා. ‘සල්ලි දෙමුද?’ දේශානි ඇහුවා. ‘අපෝ එපා. ඒක කැතයි. තෑගිම ගේන්න’ ඩිලක්ශන්ගේ තීරණේ.
ඔන්න ඉතින් ශානිකා මැඩම්ගේ අන්තිම දවස. දුකයි. ගෑනු ලමයි ටීචර් වටේ. ඇයගේ සාරි පොටෙත් එල්ලිලා එක කෙල්ලක්. එක එක්කෙනා ඇවිත් ටීචර්ට තෑගි දෙනවා. ශානිකා මැඩම්ටත් ඇඬුම් එනවා. ඒත් ඉතින් මේ පොඩි උන් ඉස්සරහා අඬන්නත් බෑනේ. ටිචර් මේ ලමයි සෙට් එකේ පවුල් හිටන් දන්නවා. ඇයි ඉතින් පේරන්ට්ස්-ටීචර් මීටින් එනවනේ දෙමාපියෝ. ශානිකා මැඩම් ඒ දෙමාපියන්ගේ රැකියාවල් එහෙමත් අහනවා ලමයි ඉතින් කොයි තරාතිරමෙද මැන ගන්න. අනික මැඩම්ට අයින්ස්ටයිටත් වඩා හොඳ මතකයක් තිබ්බා ඒ අය ගැන.
තෑගි ගේනාපු ලමයි තමන්ගේ රිබන් වලින් සරසපු තෑගි පෙට්ටි මැඩම්ට ප්‍රදානය කරා. මැඩමුත් මේ දුක් සීන් එක වැහෙන්නත් එක්ක දෙන දෙන තෑගි පෙට්ටියේ තියෙන්නේ මොනවද කියලා අනුමානෙන් ඒ දෙන ලමයින්ට කිව්වා. බේකරියක් අයිති සුමතිගෙ දුව පෙට්ටිය දෙනකොට කිව්වා ‘කේක් එකක් නේ?’ කියලා. අනේ කෙල්ලට පුදුම සන්තෝසයක් මැඩම් හරියටම කිව්ව එක ගැන. හෑන්ඩ් බෑග් විකුණන ස්වර්ණලාතාගේ දුව තෑග්ග දෙනකොට ඒ පෙට්ටිය අතට අරන් හොලවලා එහෙම මැඩම් කිව්වා ‘හෑන්ඩ් බෑග් එකක් නේ?’ කියලා. කෙල්ලට පුදුමෙනුත් පුදුමයි මැඩම්ගේ ගෙස් කිරිල්ල! සපත්තු කඩේ අයිති කරුණාසේනගෙ කොලූ තෑග්ග දෙනකොට කිව්වා ‘මට ලස්සන සෙරෙප්පු දෙකක් නේ’ කියලා ටක්කෙටම. කොල්ල කොර මැඩම්ගෙ මොලේ ගැන හිතලා! ඔය විදියට ඉතින් මැඩම් එන එන ලමයගේ පෙට්ටිය හොලවලා හරියටම වගේ කිව්වා තාත්ත අම්මා කරන රස්සාවල්, බිස්නස් ගැන හිතලා.
පන්තියේ පොහොසත්ම එකා මිනේශ්. උගේ තාත්තා ලන්කාවට පිට රටින් වයින් ගේන කෙනෙක්. ශානිකා මැඩම් හරිම ආසයි වයින් ගැන දන්නවා කියන්න. ඉතින් මැඩම් ඔය මිනේශ්ගේ ගෙදරින් වයින් ගෙන්නවා ගෙන ඒවයේ නම් එහෙම කට පාඩම් කර ගත්තා ඉස්සර ඉඳන්. අනේ අපරාදෙ කියන්න බෑ මිනීශ්ගේ තාත්තත් නොවරදා වයින් අරිනවා ශානිකා මැඩම්ට. ෆ්‍රෙන්ච් වයින්, ඔස්ට්‍රේලියන්, චිලී, සවුත් ඇෆ්‍රිකන් වගේ හැම ජාතියක්ම මැඩමුත් දන්නවා. මැඩම්ට ඔය වයින් දැනුම ලොකු ආඩම්බරයක්.
ඉතින් ඕන් මිනේශ් ගෙනාවා එයාගේ තෑගි පෙට්ටිය. මැඩම්ගේ කට කනේ. ඇයි ඉතින් ලොකු පෙට්ටියක්. මැඩම් දන්නවා මොනවද ඒ කියලා. මැඩම් ඒ කාඩ් බෝඩ් පෙට්ටිය අත් දෙකින්ම ගද්දී දැන ගත්තා වෙලා තියන හදිය! මේ ලමයගේ දාන්ගලේ. අපරාදෙ’ මැඩම් තමන්ටම කියා ගත්තා. පෙට්ටිය යට තෙත් වෙලා වයින් වලින්. ඒ කියන්නේ එක බෝතලයක් කැඩිලා. අනේ අපරාදේ. හොඳම ඒවා එවන්නේ මිස්ටර් ගුණසේකර මට. ශානිකා හිතුවා. එයා තමන්ගේ සුමුදු මැදැඟිල්ලෙන් ඒ තෙත් වුනු පෙට්ටියේ වයින් ගාව ගෙන දිවේ ගාගෙන රස බැලුවා. මැඩම් වයින් එක්ස්පර්ට්. කොල්ලත් ඉතින් තමන්ගෙ තාත්තා වයින් ගේන හින්ඳා වයින් ගැන ටිකක් දන්නවා. ඉතින් මැඩම් පොඩ්ඩක් රස බලලා කිව්වා ‘මේකෙ බ්‍රෑන්ඩ් එක මට හරියටම කියන්න බෑ පුතා ඒත් මේ ෆ්‍රෙන්ච් වයින් එකක්’ කියලා. ‘නෑ මැඩම්’ කිව්වා කොල්ලා මැඩම්ව පුදෙමට පත් කරමින්. මැඩම් ආයෙත් තමන්ගේ මැදැන්ඟිල්ල හොඳින් පෙට්ටියේ ලීක් වුනු වයින් වල අතුල්ලමින් නාහෙටත් අල්ලා දිවේ ගාගත්තා. හොඳින් තලු මරලා හිතල හිතලා කිව්වා ‘මේක මේ නිව් වර්ල්ඩ් වයින් එකක්. ඔස්ට්‍රේලියන් නේද?’ කියලා. ‘නෑ මැඩම්’ කිව්වා කොල්ලා. ඔන්න ඉතින් ඔය විදියට ඇමරිකන්, ඇෆ්‍රිකන්, ඒශියන් වගේ හැම ජාතියකම වයින් ගැන කිව්වත් කොල්ලා නෑම කියනවා. කොල්ල දැන් දැන් ටිකක් හිනාවකුත් වෙනවා. මැඩම් පරාදයි. දන්න ඔක්කොම වයින් ජාති කිව්වනේ. ‘මන් දන් නෑ පුතා. මොන වයින්ද මේ?’ ඇහුවා. ‘අනේ වයින් නෙවෙයි මැඩම්. මැඩම් බලු පැටවුන්ට ආසයි කියලා අම්මා බලු පැටියෙක් එව්වේ’ කියපි කොල්ලා! මැඩම් තමන්ගේ සුමුදු මැදැඟිල්ල දිහා බලන් හිටියා. දවසේ පලවෙනි පාරට ලමයින්ට හිනාවක් ගියා.
උපුටා ගැනීම: Susantha Pethiyagoda