විවාහ වූ අළුත හා හා පුරා කියා වෙනම නිවසක පදිංචියට ගිය පසු මම ආසාවෙන්ම කරපු දේ තමයි විවිධ කෑම වර්ග අත්හදා බැලීම.සමහර කෑම වර්ග වලට නමක් තිබුනත් සමහර කෑම වර්ග නමක් දාන්න වුන අවස්ථාවන්ද ඕනෑ තරම්.මේ මොන කෑම වර්ගයක් උනත් ගිලදැමීමට හැකි අපූරු හැකියාවක් අපේ ගෙදර උන්දෑ ට තිබූ බව කිව යුතුමය.
දවසක් රෑට ඉස්සන් හොද්දක් කෑමට සිතක් පහල වූයේ අපේ ගෙදර උන්දෑ ටමය.ඉතින් හවස් වරුවේ ටවුමට ගොස් ඉවීමට අවශ්‍ය කළමනා රැස් කරමින් සිටින අතර මාළු කඩ කීපයකටම ගොඩවුණේ ඉස්සන් මිලදී ගැනීමටය.අහෝ..ඒ හැම කඩයකම සිටියේ සුදු පාට ඉස්සන් ය.මට අවශ්‍ය වූයේ තැඹිලි පාටින් දිලිසෙන ලස්සන ඉස්සන් ය.කඩවල් වලින් බඩු මිලදී ගැනීම ට යාම හා බඩු තේරීම මගේ මතයට අනුව සිදුවන්නක් බැවින් අපේ ගෙදර උන්දෑ ගේ කාර‌්‍ය වූයේ ප්‍රවාහන පහසුකම් සැපයීම හා මා පැමිනෙන තෙක් සීට් එකත් පහත් කරගෙන වාහනයට වී නිදාගැනීමත්ය.
නැවත පැමිණි මා මේ කඩවල තැඹිලි පාට ඉස්සො නෑනෙ අනේ,තවටිකක් බලමු දැයි ඇසූවිට උන්දෑ ගත් කටටම තව මාළු කඩ තියෙනවා.ඒවගේ වත් බලමු යැයි පැවසූයේ උන්දෑ ගේ සාමන්‍ය දැනුමද ඉස්තරම් තත්වයක පැවති හෙයිනි.
තුන් වන මාළු කඩයටත් ගොඩවූ පසු මේ පැත්තේ තැඹිළි පාට ඉස්සන් විකිණීම ට නැත්දැයි මුදලාලිගෙන් අසූවේ බැරිම තැනය.
අමුවද ඕන වේලපුවදැයි ඔහු සාමාන්‍ය ලෙස ඇසූ අතර අමුවා යැයි මමද සාමාන්‍ය ලෙසටම පැවසීමි.අසාමාන්‍ය ලෙස බලා කට කොනින් සිනහවුනු හෙතෙම නෝනා ඒව කලපු ඉස්සො.මේවා මුහුදු ඉස්සො ,මෙහේ තියෙන්නෙ මුහුදු ඉස්සො විතරයි යැයි පැවසීය.
නැති ඉස්සන් කොහෙන් හොයන්න ද?දෙන්නකෝ එහෙනම් ඕකෙන් වත්..
ගෙදර ගිහින් පොතේ හැටියට ඉස්සො කරිය හදන්න තෙලට දාපු ඉස්සො ටික,තව ටික වෙලාවක් යනවිට තැඹිලි පැහැයට හැරෙමින් පැවති බවක් පෙනෙන්නට විය.පොතේ හැටියට කිරිත් මුරුංගා කොළත් දමා හැදූ මුහුදු ඉස්සන් කරිය ක්‍රමයෙන් කලපු ඉස්සන් කරියකට පරිවර්තනය වෙමින් පැවතිනි.
මට දැන් සතුටුය.ඉස්සන් තැඹිලි පාට වී ඇත.
ඒ වෙලාවෙ සිහි නොවූවත් මාළු මුදලාලිගේ කින්ඩි හිනාවට හේතුව තේරුනේ පසුවය.
උපුටා ගැනීම: Prabha Hitinayake