එක අම්මෙක්ට බබෙක් ඉපදුනා..
ඒ බබා ඉපදෙද්දිම කොණ්ඩෙ තිබුනෙ නෑ.. අම්මා හිතුවා ඒක සාමාන්‍ය දෙයක් කියලා…
ඒත් ඒක එහෙම උනෙ නෑ.. බබාට අවුරුද්දක් යනකලුත් කොණ්ඩෙ වැවුනෙ නෑ…
අම්මා ඒත් හිතුවා කල් යද්දි බබාට කොණ්ඩෙ වැවෙයි කියලා..
ඒත් බබා පාසල් යන වයස එනකන්ම බබාගෙ ඔලුවෙ එක කෙස් ගහක්වත් වැවුනෙ නෑ….
අනික් ළමයි එක්ක බලද්දි තමන්ගෙ ළමයව කැපිලා පෙනෙයි කියලා එයාගෙ අම්මා බය වුනා..
ළමයි හැමෝගෙම විහිළුවට ලක් වෙයි කියලා හිතුවා…
ඒ නිසාම අම්මා හැමවෙලේම බබාට තොප්පියක් පළදවන්න පුරුදු වෙලා හිටියා..
ඉතින් බබාගෙ පාසල් වයස ආව නිසා එයාගෙ අම්මා එයාව පාසලට ඇතුලත් කරා..
අම්මා තමන්ගෙ පුතාට කතා කරලා මෙහෙම කිව්වා…
” මගෙ පුතේ… මේ තොප්පිය ඔයා හැමවෙලේම පැළදගෙන ඉන්න මතක තියාගන්න ඕන…
ඔයාගෙ කොණ්ඩෙ නැති ඔළුව කාටවත් දකින්න නොදී…
ඔයාට තේරුනාද…?”
අම්මා ළමයට එහෙම කියලා පාසලට එක්කන් ගියා..
පාසල ආරම්භ උනෙ සීත කාලෙ නිසා පුංචි පිරිමි ළමයට ඒක එතරම් අපහසුවක් උනෙ නෑ.. මොකද හැම ළමයෙක්ම වගෙ ලොකු කබා හා තොප්පි පැළදගෙන හිටියා…
ඒත් සීත කාලෙ ඉවර වෙලා ගියා උනත් මෙ පිරිමි ළමයා තොප්පිය හැමවෙලේම පැළදගෙන හිටියා..ග්‍රීස්ම කාලෙදි පවා…
මේක හැම ළමයෙක්ටම ප්‍රශ්නයක් වුනා..
” ඇයි ඔයා හැමවෙලේම තොප්පියක් දාගෙන ඉන්නෙ…”
” දැන් සීත කාලෙ ඉවරයිනෙ.. “
“ඔයාට අමාරු නැද්ද.. ඔහොම ඉන්න…”
පිරිමි ළමයගෙ පංතියෙ ළමයි හැමෝම එයා ගැන විශේෂ අවධානෙකින් පිරිමි ළමයගෙන් එක එක ප්‍රශ්න ඇහුවා…
ඔහු බය උනා..
අම්මා කියපු විදියට තමා තොප්පිය ගලවලා තමන්ගෙ තට්ට හිස දැක්කොත් ළමයි ඔහුට විහිළු කරයි කියලා හිතුවා…
ඔහු ඒ නිසා යාළුවන්ගෙන් ඈත් වෙලා තනියම පන්තියෙ මුල්ලකට වෙලා හිටියා..
අනිත් ළමයි එක්ක කතා කරන්න පවා ඔහු අකමැති උනෙ තමාගෙ තොප්පිය පිළිබඳව ඔවුන් ඔහුගෙන් ප්‍රශ්න කරන නිසා..
ඒත් හැම ළමයෙක්ටම මේ පිරිමි ළමයා ගැන කුතුහලයක් ඇති උනා..
ඒ හින්දම දවසක් ළමයි ඔක්කොම එකතුවෙලා බලෙන්ම පිරිමි ළමයගෙ තොප්පිය ගැලෙව්වා…
හැමෝම තමන්ගෙ තට්ට හිස දැක්කා කියලා පිරිමි ළමයට තේරුනා..
හැමෝම ඔහු දිහා බලලා හිනා උනා…
” තට්ට ළමයා… තට්ට ළමයා…”
හැමෝම ඔහුට විහිලු කරා…
ඔහු බය උනා… පන්තියෙ මුල්ලක හැංගිලා තනියම ඇඩුවා….
පාසල් ඉවරවෙලා ළමයි හැමෝම ගියත් පිරිමි ළමයා පංතියෙ මුල්ලෙ හැංගිලා අඩමින් හිටියා..
ඔහුට අනෙක් ළමයින්ට මුහුණ දෙන්න ලැජ්ජාවක් දැනුනා…
තමාට නැවත විහිලු කරාවි යැයි බය හිතුනා…
ඔහු ඉකි ගසමින් ඇඩුවා…
පන්තිය අසළින් යමින් ඉදපු ගුරුතුමියට ඔහුගෙ හැඩුම ඇහුනා..
ඇය ඔහු ළගට ආවා…
වෙලා තිබුන දේ දැනගන්න ගුරුතුමීට එච්චර වෙලාවක් ගියෙ නෑ…
ඒත් ගුරුතුමී පිරිමි ළමයගෙන් මෙහෙම ඇහුවා..
” ඔයා අඩන්නෙ ඔයාට ළමයි විහිළු කරපු නිසාද නැත්තන් ඔයාට තට්ට හිසක් තියන නිසාද “..
කියලා…
ළමයා මොහොතකට ඇඩුම නවත්තලා කල්පනා කරා…
ඒත් ඔහුට උත්තරක් හොයාගන්න වෙලා ගියා..
ඒත් ඔහු ටිකක් වෙලා ගිහින් ගුරුතුමීට මෙහෙම කිව්වා..
” මට තට්ට ඔළුවක් තියන නිසා….
මම වෛර කරනව ඒකට…”
ඔහු අඩමින්ම පිළිතුරු දුන්නා…
ගුරුතුමී හිනාවෙලා මෙහෙම ඇහුවා
” ඔයාගෙ කෙස් නැති ඔළුව ඔයාට මීට කලින් කරදරයක් වෙලා තියනවද…? “
” නෑ… එතකොට කවුරුත් දැනන් හිටියෙ නෑනෙ මම තට්ට ළමයෙක් කියලා…”
ළමය උත්තර දුන්නා…
” ඉතින් ඒ කියන්නෙ ඔයාගෙ ප්‍රශ්නෙ ඔයාගෙ තට්ට ඔළුව ගැන අනික් අය දැනගත්තු එක නේද…?”
ගුරුතුමී ආපහු ඇහුවා..
” ඔව් ඒක තමයි…”
ළමය කිව්වා…
ඊට පස්සෙ ගුරුතුමී ඔහුට ලංවෙල රහසක් කිව්වා…
ඔහුගෙ තට්ටය ගැන අහන හැම කෙනෙක්ටම ඒක කියන්න කියලා කිව්වා..
ඔහු ඇඩුම නතර කරලා සතුටින් හිනාවුනා…
ඔහු හිනාවෙල ගුරුතුමීට ස්තූති කරා…කරදරකාරී තොප්පිය හිසින් ගලවලා පැතතකට දැම්මා .
ගුරුතුමී කියපු වචන හොදින් හිතට අරන් සතුටින් පන්තියෙන් එළියට ආවා..
පාසලෙන් එළියට එද්දිම ඔහුට උසුළු විසුලු කරපු ඔහුගෙ පාසලේ මිතුරෙක් පිරිමි ළමයට හම්බුනා..
” ඇයි ඔයාට තට්ටයක් තියෙන්නේ ..
ඔයාට ඇයි අපිට වගේ කොණ්ඩෙ වැවෙන්නෙ නැත්තෙ….”
ඔහු තවත් ළමුන් කිහිප දෙනෙක් සමගම සිනාසෙමින් පිරිමි ළමයට විහිළු කලා..
” ඒ මම ඔයාලට වඩා විශේෂ නිසා…”
පිරිමි ළමයා තමන්ට විහිලු කරපු ළමයින්ට ඒ වචන ටික කියලා එතනින් යන්න ගියා..
ඔහුට එතනින් පස්සෙ විහිලු කරපු හෑම කෙනෙක්ටම ඔහු එහෙම කිව්වා…
නැවත ඔහු කිසිදාක තමන්ගෙ තට්ට හිස සගවගත්තෙ නෑ…
ටික කාලයක් යද්දි ඔහුගෙ තට්ට හිස නිතරම දකිද්දි අනික් අයගෙ විහිලු නිකන්ම නැවතුවා.. හැමෝටම නිතර දෙවෙලෙ දකින ඔහුගෙ කෙස් නැති හිස සාමාන්‍යය දෙයක් වුනා..
ඉතින් පිරිමි ළමයට එදා තමන් මුල්ලකට වෙලා අඩද්දි ගුරුතුමී කියපු දේ මතක් උනා…
” අනික් අය ඔයාට විහිලු කරන්නෙ ඔයා එයාලට වඩා වෙනස් නිසා..
ඔයා එයාල අතරින් විශේෂ නිසා…
ඔයාගෙ කෙස් නැති හිස හැමෝටම විහිලුවක් වගේ වෙන්නෙ තාම එයාලට ඔයාගෙ වෙනස අලුත් නිසා…
හැංගෙන්න ඕන මුල්ලකට වෙලා අඩන්න ඕන වැරදි කරපු මිනිස්සු මිසක් අනික් අයට වඩා වෙනස් වුන විශේෂ වුන මිනිස්සු නෙවෙයි .
ඒ වෙනස කැපී පේනකොට මුලින් ඒ වෙනසට හිනාවෙන මිනිස්සුම..
දවසක ඒ වෙනසක ගරු කරාවි… ඒ වෙනස ඔයාගෙ ශක්තියක් විදියට ඔයාගෙ ජීවිතයට එකතු කරගෙන ඔබේ ජීවිතය දිනාගත්තාම….
ඒ නිසා ඔයා ඔයාට විහිලු කරන ඔයාගෙ තට්ට ඔලුව ගැන අහන හැමෝටම මෙහෙම කියන්න…
ඒ මම ඔයාලට වඩා විශේෂ නිසා…. “
නිමි..
උපුටා ගැනීම: නිපුනිකා ගුණවර්ධන